Prisiri Nanga a Gado fu Wi Frulusu
Prisiri Nanga a Gado fu Wi Frulusu
„Mi sa breiti pasa marki na ini Yehovah; mi sa de nanga prisiri nanga a Gado fu mi frulusu.”—HABAKUK 3:18.
1. Fu san Danièl ben abi wan fisyun bifo Babilon ben fadon na ini 539 b.G.T.?
MORO leki tin yari bifo Babilon fadon na ini 539 b.G.T., na owru profeiti Danièl ben si wan span fisyun. A fisyun ben taki na fesi taki sani ben o pasa di ben o tyari a feti kon di ben o doro wan heimarki na mindri den feanti fu Yehovah nanga en Kownu di a poti, Yesus Krestes. Fa Danièl ben handri tapu dati? A ben taki: „Mi ben firi taki mi ben weri srefisrefi èn . . . ben skreki te fu dede fu a sani ede di mi ben si.”—Danièl 8:27.
2. Sortu feti Danièl ben si na ini wan fisyun, èn fa yu e feni taki a de so krosibei?
2 Fa a de nanga wi? ¡Wi e libi moro fara na ini a ten leki na a ten dati! Fa wi e handri te wi e si taki a feti di Danièl ben si na ini a fisyun—a feti fu Gado na Armagedon-de kefalek krosibei? Fa wi e handri te wi e si taki a godelowsufasi di puru kon na doro na ini a profeititori fu Habakuk de so furu na ala sei, taki den feanti fu Gado musu kisi pori trutru? Kande den firi fu wi de a srefi leki di fu Habakuk srefi, soleki fa a e taki fu den na ini a di fu dri kapitel fu en profeiti buku.
Habakuk E Begi gi a Sari-ati fu Gado
3. Gi suma Habakuk ben begi, èn fa den wortu fu en kan abi krakti na wi tapu?
3 Habakuk kapitel 3 na wan begi. Soleki fa vers 1 e sori, a de wan singi fu sari noso fu kragi. A profeiti e begi neleki a e begi gi ensrefi. Ma fu taki en leti, Habakuk e taki gi a nâsi di Gado frukisi. Na ini a ten disi a begi fu en wani taki furu gi a pipel fu Gado di e du a Kownukondre preikiwroko. Te wi e leisi Habakuk kapitel 3 nanga a sani disi na prakseri, dan den wortu fu en e meki wi kisi a firi taki wan ogri sani de fu pasa, ma den e furu wi nanga prisiri tu. A begi fu Habakuk, noso kragisingi, e gi wi krakti reide fu prisiri nanga a Gado di e gi wi frulusu.
4. Fu san ede Habakuk ben kon frede, èn fu sortu fasi fa Gado sa gebroiki en makti wi kan de seiker?
4 Soleki fa wi si kaba na ini den tu artikel na fesi, dan a situwâsi ben takru srefisrefi na ini a kondre Yuda na ini a ten fu Habakuk. Ma Gado no ben o meki a situwâsi disi tan go so doro. Yehovah ben o du wan sani, neleki fa a ben du dati na ini a ten di pasa. Na fu dati ede a profeiti ben bari taki: „O Yehovah, mi yere a nyunsu di abi fu du nanga yu. ¡Mi kon frede a wroko fu yu, o Yehovah!” San a ben wani taki? ’A nyunsu di abi fu du nanga Yehovah’ ben de a historia fu den makti sani di Yehovah ben du èn di ben skrifi, soleki san a ben du na a Redise, na ini a gran sabana èn na Yerikow. Habakuk ben sabi heri bun den sani disi di Yehovah ben du, èn den ben meki a kon frede bika a ben sabi taki Gado ben sa gebroiki en bigi makti baka teige den feanti fu en. Te wi e si a godelowsufasi fu a libisma famiri na ini a ten disi, dan wi tu sabi taki Yehovah sa handri, neleki fa a ben du dati na ini owruten. ¿Dati e meki wi kon frede? ¡A no de fu taki! Toku wi e begi leki fa Habakuk ben begi: „¡O tyari dati kon na libi na mindri fu den yari! Meki a de so, taki yu e meki dati bekènti na mindri fu den yari. Meki a de so, taki na a ten fu a bruya yu e prakseri fu sori sari-ati” (Habakuk 3:2). Meki a de so, taki na a reti ten fu Gado, „na mindri fu den yari”, a sa gebroiki en wondru makti. ¡Èn meki a de so, taki na a ten dati, a e memre fu sori sari-ati gi den wan di lobi en!
