Fa Yu E Si Yusrefi?

A BEN de wan man di abi bigimemre. Di a ben kisi wan hei posisi na lanti, dan a ben prisiri na ini en ati srefisrefi fu a hei di sma ben hei en pasa marki èn fu a gi di den ben gi en bun furu grani. Ma wan sani di ben hendri en srefisrefi, ben de taki wan tra tiriman ben weigri fu gi en a grani dati. Fu di a tiriman di ben abi bigimemre ben wani teki refensi, meki a ben meki plan fu kiri ala sma na ini a gran kownukondre di ben de fu a srefi nâsi leki a sma di ben afrontu en. ¡Disi kwetikweti no ben de wan yoisti fasi fa wan sma musu denki fu a de di a de prenspari!

A sma di ben meki den takru plan disi ben de Haman, wan hei tiriman na ini a paleisi fu Ahasferos, Kownu fu Persia. ¿Èn san ben de a marki fu a feantifasi fu en? Wan Dyu di nen Mordekai. Ala di a fasi fa Haman ben handri fu di a ben wani kiri wan heri nâsi, ben de wan tumusi aparti sani, toku a e sori san na a kefar nanga den seryusu bakapisi fu bigifasi. Na bigimemre fasi fa a ben denki no wawan ben poti trawan na ini wan muilek situwâsi, ma a ben meki tu taki den ben gi en syen na publiki èn a dede te fu kaba.—Ester 3:1-9; 5:8-14; 6:4-10; 7:1-10.

Tru Anbegiman Kan Kisi Bigifasi Tu

Yehovah wani taki wi musu ’waka bescheiden nanga wi Gado’ (Mika 6:8). Bijbel abi difrenti tori fu sma di no ben tan si densrefi na wan bescheiden fasi. Disi ben tyari problema nanga sari kon gi den. Te wi e luku wan tu fu den eksempre disi, dan dati kan yepi wi fu si taki te yu no e denki na wan balansi fasi, dan dati na wan don sani èn wan ogri sani.

A denki fu Yona, wan profeiti fu Gado, ben kon bruya someni, taki Yona ben pruberi fu lowe di Gado ben gi en a komando fu warskow den godelowsu sma fu Ninifei gi a krutu di Yehovah ben o tyari kon na den tapu (Yona 1:1-3). Baka ten, di en preikiwroko ben meki taki den Ninifeisma ben abi berow, dan Yona ben mandi. A ben broko en ede sote nanga en eigi nen leki profeiti, taki pikinmoro a no ben abi bisi nanga a libi fu den dusundusun Ninifeisma (Yona 4:1-3). Efu wi e broko wi ede tumusi furu nanga a de di wi de prenspari, dan wi sa si taki a muilek fu tan si sma nanga den sani di e pasa lontu wi na wan yoisti èn soifri fasi.

Luku so srefi Usia, di ben de wan bun kownu fu Yuda. Di a no ben denki na wan balansi fasi moro, dan a ben pruberi na wan asranti fasi fu teki wan tu priesterwroko abra. Fu di a no ben handri na wan bescheiden fasi èn a ben handri nanga furu bigimemre, meki a ben pai gi dati nanga en gosontu èn nanga a lasi di a ben lasi a bun-ati fu Yehovah.—2 Kroniki 26:3, 16-21.

Wan denki di no ben de na ini balansi, pikinmoro ben kisi den apostel fu Yesus. Den ben tron sma di ben broko den ede srefisrefi nanga glori èn makti gi densrefi. Di a ten fu bigi tesi ben doro, dan den ben libi Yesus en wawan èn den ben lowe (Mateus 18:1; 20:20-28; 26:56; Markus 9:33, 34; Lukas 22:24). A mankeri di den ben mankeri bescheidenfasi èn a prakseri di den ben prakseri taki den prenspari, pikinmoro ben meki den frigiti a prakseri fu Yehovah èn so srefi a rol fu den di ben abi fu du nanga a wani fu en.

Den Takru Bakapisi te Wan Sma E Feni Ensrefi Prenspari

Te wi no e si wisrefi na wan balansi fasi, dan dati kan hati sma èn a kan pori a matifasi di wi abi nanga trawan. Fu eksempre, kande wi e sidon na wan presi èn wi si tu sma e syusyu nanga makandra ala di den e lafu. Efu wi e prakseri wi srefi nomo, dan sondro fu abi leti, wi ben sa kan denki taki den e meki spotu nanga wi, fu di den e taki so safri. A kan taki wi denki no e gi wi pasi fu wi luku iniwan tra fruklari di de, kande gi a fasi fa den e tyari densrefi. Fu suma den ben kan taki moro, te yu e luku en bun? Wi kan kisi atibron èn teki a bosroiti fu no taki noiti moro nanga den tu sma dati.  Na a fasi dati, a si di wi no e si a prensparifasi fu wi na wan balansi fasi, kan meki taki wi no man frustan sani bun èn taki wi kan pori a matifasi di wi abi nanga memre fu wi osofamiri èn nanga trawan.

