Ondrofenitori

Yehovah Na Mi Kibripresi Nanga Mi Krakti

SOLEKI FA MARCEL FILTEAU BEN FRUTERI

„Efu yu e trow nanga en, dan yu sa go na strafu-oso seiker.” Dati na san sma ben taigi na uma di mi ben o trow. Meki mi fruklari fu san ede den ben taki so wan sani.

DI MI ben gebore na ini 1927, dan Quebec, a distrikt fu Kanada, ben de wan presi pe moro furu sma ben abi a Katolik bribi. So wan fo yari na baka, dan Cécile Dufour, wan furuten dinari fu Yehovah Kotoigi, ben bigin kon na wi oso na ini a foto Montreal. Fu dati ede, den birtisma fu wi nofotron ben de wan kefar gi a sisa disi. Fu taki en leti, den ben aresteri en èn ben handri takru nanga en furu leisi bika a ben preiki a boskopu fu Bijbel. So bun, heri esi wi ben kon frustan taki den wortu fu Yesus tru: „Unu sa de sani di no wan nâsi no wani si na ai fu mi nen ede.”—Mateus 24:9.

Na a ten dati, furu sma ben prakseri taki na wan sani di no kan kwetikweti taki wan osofamiri fu Kanada èn di e taki Fransitongo, e gowe libi a Katolik relisi fu den. Ala di noiti mi papa nanga mama ben tron dopu Kotoigi, toku den ben kon si heri esi taki den leri fu a Katolik Kerki no ben de akruderi Bijbel. Fu dati ede den ben gi den aiti pikin fu den deki-ati fu leisi den publikâsi fu den Kotoigi, èn den ben horibaka gi den wan fu wi di ben teki a sei fu a waarheid fu Bijbel.

Teki wan Bosroiti na ini Muilek Ten

Na ini 1942 di mi ben de na skoro ete, mi ben bigin abi trutru belangstelling gi bijbelstudie. A tirimakti ben tapu a wroko fu den Kotoigi fu Yehovah na a ten dati na ini Kanada, bika den ben waka na baka na eksempre fu den fosi Kresten èn den no ben wani abi noti fu du nanga den orloku fu den nâsi (Yesaya 2:4; Mateus 26:52). Den ben poti a moro owru brada fu mi, Roland, na ini wan strafuman wrokokampu bika a ben weigri fu  hori gon na ini a grontapufeti di ben e feti na a ten dati.

Pikinmoro na ini a ten disi, Papa ben gi mi wan buku na ini Fransitongo di ben e taki fu den pina di den Doisri Kotoigi ben pina bika den ben weigri fu horibaka gi den srudati aktiviteit fu Adolph Hitler. * Mi ben kisi deki-ati fu moksi misrefi nanga den deki-ati eksempre disi fu sma di e hori den soifri retifasi, èn mi ben bigin fisiti den konmakandra fu den Kotoigi fu Yehovah di ben hori na ini wan oso. Heri esi mi ben kisi a kari fu du a preikiwroko. Mi ben teki a kari disi ala di mi ben frustan heri bun taki sma ben sa kan aresteri mi èn poti mi na ini strafu-oso.

Baka di mi ben begi fu kisi krakti, mi ben naki na mi fosi doro. Wan uma di abi switifasi ben opo a doro, èn baka di mi ben taki suma na mi, dan mi ben leisi 2 Timoteus 3:16 gi en: „Na Gado ben meki sma skrifi ala den Buku fu Bijbel nanga yepi fu en santa yeye èn den bun.”

„¿Yu ben sa wani leri moro fu Bijbel?” mi ben aksi.

„Iya”, na uma ben piki.

Dati meki mi ben taigi en taki mi ben o kon nanga wan mati di ben sabi a Bijbel moro betre leki mi, èn a wiki na baka, mi ben tyari wan sisa go nanga mi. Baka a fosi ondrofeni dati, mi ben kisi moro frutrow, èn mi ben leri taki wi no e du wi diniwroko nanga wi eigi krakti. Soleki fa na apostel Paulus ben taki, wi e du dati nanga a yepi fu Yehovah. Iya, a de prenspari taki wi e frustan taki „a krakti di e pasa san de normaal, ben sa de fu Gado èn no fu wisrefi”.—2 Korentesma 4:7.

