Den „Warti Sani” E Furu na Oso fu Yehovah
Den „Warti Sani” E Furu na Oso fu Yehovah
„Mi [Yehovah] wani seki ala den nâsi, èn den warti sani fu ala den nâsi musu kon na ini; èn mi wani furu na oso disi nanga glori.”—HAGAI 2:7.
1. Fu san ede wi e prakseri den lobiwan fu wi fosi na ini ten pe bigi nowtu de?
SORTU warti sani de na ini yu oso? ¿Yu abi kefalek moi meubel, wan moro nyun computer, wan nyun wagi na ini yu garage? ¿Srefi efu yu abi ala den sani disi, yu no ben o agri taki den moro warti sani na ini yu oso na den sma — den memre fu yu osofamiri? Prakseri taki wan neti a smeri fu smoko e wiki yu. ¡Yu oso e bron, èn yu abi wan tu miniti nomo fu lowe! San na a fosi sani di yu o prakseri? ¿Yu meubel? ¿Yu computer? ¿Yu wagi? ¿Na presi fu dati, yu no ben o prakseri den lobiwan fu yu fosi? Seiker yu ben o prakseri den fosi, bika sma warti moro materia sani.
2. O furu sani Yehovah kria, èn sortu sani di A ben kria Yesus ben lobi moro furu?
2 Now, prakseri fu Yehovah Gado nanga en Manpikin, Yesus Krestes. Yehovah na „a Sma di ben meki hemel nanga grontapu nanga se nanga ala den sani di de na ini” (Tori fu den Apostel 4:24). En Manpikin, a „basi wrokoman”, ben de a wrokoman nanga suma Yehovah ben meki ala tra sani (Odo 8:30, 31; Yohanes 1:3; Kolosesma 1:15-17). Fu tru, Yehovah èn so srefi Yesus e warderi ala sani di den kria. (Teki gersi Genesis 1:31.) Ma sortu sani di den kria, yu denki taki den e warderi moro — den sani, noso sma? Leki a koni di prenki wan libisma srefi, Yesus e taki: „Den sani di mi ben abi waran firi gi den trutru, ben de den manpikin fu libisma”, noso leki fa William F. Beck en vertaling e taki en, Yesus ben „prisiri srefisrefi nanga libisma”.
3. Sortu profeititori Yehovah ben meki Hagai taki?
3 Tweifri no de taki Yehovah e si sma leki kefalek warti sani. Wan sani di e sori disi de fu feni na ini den profeiti wortu di a ben meki en profeiti Hagai taki na ini a yari 520 b.G.T. Yehovah ben fruklari: „Mi wani seki ala den nâsi, èn den warti sani fu ala den nâsi musu kon na ini; èn mi wani furu na oso disi nanga glori. . . . A glori fu a lasti oso disi sa kon moro bigi leki di fu a fosiwan.”—Hagai 2:7, 9.
4, 5. (a) Fu san ede a no ben o reidelek fu denki taki den wortu „warti sani” abi fu du nanga moimoi materia sani? (b) San yu ben kan taki de „warti sani”, èn fu san ede?
4 Sortu „warti sani” ben o furu na oso fu Yehovah èn ben o tyari moro glori kon leki oiti bifo? ¿Kefalek furu meubel nanga kefalek moimoi sani? ¿Gowtu, solfru, nanga diri ston? Disi no ben o de wan reidelek sani kwetikweti. ¡Prakseri taki a fosi tempel di na inwijding fu en ben de so wan feifi yarihondro na fesi, ben de wan oso fu milyardmilyard Amerkan dala! * ¡Fu tru, Yehovah no ben o fruwakti taki a pikin grupu Dyu di ben drai go baka na a kondre fu den, ben o bow wan tempel di ben o bigi èn moi moro leki a tempel fu Salomo!
