Nyun Memre gi a Tiri Skin

SATRA 2 oktober 1999, na Alayari Konmakandra fu a Watch Tower Bible and Tract Society of Pennsylvania ben tapu nanga wan sani di den ben meki bekènti èn di ben fruwondru sma. Den 10.594 sma di ben fisiti a konmakandra noso di ben arki nanga yepi fu telefon, ben breiti srefisrefi fu yere taki den ben poti fo nyun memre ete na ini a Tiri Skin fu den Kotoigi fu Yehovah. Ala den nyun memre na salfu Kresten, èn den na Samuel F. Herd; M. Stephen Lett; Guy H. Pierce; nanga David H. Splane.

• Samuel Herd ben bigin nanga a pionierwroko na ini 1958, èn na ini den yari 1965 te go miti 1997 a ben de na ini a kringwroko nanga a distriktwroko. Baka dati, en nanga en wefi, Gloria, tron memre fu a Bethelfamiri na ini Amerkankondre, pe Brada Herd wroko na ini a Dienstafdeling. A ben dini so srefi leki wan yepiman gi a Dienstkomte.

• Stephen Lett ben bigin nanga a pionierwroko na ini december 1966, èn na ini den yari 1967 te go miti 1971 a ben dini na Bethel na ini Amerkankondre. Na ini oktober 1971 a trow en wefi Susan, èn a ben go na ini a spesrutu pionierwroko. Fu 1979 te go miti 1998, a ben dini leki kringopziener. Fu sensi april 1998, en nanga Susan tron memre fu a Bethelfamiri na ini Amerkankondre. Drape a wroko na ini a Dienstafdeling èn ben de wan yepiman gi na Onderwijskomte.

• Guy Pierce ben kweki wan osofamiri èn baka dati en nanga en wefi ben bigin nanga a pionierwroko na ini april 1982. A ben dini leki kringopziener na ini den yari 1986 te go miti 1997, di en nanga en wefi Penny ben tron memre fu a Bethelfamiri na ini Amerkankondre. Brada Pierce ben e dini leki wan yepiman na a Personeelkomte.

• David Splane ben bigin nanga a pionierwroko na ini september 1963. Leki wan sma di pasa a di fu 42 klas fu Gilead nanga bun bakapisi, a ben dini leki zendeling na ini Senegal, Afrika, èn baka dati a ben de 19 yari na ini a kringwroko na ini Kanada. En nanga en wefi, Linda, dini na Bethel na ini Amerkankondre fu sensi 1990, pe Brada Splane wroko na a Dienstafdeling nanga a Skrifi-afdeling. Fu sensi 1998, a ben de wan yepiman gi a Skrifikomte.

Boiti den fo nyun memre, a Tiri Skin abi so srefi C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, nanga D. Sydlik. Wi alamala e begi taki Yehovah sa tan blesi èn tranga a Tiri Skin di kon moro bigi now, ala di a Tiri Skin e go doro fu tiri den wroko fu Gado pipel na heri grontapu èn e sorgu gi den sani di den abi fanowdu na yeye fasi.