Baka dati, a preikiwroko ben tron wan sani di mi ben du ini mi libi doronomo, èn na so a ben de tu nanga na aresteri di sma ben aresteri mi èn ben poti mi na ini strafu-oso. Fu dati ede sma ben taigi na uma di mi ben o trow: „¡Efu yu e trow nanga en, dan yu sa go na strafu-oso seiker!” Ma den sortu ondrofeni disi no ben muilek trutru. Na baka di mi ben tan wan neti na ini strafu-oso, dan wan tra Kotoigi nofotron ben pai a lusu-moni fu puru wi na strafu.

Prenspari Bosroiti

Na ini april 1943 mi ben gi misrefi abra na Yehovah èn mi ben teki dopu na ini watra leki simbôl fu dati. Baka dati, na ini augustus 1944, mi ben fisiti mi fosi bigi kongres na ini Buffalo, New York, Amerkankondre, leti abrasei a grens fu Kanada. Twenti na feifi dusun sma ben de drape, èn a programa ben wiki na angri fu mi fu tron wan pionier, soleki fa den ben kari den furuten dinari fu Yehovah Kotoigi. Na ini mei 1945 a wroko fu Yehovah Kotoigi ben opo baka na ini Kanada, èn a mun na baka, mi ben bigin nanga a pionierwroko.

Ma so furu leki a diniwroko fu mi ben gro, na so furu leisi tu mi ben go na strafu-oso. Wan leisi  den ben poti mi na ini wan dungru-oso kamra nanga Mike Miller, wan getrow futuboi fu Yehovah di ben dini langa ten kaba. Wi ben sidon na tapu a ston gron èn ben taki. A takimakandra di wi ben abi di e tranga sma na yeye fasi, ben gi wi deki-ati èn ben gi mi krakti srefisrefi. Ma baka ten na aksi ben kon na ini mi prakseri taki, ’Fa a ben o de te wan kesekese ben o de na mindri wi èn te wi no ben o taki nanga makandra?’ A ten di mi ben de nanga a lobi brada disi na ini dungru-oso ben leri mi wan fu den moro moi les na ini mi libi — wi abi den brada fu wi fanowdu èn fu dati ede wi musu gi makandra pardon èn abi switifasi gi makandra. Noso, soleki na apostel Paulus ben skrifi: „Efu . . . unu e tan beti èn swari makandra, dan luku bun taki unu no e kiri makandra.”—Galasiasma 5:15.

Na ini september 1945, mi ben kisi a kari fu dini na a bijkantoro fu a Waktitoren Genootschap na ini Toronto, Kanada, di wi e kari Bethel. A programa di den ben abi na yeye fasi drape ben gi deki-ati fu tru èn a ben tranga mi bribi. A yari na baka, mi ben kisi a toewijzing fu wroko na a boerderij fu Bethel, so wan 40 kilometer na a noordsei fu a bijkantoro. Di mi ben e piki aardbeien nanga a yongu sisa Anne Wolynec, dan mi no ben si wawan taki a ben moi, ma so srefi taki a ben abi lobi èn faya gi Yehovah. Wi ben kon lobi makandra, èn wi ben trow na ini yanuari 1947.

Na ini tu nanga afu yari baka dati, wi ben pionier na ini London, Ontario, èn baka dati na Cape Breton Èilanti pe wi ben yepi fu seti wan gemeente. Baka dati, na ini 1949, wi ben kisi a kari fu go na a di fu 14 klas fu a Waktitoren Bijbelskoro Gilead, pe wi ben kisi leri fu tron zendeling.

Zendeling Wroko na ini Quebec

Den fosi Gilead zendeling fu Kanada ben kisi a toewijzing fu bigin a preikiwroko na ini Quebec. Na ini 1950, wi makandra nanga 25 trawan fu a di fu 14 klas fu wi ben moksi wisrefi nanga den. A zendeling wroko di ben gro ben tyari moro faya frufolgu nanga ogridu fu grupu sma, di den fesiman fu a Lomsu Katolik Kerki ben sutu faya gi.