¡Yehovah De na Pasi E Kon!
5. Fa ’Gado ben kon fu Teman’, èn san disi e sori fu Armagedon?
5 San sa pasa te Yehovah e yere a begi di wi e begi gi sari-ati? Wi e feni a piki na ini Habakuk 3:3, 4. Na a fosi presi, a profeiti e taki: „Gado srefi ben kon fu Teman, iya, wan Santawan fu a Paranbergi.” Na ini den dei fu Moses, Teman nanga Paran ben de na a pasi di Israèl ben teki fu go na a gran sabana fu go na Kanan. Di a bigi nâsi ben e teki waka, dan a ben gersi leki na Yehovah srefi ben e hari go èn noti ben kan tapu en. Syatu bifo Moses dede, a ben taki: „Yehovah — fu Sina-i a ben kon, èn na Se-ir a ben komoto kon skèin na den tapu. Leki wan leti a ben skèin kon fu a bergikontren fu Paran, èn furu tin dusun santawan [engel] ben de nanga en” (Deuteronomium 33:2). Te Yehovah e hari go teige den feanti fu en na Armagedon, dan na wan srefi sortu fasi a sa sori a makti fu en di sma no man gens srefisrefi.
6. ¿Boiti a glori fu Gado, san den Kresten di abi a koni fu man si sani krin, e si?
6 Habakuk e taki tu: „[Yehovah en] wartifasi ben tapu a hemel; èn grontapu ben kon furu nanga a prèise fu en. Èn fu a sei fu a brenkifasi fu en, a ben kon de neleki a leti.” ¡Dati ben musu de wan kefalek moi sani fu si! A tru taki libisma no man si Yehovah Gado èn tan na libi (Exodus 33:20). Ma gi den getrow futuboi fu Gado, na ai fu den ati e fruwondru te den e prakseri dipi fu a glori fu en (Efeisesma 1:18). Èn Kresten di abi a koni fu man si sani krin, e si ete wan sani boiti a glori fu Yehovah. Habakuk 3:4 e taki san den e si: „A ben abi tu faya di ben skèin komoto na en anu, èn drape a krakti fu en ben kibri.” Iya, wi e si taki Yehovah de klariklari fu handri, èn a e gebroiki en reti-anu fu krakti èn fu makti.
7. San a fektoriwaka fu Gado wani taki gi den wan di e opo densrefi teige en?
7 A fektoriwaka fu Gado sa tyari rampu kon gi den wan di e opo densrefi teige en. Habakuk 3:5 e taki: „Pestsiki ben tan go na en fesi, èn faya korsu ben komoto na den futu fu en.” Di den Israèlsma ben de krosibei na den grens fu a Pramisi Kondre na ini 1473 b.G.T., dan furu fu den ben opo densrefi teige Gado, èn den ben go du hurudu èn ben anbegi kruktugado. A bakapisi ben de taki moro leki 20.000 fu den ben lasi den libi di Gado ben seni wan pestsiki kon na den tapu (Numeri 25:1-9). Heri esi na ini a ten di e kon, te Yehovah de na pasi e go na „a feti fu a bigi dei fu Gado na Almaktiwan”, dan den wan di sa opo densrefi teige en sa pina na a srefi fasi fu den sondu fu den. Kande son wan fu den sa dede srefi fu trutru pestsiki ede.—Openbaring 16:14, 16.
8. San sa pasa nanga den feanti fu Gado, soleki fa Habakuk 3:6 e sori?
8 Yere now fa a profeiti e taki na wan krin fasi fu den sani di Yehovah fu den legre e du. Na ini Habakuk 3:6, wi e leisi: „A [Yehovah Gado] tanapu pî, so taki a ben sa kan seki grontapu. A ben si èn dan a ben meki den nâsi dyompo opo. Èn a ben masi den têgo bergi; den pikin bergi di tan te ten di no skotu ben boigi. Den waka fu ten di pasa langa kaba, na fu en.” Fosi, Yehovah ’e tanapu pî’, neleki wan legre-edeman di e ondrosuku a fetigron. Den feanti fu en e beifi fu frede. Den e si suma de na a tra sei fu a strei èn den e skreki srefisrefi èn e dyompo opo fu bruya ede. Yesus ben taki na fesi fu a ten te „ala den lo fu grontapu sa naki densrefi na ini wan sari krei” (Mateus 24:30). Den sa frustan tumusi lati taki no wan sma kan tan tanapu teige Yehovah. Den organisâsi fu libisma — srefi den wan di gersi taki den sa tan ala ten neleki „den têgo bergi” nanga „den pikin bergi di tan te ten di no skotu” — sa broko na pisipisi. A sa de leki Gado en „waka fu ten di pasa langa kaba”, leki a fasi fa a ben handri na ini owruten.