5 Ma san na den „warti sani” di ben o furu na oso fu Yehovah? A de krin, den musu de sma. Boiti dati, den sani di e meki na ati fu Yehovah e prisiri a no solfru nanga gowtu, ma na sma di e dini en fu di den lobi en (Odo 27:11; 1 Korentesma 10:26). Iya, Yehovah e warderi ala den man, uma, nanga pikin-nengre di e anbegi en na wan fasi di a feni bun (Yohanes 4:23, 24). Den na „warti sani”, èn den warti srefisrefi gi Yehovah, moro leki ala den moimoi sani di ben moi a tempel fu Salomo.
6. San ben de a marki fu na owruten tempel fu Gado?
6 Ala di fayafaya gens ben de, toku a tempel ben kaba bow na ini 515 b.G.T. Te na a ten fu na ofrandi fu Yesus, a tempel na ini Yerusalem ben tan a mindribere fu a soifri anbegi gi furu „warti sani”, di ben de sma di gebore leki Dyu èn den Heiden proseliet. Ma a tempel ben prenki wan sani di moro bigi, soleki fa wi sa si.
Wan Kontru na ini a Fosi Yarihondro
7. (a) San na owruten tempel fu Gado na ini Yerusalem ben prenki? (b) Kari den sani di a granpriester ben du tapu a Verzoen Dei.
7 A tempel na ini Yerusalem ben prenki wan moro bigi seti fu anbegi. A de a yeye tempel fu Gado, di Yehovah seti na ini 29 G.T. nanga Yesus leki Granpriester (Hebrewsma 5:4-10; 9:11, 12). Luku wan sani di de a srefi na mindri den wroko fu a granpriester fu Israèl èn den sani di Yesus du. Ibri yari tapu a Verzoen Dei, a granpriester ben go na a altari na ini a fesi dyari fu a tempel èn ben òfer wan bulu fu verzoen den sondu fu den priester. Baka dati, a ben go na ini a tempel nanga a brudu fu a bulu, èn a ben pasa den doro di ben prati a fesi dyari fu a Santapresi èn dan a ben pasa a garden di ben prati a Santapresi fu a Moro Santapresi. Te a granpriester ben de na ini a Moro Santapresi kaba, dan a ben iti-iti a brudu na fesi na ark fu a frubontu. Dan, baka te a ben du den srefi sani, a ben òfer wan bokoboko fu verzoen den 12 lo fu Israèl di no de priester (Lefitikus 16:5-15). Fa den sani disi di a ben du abi fu du nanga a yeye tempel fu Gado?
8. (a) Na sortu fasi Yesus ben òfer na ini 29 G.T.? (b) Sortu spesrutu banti Yesus ben abi nanga Yehovah na ini a heri pisi ten fu en diniwroko na grontapu?
8 Fu taki en leti, Yesus ben òfer ensrefi na tapu na altari fu a wani fu Gado, di a ben dopu èn ben salfu nanga Gado en santa yeye na ini a yari 29 G.T. (Lukas 3:21, 22). Iya, a sani disi di pasa ben de a bigin fu wan ofrandi libi di Yesus ben libi, di ben tan dri nanga afu yari langa (Hebrewsma 10:5-10). Na ini a pisi ten dati, Yesus ben abi wan matifasi nanga Gado leki wan sma di gebore nanga yeye. Na aparti posisi disi di Yesus ben abi nanga en hemel Tata na wan sani di tra libisma no ben man frustan krinkrin. A ben de neleki wan garden ben tapu den ai fu a frustan fu den, neleki wan garden ben tapu a Santapresi meki sma di ben de na ini a fesi dyari fu a tabernakel no ben man luku go na ini.—Exodus 40:28.
