A Frufolguman E Si wan Bigi Leti

SAULUS ben kuku fu na atibron di a ben atibron srefisrefi nanga den bakaman fu Yesus. A no ben de tevrede nanga a frufolgu di a ben frufolgu den kaba na ini Yerusalem, so srefi a ston di den ben ston Stefanus kiri, èn dati meki a ben wani pruberi now fu kwinsi den bakaman fu Yesus moro hebi. „Saulus, di ben de wan kefar ete gi den disipel fu Masra fu di a ben wani kiri den, ben go na a granpriester èn ben aksi en fu gi en brifi gi den snoga na ini Damaskus, so taki a ben kan tai ala sma di a ben feni èn di ben de fu A Pasi, mansma nanga umasma, èn tyari den kon na Yerusalem.”—Tori fu den Apostel 9:1, 2.

Di Saulus ben waka go na Damaskus, dan a musu ben denki dipi fa a ben sa man du a komando di a ben kisi na a moro bun fasi. A no abi misi taki den fesiman fu a bigi Dyu libimakandra na ini a foto dati, ben o wroko makandra nanga en, fu di a ben kisi primisi fu a granpriester. Saulus ben o suku yepi na den.

A musu de so, taki Saulus ben prisiri moro di a ben doro a presi pe a ben musu de. A reis di a ben reis fu Jerusalem go te na Damaskus — te wan sma ben waka en, dan a ben teki so wan seibi noso aiti dei, dati wani taki 220 kilometer — ben hebi srefisrefi. Wantronso na mindridei, wan faya ben koti di ben krin moro son. A ben skèin lontu Saulus, èn Saulus ben fadon na gron. A ben yere wan sten e taki nanga en na ini Hebrewtongo: „Saulus, Saulus, fu san ede yu e frufolgu mi? Fu tan skopu teige den srapu penti e meki en tranga gi yu.” „Suma na yu, Masra?”, na so Saulus ben aksi. A ben piki: „Mi na Yesus, a sma di yu e frufolgu.” „Ma opo, go tanapu tapu yu futu. Bika fu a sani disi ede mi meki yu ai ben kan si mi, so taki mi kan teki yu na mindri trawan fu yu kan tron wan futuboi èn wan kotoigi so bun fu sani di yu si èn fu sani di abi fu du nanga mi èn di mi sa meki yu si ete; ala di mi e fri yu fu a pipel disi èn fu den nâsi, di mi e seni yu na den.” „San mi sa du, Masra?”, na so Saulus ben aksi. „Opo, èn go na Damaskus, èn drape den sa fruteri yu ala sani di yu musu du.”—Tori fu den Apostel 9:3-6; 22:6-10; 26:13-17.

Den wan di ben reis makandra nanga Saulus ben  yere wan sten, ma den no ben si a sma di ben taki noso den no ben frustan san a sma ben taki. Fu di a leti ben de so krin, dan Saulus no ben man si di a ben opo tanapu, èn den ben musu tyari en na en anu. „Dri dei langa a no ben man si no wan sani, èn a no ben nyan noso dringi.”—Tori fu den Apostel 9:7-9; 22:11.

Dri Dei fu Denki Dipi

Yudas, di ben libi na ini wan strati di den ben kari Reti, ben ontfanga Saulus bun (Tori fu den Apostel 9:11). * A strati disi — di den ben kari Darb al-Mustaqim na ini Arabiatongo — de wan fu den moro prenspari strati na ini Damaskus te now ete. Prakseri san Saulus ben musu denki di a ben de na ini na oso fu Yudas. A sani di ben pasa nanga Saulus ben meki taki a no ben man si moro èn a ben skreki srefisrefi. Now a ben abi ten fu denki dipi fu san den sani disi ben wani taki.

A frufolguman ben kisi fu du nanga a sani di a ben denki taki a ben de wan law sani. Masra Yesus Krestes, di den ben anga na wan postu — di a moro hei Dyu tirimakti ben krutu èn di ’sma ben wisiwasi èn ben wai pasi gi en’ — ben de na libi. ¡We, Gado ben feni Yesus bun srefi èn a ben tanapu na a reti anu fu En, na ini wan „leti pe no wan sma no kan pasa go na ini”! ¡Yesus trutru ben de a Mesias! Stefanus nanga den trawan ben abi leti (Yesaya 53:3; Tori fu den Apostel 7:56; 1 Timoteus 6:16). ¡Saulus ben fowtu srefisrefi, fu di Yesus ben sori taki a ben de na a sei fu yoisti den wan di Saulus ben frufolgu! Fa Saulus ben kan „tan skopu teige den srapu penti” now di a ben abi buweisi? Srefi wan tranga-ede mankaw den kan pusu te fu kaba fu go na a presi pe na eiginari fu a mankaw wani taki a musu go. Fu dati ede, efu Saulus ben weigri fu du san Yesus ben gi en deki-ati fu du, dan a ben sa hati ensrefi.