Tu dei na baka di wi ben doro na ini wi fosi zendeling toewijzing na ini a foto Rouyn, dan skowtu ben aresteri Anne èn ben poti en na bakasei fu wan skowtu wagi. Disi ben de wan nyun ondrofeni gi en, fu di a ben kon fu wan pikin dorpu na ini a distrikt Manitoba, Kanada, pe pikinmoro noiti a ben si wan skowtu. Soleki fa wi kan fruwakti, a ben frede èn a ben memre den wortu baka: „Efu yu e trow nanga en, dan yu sa go na strafu-oso seiker.” Ma bifo den skowtu ben rèi gowe, den ben feni mi tu èn ben poti mi na ini a wagi nanga Anne. „¡Mi breiti trutru fu si yu!” a ben taki. Toku a ben bedari srefisrefi, èn ben taki: „We, a srefi sani ben pasa nanga den apostel bika den ben preiki fu Yesus” (Tori fu den Apostel 4:1-3; 5:17, 18). Baka ten na a dei dati, den ben lusu wi bika a lusu-moni ben pai.

Pikinmoro wan yari na baka a kefal dati, di wi ben de na ini na oso-fu-oso diniwroko na ini wi nyun toewijzing na ini Montreal, mi ben yere wan dyugudyugu na tapu na uku fu wan strati èn mi ben si wan ogri grupu sma ben e fringi ston. Di mi ben go fu yepi Anne nanga en kompe, dan den skowtu ben doro na a presi. ¡Na presi fu aresteri den memre fu na ogri grupu, dan den skowtu ben aresteri Anne nanga en kompe! Di den ben de na ini strafu-oso, dan Anne ben taigi a nyun Kotoigi taki den ben ondrofeni trutru san Yesus ben taki: „Unu sa de sani di no wan sma no wani si na ai fu mi nen ede.”—Mateus 10:22.

Wan leisi, so wan 1700 krutu afersi teige Yehovah Kotoigi ben musu krutu ete na krutubangi na ini Quebec. Moro furu den ben krutu wi taki wi ben e prati publikâsi di ben e gi sma deki-ati fu opo densrefi teige den tirimakti, noso taki wi ben e prati publikâsi sondro taki wi ben abi primisi fu du dati. Fu dati ede a Wettelijk Afdeling fu a Waktitoren Genootschap ben bigin du wan sani teige a tirimakti fu Quebec. Baka furu yari fu strei na ini wet, Yehovah ben meki wi wini tu bigi wini na ini a Hei Krutubangi fu Kanada. Na ini december 1950, wi ben kon krin fu a krutu di sma ben krutu wi taki den publikâsi fu wi ben e gi sma deki-ati fu opo densrefi teige den tirimakti, èn na ini oktober 1953, wi ben kisi a reti fu prati den Bijbel publikâsi fu wi sondro taki wi abi primisi fanowdu gi dati. Na so fasi wi ben si na wan krinkrin fasi fa Yehovah de trutru wan „kibripresi gi wi nanga wan krakti, wan yepi di de fu feni makriki na ini ten fu banawtu”.—Psalm 46:1.

¡A de moi fu si taki a nomru fu Kotoigi na ini  Quebec ben gro fu 356 Kotoigi na ini 1945 di mi ben bigin pionier, kon tron moro leki 24.000 Kotoigi na ini a ten disi! A kon tron fu tru leki fa a Bijbel profeititori ben taki na fesi: „No wan fetisani di den sa meki teige yu sa abi bun bakapisi, èn no wan tongo di sa opo teige yu na ini a krutu, yu sa krutu.”—Yesaya 54:17.