9. Fu san ede Yesus no ben man go na ini hemel leki wan libisma, èn fa a situwâsi disi ben lusu?
9 Ala di a de wan Manpikin fu Gado di salfu nanga santa yeye, toku a libisma Yesus no ben man go libi na ini hemel. Fu san ede a no ben man du dati? Bika skin nanga brudu no man go na ini Gado en hemel Kownukondre (1 Korentesma 15:44, 50). Fu di a libisma skin fu Yesus ben de wan skotu gi en, meki a garden ben de wan bun simbôl fu en, fu di a garden e prati a Santapresi fu a Moro Santapresi na ini na owruten tempel fu Gado (Hebrewsma 10:20). Ma dri dei baka a dede fu Yesus, Gado ben opo en baka leki wan yeye (1 Petrus 3:18). Dan a ben kan go na ini a Moro Santapresi fu Gado en yeye tempel — na ini hemel srefi. Èn dati na soifri san ben pasa tu. Paulus e skrifi: „Krestes no ben go na ini wan santa presi di ben meki nanga anu, di de wan kopi fu a trutru sani, ma na hemel srefi fu sori ensrefi now na fesi a sma di de Gado, fu a bun fu wi.”—Hebrewsma 9:24.
10. San Yesus ben du di a ben drai go baka na hemel?
10 Na ini hemel, Yesus ’ben iti-iti a brudu’ fu en ofrandi, di a ben gi Yehovah a waarde fu en brudu di man frulusu sma. Ma Yesus ben du moro leki dati. Syatu bifo a dede fu en, a ben taigi den bakaman fu en: „Mi e gowe fu sreka wan presi gi unu. So srefi, te mi e gowe èn e sreka wan presi gi unu, dan mi e kon baka èn misrefi sa teki unu na mi oso, so taki unu kan de tu pe mi de” (Yohanes 14:2, 3). So bun, fu di Yesus ben kisi primisi fu go na ini a Moro Santapresi, noso na ini hemel, meki a ben opo a pasi gi tra sma fu kon na en baka (Hebrewsma 6:19, 20). Den sma disi, di ben o de 144.000 sma, ben o dini leki ondropriester na ini Gado en yeye tempel (Openbaring 7:4; 14:1; 20:6). Neleki fa a granpriester fu Israèl ben teki fosi a brudu fu a bulu go na ini a Moro Santapresi fu verzoen den sondu fu den priester, na so a waarde fu Yesus en brudu di a trowe, ben gebroiki fosi gi den 144.000 ondropriester disi. *
Disiten „Warti Sani”
11. Gi suma a granpriester fu Israèl ben òfer wan bokoboko, èn san disi ben prenki?
11 A sori taki na ini a yari 1935, a tyari di Gado ben tyari den salfuwan kon na makandra, ben du kaba. * Ma Yehovah no ben kaba fu gi en oso glori. Nôno, „warti sani” ben musu kon na inisei ete. Hori na prakseri taki a granpriester na ini Israèl ben òfer tu meti—wan bulu gi den sondu fu den priester èn wan bokoboko gi den sondu fu den lo di no ben de priester. Fu di den priester na wan prenki fu den salfuwan di ben o de nanga Yesus na ini a hemel Kownukondre, dan suma na den lo di no ben de priester? A piki de fu feni na ini den wortu fu Yesus di skrifi na ini Yohanes 10:16: „Mi abi tra skapu ete, di no de fu a koi disi; den dati mi musu tyari kon tu, èn den sa arki mi sten, èn den sa tron wán ipi, wán skapuman.” So bun, a brudu di Yesus trowe abi wini gi tu grupu sma—fosi, den Kresten di abi a howpu fu tiri nanga Yesus na ini hemel, èn di fu tu, den wan di abi a fruwakti fu libi fu têgo na ini wan paradijs grontapu. A de krin taki na a di fu tu grupu disi na den „warti sani” di kari na ini a profeititori fu Hagai.—Mika 4:1, 2; 1 Yohanes 2:1, 2.
