Kweki wan Krosibei Banti Nanga Yehovah

„KON krosibei na Gado, èn en sa kon krosibei na unu”, na so a disipel Yakobus ben skrifi (Yakobus 4:8). Èn a psalm skrifiman David ben singi: „A krosibei banti nanga Yehovah de gi den wan di e frede en” (Psalm 25:14). A de krin, Yehovah Gado wani taki wi musu abi wan krosibei matifasi nanga en. Toku a no abi fu de so taki ala sma di e anbegi Gado èn di e gi yesi na en wet, e firi taki den de krosibei na en.

Fa a de nanga yu? ¿Yu abi wan krosibei matifasi nanga Gado? A de seiker taki yu wani kon moro krosibei na en. Fa wi kan kweki wan krosibei banti nanga Gado? San disi ben sa wani taki gi wi? A di fu dri kapitel fu a Bijbel buku Odo e gi den piki.

Sori Lobi Bun-ati Nanga Trufasi

Kownu Salomo fu Israèl fu owruten, e bigin a di fu dri kapitel fu Odo nanga den wortu: „Mi manpikin, no frigiti mi wet, èn meki yu ati gi yesi na mi komando, bika yu sa kisi furu dei nanga furu yari nanga vrede na tapu” (Odo 3:1, 2). Fu di Salomo ben skrifi sani nanga yepi fu Gado en santa yeye, meki a rai di gi neleki te wan papa e gi rai, kon trutru fu Yehovah Gado èn a skrifi gi wi. Dya wi e kisi rai fu hori wisrefi na den frumane fu Gado — en wet, noso leri, èn den komando fu en — di skrifi poti na ini Bijbel. Efu wi e du disi, dan wi „sa kisi furu dei nanga furu yari nanga vrede na tapu”. Iya, srefi now wi kan abi wan libi fu vrede èn wi kan wai pasi gi den fasi fu a libi, san e poti wi na fesi a kefar fu dede moro fruku, wan sani di e pasa furutron nanga ogriman. Boiti dati, wi kan tan prakseri fu a howpu di wi abi fu têgo libi na ini wan nyun grontapu pe vrede sa de.—Odo 1:24-31; 2:21, 22.

Moro fara, Salomo e taki: „Lobi bun-ati nanga trufasi, meki den no gowe libi yu. Tai den na yu neki. Skrifi den na tapu a tafra fu yu ati, èn na so fasi feni a bun nanga bun inzicht na ini na ai fu Gado èn fu a libisma fu grontapu.”—Odo 3:3, 4.

Den vertaal a wortu „lobi bun-ati” soleki fa a ben de biginbigin so srefi nanga „loyaal lobi” èn a wani taki tu, getrowfasi, wanfasi, nanga loyaalfasi. ¿Wi abi a fasti bosroiti fu tan krosibei na Yehovah awansi san o pasa? ¿Wi e sori lobi bun-ati te wi de makandra nanga wi kompe-bribiman? ¿Wi e du muiti fu tan krosibei na den? ¿Te wi e wroko makandra nanga den ala dei, dan wi e tan hori ’a wet fu lobi bun-ati na tapu wi tongo’ srefi efu wi de na ini muilek situwâsi?—Odo 31:26.

Fu di Yehovah abi lobi bun-ati pasa marki, meki a de „klariklari fu gi pardon” (Psalm 86:5). Efu wi ben abi berow fu den sondu di wi ben du fosi èn now wi e meki reti pasi gi wi futu, dan wi de seiker taki „ten di e gi kowru-ati” sa kon fu Yehovah (Tori fu den Apostel 3:19). ¿A no de so taki wi musu waka na baka na eksempre fu wi Gado, fu di wi e gi tra sma pardon fu den sondu fu den?—Mateus 6:14, 15.

Yehovah na „a Gado fu waarheid” èn a wani „trufasi” fu den wan di e suku fu abi wan krosibei banti nanga en (Psalm 31:5). ¿Wi kan fruwakti trutru taki Yehovah o de wi Mati, efu wi e libi wan dobru libi — te wi de nanga Kresten kompe dan wi e tyari wisrefi na wán fasi èn te den no e si wi, dan wi e tyari wisrefi na wan tra fasi — neleki „den man di no lobi waarheid”, di e kibri sortu sma den de? (Psalm 26:4) ¡Dati  ben sa de wan don sani trutru, fu di „ala sani de opo-opo èn krin fu si na ini den ai” fu Yehovah!—Hebrewsma 4:13.

