Wi Na Den Sma Di Abi Bribi

Pristeri wan Boskopu Di E Trowstu Sma na Italiakondre

YEHOVAH na „a Gado fu ala trowstu”. Te den dinari fu en e leri fu waka na en baka, dan den „kan trowstu den wan di e kisi fu du nanga iniwan sortu banawtu” (2 Korentesma 1:3, 4; Efeisesma 5:1). Disi na wan fu den prenspari marki fu a preikiwroko di Yehovah Kotoigi e du.

Yepi wan Uma Di De na Nowtu

Spesrutu na ini den yari di no pasa so langa ete, pôtifasi, feti, nanga na angri di sma e angri fu feni wan moro betre libi ben meki taki furu sma ben froisi go libi na den moro gudu kondre. Ma a no makriki fu fiti densrefi na den nyun situwâsi. Manjola ben e libi nanga tra Albaniasma na Borgomanero. Fu di a ben e tan na Italiakondre sondro taki lanti ben gi en primisi fu dati, meki a ben draidrai fu taki nanga Wanda, di de wán fu den Kotoigi fu Yehovah. Toku te fu kaba, Wanda ben meki wan mofo nanga Manjola di esi-esi ben sori furu belangstelling gi a studeri di a ben studeri a Wortu fu Gado, ala di a taki di den ben taki difrenti tongo ben meki disi muilek. Ma baka wan tu fisiti, Wanda no ben man feni no wan sma na oso moro. San ben pasa? Wanda ben kon sabi taki ala den sma di ben tan na ini na oso dati ben lowe fu di skowtu ben suku fu kisi wan fu den — a freiri fu Manjola — ¡fu di a ben kiri wan sma!

Baka fo mun, Wanda ben miti Manjola baka. „En fesi ben lasi kloru, a ben mangri èn a ben gersi wan sma di trutru ben abi wan muilek ten”, na so Wanda e memre. Manjola ben fruklari taki a freiri di a ben abi fosi ben de na strafu-oso èn taki den mati pe a ben go fu kisi yepi, ben broko en saka srefisrefi. Fu di a ben lasi-ati, meki a ben begi Gado fu yepi en. Dan a ben memre Wanda, di ben taki nanga en fu a Bijbel. ¡Manjola ben prisiri fu si Wanda baka!

Den ben bigin baka nanga wan bijbelstudie èn esi-esi Manjola ben bigin go na den Kresten konmakandra. A ben man kisi primisi fu lanti fu tan na Italiakondre. Baka wan yari, Manjola ben tron wan dopu Kotoigi. A ben feni trowstu fu den pramisi fu Gado, èn a ben drai go baka na Albania fu prati a boskopu fu Bijbel di e gi sma trowstu, nanga den kondreman fu en.

Gi Kotoigi na wan Presi Pe Tenti Seti gi Sma Di Froisi Kon Libi na ini wan Tra Kondre

Furu gemeente na Italiakondre seti sani fu gi kotoigi na sma neleki Manjola, di froisi kon tan drape. Fu eksempre, wan gemeente na Florence ben seti sani fu abi a fasti gwenti fu fisiti wan presi pe tenti seti gi  sma di froisi kon libi na Italiakondre. Den sma di ben tan na ini a presi drape — furu fu den kon fu Owstu-Europa, Masedonia, nanga Kosovo — ben kisi fu du nanga difrenti muilek situwâsi. Wan tu fu den ben abi problema nanga a gebroiki fu drugs noso sopi. Furu fu den ben sorgu densrefi fu di den ben fufuru pikin sani.

A preiki di den ben e preiki na ini a libimakandra disi ben de wan tyalensi. Ma te fu kaba, wan furuten evangelie preikiman di nen Paola ben miti Jaklina, wan uma fu Masedonia. Baka di den ben taki makandra wan tu leisi Jaklina ben gi en mati, Susanna, deki-ati fu ondrosuku a Bijbel. Susanna fu en sei, ben taki nanga tra famiriman. Esi-esi feifi memre fu a famiri ben e kisi a fasti gwenti fu studeri a Bijbel, fu fisiti den Kresten konmakandra, èn den ben e du san den ben e leri. Ala di den abi fu du nanga problema, toku den e kisi trowstu fu Yehovah nanga en Wortu.

Wan Non E Teki a Trowstu Di Yehovah E Gi

Na ini a foto Formia, wan furuten evangelie preikiman di nen Assunta ben taki nanga wan uma di no ben man waka bun. Na uma ben de wan non di ben de fu wan relisi grupu di e yepi den sikiwan nanga den swakiwan na ini ati-oso nanga oso pe sma e tan.

Assunta ben taigi a non: „¿Yu e pina tu, a no so? Na wan sari sani taki wi alamala abi problema fu tyari.” Ne a non bigin bari krei èn a ben fruklari taki a ben abi seryusu problema nanga a gosontu fu en. Assunta ben gi en deki-ati ala di a ben taki dati a Gado fu Bijbel ben kan gi en trowstu. A non ben teki den tijdschrift di abi den gron tapu Bijbel èn di Assunta ben pristeri en.

A tra leisi di den ben taki nanga makandra, a non di ben nen Palmira, ben erken taki a ben nyan furu pina. A ben libi wan langa ten na ini wan oso di de ondro a tiri fu non. Di a ben musu gowe wan pisi ten fu a gosontu fu en, dan den no ben gi en pasi fu kon libi drape baka. Toku Palmira ben abi a firi taki a ben tai na Gado ete nanga yepi fu den sweri di a ben meki leki non. A ben go na sma di e dresi trawan fu den „dresi” en, ma na ondrofeni dati ben meki en pina srefisrefi na frustan sei. Palmira ben agri fu studeri a Bijbel èn a ben go na den Kresten konmakandra wan yari langa. Dan a ben froisi go na wan tra kontren, èn a Kotoigi no ben miti en moro. Tu yari ben pasa bifo Assunta ben feni en baka. A famiri fu Palmira nanga kerki tiriman ben gens en bun furu. Toku a ben go moro fara nanga en bijbelstudie, a ben go na fesi na yeye fasi èn ben teki dopu leki wan Kotoigi fu Yehovah.

Iya, a boskopu fu ’a Gado di e gi trowstu’ e gi furu sma deki-ati (Romesma 15:4, 5). Fu dati ede, Kotoigi fu Yehovah na Italiakondre abi a fasti bosroiti fu tan waka na baka Gado fu di den e pristeri trawan a moi boskopu fu Gado di e trowstu sma.