12. Fa den e hari furu „warti sani” kon na a oso fu Yehovah na ini a ten disi?
12 Den „warti sani” disi e furu na oso fu Yehovah ete. Na ini den yari no so langa pasa, den kisi primisi fu opo a wroko baka na ini Owstu-Europa, pisi fu Afrika, nanga tra kondre, èn dati ben meki a bun nyunsu fu Gado Kownukondre di seti kaba, gro na ini kontren di wi no ben wroko ete te nanga now. Te den warti sma e kon na ini a seti fu a tempel fu Gado, dan den tu e du muiti fu meki moro disipel, soleki fa Yesus ben komanderi (Mateus 28:19, 20). Te den e du dati, den e miti furu sma, owruwan nanga yonguwan, di abi na okasi fu tron „warti sani” tu di sa gi na oso fu Yehovah glori na so fasi. Luku wan tu eksempre nomo di e sori fa disi e feni presi.
13. Fa wan pikin meisje na ini Bolifia ben sori taki a ben abi faya fu prati a Kownukondre boskopu?
13 Na ini Bolifia, wan meisje di abi feifi yari èn di en papa nanga mama di de Kotoigi ben kweki, ben aksi en skoromisi primisi fu kisi fri fu skoro na ini a wiki te a kringopziener ben o fisiti a gemeente. Fu san ede? A ben wani wroko na ini a diniwroko na ini a heri spesrutu wiki disi fu aktiviteit. Disi ben fruwondru en papa nanga mama, ma den ben breiti taki a ben abi so wan moi denki. A pikin meisje e hori feifi oso-bijbelstudie now, èn wan tu fu den studenti disi e fisiti Kresten konmakandra. A ben tyari srefi en skoromisi go na a Kownukondre zaal. Kande baka ten, wan tu fu den Bijbel studenti fu en sa sori taki den na „warti sani” di sa gi na oso fu Yehovah glori.
14. ¿Na ini Korea, fa wan sisa ben kisi wini bika a ben horidoro nanga wan sma di fosi no ben abi belangstelling?
14 Di wan Kresten uma na ini Korea ben e wakti na wan tren stasyon, dan a ben go miti wan studenti di ben arki poku na wan headphone. „¿Yu abi wan relisi?” na uma ben aksi. „Mi no abi belangstelling gi relisi”, a studenti ben piki. A sisa no ben lasi-ati. „Baka wan pisi ten”, na so a ben taki moro fara, „wan sma kan wani frukisi wan relisi. Ma efu a no sabi noti fu relisi, dan a kan teki a fowtu wan.” A fesi fu a studenti ben kenki, èn a ben bigin arki wi sisa nanga belangstelling. A sisa ben pristeri en a buku Is er een Schepper die om u geeft? èn a sisa ben taki dati a buku disi ben o yepi en srefisrefi te a ten kon gi en fu teki wan relisi. A ben teki a buku wantewante. A wiki na baka, a ben bigin studeri Bijbel nanga Yehovah Kotoigi, èn now a e fisiti ala den gemeente konmakandra.
15. Fa wan yongu meisje na ini Yapan e bigin bijbelstudie, èn san ben de den wini di a ben kisi fu den muiti fu en?
15 Na ini Yapan, Megumi di abi twarfu yari e si en skoro leki wan bun veld fu preiki èn fu gi leri. A ben man bigin furu bijbelstudie srefi. Fa Megumi e du en? Fu di a e leisi Bijbel noso e sreka gi den konmakandra na ini a brekten pauze, dan nofotron den tra skoro pikin e aksi en san a e du. Son wan e aksi Megumi fu san ede a no e teki prati na wan tu aktiviteit fu a skoro. Megumi e piki den aksi fu den èn a e taigi den taki Gado abi wan nen. Nofotron disi e wiki a belangstelling fu den wan di e arki. Dan a e aksi den efu den wani wan bijbelstudie. Now Megumi e hori 20 studie — 18 fu den a e hori nanga pikin fu en klas.