Wi musu si lobi bun-ati nanga trufasi leki wan diri keti di ’tai na wi neki’, fu di den e yepi wi fu kan ’feni bun ini den ai fu Gado èn fu libisma na grontapu’. Wi no musu sori den eigifasi disi wawan fu sma kan si den, ma wi musu skrifi den poti tu ’na tapu a tafra fu wi ati’ èn na so fasi wi e meki den tron wan prenspari pisi fu den eigifasi fu wi.

Kweki wan Fasti Frutrow Tapu Yehovah

A koni kownu e taki moro fara: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.”—Odo 3:5, 6.

Yehovah e frudini en trutru taki wi e poti ala wi frutrow na en. Leki a Kriaman, a „tranga na ini makti” èn en na a Sma fu pe „dinamik krakti” komoto (Yesaya 40:26, 29). A man meki ala sani di a abi na prakseri kon tru. ¡Iya, a nen fu en wani taki trutru „En E Meki Sani Du Kon”, èn a e bow wi bribi na ini a man di a man meki den sani di a ben pramisi kon tru! Taki „Gado no man lei . . . kwetikweti” e meki taki en na waarheid (Hebrewsma 6:18). A moro prenspari eigifasi fu en na lobi (1 Yohanes 4:8). A „de regtfardiki na ini ala den pasi fu en èn a de loyaal na ini ala den wroko fu en” (Psalm 145:17). Efu wi no man frutrow tapu Gado, suma wi kan frutrow dan? A no de fu taki, dati efu wi wani kweki a frutrow tapu en, dan wi musu „tesi èn si taki Yehovah bun”, fu di wi e poti den sani di wi e leri fu a Bijbel na ini wi eigi libi èn wi e tan prakseri den bun di e kon fu disi.—Psalm 34:8.

Fa wi kan ’poti prakseri na Yehovah na ini ala den pasi fu wi’? A psalm skrifiman ben taki nanga yepi fu Gado en santa yeye: „Seiker mi sa prakseri dipi fu ala yu wroko, èn mi sa prakseri furu fu a fasi fa yu e handri” (Psalm 77:12). Fu di wi no kan si Gado, dan te wi e prakseri dipi fu den bigi wroko fu en èn a fasi fa a ben handri nanga en pipel, dan dati de prenspari fu kan kweki wan krosibei banti nanga en.

Begi na so srefi wan prenspari fasi tu fa wi kan poti prakseri na Yehovah. Kownu David ben e tan kari Yehovah „heri dei langa” (Psalm 86:3). Furutron, David ben e begi heri neti langa, soleki a ten di a ben de wan loweman na ini a sabana (Psalm 63:6, 7). „Unu musu tan begi ini yeye na ibri okasi”, na apostel Paulus ben frumane (Efeisesma 6:18). Omeni tron wi e begi? ¿Wi e prisiri fu taki nanga Gado na wan opregti fasi? Te muilek situwâsi e miti wi, dan wi e aksi en na ini begi fu yepi wi? ¿Wi e suku a tiri fu Yehovah na ini begi, fosi wi teki prenspari bosroiti? Den opregti begi fu wi na Yehovah e meki a lobi wi. Èn wi abi a dyaranti taki a sa arki a begi fu wi èn ’meki wi pasi kon reti’.

¡A de trutru wan don sani ’fu frutrow tapu wi eigi frustan’ noso tapu di fu den heihei man fu grontapu, ala di wi kan frutrow tapu Yehovah nomo! „No kon koni na ini yu eigi ai”, na so Salomo ben taki. Kontrari fu dati, a e gi a tranga: „Frede Yehovah èn drai yu baka gi san no bun. Meki disi kon tron wan dresi gi yu kumba èn wan kowru-ati gi yu bonyo” (Odo 3:7, 8). A gosontu frede di wi abi fu du wan sani di Yehovah no lobi musu tiri ala san wi e du, wi denki, nanga den firi fu wi. So wan lespeki frede e tapu wi fu du ogri sani èn a e dresi wi na yeye fasi èn a e gi wi kowru-ati.

