„Tan na Ai Doronomo”
„Tan na Ai Doronomo”
„Fu dati ede, tan na ai doronomo, bika unu no sabi sortu dei un Masra e kon.”—MATEUS 24:42.
1. Fa den sma di de futuboi fu Yehovah langaten kaba e prakseri fu den furu yari di den gi densrefi fu dini Yehovah getrow? Kari wan eksempre.
FURU sma di de futuboi fu Yehovah langa ten kaba ben leri a waarheid di den ben de yonkuman nanga yongu-uma. Leki a bisnisman di ben feni wan peri fu bigi waarde èn di ben seri ala sani di a ben abi soso fu bai a peri, na so den fayafaya Bijbel studenti dati ben drai den baka gi densrefi èn ben gi den libi abra na Yehovah (Mateus 13:45, 46; Markus 8:34). Fa den e feni en taki den ben wakti moro langa leki den ben fruwakti fu si a kontru fu den prakseri fu Gado gi a grontapu disi? ¡A no e sari den! Den e agri nanga Brada A. H. Macmillan, di ben taki baka 60 yari fu getrow diniwroko gi Gado: „Moro leki oiti bifo, mi abi a fasti bosroiti fu tan horidoro na ini mi bribi. A meki mi abi wan prenspari reide fu libi. A e yepi mi ete fu si a ten di e kon, sondro fu frede.”
2. (a) Sortu rai di kon na a yoisti ten, Yesus ben gi den bakaman fu en? (b) Sortu aksi wi sa ondrosuku na ini na artikel disi?
2 Fa a de nanga yu? Awansi o owru yu de, luku den wortu fu Yesus: „Fu dati ede, tan na ai doronomo, bika unu no sabi sortu dei un Masra e kon” (Mateus 24:42). Na eenvoudig fruklari dati abi wan dipi waarheid na ini. Wi no sabi sortu dei Masra sa kon fu strafu na ogri sistema disi, èn a no de fanowdu fu sabi dati. Ma wi musu libi na so wan fasi taki te a e kon trutru, dan a no sa meki wi firi sari. Nanga disi na prakseri, sortu eksempre wi e feni na ini Bijbel di sa yepi wi fu tan na ai doronomo? Fa Yesus ben sori taki disi de fanowdu? Èn sortu buweisi wi abi na ini a ten disi di e sori taki wi e libi na ini den lasti dei fu a godelowsu grontapu disi?
Wan Eksempre Di De wan Warskow
3. Fa furu sma na ini a ten disi de leki den sma na ini a ten fu Noa?
3 Na furu fasi den sma na ini a ten disi de leki den man nanga uma di ben libi na ini den dei fu Noa. Na a ten dati grontapu ben lai nanga ogri di du nanga tranga, èn den prakseri di ben de na ini na ati fu libisma „ala ten ben de soso takru” (Genesis 6:5). Moro furu fu den ben span den libi nanga den aladei afersi fu a libi. Ma bifo Gado ben tyari a bigi Frudu kon, a ben gi sma wan okasi fu abi berow. A ben gi Noa a komando fu preiki, èn Noa ben arki en—èn a ben dini leki „wan preikiman fu regtfardikifasi”, kande so wan 40 noso 50 yari, noso moro (2 Petrus 2:5). Ma den sma no ben arki a boskopu fu Noa di ben de wan warskow. Den no ben de na ai. Fu dati ede, te fu kaba, soso Noa nanga en osofamiri ben tan na libi di Yehovah ben tyari en krutu kon.—Mateus 24:37-39.
4. Na sortu fasi wi kan taki dati a diniwroko fu Noa ben waka bun, èn fa wi kan taki a srefi sani fu a preikiwroko fu wi?
4 ¿A diniwroko fu Noa ben waka bun? No prakseri soso a pikin nomru sma di ben arki. Fu tru, a preikiwroko fu Noa ben doro en marki, awansi fa sma ben handri na tapu dati. Fu san ede? Bika a ben gi sma nofo ten fu frukisi efu den wani dini Yehovah ofu no. Fa a de nanga a kontren pe yu e preiki? Srefi te pikinso sma nomo e arki bun, toku yu abi bun bakapisi srefisrefi. Fu san ede? Bika te yu e preiki, yu e meki sma yere a warskow fu Gado, èn na so fasi yu e du a komando di Yesus ben gi den bakaman fu en.—Mateus 24:14; 28:19, 20.