16. Fa wan brada na ini Kamerun ben man bigin bijbelstudie nanga wan tu man fu wan grupu di ben spotu en?
16 Na ini Kamerun, wan grupu fu aiti man di ben e wroko na wan wrokopresi ben bari kari wan brada di ben pristeri Bijbel publikâsi na sma di ben e waka pasa. Fu di den ben wani spotu a brada, den ben aksi en fu san ede a no e bribi na ini a Dri-wánfasi, a hel faya, noso taki a sili no man dede. A brada fu wi ben gebroiki Bijbel èn ben piki den aksi fu den. A bakapisi ben de taki dri fu den man ben teki wan bijbelstudie. Wan fu den, Danièl, ben bigin fisiti den konmakandra èn a ben broko srefi ala den sani fu en di ben abi fu du nanga afkodrei (Openbaring 21:8). Na ini pikinmoro wan yari, a ben dopu.
17. Fa wan tu brada na ini El Salvador ben gebroiki koni fu preiki gi wan man di fosi no ben wani yere a Kownukondre boskopu?
17 Na ini El Salvador, wan man ben tai na ogri dagu fu en na fesi a doro ibri leisi te a ben si Kotoigi fu Yehovah na ini a birti. A man ben e wakti te leki den Kotoigi ben waka pasa, èn dan a ben tyari a dagu go baka na ini na oso. Noiti den brada ben man taki nanga a man. Fu dati ede, den ben bosroiti wan dei taki den ben o pruberi wan tra sani. Fu di den ben sabi taki a man ben kan yere san den ben e taki, meki den ben bosroiti fu bigin taki nanga a dagu. Den ben kon na a oso, ben gi a dagu odi, èn ben taki o breiti den ben de taki den abi na okasi fu taki nanga en. Den ben taki fu a ten te wan paradijs ben o de na grontapu, te no wan sma ben o atibron moro — iya, te srefi den meti ben o libi na ini vrede. Dan den ben taki a dagu odi na wan switi fasi èn ben bigin waka a pasi gowe baka. A ben fruwondru den srefisrefi taki a man ben komoto na ini en oso èn ben aksi pardon taki noiti a ben gi den Kotoigi na okasi fu taki nanga en. A ben teki den tijdschrift, èn den ben bigin wan bijbelstudie nanga en. ¡Now a man disi na wi brada — wan fu den „warti sani”!
„No Frede”
18. Sortu problema furu Kresten e miti, ma fa Yehovah e si den anbegiman fu en?
18 ¿Yu e du a prenspari wroko fu preiki a Kownukondre èn fu meki disipel? Efu a de so, dan yu abi wan bigi grani fu tru. Iya, a de nanga a wroko disi taki Yehovah e hari den „warti sani” kon na ini en oso (Yohanes 6:44). A tru, wanwan leisi a kan taki yu weri pikinso noso taki yu lasi-ati. Sontron son sma — srefi wan tu getrow futuboi fu Yehovah — e feti nanga a firi di den abi taki den no warti. ¡Ma no gi abra! Yehovah e si ibriwan fu den anbegiman fu en leki warti sani, èn a wani trutru meki yu kisi frulusu.—2 Petrus 3:9.
19. Sortu deki-ati Yehovah ben gi nanga yepi fu Hagai, èn fa den wortu disi kan gi wi tranga?
19 Te wi lasi-ati, awansi a e kon fu gens noso tra situwâsi di no switi, dan den wortu fu Yehovah gi den Dyu di ben drai baka, kan gi wi tranga. Na Hagai 2:4-6 wi e leisi: „ ’Ma de tranga now, o Serubabel,’ na so Yehovah taki, ’èn de tranga, o Yosua, a manpikin fu Yosadak, a granpriester. Èn de tranga, un alamala, pipel fu a kondre,’ na so Yehovah taki, ’èn wroko. Bika mi de nanga unu’, na so Yehovah fu den legre taki. ’Memre a sani di mi ben sroto nanga unu di unu ben hari komoto na Egipti, èn di mi yeye ben tanapu na un mindri. No frede.’ Bika disi na san Yehovah fu den legre taki: ’Ete wan leisi — a de wan syatu pisi ten nomo — èn mi e seki hemel nanga grontapu nanga se nanga a drei gron.’” Luku taki Yehovah no e gi wi deki-ati wawan fu de tranga, ma a e gi wi so srefi san wi abi fanowdu fu kisi krakti. Fa? Luku den wortu di e gi wi krakti: „Mi de nanga unu.” ¡A e tranga wi bribi trutru fu frustan taki awansi sortu problema e miti wi, taki Yehovah de nanga wi!—Romesma 8:31.