9, 10. Na san Habakuk 3:7-11 e memre wi?
9 ’Na atibron fu Yehovah’ kon faya teige den feanti fu en. Ma sortu fetisani a sa gebroiki na ini en bigi orloku? Arki fa a profeiti e taki fu den: „Ini en sososkin den e tyari a bo fu yu kon na krin. Den sani di den lo sweri, na a sani di sma taki. Nanga yepi fu den liba yu ben prati grontapu. Bergi ben si yu; den ben kisi hebi pen. Wan bigi alen fu watra ben pasa. A dipi fu a watra ben meki en babari. A ben opo en anu hei. Son — mun — ben tan tanapu na ini a hei tanpresi fu den. Neleki leti den eigi peiri fu yu ben e tan go. A koti di a lansri fu yu ben koti faya, ben de fu brenki.”—Habakuk 3:7-11.
10 Na ini den dei fu Yosua, Yehovah ben meki a son nanga a mun tan tanapu na wan fruwondru fasi fu sori en makti (Yosua 10:12-14). A profeititori fu Habakuk e memre wi taki Yehovah sa gebroiki a srefi makti disi na ini Armagedon. Na ini 1513 b.G.T., Yehovah ben sori taki a ben abi makti na tapu a dipi fu a watra fu grontapu, di a ben gebroiki a Redise fu kiri den legre fu Farao. Fotenti yari baka dati, a kefalek hei watra fu a Jordanliba no ben de wan problema gi Israèl fu waka a fektoriwaka go na ini a Pramisi Kondre (Yosua 3:15-17). Na ini den dei fu na umaprofeiti Debora, hebi alen ben wasi puru den fetiwagi fu a feanti fu Israèl, Sisera, gowe (Krutubakra 5:21). Yehovah kan gebroiki den srefi krakti disi fu frudu, hebi alen nanga a dipi fu a watra, na Armagedon. Dondru nanga faya di e koti de na ini en anu tu, neleki wan lansri noso wan peirikokro di furu nanga peiri.
11. San sa pasa te Yehovah e lusu a bigi makti fu en?
11 Fu tru, a sa meki sma frede te Yehovah sa lusu en bigi makti. Den wortu fu Habakuk e taki dati neti sa tron dei, èn dei sa brenki moro krin leki a son ben kan skèin oiti. Efu a profeiti fasi disi fa den e taki fu Armagedon na ondro a krakti fu a santa yeye, de trutru noso de simbôlis, wán sani de seiker — Yehovah sa wini, èn a no sa meki no wan feanti lowe gowe.
¡Frulusu E Kon Trutru gi a Pipel fu Gado!
12. San Gado sa du nanga den feanti fu en, ma suma sa kisi frulusu?
12 A profeiti e taki moro fara san na den sani di Yehovah e du fu pori den feanti fu En. Na ini Habakuk 3:12, wi e leisi: „Nanga krutu na fesi fu ala sma yu ben waka pasa na heri grontapu. Ini atibron yu ben go masi den nâsi.” Toku Yehovah no sa tyari a pori kon somarso. Son sma sa kisi frulusu. „Yu ben hari go fu frulusu a pipel fu yu, fu kibri a salfuwan fu yu”, Habakuk 3:13 e taki. Iya, Yehovah sa frulusu den getrow salfu futuboi fu en. Dan Babilon a Bigiwan, a grontapu makti fu falsi relisi sa pori dorodoro. Ma na ini a ten disi den nâsi e pruberi fu figi a soifri anbegi puru. A no sa teki langa moro, dan den legre fu Gog fu Magog sa opo kon feti nanga den futuboi fu Gado (Esekièl 38:1–39:13; Openbaring 17:1-5, 16-18). ¿A feti dati fu Satan sa waka bun gi en? ¡Nôno! Na a ten dati Yehovah sa masi den feanti fu en nanga atibron èn a sa masi den na ondro en futu neleki aleisi di sma e masi na tapu a gron pe den e masi aleisi. Ma a sa kibri den wan di e anbegi en nanga yeye èn nanga waarheid.—Yohanes 4:24.