Den No Ben Arki den Profeiti fu Gado
5. (a) Sortu situwâsi ben de furu na ini Yuda na ini den dei fu Habakuk, èn san a pipel ben du nanga a profeiti boskopu fu en? (b) Fa a pipel fu Yuda ben sori feantifasi gi den profeiti fu Yehovah?
5 Furu yarihondro baka a Frudu, a kownukondre Yuda ben de na ini wan seryusu situwâsi. Na anbegi fu kruktugado, kruktudu, kwinsi, èn srefi a kiri di sma e kiri trawan ben de wan aladei sani. Yehovah ben wiki Habakuk fu warskow a pipel taki efu den no ben abi berow, dan den Kaldewsma, noso den Babilonsma, ben o tyari rampu kon na den tapu (Habakuk 1:5-7). Ma a pipel ben weigri fu arki. Kande den ben prakseri: ’¡We, moro leki wan hondro yari pasa kaba a profeiti Yesaya ben gi wan srefi sortu warskow, ma noti no pasa ete!’ (Yesaya 39:6, 7). Furu fu den heiheiman fu Yuda no ben abi wan mi-no-ke fasi wawan gi a boskopu, ma den ben handri na wan feanti fasi tu nanga den boskopuman. Wan leisi, den ben pruberi fu kiri a profeiti Yeremia, èn den ben o du dati efu Ahikam no ben kon ini a tori. Fu di ete wan tra profeiti boskopu ben meki Kownu Yoyakim atibron, meki a ben meki sma kiri a profeiti Uria.—Yeremia 26:21-24.
6. Fa Yehovah ben gi Habakuk tranga?
6 A boskopu fu Habakuk ben krakti a srefi leki di fu Yeremia, èn sma no ben lobi en boskopu tu neleki fa den no ben lobi a boskopu fu Yeremia, di Yehovah ben gebroiki nanga yepi fu en santa yeye fu taki na fesi taki Yuda ben pori 70 yari langa (Yeremia 25:8-11). Fu dati ede wi kan frustan a sari fu Habakuk di a ben bari: „O langa, o Yehovah, mi musu bari fu kisi yepi, sondro taki yu e yere? O langa mi sa kari yu fu yepi mi nanga na ogri di sma e du nanga tranga, sondro taki yu e frulusu?” (Habakuk 1:2) Na wan switi fasi Yehovah ben piki Habakuk nanga den wortu disi di ben tranga en bribi: „A fisyun de gi a fasti ten ete, èn a e tan lon go doro te na a kaba, èn a no sa fruteri wan lei. Awansi a ben sa meki unu wakti en srefi, tan fruwakti en; bika a sa kon tru sondro fu misi. A no sa kon lati” (Habakuk 2:3). So bun, Yehovah abi wan „fasti ten” te a sa tyari wan kaba kon na kruktudu èn a kwinsi di sma e kwinsi trawan. Efu a gersi leki A ben meki den e wakti, toku Habakuk no ben musu lasi-ati, èn a no ben musu go du sani moro safri tu. Na presi fu dati, a ben musu „tan fruwakti [en]”, fu di a e libi ibri dei neleki a kaba de fu kon ibri momenti. ¡A dei fu Yehovah no ben o kon lati!