Gi Yehovah a Moro Bun Sani Di Yu Abi

Na sortu tra fasi wi kan kon krosibei na Gado? „Gi Yehovah grani nanga den warti sani fu yu èn nanga den fosiwan fu ala den gron-nyan fu yu”, a kownu e gi leki rai (Odo 3:9). Fu gi Yehovah grani wani taki fu sori en furu lespeki èn hei en nen na publiki fu di wi e teki prati na a wroko fu meki en nen bekènti èn fu di wi e horibaka gi a wroko disi. Den warti sani di wi e gebroiki fu gi Yehovah grani na wi ten, den talenti fu wi, wi krakti, nanga den materia sani di wi abi. Den sani disi musu de den fosi froktu — a moro bun sani di wi abi. ¿A fasi fa wi e gebroiki den sani di wi abi, no musu sori taki wi abi a fasti bosroiti fu ’tan suku fosi a kownukondre nanga a regtfardikifasi fu Gado’?—Mateus 6:33.

Te wi e gi Yehovah grani nanga den warti sani fu wi, dan wi no sa tan sondro fu kisi pai. „Dan den maksin fu yu sa kon furu pasa marki”, na so Salomo e gi leki dyaranti, „èn den pers-bari fu yu  sa kon furu nanga nyun win te den e lon abra” (Odo 3:10). Ala di wan tanbun na yeye fasi srefi, no de wan dyaranti taki a sa go bun na materia sei, toku te wi e gebroiki den sani di wi abi fu gi Yehovah grani, dan dati e tyari furu blesi kon. A du di Yesus ben du a wani fu Gado, ben de gi en a „nyanyan” di ben e gi en krakti (Yohanes 4:34). So srefi, te wi e teki prati na a preikiwroko nanga a wroko fu meki disipel di e gi Yehovah glori, dan dati e bow wi. Te wi e tan du a wroko dati, dan den maksin fu wi na yeye fasi di abi sani na ini, sa kon furu srefisrefi. A prisiri fu wi — san a nyun win e prenki — sa furu pasa marki.

¿Wi no e luku go na Yehovah so srefi èn e begi na en fu gi wi nofo nyanyan sani ala dei? (Mateus 6:11) Ala sani di wi abi, yu kan taki, e kon fu wi lobi-ati hemel Tata. Yehovah sa kanti moro blesi kon na wi tapu akruderi a fasi fa wi e gebroiki den warti sani fu wi fu prèise en.—1 Korentesma 4:7.

Teki a Trangaleri fu Yehovah Nanga Prisiri

A kownu fu Israèl ben si o prenspari trangaleri de fu kan kisi wan krosibei banti nanga Yehovah, dati meki a e gi wi leki rai: „No trowe, o mi manpikin, a trangaleri fu Yehovah; èn no tegu gi a piri-ai fu en, bika a sma di Yehovah lobi, na en a e piri-ai gi, neleki fa wan papa e du nanga wan manpikin di a e prisiri nanga en.”—Odo 3:11, 12.

Ma a kan taki, a no sa de makriki gi wi fu teki trangaleri. „No wan trangaleri na wan prisiri sani na a momenti di wi e kisi en, ma a e gi sari”, na apostel Paulus ben skrifi, „toku, baka ten a e meki froktu fu vrede gi den wan di oefen densrefi nanga dati, namku regtfardikifasi” (Hebrewsma 12:11). Piri-ai nanga trangaleri na wan prenspari pisi fu a leri di wi e kisi fu tyari wi kon moro krosibei na Gado. Piri-ai di e kon fu Yehovah — efu wi e kisi en fu papa nanga mama, noso na ini a Kresten gemeente, noso te wi e prakseri dipi fu bijbeltekst te wi e du wi persoonlijk studie — dati na fa a e sori taki a lobi wi. Na wan koni sani, efu wi e teki trangaleri nanga prisiri.

Tan Hori Koni èn a Koni fu Man Si Sani Krin, Steifi

Baka dati, Salomo e poti krakti tapu a prensparifasi fu koni èn a koni fu man si sani krin, te wi wani kweki wan krosibei matifasi nanga  Gado. A e fruklari: „Koloku a libisma de di e feni koni, èn a libisma di e kisi a koni fu man si sani krin, bika fu abi en leki wini, de moro bun leki fu abi solfru leki wini, èn fu abi en leki san yu kisi fu yu wroko, moro bun leki gowtu. . . . A de wan bon fu libi gi den wan di e hori en, èn den wan di e hori en steifi den sa taki dati den de koloku sma.”—Odo 3:13-18.

Te a kownu e memre wi na a fasi fa koni nanga a koni fu man si sani krin de fu si na ini den wondru wroko di Yehovah kria, a e taki: „Yehovah ensrefi poti a fondamenti fu grontapu nanga koni. A seti hemel steifi nanga a koni fu man si sani krin. . . . Mi manpikin, no meki den gowe libi yu ai. Kibri praktisch koni èn a krakti di yu abi fu man denki, èn a sa kon na krin taki den sani disi na libi gi yu sili èn wan moi sani gi yu neki.”—Odo 3:19-22.