20. Na sortu fasi glori e furu na oso fu Yehovah na ini a ten disi, moro leki oiti bifo?
20 Yehovah buweisi trutru taki a de nanga en pipel. Iya, a de leki fa a ben meki en profeiti Hagai taki: „A glori fu a lasti oso disi sa kon moro bigi leki di fu a fosiwan . . . Èn na a presi disi mi sa gi vrede” (Hagai 2:9). Fu tru, a moro bigi glori na ini a ten disi de fu feni na ini Yehovah en yeye tempel. Iya, hondro dusundusun sma e go ipi-ipi na a tru anbegi ibri yari. Den e nyan bun na yeye fasi, èn srefi na ini a bruya grontapu disi, den abi wan vrede di na ini Gado en nyun grontapu nomo den sa abi wan di bigi moro leki dati.—Yesaya 9:6, 7; Lukas 12:42.
21. San musu de a fasti bosroiti fu wi?
21 A no de fara moro taki Yehovah sa seki den nâsi na Armagedon (Openbaring 16:14, 16). Fu dati ede, meki wi gebroiki a ten di tan abra ete, fu yepi moro sma meki den kisi frulusu. Meki wi de tranga èn meki wi frutrow tapu Yehovah dorodoro. Meki a de a fasti bosroiti fu wi fu tan anbegi na ini en gran yeye tempel, fu furu en nanga moro „warti sani” te leki Yehovah taki dati a wroko fu wi klari kaba.
[Futuwortu]
^ paragraaf 4 Den bijdrage di ben gi fu bow a tempel fu Salomo ben de a srefi leki pikinmoro 40 milyard Amerkan dala. Ala den sani di den no ben gebroiki fu bow a tempel ben poti na ini a monikisi fu a tempel.—1 Kownu 7:51.
^ paragraaf 10 Tra fasi leki a granpriester fu Israèl, Yesus no ben abi sondu gi san a ben musu verzoen. Ma den kompe-priester fu en ben abi sondu bika Gado ben bai den na mindri sondu libisma.—Openbaring 5:9, 10.
^ paragraaf 11 Luku A Waktitoren fu 15 februari 1998, bladzijde 17-22.
¿Yu E Memre Disi Ete?
• San warti moro gi Yehovah, moro leki materia sani?
• Sortu tu grupu sma abi wini fu a brudu di Yesus trowe?
• Suma na den „warti sani” di ben musu furu na oso fu Yehovah nanga glori?
• Sortu buweisi wi abi taki a profeititori fu Hagai e kon tru na ini a ten disi?
[Aksi fu a tori disi]
[Schema na tapu bladzijde 16 di e tyari sani kon na krin]
(Efu yu wani si pe den sani disi skrifi, luku a tijdschrift)
¿Yu sabi san na owruten tempel fu Yehovah wani taki na simbôlis fasi?
Moro Santapresi
Garden
Santa-presi
Gadri
Altari
Fesi dyari
[Prenki na tapu bladzijde 17]
A granpriester ben òfer wan bulu gi den sondu fu den priester èn a ben òfer wan bokoboko gi den sondu fu den lo fu Israèl di no ben de priester
[Prenki na tapu bladzijde 18]
A Kownukondre preikiwroko na heri grontapu e hari ipi-ipi sma go na a oso fu Yehovah