7. Fu san ede Yerusalem ben kan fruwakti fu kisi pori na ini a fosi yarihondro G.T.?
7 Pikinmoro 20 yari baka di Yehovah ben taki nanga Habakuk, na edefoto fu Yuda, Yerusalem, ben kisi pori. Baka ten den ben bow en baka, èn furu fu den ogri sani di sma ben du èn di ben sari Habakuk ben kon bun baka. Ma na ini a fosi yarihondro G.T., a foto ben kan fruwakti baka fu kisi pori bika den sma di ben libi na ini a foto no ben de getrow. Nanga sari-ati Yehovah ben sreka sani fu meki opregtisma tan na libi. Disi leisi a ben gebroiki a moro prenspari profeiti, Yesus Krestes, fu tyari a boskopu. Na ini 33 G.T. Yesus ben taigi den bakaman fu en: „Te unu e si taki legre kampu lontu Yerusalem, sabi dan taki a pori fu en kon krosibei. Dan meki den wan di de na ini Yudea, bigin lon gowe na den bergi.”—Lukas 21:20, 21.
8. (a) San ben pasa kande nanga wan tu Kresten na baka wan pisi ten baka a dede fu Yesus? (b) Fa den profeiti wortu fu Yesus di ben abi fu du nanga Yerusalem ben kon tru?
8 Baka di den yari pasa, wan tu Kresten na ini Yerusalem ben kan aksi densrefi kande o ten a profeititori fu Yesus ben o kon tru. Boiti dati, prakseri den òfer di wan tu fu den ben tyari trutru. Kande den ben weigri fu teki moi okasi fu du bisnis, bika den ben abi a fasti bosroiti fu tan na ai doronomo. ¿Den ben kon weri na baka wan pisi ten? ¿Den ben denki taki den ben lasi ten, èn ben prakseri taki den wortu fu Yesus ben abi fu du nanga wan tra geslakti na ini a ten di e kon, èn no nanga a geslakti fu den? Na ini 66 G.T., a profeititori fu Yesus ben bigin kon tru di den legre fu Rome ben lontu Yerusalem. Den sma di ben tan na ai ben si a marki, den ben gowe libi a foto, èn den no ben ondrofeni a pori di Yerusalem ben kisi pori.
Agersitori Di E Sori Taki A De Fanowdu fu Tan na Ai
9, 10. (a) Fa yu ben o taki syatu fu Yesus en agersitori fu den srafu di ben wakti tapu a masra fu den te a ben o drai kon baka fu a trow fu en? (b) Fu san ede a ben sa kan muilek gi den srafu fu wakti tapu a masra fu den? (c) Fu san ede a ben tyari bun gi den srafu taki den ben abi pasensi?
9 Di Yesus ben sori taki a de fanowdu fu tan na ai, dan Yesus ben gersi den disipel fu en nanga srafu di e wakti te a masra fu den drai kon baka fu a trow fu en. Den ben sabi taki wan neti a ben o drai kon baka — ma sortu yuru? ¿Na ini a fosi wakti fu a neti? ¿A di fu tu? ¿A di fu dri? Den no ben sabi. Yesus ben taki: „Te [a masra] e kon na ini a di fu tu wakti noso srefi na ini a di fu dri wakti, èn e feni den na so fasi [taki den tan na ai], ¡koloku fu den!” (Lukas 12:35-38). Prakseri a fruwakti di den srafu disi ben abi. Ibri babari, ibri skaduw di e buweigi, seiker ben o meki a fruwakti fu den kon moro faya: ’¿Disi ben kan de wi masra?’
10 Fa a ben o de efu a masra ben o doro na ini a di fu tu wakti fu a neti, di e bigin wan sani fu neigi yuru teneti te go miti mindrineti? ¿A ben o de so taki ala den srafu, srefi den wan di ben wroko tranga fu sensi fruku mamanten, ben o de klariklari fu gi en odi, noso wan tu fu den ben o sribi? Fa a ben o de te a masra ben drai baka na ini a di fu dri wakti fu a neti — a pisi ten fu mindrineti te go miti wan sani fu dri yuru mamanten? ¿Wan tu fu den srafu ben o kon lasi-ati, èn srefi taki den ben o mandi fu di a gersi taki a masra fu den e meki den wakti? * Soso den wan di ben o de na ai te a masra ben o doro, ben o koloku. Den wortu fu Odo 13:12 ben o fiti trutru gi den: „Fruwakti di musu skoifi poti na wan tra ten, e meki na ati kon siki, ma a sani gi san sma e angri, de wan bon fu libi te a e kon trutru.”
