¡Yu Kan Sabi a Tamara!

Moro furu sma e denki seryusu fu a tamara. Den lobi fu prakseri den sani di den sa du, fu poti moni na ini wan bisnis na wan koni fasi fu kan kisi wini, èn fu abi a firi taki no wan ogri kan miti den. ¿Ma wan fasi de fa wi kan de seiker san a tamara sa tyari kon?

FU DI libisma ben wani kon sabi san a tamara sa tyari kon, meki den pruberi ala sortu sani. Sabiman di e studeri afersi di abi fu du nanga a libimakandra èn di sma e kari futuroloog, e luku a fasi fa sani e waka na ini a ten disi finifini èn tapu gron fu disi den e fruteri fa sani sa de na ini a ten di e kon. Den ekonomiaman e du a srefi sani na ini a wroko fu den. Astroloog nanga lukuman e frutrow tapu horoscoop, den brenki grasi bal, nanga obia, èn den abi ipi-ipi sma di e waka na den baka. Fu eksempre, a Fransi astroloog Nostradamus pôpi te now ete, ala di a dede hondrohondro yari kaba.

A kon na krin taki den sma disi di wani plèi profeiti, na sma di yu no man frutrow kwetikweti èn di no man meki a fruwakti di sma abi tapu san den taki, kon tru. Fu san ede? Bika den e poti Yehovah Gado nanga en Wortu, Bijbel, na wan sei. Fu a sani disi ede meki den no man piki den prenspari aksi leki den wan disi: ’Fu san ede mi kan de seiker taki den sani di den ben fruteri na fesi na ini Bijbel o pasa trutru? Fa den e fiti na ini a prakseri di Gado abi nanga libisma? Fa mi nanga mi osofamiri kan kisi wini fu den profeititori disi?’ Bijbel e piki den aksi disi.

Bijbel profeititori moro bun tu na furu tra fasi. Heri tra fasi leki den sani di den astroloog e taki na fesi, Bijbel profeititori e gi sma pasi fu abi wan fri wani. Fu dati ede, no wan sma na wan srafu fu sani di sma taki na fesi (Deuteronomium 30:19). Sani di den ben skrifi soleki den di fu Nostradamus no abi moreel markitiki, èn na ini a presi fu disi, den e poti dangra tori nanga tori di e meki dyugudyugu kon. Ma Bijbel profeititori abi wan steifi fondamenti na moreel sei. A e fruklari fu san ede Gado e go du soleki fa a prakseri (2 Kroniki 36:15). Èn den profeititori fu Yehovah noiti no e misi, fu di „Gado . . . no man lei” (Titus 1:2). Fu dati ede, sma di e meki Gado Wortu tiri den, e libi wan libi pe den e frustan sani moro krin, wan libi di abi wan marki nanga wan libi di de koloku sondro fu lasi a diri ten nanga den gudu fu den na ini a feti di den e feti baka sani di de fu soso.—Psalm 25:12, 13.

Den penti disi nanga furu tra penti den taki na den „Gado Profeiti Wortu” Distrikt Kongres fu Yehovah Kotoigi fu 1999/2000 di ben hori na heri grontapu. Den lezing, den interview, den demonstrâsi nanga wan Bijbel drama hari a prakseri fu a publiki go na a tumusi moi yeye gudu di den wan di e studeri èn e gebroiki Gado profeiti wortu e nyan bun fu en. Na artikel di e kon now o taki syatu fu wan tu moi heimarki fu a kongres.