13. Fa Habakuk 3:13 sa kon tru?
13 Nanga den wortu disi Habakuk ben taki na fesi taki den godelowsuwan ben o kisi pori dorodoro: „Yu [Yehovah] ben broko na ede fu na oso fu a godelowsuwan na pisipisi. Den ben meki a fondamenti kon de fu si, iya, te na a neki” (Habakuk 3:13). Na „oso” disi na a godelowsu seti di ben kon de ondro a krakti fu Satan Didibri. A sa broko na pisipisi. Na „ede”, noso den fesiman di de teige Gado, sa masi. A heri strukturu sa broko na pisipisi, te na a fondamenti fu en. A no sa de moro. ¡Dati sa de wan kefalek bun frulekti trutru!
14-16. San sa pasa nanga a pipel fu Yehovah èn nanga den feanti fu den, soleki fa Habakuk 3:14, 15 e sori?
14 Na Armagedon, den wan di e pruberi fu pori a „salfuwan” fu Yehovah sa bruya. Akruderi Habakuk 3:14, 15, a profeiti e taki nanga Yehovah, taki: „Nanga den eigi isri tiki fu en yu ben boro na ede fu den fetiman fu en di den ben kon leki wan bigi winti fu panya mi. A prisiri babari fu den ben de leki di fu den sma di e go fu nyan wan sma di e kisi kwinsi èn di de na ini wan kibripresi. Yu ben pasa go na ini a se nanga den asi fu yu, pasa go na ini a bun bigi watra.”
15 Te Habakuk e taki dati den „fetiman . . . ben kon leki wan bigi winti fu panya mi”, dan a profeiti e taki gi den salfu futuboi fu Yehovah. Neleki sma di e luru trawan fu fufuru den na strati, na so den nâsi sa dyompo opo na tapu den anbegiman fu Gado fu pori den. Den feanti disi fu Gado èn fu a pipel fu en sa bari wan „prisiri babari” fu di den e bribi taki den sa wini. A sa gersi leki getrow Kresten swaki, leki „wan sma di e kisi kwinsi”. Ma te den legre di de teige Gado e kon fu feti, dan Yehovah sa meki den drai den fetisani fu den teige densrefi. Den sa gebroiki den fetisani fu den, noso „isri tiki”, teige den eigi fetiman fu den.
16 Ma moro sani musu feni presi ete. Yehovah sa gebroiki den yeye legre di hei moro libisma, fu pori den feanti fu en dorodoro. Nanga den „asi” fu den hemel legre fu en na ondro Yesus Krestes, a sa pusu go na fesi ala di a e wini, pasa go na ini „a se” nanga „a bun bigi watra”, dati wani taki, a krasi ipi libisma di de feanti fu en (Openbaring 19:11-21). Dan den godelowsuwan sa puru fu grontapu. ¡Dati na wan kraktifasi fu sori a makti nanga a retidu fu Gado!
¡A Dei fu Yehovah E Kon!
17. (a) Fu san ede wi kan abi frutrow na ini a kontru fu den wortu fu Habakuk? (b) Fa wi kan de leki Habakuk ala di wi e wakti a bigi dei fu Yehovah?
17 Wi kan de seiker taki heri esi den wortu fu Habakuk sa kon tru. Den no sa meki wi wakti. San yu e du na tapu den sani disi di yu sabi na fesi? Prakseri taki Habakuk ben e skrifi na ondro a krakti fu a santa yeye. Yehovah sa handri, èn pori sa de na grontapu te dati e pasa. A no e fruwondru wi taki a profeiti ben skrifi: „Mi ben yere a sani, èn mi bere ben bigin drai; di mi ben yere a babari, dan den mofobuba fu mi bigin beifi; den bonyo fu mi ben bigin pori; èn a fasi fa mi ben de, mi ben bruya, taki mi ben musu wakti safri a dei fu banawtu, te a sa hari go feti nanga a pipel, so taki a kan fadon wantronso na den tapu” (Habakuk 3:16). Habakuk ben bruya srefisrefi—èn wi kan frustan dati. ¿Ma a bribi fu en ben kon swaki? ¡Kwetikweti! A ben de klariklari fu wakti safri tapu a bigi dei fu Yehovah (2 Petrus 3:11, 12). ¿A no so wi e denki tu? ¡Trutru! Wi e bribi tranga taki a profeititori fu Habakuk sa kon tru. Ma teleki a ten dati, wi sa wakti nanga pasensi.
