A Profeiti Wortu fu Gado E Gi Howpu gi  a Tamara

TANGI fu a Wortu fu Gado, a Santa Bijbel, meki tru Kresten e luku go na a tamara nanga bribi, nanga howpu, èn nanga a si di den e si a bun sei fu sani. Fu di a matifasi di den abi nanga Yehovah Gado e meki taki den e firi densrefi seiker, dan den e fruwakti fu si a tamara. Soleki fa a fosi lezing fu „A Profeiti Wortu fu Gado” Distrikt Kongres ben fruklari, dan Yehovah Kotoigi na fayafaya studenti fu Bijbel profeititori someni yari kaba. So bun, san Yehovah ben sreka gi en pipel na den kongres disi? Ala sma di ben drape ben de klariklari nanga den Bijbel na ini den anu, ala di den ben angri fu kon sabi san Yehovah ben sreka gi den. Den poti a thema gi ibri dei fu a kongres leki wan aparti ondro-edeprakseri.

A FOSI DEI: Waka na ini a Leti fu a Wortu fu Gado

A lezing „A Wortu fu Gado Tyari Wi” ben fruklari taki a pipel fu Yehovah de neleki wan man di e bigin teki waka na ini a dungru fu a neti. Te son e opo, dan a e si sani frafra, ma te a son e opo bun hei na loktu, dan a e si ala pikin sani krin. Soleki fa ben taki na fesi na ini Odo 4:18, dan a pipel fu Yehovah kon si a pasi fu den krin na ondro a brenki leti fu a waarheid fu a profeiti wortu fu Gado. A no libi den fu go naki futu fadon na ini dungru na yeye fasi.

A thema taki, „Poti Prakseri na a Profeiti Wortu fu Gado”, ben memre den arkiman taki den sma di e frutrow tapu Yehovah, no abi a firi taki a fruwakti fu den no e kon tru èn taki den lasi-ati, soleki fa a de nanga den sma di e waka na baka falsi mesias nanga falsi profeiti. ¡Heri tra fasi leki disi, bun furu buweisi de di e sori taki Yesus Krestes na a tru Mesias! Fu eksempre, Yesus transfigurâsi di ben de wan wondru, ben meki wi si pikinso na fesi kaba taki a o de a Kownu di Gado poti na tapu a kownusturu fu a Kownukondre fu Gado. Fu di Yesus ben kisi Kownukondre makti na ini 1914, meki en na a „deistari” tu di den kari na ini 2 Petrus 1:19. „Leki a Mesias Deistari, a e meki wan nyun dei, noso pisi ten bekènti, di e bigin gi ala sma di e gi yesi”, na so a takiman ben taki.

Na a bigin fu a bakadina programa, a lezing „Skèin Leki Tyariman fu Leti” ben taki finifini fu Efeisesma 5:8, pe na apostel Paulus e gi wi a rai fu „tan waka leki pikin fu leti”. Kresten na tyarisma fu leti, no soso fu di den e prati Gado Wortu nanga trawan nomo, ma fu di den e gebroiki Bijbel na ini a libi fu den soleki fa Yesus ben du.

Fu de so wan tyariman fu leti, dan wi musu „Abi Prisiri ini a Leisi fu a Wortu fu Gado”. Na ini wan symposium di ben de na ini dri pisi, den ben tyari a thema disi kon na krin. Baka di a fosi takiman ben taki san Abraham Lincoln ben taki, di ben kari Bijbel „a moro bun presenti di Gado oiti gi libisma”, dan a takiman ben aksi a publiki san a gwenti di den gwenti leisi ben tyari kon na krin fu a dipi warderi di den abi gi a Wortu fu Yehovah. Arkiman ben kisi deki-ati fu leisi Bijbel finifini, fu teki a ten fu si den tori fu Bijbel na ini den prakseri èn fu moksi den nyun sani nanga den sani di den leri kaba.