Fu di Yesus ben de a Mesias, dan a no ben kan, taki Gado ben krutu en. Toku Yehovah ben gi pasi meki Yesus dede a moro syen dede èn fu kon na ondro a strafu fu a Wet: „Gado fluku a sma di den e anga” (Deuteronomium 21:23). Yesus dede ala di a ben anga na a pina-udu. Den ben fluku en, no fu di a ben sondu, fu di a no ben abi sondu, ma fu a sondufasi fu a libisma famiri ede. Saulus ben fruklari baka ten: „Ala den sma di e frutrow na tapu den wroko fu wet, de na ondro wan fluku; fu di a skrifi: ’Frufruktu fu ibriwan sma di no tan na ini ala den sani di skrifi na ini a lolo fu a Wet so taki a e du den.’ Boiti dati, a de krin taki nanga yepi fu a wet den no e fruklari no wan sma regtfardiki na Gado . . . Krestes ben bai wi fu a fluku fu a Wet fu di en tron wan fluku na ini a presi fu wi, bika a skrifi: ’Frufruktu fu iniwan sma de di den anga na wan postu.’”—Galasiasma 3:10-13.

A srakti-ofrandi fu Yesus ben man frulusu sma. Fu di Yehovah ben teki a srakti-ofrandi dati, dan na wan agersi fasi, a ben spikri a Wet nanga a fluku fu a Wet, na a postu. Di Saulus ben kon frustan dati, dan a ben kan si a pina-udu di ben de „gi den Dyu wan sani fu naki futu fadon”, leki a „koni fu Gado” (1 Korentesma 1:18-25; Kolosesma 2:14). So bun, efu wan sma no ben kan kisi frulusu nanga den wroko fu a wet, ma nanga yepi fu a sori di Gado e sori en no-frudini bun-ati na sondu sma leki Saulus srefi, dan sma di no ben de na ondro a Wet ben sa kan kisi frulusu tu. Èn a ben de na den Heiden pe Yesus ben seni Saulus go.—Efeisesma 3:3-7.

Wi no sabi omeni fu den sani disi Saulus ben frustan na a ten di a kenki a bribi fu en. Yesus ben o taki nanga en ete wan leisi, kande moro leki wán leisi, fu a wroko di a ben abi fu go du na den nâsi. Boiti dati, furu yari ben pasa bifo Saulus ben skrifi poti ala den sani disi na buku nanga yepi fu Gado en santa yeye (Tori fu den Apostel 22:17-21; Galasiasma 1:15-18; 2:1, 2). Ma wan tu dei pasa nomo di Saulus ben kisi fu yere fu a nyun Masra fu en san a ben musu du moro fara.

Ananias E Go na En

Baka di Yesus ben sori ensrefi na Saulus, dan a ben sori ensrefi na Ananias tu, èn a ben taigi en:  „Go na a strati di den e kari Reti, èn na a oso fu Yudas yu musu suku wan man di nen Saulus, fu Tarsus. Bika, ¡luku! a e begi, èn na ini wan fisyun a si wan man di nen Ananias kon na inisei, èn a poti en anu na en tapu, so taki a ben sa si baka.”—Tori fu den Apostel 9:11, 12.

Fu di Ananias ben sabi suma Saulus ben de, dan wi kan frustan fu san ede a ben fruwondru fu den wortu fu Yesus. A ben taki: „Masra, furu sma fruteri mi fu a man disi, fa a ben du furu takru sani nanga den santawan fu yu na ini Yerusalem. Èn dyaso a kisi primisi fu den granpriester fu poti ala den wan di e kari yu nen, na ini bui.” Ma Yesus ben taigi Ananias: „Go, bika a man disi na wan prapi di mi frukisi, fu tyari mi nen go na den nâsi, so srefi na den kownu nanga den manpikin fu Israèl.”—Tori fu den Apostel 9:13-15.