18. ¿Ala di Habakuk ben fruwakti problema, toku san ben de a denki fu en?
18 Feti e tyari pina kon ala ten, srefi gi den sma di sa wini kande. Sma kan mankeri nyanyan. Sma kan lasi gudu. Den prenspari sani di sma abi fanowdu na materia sei e kon moro mendri kande. Efu dati e pasa nanga wi, dan san wi sa du? Habakuk ben abi wan denki di de wan eksempre gi wi, bika a ben taki: „Awansi a figabon srefi no e gi bromki, èn den droifibon no e gi froktu, awansi a wroko fu na olijfbon trutru no abi bun bakapisi, èn srefi den heipresi no e gi nyanyan trutru, awansi den koti den meti puru fu a koi trutru, èn no wan kaw no de inisei den presi di abi skotu — Toku fu mi sei, mi sa breiti pasa marki na ini Yehovah; mi sa de nanga prisiri nanga a Gado fu mi frulusu” (Habakuk 3:17, 18). Habakuk ben fruwakti problema, kande angriten, soleki fa a de trutru. Toku a no ben lasi a prisiri di a ben abi nanga Yehovah, di ben frulusu en.
19. Sortu problema furu Kresten abi, ma fu san wi kan de seiker efu wi e poti Yehovah na a fosi presi na ini wi libi?
19 Na ini a ten disi, srefi bifo a feti di Yehovah o feti nanga den godelowsusma, furu sma e pina fu hebi banawtu. Yesus ben taki na fesi dati feti, angriten, gronseki nanga pestsiki ben sa de wan pisi fu ’a marki fu en denoya’ ini kownu makti (Mateus 24:3-14; Lukas 21:10, 11). Furu fu den brada fu wi e libi na ini kondre di kisi fu du nanga a kontru fu den wortu fu Yesus na wan seryusu fasi, èn a bakapisi de taki den e ondrofeni bigi problema. Kande tra Kresten sa kisi fu du nanga den srefi sani disi na ini a ten di e kon. Gi furu fu wi, a kan taki ’a figabon no sa gi bromki’ bifo a kaba e kon. Ma wi sabi fu san ede den sani disi e feni presi, èn dati e gi wi krakti. Boiti dati, wi e kisi yepi. Yesus ben pramisi: „Fu dati ede, tan suku fosi a kownukondre nanga en [Gado] regtfardikifasi, èn ala den tra sani disi unu sa kisi tu” (Mateus 6:33). Dati no e gi wi a dyaranti taki wi sa abi wan makriki libi, ma a e gi wi a dyaranti taki efu wi e poti Yehovah na a fosi presi na ini wi libi, dan a sa luku wi.—Psalm 37:25.
20. Sortu fasti bosroiti wi musu abi, ala di wi e miti problema gi wan syatu pisi ten?
20 Awansi sortu problema wi musu miti gi wan syatu pisi ten, wi no sa lasi bribi na ini a makti di Yehovah abi fu frulusu wi. Furu fu wi brada nanga sisa na ini Afrika, Owstu-Europa, nanga tra presi e kisi fu du nanga seryusu problema, ma toku den e tan ’breiti pasa marki na ini Yehovah’. Neleki den, meki wi noiti no tapu fu du a srefi sani. Hori na prakseri taki a Soeverein Masra Yehovah na a Sma di e gi wi „nyun krakti” (Habakuk 3:19). Noiti a sa broko wi saka. Armagedon sa kon trutru, èn a nyun grontapu di Gado pramisi sa kon trutru na baka dati (2 Petrus 3:13). Dan „grontapu sa kon furu nanga a sabi di sma sa sabi a glori fu Yehovah, neleki fa den watra e tapu se” (Habakuk 2:14). Teleki a kefalek moi ten dati, meki wi waka na baka a bun eksempre fu Habakuk. Meki wi ala ten ’prisiri na ini Yehovah èn breiti nanga a Gado fu wi frulusu’.
¿Yu E Memre Disi Ete?
• Fa a begi fu Habakuk kan abi krakti na wi tapu?
• Fu san ede Yehovah de na pasi e kon?
• San a profeititori fu Habakuk e taki fu a frulusu di sma kan kisi?
• Nanga sortu denki wi musu wakti a bigi dei fu Yehovah?
[Aksi fu a tori disi]
[Prenki na tapu bladzijde 23]
¿Yu sabi sortu krakti Gado sa gebroiki teige den godelowsuwan na Armagedon?