11. Fa begi kan yepi wi fu tan na ai doronomo?
11 San ben o yepi den bakaman fu Yesus fu tan na ai doronomo na ini a pisi ten di gersi taki den ben musu wakti moro langa? Di Yesus ben de na ini a dyari fu Getseimanei syatu bifo sma ben grabu en hori, Yesus ben taigi dri fu den apostel fu en: „Tan na ai èn begi doronomo, fu unu no kan kon na ini tesi” (Mateus 26:41). Furu yari na baka, dan Petrus, di ben de drape na a okasi dati, ben gi den tra Kresten wan srefi sortu rai. A ben skrifi: „A kaba fu ala sani kon krosibei. Fu dati ede, de nanga wan gosontu frustan, èn de na ai ini a tori fu begi” (1 Petrus 4:7). Fu tru, fayafaya begi musu de wan pisi fu den gwenti di wi abi leki Kresten. Iya, wi musu begi Yehovah fu yepi wi fu tan na ai doronomo.—Romesma 12:12; 1 Tesalonikasma 5:17.
12. San na a difrenti na mindri a bereken di sma e bereken ten, èn a de di wan sma de na ai?
12 Luku taki Petrus ben taki tu: „A kaba fu ala sani kon krosibei.” O krosibei? Libisma no man na no wan fasi fu sori a yoisti dei èn a yoisti yuru (Mateus 24:36). Ma wan difrenti de na mindri a teki di wan sma e teki furu ten fu bereken a ten, wan sani di Bijbel no e gi deki-ati fu du, èn a tan di wan sma e tan fruwakti a kaba, di de wan sani di Bijbel e gi deki-ati fu du. (Teki gersi 2 Timoteus 4:3, 4; Titus 3:9.) San na wán fasi fa wi kan tan fruwakti a kaba? Wan fasi na te wi e poti finifini prakseri na den buweisi di e sori taki a kaba de krosibei. Fu dati ede, meki wi luku siksi buweisi di e sori taki wi e libi na ini den lasti dei fu a godelowsu grontapu disi.
Siksi Krakti Buweisi
13. Fa a profeititori fu Paulus di skrifi na ini 2 Timoteus kapitel 3 e overtoigi yu taki wi e libi na ini „den lasti dei”?
13 Fosi wan, krinkrin wi e si a kontru fu a profeititori fu na apostel Paulus di abi fu du nanga „den lasti dei”. Paulus ben skrifi: „Na ini den lasti dei muilek ten sa kon, di tranga fu pasa. Bika sma sa lobi densrefi nomo, den sa lobi moni, den sa de asranti, den sa abi heimemre, den sa afrontu Gado, den sa trangayesi papa nanga mama, den sa de sondro tangi, den no sa de loyaal, den no sa abi natuurlijk firi fu lobi, den no sa de klariklari fu meki kruderi, den sa de ogri-ati leiman, den no sa man dwengi densrefi, den sa abi wan krasi fasi fu du sani, den no sa lobi bun sani, den sa de toriman, den sa tranga-ede, den sa abi bigimemre, den sa lobi prisiri moro leki den lobi Gado, sa abi wan fasi fu a gi di den gi densrefi abra na Gado, ma di no sa sori fu abi a krakti fu dati; èn unu musu drai un baka gi den sani disi. Ma godelowsu sma nanga bedrigisma sa kon moro ogri, ala di den e kori sma èn trawan e kori den” (2 Timoteus 3:1-5, 13). ¿Wi no e si taki a profeititori disi e kon tru na ini a ten fu wi? ¡Soso den sma di no wani si den trutori, kan taki dati a no de so! *