A tra pisi fu a symposium ben poti krakti na tapu a fanowdu di a de fanowdu fu studeri, fu no leisi wawan tron nomo, efu wi o teki „tranga nyanyan” na ini wi (Hebrewsma 5:13, 14). A takiman ben taki dati studie, yoisti e gi krakti, efu wi e ’sreka na ati fu wi’ na fesi neleki san na Israèl priester Esra ben du (Esra 7:10). Ma fu san ede studie prenspari so? Bika a abi langalanga fu du nanga a matifasi di wi abi nanga Yehovah srefi. Fu dati ede, a studie fu Bijbel musu de wan warti sani, a musu de wan prisiri sani, èn a musu gi wi nyun krakti baka, ala di a wani taki dati wi musu dwengi wisrefi na frustan sei èn dati wi musu du muiti fu dati. Fa wi kan feni a ten gi wan studie di warti wan sani? Efu wi e „bai a yoisti ten” fu sani di no prenspari so, na so a lasti takiman fu a symposium ben taki (Efeisesma 5:16). Iya, a sroto fu feni ten na fu gebroiki a ten di wi abi na a moro bun fasi.

A lezing „Gado E Gi Krakti na a Sma Di Weri” ben sori taki a de so taki someni sma weri na ini a ten disi. Fu kan abi „a krakti di e pasa san de normaal” fu du a Kresten diniwroko, dan wi musu frutrow tapu Yehovah, di „e gi den wan di weri krakti” (2 Korentesma 4:7; Yesaya 40:29). Den sani di e yepi wi fu kisi krakti, na a Wortu fu Gado, begi, a Kresten gemeente, a teki di wi e teki prati na a diniwroko doronomo, den Kresten opziener, nanga a getrow eksempre fu trawan. A thema „De Leriman Nanga a Ten na Prakseri” ben tyari kon na krin taki a de fanowdu taki Kresten na leriman èn so srefi preikiman èn taki den musu wroko tranga fu kon sabi a „koni fu gi sma leri”, bun.—2 Timoteus 4:2.

A lasti lezing fu a dei, „Den Sma Di E Feti Nanga Gado No Sa Wini”, ben taki fu muiti di sma na ini son kondre du no so langa pasa ete, fu kari Yehovah Kotoigi wan sekte di kan du sma ogri, disi fu di den sma ben abi wan fowtu fasi fu denki. Ma wi no abi fu frede, fu di Yesaya 54:17 e taki: „’No wan fetisani di den sa meki teige yu sa abi bun bakapisi, èn no wan tongo di sa opo teige yu na ini a krutu, yu sa krutu. Disi na a famirigudu fu den futuboi fu Yehovah, èn a regtfardikifasi fu den e kon fu mi’, na so den wortu fu Yehovah de.”

A DI FU TU DEI: Sani Di Ben Meki Bekènti Nanga Yepi fu den Profeiti Buku fu Bijbel

Baka di den taki fu a bijbeltekst fu a dei dati, den sma di ben kon makandra ben prisiri fu a di fu tu symposium fu a kongres, di ben nen „Gi Yehovah Glori Leki Tyariman fu Leti”. A fosi  lezing ben sori taki a marki fu wan Kresten na fu gi Yehovah glori fu di a e preiki na ala presi. A pisi fu a symposium di ben kon baka disi, ben taki dati a de fanowdu fu tyari den sma di e arki, kon na a organisâsi fu Gado. Fa? Efu wi e teki feifi noso tin miniti bifo noso baka ibri oso-bijbelstudie fu sori fa na organisâsi fu Gado e wroko. A di fu dri lezing fu a symposium disi ben poti krakti na tapu taki a de fanowdu fu gi Gado glori fu di wi e du bun wroko.

A lezing „Lobi den Frumane fu Yehovah Pasa Marki” ben taki fu den vers di teki puru fu Psalm 119. A no de fu taki, dati wi abi frumane fanowdu, fu di wi alamala kan frigiti sani. ¡Fu dati ede a de prenspari taki wi e leri fu lobi den frumane fu Yehovah, neleki san a psalm skrifiman ben du!