Fu di a ben kisi a deki-ati disi, dan Ananias ben go na a presi di Yesus ben sori en. Di a ben feni Saulus, èn a ben bari en odi, dan Ananias ben poti en anu na en tapu. „Èn wantronso”, na so a tori e taki, „sani di ben gersi fisibuba ben fadon komopo fu den ai fu [Saulus], èn a ben man si baka.” Now Saulus ben de klariklari fu arki. Den wortu fu Ananias ben buweisi taki a sani di Saulus ben frustan kande fu den wortu fu Yesus, ben de tru: „A Gado fu wi fositen tata teki yu fu kon sabi a wani fu en èn fu si a Regtfardikiwan èn fu yere a sten fu en mofo, fu di yu musu de wan kotoigi gi en na fesi fu ala sma fu fruteri den sani di yu si èn di yu yere. ¿Èn now, fu san ede yu e draidrai? Opo, teki dopu èn wasi yu sondu puru, fu di yu e kari en nen.” San ben de a bakapisi? Saulus „ben opo èn ben dopu, èn a ben teki nyanyan èn kisi krakti baka”.—Tori fu den Apostel 9:17-19; 22:12-16.

Baka di Ananias du a wroko di a ben kisi fu du, dan a no ben de fu feni moro na ini a Bijbel tori, èn Bijbel no e taki noti moro fu en. ¡Ma ala sma di ben yere fa Saulus ben taki, ben fruwondru! A sma di ben de wan frufolguman fosi, di ben kon na Damaskus fu tyari den disipel fu Yesus go sroto, ben bigin preiki na ini den snoga èn a ben bigin buweisi taki Yesus ben de a Krestes.—Tori fu den Apostel 9:20-22.

„Wan Apostel fu den Nâsi”

A sani di miti Saulus na tapu a pasi na Damaskus, ben overtoigi en na wan krakti fasi fu stop nanga a frufolgu di a ben frufolgu den Kresten. Fu di Saulus ben sabi suma a Mesias ben de, dan a ben kan si taki den furu prakseri nanga profeititori na ini den Hebrew Buku fu Bijbel abi fu du nanga Yesus. Fu di Saulus ben frustan taki Yesus ben sori ensrefi na en èn ’ben grabu hori en’ èn ben gi en a wroko leki „wan apostel fu den nâsi”, dan dati ben abi furu krakti na tapu a libi fu Saulus (Filipisma 3:12; Romesma 11:13). Now leki na apostel Paulus, a ben abi wan grani èn wan makti di no ben sa abi krakti nomo na tapu a tra pisi fu en libi na grontapu, ma so srefi na tapu a fasi fa a Kresten historia ben sa waka.

Yari baka dati, di wan kesekese ben kon fu a de di Paulus ben de wan apostel, dan a ben buweisi fa a ben kan abi a makti di a ben abi, fu di a ben sori go na a sani di ben pasa nanga en na tapu a pasi na Damaskus. „¿Mi no de wan apostel? ¿Mi no ben si Yesus, wi Masra?”, na so a ben aksi. Èn baka di Saulus (Paulus) ben taki fa Yesus, di opo baka na dede, ben sori ensrefi na trawan, dan a ben taki: „Leki lastiwan fu alamala, a ben sori ensrefi na mi tu di de leki wan sma di gebore tumusi fruku” (1 Korentesma 9:1; 15:8). Fu di Saulus ben si a fisyun fu Yesus na ini en hemel glori, dan a ben de neleki Saulus ben kisi a grani fu kon gebore, noso fu kisi wan opobaka na yeye libi fosi a ten ben doro.

Saulus ben erken a grani di a ben kisi èn a ben du furu muiti fu libi akruderi a grani dati. „Mi na a moro mendriwan fu den apostel, èn mi no warti fu den kari mi wan apostel, fu di mi ben frufolgu a gemeente fu Gado”, na so a ben skrifi. „Ma . . . a no-frudini bun-ati di [Gado] sori mi, no ben de fu soso, ma mi wroko moro furu leki [ala den tra apostel].”—1 Korentesma 15:9, 10.

Kande neleki Saulus, yu e memre a ten di yu ben kon frustan taki, efu yu wani kisi a bun-ati fu Gado, dan yu ben sa musu kenki a fasi fa yu ben si sani na relisi sei bun langa kaba. A no de fu taki dati yu ben de nanga tangi srefisrefi taki Yehovah ben yepi yu fu frustan a waarheid. Di Saulus ben si a leti èn a ben frustan san a ben musu du, dan a no ben draidrai fu du en. Èn a ben tan du en nanga faya èn nanga wan fasti bosroiti, te na a lasti pisi fu en libi na grontapu. ¡Dati de trutru wan tumusi bun eksempre gi ala den sma di wani a bun-ati fu Yehovah na ini a ten disi!

[Futuwortu]

[Prenki na tapu bladzijde 27]

A strati di den kari Reti na ini a disiten Damaskus

[Sma di abi a reti fu a prenki]

Fowtow fu ROLOC Atosigi ini Kloru