Koni nanga a koni fu man si sani krin, na eigifasi di komoto na Gado. Wi no musu kweki den wawan, ma wi musu hori den steifi tu, fu di wi noiti musu tron sma di no e broko den ede moro nanga a faya fasi fa wi ben e studeri Bijbel èn nanga a poti di wi e poti den sani di wi e leri na ini wi libi. „Efu dati de so, dan yu sa waka na ini seikerfasi tapu yu pasi”, na so Salomo e go moro fara, „èn srefi yu futu no sa naki na no wan sani.” A e taki moro fara: „Awansi o ten yu o go didon yu no sa frede; èn fu tru yu sa go didon, èn yu sribi musu de switi.”—Odo 3:23, 24.

Iya, wi kan waka na ini seikerfasi èn sribi nanga wan korostu ati ala di wi e wakti a dei di sa kon leki wan fufuruman, pe „wantronso wan pori sa kon” na tapu na ogri grontapu fu Satan (1 Tesalonikasma 5:2, 3; 1 Yohanes 5:1). Srefi na ini a bigi banawtu di de so krosibei kaba, wi kan abi a dyaranti disi: „Yu no sa abi fu frede fu no wan ogri sani di sa kon na yu tapu wantronso, noso fu a bigi winti di e kon na tapu den godelowsuwan, fu di a e kon. Bika Yehovah srefi sa buweisi trutru taki a de a sma di yu kan frutrow, èn seiker a sa kibri yu futu, so taki noti sa grabu yu futu.”—Odo 3:25, 26; Mateus 24:21.

Du Sani Di Bun

„No tapu yusrefi fu du bun gi den wan di musu kisi dati”, na so Salomo e gi tranga, „te a de ini a makti fu yu anu fu du dati” (Odo 3:27). Te wi e du trawan bun, dan a wani taki tu dati wi e gebroiki den sani di wi abi fu a bun fu den, èn disi abi someni sei. ¿Ma a yepi di wi e yepi trawan fu kisi wan krosibei matifasi nanga a tru Gado, a no a moro bun sani di wi kan du gi den na ini a „ten [disi] fu a kaba” (Danièl 12:4). Disi now, na a ten fu sori wan faya gi a Kownukondre preikiwroko nanga a wroko fu meki disipel.—Mateus 28:19, 20.

A koni kownu e kari so srefi wan tu sani di wi musu wai pasi gi dati, èn a e taki: „No taigi a sma na yu sei: ’Gowe, kon baka èn tamara mi sa gi yu’, ala di yu abi wan sani na yu. No sidon denki sani fu du a sma na yu sei ogri, ala di a e libi nanga yu nanga wan firi fu seikerfasi. No meki trobi nanga wan sma sondro fu abi wan reide, efu a no ben du yu no wan ogri. No kisi bigi-ai gi a man fu tranga ogridu, èn no teki no wan fu den pasi fu en.”—Odo 3:28-31.

Salomo e taki syatu fu san ede a gi a rai disi, èn a e taki: „Bika a sma di abi triki, na wan tegu sani gi Yehovah, ma A e hori bun kompe nanga den opregti wan. A fluku fu Yehovah de na tapu na oso fu a godelowsuwan, ma a tanpresi fu den regtfardikiwan a e blesi. Efu den na sma di e spotu trawan, ensrefi sa spotu den; ma gi den safri-atiwan a sa du bun. Grani na san den koniwan sa kon abi, ma den donwan e poti sani di no abi grani go na hei.”—Odo 3:32-35.

Efu wi wani nyan bun fu wan krosibei banti nanga Yehovah, dan wi no musu sidon denki bedrigi sani èn meki plan fu du trawan ogri (Odo 6:16-19). Soso te wi e du san bun na ini na ai fu Gado, dan a sa feni wi bun èn blesi wi. So srefi, wi kan kisi grani di wi no ben suku gi wisrefi, te trawan e si taki wi e handri akruderi a koni fu Gado. Fu dati ede, meki wi kakafutu gi den bedrigi fasi fu a godelowsu èn ogri grontapu disi. ¡Fu tru, meki wi tyari wisrefi na wan opregti fasi èn kweki wan krosibei banti nanga Yehovah!

[Prenki na tapu bladzijde 25]

„Gi Yehovah grani nanga den warti sani fu yu”