Dan wan heimarki ben de — a dopu lezing di ben nen „A Poti di wan Sma E Poti Prakseri na a Profeiti Wortu E Meki Taki A E Teki Dopu”. A lezing ben memre den sma di ben o teki dopu taki den e du a srefi sani di Krestes ben du fu di den no e teki dopu nomo, ma fu di den e waka na baka a fasi fa en ben waka tu (1 Petrus 2:21). ¡Disi na trutru wan bigi grani di den nyun wan disi abi taki den abi wan prati na a kontru fu Yohanes 10:16, pe Yesus ben taki na fesi dati a ben o tyari „tra skapu” kon makandra fu dini na a sei fu den disipel fu en di salfu nanga santa yeye!

Na a bigin fu a bakadina programa, a lezing „Yere San a Yeye Abi fu Taki” ben fruklari taki a yeye fu Yehovah e taki nanga wi nanga yepi fu Bijbel, nanga yepi fu „a getrow èn koni srafu”, èn nanga yepi fu wi konsensi di kisi leri fu Bijbel (Mateus 24:45). Fu dati ede, Kresten no abi fu yere wan trutru sten di komoto na hemel fu kan sabi fa den musu plisi Gado. A takimakandra di ben kon baka dati, èn di ben nen „Tanapu Kánkan gi Leri Di E Kruderi Nanga a Gi Di Sma E Gi Densrefi na ini a Dini fu Gado”, ben frumane Kresten fu no go ondrosuku den prakseri di e pori bun gwenti nanga wet èn di grontapu e panya. A tru, taki efu wi no man dwengi wisrefi fu kon sabi sani nomonomo, dan dati kan meki taki wi e kisi fu du nanga takru leri di ben kon fu den sma di fadon komoto na bribi èn fu tra yepiman fu Satan. ¡O moro betre a de fu abi a fasti gwenti fu leisi Bijbel èn so srefi ala den artikel na ini A Waktitoren nanga Ontwaakt!

A tra lezing di ben nen „Tan Hori a Model fu Gosontu Wortu”, ben poti krakti tapu o prenspari a de fu sabi a „model” noso a strukturu fu a waarheid na ini Bijbel (2 Timoteus 1:13). A frustan di wi e frustan a model disi na a sroto fu kon de wan sma di e gi ensrefi na ini a dini fu Gado, ma so srefi fu kan si san na den sani di no e kruderi nanga waarheid.

Prakseri pikinso taki Yehovah e si yu leki wan warti sani. ¡Dati na wan bigi grani trutru! A lezing „Den ’Warti Sani’ E Furu na Oso fu Yehovah” ben gi furu deki-ati bika a ben gi den arkiman a dyaranti taki ibri memre fu a „bigi ipi” warti trutru gi Yehovah (Openbaring 7:9). Fu dati ede, Yehovah sa kibri den te a sa „seki” den nâsi wan lasti leisi na ini a „bigi banawtu” di e kon (Hagai 2:7, 21, 22; Mateus 24:21). Ma na ini a pisi ten dati, a pipel fu Yehovah musu tan na ai na yeye fasi, soleki fa a lezing „Den Profeiti Buku fu Bijbel E Warskow Wi fu Tan Na Ai” ben fruklari. A takiman ben teki den wortu fu Yesus, taki: „Fu dati ede, tan na ai doronomo, bika unu no sabi sortu dei un Masra e kon” (Mateus 24:42). Fa wi e tan na ai na yeye fasi? Wi kan du dati efu wi tan abi furu fu du ini a diniwroko fu Yehovah, efu wi tan begi, èn efu wi tan fruwakti a bigi dei fu Yehovah.

A lasti lezing fu a dei ben nen „A Profeiti Wortu na ini a Ten fu a Kaba”. Wi sa memre dati na ini furu yari di de fu kon ete. Fu san ede? Bika a takiman ben meki bekènti taki wan nyun buku ben kon na doro — ¡Poti Prakseri na a Profeititori fu Danièl! „A buku disi di abi moi prenki èn di abi 320 bladzijde e taki fu ibri pisi fu a buku Danièl”, na so a takiman ben taki. ¡Taki Yehovah e skèin leti na tapu a profeiti Wortu fu en, na trutru wan buweisi di e tranga a bribi!