Den wan di e teki densrefi tumusi seryusu kan tron sma di e dyaf, sma di e tan skepi fu den bigi talenti di den denki taki den abi, fu den sani di den du, noso fu den sani di den abi. Noso den ben kan basi takimakandra, ala di den abi fu taki wan sani fu densrefi ala ten. So wan fasi fu taki e sori taki den no abi trutru lobi èn a kan de wan sani di e hendri sma srefisrefi. Na so wan fasi, den sma di abi bigimemre, nofotron e tron sma di no abi firi gi trawan.—1 Korentesma 13:4.

Wi leki Yehovah Kotoigi, kan miti sma na ini wi publiki diniwroko di e spotu wi èn di no wani arki wi. Wi musu hori na prakseri taki a no wi srefi den e gens, ma den trutru e gens Yehovah, a Sma fu pe a boskopu fu wi komopo. Ma te wi no e si a prensparifasi fu wi na wan yoisti fasi, dan dati kan tyari seryusu bakapisi kon. Furu yari pasa kaba, wan brada ben teki a tumusi srapu fasi fa wan ososma ben taki, leki wan sani di ben de gi en èn a ben taki grofu nanga a sma baka (Efeisesma 4:29). Baka dati, noiti moro a brada ben teki prati na ini a oso-fu-oso diniwroko. Iya, bigifasi ben sa kan meki taki wi no man dwengi wisrefi moro te wi e preiki. Meki wi du muiti fu no meki a sani dati pasa noiti. Na presi fu dati, meki wi suku a yepi fu Yehovah na wan sakafasi, so taki wi kan abi wan yoisti warderi gi a grani fu teki prati na ini a Kresten diniwroko.—2 Korentesma 4:1, 7; 10:4, 5.

Te wi feni taki wi prenspari, dan disi ben kan tapu wi so srefi fu no teki rai di wi abi so tranga fanowdu. Na wan kondre na ini Centraal-Amerika wan tu yari pasa kaba, wan tini boi ben hori wan lezing na tapu a Theokrasia Diniwroko-skoro na ini a Kresten gemeente. Di a skoro-opziener ben gi en wan tu srapu rai, dan a yonguwan di ben kisi atibron ben trowe en Bijbel go na gron èn a ben waka komoto na ini a Kownukondre zaal ala di a ben stampu nanga en futu èn a ben abi a prakseri fu no kon baka noiti moro. Ma baka wan tu dei, a poti a bigifasi fu en na wan sei, meki en bun baka nanga a skoro-opziener, èn ben teki a rai fu en na wan sakafasi. Baka wan pisi ten, a yongu man disi ben gro kon tron wan lepi Kresten.

Te wi no de bescheiden èn e teki wisrefi tumusi seryusu dan dati kan pori wi banti nanga Gado. Odo 16:5 e warskow: „Ibriwan sma di abi wan bigimemre ati, na wan tegu sani gi Yehovah.”

Wan Balansi Fasi fu Si Wisrefi

A de krin taki wi no musu teki wisrefi tumusi seryusu. Ma a no de fu taki, dati disi no wani taki dati wi no musu si den sani di wi e du noso e taki leki wan seryusu sani. A Bijbel e sori taki den opziener, den dinari ini a diniwroko — fu taki en leti, ala sma na ini a gemeente — musu de seryusu (1 Timoteus 3:4, 8, 11; Titus 2:2). So bun, fa Kresten kan kweki wan bescheiden, balansi èn seryusu fasi fu si densrefi èn tan abi dati?

A Bijbel e gi wi deki-ati nanga yepi fu furu eksempre fu sma di ben tan si densrefi na wan balansi fasi. Wan tumusi aparti wan na Yesus Krestes en eksempre fu sakafasi. Fu di Gado Manpikin ben wani du a wani fu en Tata èn tyari frulusu kon gi a libisma famiri, meki a ben libi a glori posisi fu en na ini hemel nanga en fri wani èn a ben kon tron wan sakafasi libisma na grontapu. Ala di sma ben afrontu en, ben kosi en èn a dede na wan syen fasi, toku a ben man tan dwengi ensrefi èn ben tan tyari ensrefi na wan warti fasi (Mateus 20:28; Filipisma 2:5-8; 1 Petrus 2:23, 24). Fa Yesus ben man du disi? A ben frutrow tapu Yehovah dorodoro èn ben abi a fasti bosroiti fu du a wani fu Gado. Yesus ben studeri a Wortu fu Gado fayafaya, a ben begi fayafaya èn ben span ensrefi na wan krakti fasi na ini a diniwroko (Mateus 4:1-10; 26:36-44; Lukas 8:1; Yohanes 4:34; 8:28; Hebrewsma 5:7). Te wi e waka na baka na eksempre fu Yesus, dan disi kan yepi wi fu kweki wan balansi fasi fu si wisrefi èn tan du disi ala ten.—1 Petrus 2:21.

