San Na a Sroto fu Meki Sani Waka Bun?

TU YONGU man di ben lobi ondrosuku nyun sani, ben e wroko nanga spesrutu sistema fu sreka wan masyin di sma noiti ben si ete, fu pruberi en èn fu si efu a e wroko. Ma wantronso, wan bigi winti wai, grabu a swaki masyin, opo en go na loktu, èn nanga wan bun tranga babari a winti trowe en go na gron èn a broko en na pisipisi. Den man di ben lasi-ati, ben tanapu drape sondro fu taki wan sani. A tranga wroko fu den di den ben du finifini, ben e didon drape na ini wan ipi fu udu nanga isri.

A fruferi sani di ben pasa a dei dati nanga Orville nanga Wilbur Wright na ini oktober 1900 no ben de a fosi leisi taki wan sani no ben go bun di den ben pruberi fu bow wan opolani di hebi moro loktu. Na wan tu yari kaba den ben pruberi nyun sani èn den ben gebroiki furu moni kaba.

Ma te fu kaba, a hori di den ben horidoro ben abi bun bakapisi. Tapu 17 december 1903, na Kitty Hawk, North Carolina, na ini Amerkankondre, den brada Wright ben man meki a fosi opolani di ben e wroko nanga wan masyin, frei 12 sekonde langa — ¡a syatu te yu teki en gersi nanga o langa opolani e frei na ini a ten disi, ma a ben langa nofo fu kenki grontapu fu ala ten!

Nofotron, moro furu sani di sma e pruberi kan waka bun te den e horidoro nanga pasensi. Awansi na a leri di wan sma wani leri taki wan nyun tongo, noso a leri di a wani leri wan wroko, noso srefi a bigin di a wani bigin wan matifasi, moro furu sani di abi waarde wi kan kisi soso te wi e tan du muiti. „Neigi fu den tin leisi,” na so a skrifiman Charles Templeton e taki, „a waka di sani e waka bun, abi langalanga fu du nanga wán sani: tranga wroko.” A koranti skrifiman Leonard Pitts, Jr., e taki: „Wi e taki fu a talenti di sma abi, wi e erken a koloku di wan sma abi, ma furutron wi e frigiti den moro prenspari sani. A tranga wroko èn den furu leisi te sani no e waka bun. A kon di sma e kon fruku na wroko èn e gowe lati.”

Disi e buweisi san Bijbel ben taki langa ten pasa kaba: „Na anu fu a sma di de fayafaya, na a wan di sa tiri” (Odo 12:24). Fu de fayafaya wani taki dati wi musu horidoro na ini den muiti di wi e du. Disi de fanowdu efu wi wani doro san wi ben abi na prakseri. San na horidoro? Fa wi kan horidoro te wi e suku fu doro den marki fu wi, èn na ini sortu sani wi musu horidoro? Wi sa piki den aksi disi na ini na artikel di e kon now.

[Sma di abi a reti fu a prenki na tapu bladzijde 3]

Fowtow U.S. National Archives