14. Fa den wortu fu Openbaring 12:9 di e taki fu Didibri e kon tru na ini a ten disi, èn san sa pasa heri esi nanga en?
14 A di fu tu, wi e si den bakapisi fu a trowe di den trowe Satan nanga den ogri yeye fu Satan komoto na hemel, di de wan kontru fu Openbaring 12:9. Wi e leisi drape: „Den ben fringi a bigi draak go na ondro, a fosi sneki, a wan di den e kari Didibri nanga Satan, di e kori heri grontapu pe sma e libi; den ben fringi en go na grontapu, èn den engel fu en den ben fringi go na ondro makandra nanga en.” Disi ben tyari bigi helu kon gi grontapu. Fu tru, furu helu kon gi libisma, spesrutu fu sensi 1914. Ma a profeititori na ini Openbaring e taki tu taki te den trowe Didibri go na grontapu, dan a sabi taki „a abi wan syatu pisi ten nomo” (Openbaring 12:12). Na ini a pisi ten disi, Satan e feti nanga den salfu bakaman fu Krestes (Openbaring 12:17). Wi si den bakapisi trutru fu a opo di Satan opo kon fu du sma ogri na ini a ten fu wi. * Ma heri esi Yesus sa sroto Satan na ini a dipi peti so taki „a no ben sa kori den nâsi moro”.—Openbaring 20:1-3.
15. Fa Openbaring 17:9-11 e gi wi buweisi taki wi e libi na ini a ten fu a kaba?
15 A di fu dri, wi e libi na ini a ten fu a di fu aiti èn lasti „kownu” di kari na ini a profeititori di skrifi na ini Openbaring 17:9-11. Dyaso na apostel Yohanes e kari seibi kownu, di de seibi grontapu makti — Egipti, Asiria, Babilon, Medo-Persia, Grikikondre, Rome, nanga na Anglo-Amerkan tu-pisi grontapumakti. A e si so srefi „wan di fu aiti kownu” di „komoto kon fu den seibi”. A di fu aiti kownu disi — a lastiwan di Yohanes e si — e prenki den Verenigde Nâsi. Yohanes e taki dati a di fu aiti kownu disi „e go miti pori”, èn baka dati no wan tra grontapu kownu ben kari. *
16. Fa den trutori fu a popki na ini a dren fu Nebukadnesar e sori taki wi e libi na ini den lasti dei?
16 A di fu fo, wi e libi na ini a pisi ten di den gronfutu fu a popki na ini a dren fu Nebukadnesar e prenki. A profeiti Danièl ben fruklari a dangra dren disi fu wan bun bigi popki, di meki leki libisma (Danièl 2:36-43). Den fo pisi fu a popki di meki fu metaal e prenki difrenti grontapumakti, di e bigin nanga na ede (a Kownukondre fu Babilon) èn e saka go te na den futu nanga den futufinga (den tirimakti di e tiri na ini a ten disi). Ala den grontapumakti di a popki dati e prenki, kon kaba. Wi e libi na ini a pisi ten di den gronfutu fu a popki e prenki. No wan tra makti ben kari di musu kon ete. *
17. Fa a Kownukondre preikiwroko fu wi e gi moro buweisi taki wi e libi na ini a ten fu a kaba?
17 A di fu feifi, wi e si a preikiwroko e du na heri grontapu, di Yesus ben taki dati a ben o feni presi leti bifo a kaba fu a sistema disi. Yesus ben taki: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Na ini a ten disi a profeititori dati e kon tru na wan fasi di noiti bifo ben feni presi. A tru, kontren de ete pe wi no ben preiki ete, èn a kan taki na a reti ten fu Yehovah, wan bigi doro di e tyari go na moro bigi aktiviteit sa opo (1 Korentesma 16:9). Ma toku Bijbel no e taki dati Yehovah sa wakti teleki ibriwan sma na grontapu kisi kotoigi persoonlijk. Na presi fu dati, a bun nyunsu musu preiki teleki Yehovah feni taki a nofo. Dan a kaba sa kon.—Teki gersi Mateus 10:23.
18. Soleki fa a sori, san sa de wan trutru sani di o pasa nanga wan tu salfuwan te a bigi banawtu bigin, èn fa wi kan sabi disi?