Luku a moi eksempre fu Yonatan, a manpikin fu Kownu Saul tu. Trangayesi fu en papa, meki Yonatan ben lasi na okasi fu tron kownu, baka Saul (1 Samuèl 15:10-29). ¿Yonatan ben abi bita-ati fu a lasi disi ede? ¿A ben kon dyarusu tapu David, a yongu man di ben o tiri na ini en presi? Ala di Yonatan ben bigi moro David èn kande ben abi moro ondrofeni leki en, toku a ben fiti ensrefi na a fasi fa Yehovah seti sani, nanga bescheidenfasi èn nanga sakafasi, èn a ben horibaka gi David na wan loyaal fasi (1 Samuèl 23:16-18). Te wi e si krin san na a wani fu Gado èn wi wani saka wisrefi  na ondro a wani dati, dan dati sa yepi wi fu ’no denki moro fu wisrefi leki a de fanowdu’.—Romesma 12:3.

Yesus ben leri sma a waarde di a abi fu sori bescheidenfasi nanga sakafasi. A ben sori disi di a ben taki dati te den disipel fu en ben de na wan trow-oso, dan den no ben musu teki „a moro prenspari presi”, bika a ben kan pasa taki wan moro prenspari sma ben sa kon èn den ben sa kisi syen fu di den musu go sidon na a moro lagi presi. Fu sori krin san wi ben kan leri fu disi, dan Yesus ben taki moro fara: „Bika ibriwan sma di e hei ensrefi, den sa saka en èn a sma di e saka ensrefi, den sa hei en” (Lukas 14:7-11). Wi sa de koni sma efu wi poti prakseri na a rai fu Yesus èn efu wi e ’weri gi wisrefi sakafasi fu yeye’.—Kolosesma 3:12; 1 Korentesma 1:31.

Blesi Di E Kon te Wi E Si Sani na wan Balansi Fasi

Te den futuboi fu Yehovah e denki fu sani na wan bescheiden fasi èn na wan sakafasi, dan dati e meki taki den prisiri trutru nanga a diniwroko fu den. A de moro makriki fu taki nanga den owruman te den abi sakafasi èn e „handri na ipi na wan safufasi” (Tori fu den Apostel 20:28, 29). Dan a sa de moro makriki gi ala sma na ini a gemeente fu taki nanga den owruman èn fu suku yepi na den. Dati kan yepi a gemeente fu kon moro krosibei na makandra na ini wan yeye fu lobi, switifasi nanga frutrow.

Te wi no e teki wisrefi tumusi seryusu, dan wi sa man meki bun mati. Bescheidenfasi nanga sakafasi sa yepi wi fu no kweki wan yeye fu strei nanga trawan èn a sa yepi wi fu no pruberi fu du sani moro betre leki trawan noso fu abi moro furu materia sani leki trawan. Den eigifasi disi fu Gado sa yepi wi fu poti moro prakseri na trawan èn na a fasi disi wi sa man trowstu èn yepi den wan di de na nowtu, moro bun (Filipisma 2:3, 4). Te lobi nanga switifasi e naki sma ati, dan moro furu, den e handri bun na tapu dati. ¿Èn a no de so taki a banti disi di de fu di sma no e prakseri densrefi nomo, e kon tron a fondamenti pe sma e bow tranga matifasi na tapu? ¡A de trutru wan bigi blesi te wi no e teki wisrefi tumusi seryusu na wan fasi di no de bescheiden!—Romesma 12:10.

Wan balansi fasi fu si wisrefi e meki tu taki a de moro makriki fu taki dati wi fowtu te wi afrontu wan sma (Mateus 5:23, 24). A bakapisi de taki wi sa abi wan moro bun banti nanga trawan, di sa meki wi kon bun baka nanga trawan èn di sa meki sma abi lespeki gi makandra. Efu den wan di abi a frantwortu fu tiri, soleki den Kresten owruman, abi sakafasi èn den de bescheiden, dan den abi na okasi fu du furu bun sani gi trawan (Odo 3:27; Mateus 11:29). Wan sma di abi sakafasi sa feni en so srefi moro makriki fu gi trawan di e sondu teige en pardon (Mateus 6:12-15). A no sa atibron tumusi efu a e si taki trawan e taki sani fu meki a firi syen èn a sa frutrow tapu Yehovah fu seti sani kon bun, di sma no kan seti kon bun baka na no wan enkri fasi.—Psalm 37:5; Odo 3:5, 6.

A moro bigi blesi di wi e kisi te wi e si wisrefi na wan bescheiden fasi èn nanga sakafasi, na taki wi e nyan bun fu a bun-ati fu Yehovah èn a e feni wi bun. „Gado e kakafutu gi den heimemrewan, ma a e gi no-frudini bun-ati na den sakafasiwan” (1 Petrus 5:5). Noiti wi musu meki a fowtu fu denki taki wi moro bun leki wi de trutru. Na presi fu dati, meki wi erken na wan sakafasi sortu posisi wi abi na ini a fasi fa Yehovah seti sani. Bigi blesi e wakti ala sma di e doro den markitiki fu Yehovah ’fu waka bescheiden nanga Gado’.

[Prenki na tapu bladzijde 22]

Yonatan ben horibaka gi David na wan sakafasi