A DI FU DRI DEI: A Profeiti Wortu fu Gado Noiti E Tan Sondro fu A Kon Tru

A lasti dei fu a kongres ben bigin nanga a symposium „Profeiti Wortu gi a Fasti Ten”. Den dri pisi ben ondrosuku den dri fruklari di a profeiti Habakuk ben gi fu den krutustrafu fu  Yehovah. A fosiwan ben kon na tapu a tranga-ede Yuda èn a di fu tu ben kon na tapu Babilon di ben kwinsi sma. A lastiwan, di musu kon tru ete, abi fu du nanga a pori di Gado o pori ala den godelowsu sma dyonsrode. A lasti brada fu a symposium di ben taki fu Armagedon, ben gi den arkiman deki-ati fu abi wan gosontu frede gi Gado di a ben taki: „Fu tru, a sa meki sma kon frede te Yehovah e lusu ala krakti fu en bigi makti.”

„Abi Warderi gi a Yeye Gudu di Wi Kisi” ben de a nen fu a Bijbel drama di ben naki sma ati. A sani disi di den ben sori èn di e ondrosuku wi ati nanga wi konsensi, ben sori a difrenti na mindri a fasi fa Yakob ben si yeye sani èn a fasi fa Esau ben si en. Esau no ben warderi a yeye gudu fu en kwetikweti, èn fu dati ede Yakob ben kisi en. En ben kibri disi bun. „Sortu [yeye gudu] Yehovah gi wi?”, den ben aksi den sma di ben kon na a kongres. „A waarheid fu Bijbel, a Wortu fu en; a howpu fu kisi têgo libi; èn a grani di wi kisi fu teki presi gi en leki bariwrokoman fu a bun nyunsu”, na so a takiman ben piki.

A tra lezing ben nen „San a Warti Gudu Di Wi Kisi Wani Taki gi Yu?” Wi e sori taki wi e si a yeye gudu fu wi na a yoisti fasi, efu wi e meki a diniwroko fu Yehovah nanga den grani na yeye fasi de moro prenspari leki den sani di wisrefi wani noso leki materia gudu. Na so wan fasi wi e meki a matifasi di wi abi nanga Yehovah de a moro prenspari sani na ini wi libi, heri tra fasi leki san Adam, Esau, èn den Israèlsma di no ben de getrow, ben du.

A publiki taki „Meki Ala Sani Kon Nyun—Soleki fa Ben Taki na Fesi”, ben moksi fo prenspari profeititori, di ben abi fu du nanga den „nyun hemel” èn a „nyun grontapu”, kon na wán (Yesaya 65:17-25; 66:22-24; 2 Petrus 3:13; Openbaring 21:1, 3-5). A de krin, taki Yehovah ben abi wan moro bigi kontru fu den profeititori disi na prakseri, leki den wan di ben kon tru gi en pipel di ben kon bun baka na ini 537 b.G.T. Iya, a ben abi en Kownukondre tiri (den „nyun hemel”) na prakseri èn den sma na grontapu di ben o saka densrefi na ondro a tiri disi (a „nyun grontapu”) èn di ben o libi na ini wan tumusi moi paradijs na grontapu.

A lezing di ben nen „Den Fruwakti fu Wi ala di a Wortu fu Gado E Tyari Wi” ben tyari a kongres na wan bosroiti di ben seki sma èn di ben gi den deki-ati. A ben memre ala sma taki „a ten di tan abra” fu kaba a wroko fu meki a Kownukondre bekènti, „kon syatu” (1 Korentesma 7:29). Iya, wi e tanapu na a dromofo srefi fu a ten taki den sani sa kon tru di Yehovah bosroiti fu du nanga Satan èn nanga a heri godelowsu seti fu sani fu en. Meki wi abi den srefi firi leki di fu a psalm skrifiman di ben singi: „Wi eigi sili fruwakti Yehovah. En na wi yepiman nanga wi skelt” (Psalm 33:20). ¡Fa wan tumusi moi howpu e wakti den wan di a fruwakti fu den gron tapu a profeiti wortu fu Gado!

[Prenki na tapu bladzijde 7]

Wan krakti drama ben meki a warderi di den futuboi fu Yehovah abi gi a yeye gudu, kon moro bigi

[Prenki na tapu bladzijde 7]

Furu sma di ben poti prakseri na a profeiti wortu fu Gado ben teki dopu