18 A di fu siksi, a nomru fu trutru salfu disipel fu Krestes e kon moro mendri, ala di soleki fa a sori, son wan fu den sa de na grontapu ete te a bigi banawtu e bigin. Moro furu fu a fikapisi owru srefisrefi kaba, èn na ini den yari di pasa a nomru fu den wan di salfu trutru, kon moro mendri. Ma di Yesus ben taki fu a bigi banawtu, a ben taki: „Efu den no ben koti den dei dati syatu, dan no wan skin no ben sa kisi frulusu; ma fu den wan di Gado frukisi ede, den dei dati sa koti syatu” (Mateus 24:21, 22). Fu dati ede, soleki fa a sori, wan tu fu den wan di Krestes „frukisi” sa de na grontapu ete te a bigi banawtu e bigin. *
San De na Wi Fesi?
19, 20. Fu san ede a de moro tranga fanowdu na ini a ten disi, moro leki oiti bifo, taki wi e tan wiki èn e tan na ai doronomo?
19 San wi kan fruwakti na ini a ten di e kon? Span sani musu feni presi ete. Paulus ben warskow taki „a dei fu Yehovah e kon soifri leki wan fufuruman na neti”. A ben taki fu sma di e denki taki den abi ala koni fu grontapu: „Awansi den e taki: ’¡Vrede nanga seikerfasi!’, toku wantronso wan pori sa kon na den tapu na ini wán momenti.” Fu dati ede Paulus e gi den leisiman fu en a deki-ati: „No meki wi sribi go doro soleki fa den trawan e du, ma meki wi tan na ai èn hori wisrefi” (1 Tesalonikasma 5:2, 3, 6). Fu tru, den wan di e luku na libisma organisâsi fu tyari vrede nanga seikerfasi kon e tapu den ai gi trutori. ¡Den sma disi e sribi dipi!
20 A pori fu a seti fu sani disi sa kon heri esi èn wantronso. Fu dati ede, tan fruwakti a dei fu Yehovah. Gado srefi ben taigi Habakuk: ¡„A no sa kon lati”! Iya, leki noiti bifo a de tranga fanowdu taki wi e tan na ai doronomo.
[Futuwortu]
^ paragraaf 10 A masra no ben meki no wan mofo nanga den srafu fu en. So bun, a no ben abi fu gi frantwortu na den srafu fu en gi ala sani di a e du, èn a no ben de fruplekti tu fu taigi den srafu fu en fu san ede a gersi leki a ben meki den wakti.
^ paragraaf 13 Gi wan moro finifini takimakandra fu a profeititori disi, luku kapitel 11 fu a buku Sabi di e tjari joe go na têgo libi, di a Watchtower Bible and Tract Society of New York, Inc., tyari kon na doro.
^ paragraaf 14 Gi moro bodoi, luku bladzijde 180-186 fu a buku De Openbaring — Haar grootse climax is nabij!, di a Watchtower Bible and Tract Society of New York, Inc., tyari kon na doro.
^ paragraaf 15 Luku De Openbaring — Haar grootse climax is nabij!, bladzijde 251-254.
^ paragraaf 16 Luku kapitel 4 fu a buku ¡Poti Prakseri na a Profeititori fu Danièl!, di a Watchtower Bible and Tract Society of New York, Inc., tyari kon na doro.
^ paragraaf 18 Na ini na agersitori fu den skapu nanga den bokoboko, a Manpikin fu libisma e doro na ini en glori na ini a pisi ten fu a bigi banawtu èn a e go sidon fu krutu sma. A e krutu sma tapu gron fu den sani di den ben du fu horibaka gi den salfu brada fu Krestes. A markitiki disi di a e gebroiki fu krutu sma ben o de fu soso efu ala den brada fu Krestes ben gowe libi grontapu langa ten bifo a krutudei doro.—Mateus 25:31-46.
¿Yu E Memre Disi Ete?
• Sortu Bijbel eksempre kan yepi wi fu tan na ai doronomo?
• Fa Yesus ben sori taki a de fanowdu fu tan na ai?
• Sortu siksi buweisi e sori taki wi e libi na ini den lasti dei?
[Aksi fu a tori disi]
[Prenki na tapu bladzijde 9]
A. H. Macmillan ben dini Yehovah getrow so wan siksi tenti yari langa
[Prenki na tapu bladzijde 10]
Yesus ben agersi den disipel fu en nanga srafu di e tan na ai doronomo