A Wroko fu Wi na ini Fransikondre

Na ini september 1959, Anne nanga mi ben kisi a kari fu dini na Bethel na ini Parijs, Fransikondre, pe mi ben kisi a toewijzing fu teki fesi na ini a wroko fu druk publikâsi. Teleki a ten di wi ben doro drape na ini yanuari 1960, wan bedrijf ben druk den publikâsi. Fu di na ini a ten dati lanti ben tapu a wroko fu druk The Watchtower na ini Fransikondre, meki wi ben druk a tijdschrift ibri mun leki wan brochure fu 64 bladzijde. A brochure ben nen The Interior Bulletin of Jehovah’s Witnesses, èn a ben abi den studie artikel na ini di ben musu studeri na ini den gemeente na ini a mun dati. Fu 1960 te go miti 1967, a nomru fu sma di ben du a preikiwroko na ini Fransikondre ben gro fu 15.439 Kotoigi go na 26.250 Kotoigi.

Te fu kaba, moro furu zendeling ben kisi tra toewijzing fu go na tra presi, èn wan tu fu den ben seni go na Fransitongo kondre na ini Afrika èn trawan ben seni go baka na Quebec. Fu di Anne ben siki èn ben musu kisi wan oparâsi, meki wi ben drai go baka na Quebec. Baka dri yari di a ben kisi datra yepi, Anne ben kon gosontu baka. Dan mi ben kisi a toewijzing fu du a kringwroko, fu fisiti wan tra gemeente ibri wiki fu gi den deki-ati na yeye fasi.

Zendeling Wroko na ini Afrika

Wan tu yari na baka, na ini 1981, wi ben breiti fu kisi wan nyun toewijzing leki zendeling na ini Zaire, di de now a Demokrasia Republiek Kongo. Den sma ben pôti èn den ben ondrofeni furu problema. ¡Di wi ben doro, dan 25.753 Kotoigi ben de drape, ma na ini a ten disi a nomru dati kon tron moro leki 113.000 Kotoigi, èn 446.362 sma ben fisiti a Memrefesa fu Krestes dede, na ini 1999!

Na ini 1984 wi ben kisi wan pisi gron fu 200 hectare fu lanti, fu bow wan nyun bijkantoro. Baka dati, na ini december 1985, wan internationaal kongres ben hori na ini na edefoto Kinshasa, nanga 32.000 fisitiman fu furu kondre na grontapu. Baka dati, wan gens di den kerki fesiman ben sutu faya gi, ben bruya a wroko fu wi na ini Zaire. Tapu 12 maart 1986, den brada di ben abi a frantwortu ben kisi wan brifi di ben fruklari taki na organisâsi fu Yehovah Kotoigi na ini Zaire no ben de akruderi wet. A handtekening fu a presidenti fu a kondre, di dede no sa langa pasa ete, Mobutu Sese Seko, ben de na tapu a brifi disi di ben tapu ala den aktiviteit fu wi.

Bika fu den sani disi di ben feni presi wantronso, wi ben musu handri akruderi a rai fu Bijbel: „A sma di si a rampu èn go kibri, koni” (Odo 22:3). Wi ben feni wan tu fasi fu kisi papira, enki, film, nanga plaat fu druk, nanga chemicaliën fu dorosei kondre, fu druk den publikâsi fu wi na ini Kinshasa. Wi ben abi wi eigi sistema tu fu prati den publikâsi. ¡Di wi ben orga kaba, dan a sistema fu wi ben wroko moro bun leki a post kantoro fu lanti!

Den ben aresteri dusundusun Kotoigi, èn sma ben gi furu fu den kefalek ogri-ati skin-ati. Toku, boiti wan tu nomo, den ben tanapu kánkan ala di sma ben handri so nanga den èn den ben tan getrow. Den ben aresteri mi tu èn mi ben si den kefalek takru situwâsi pe den brada fu wi ben de na ini, na ini strafu-oso. Furu leisi den sikrit skowtu nanga den tirimakti ben poti druk na wi tapu na furu fasi, ma ala ten Yehovah ben sorgu taki wi ben komoto na ondro a druk.—2 Korentesma 4:8.

Wi ben kibri so wan 3000 karton dosu nanga buku na ini a maksin fu wan bisnisman. Ma te fu kaba, wan fu den wrokoman fu en ben fruteri den sikrit skowtu, èn den skowtu ben aresteri a bisnisman. Di den ben e go na strafu-oso dan den ben miti mi na ini mi wagi. A bisnisman ben taigi den taki mi ben de a sma di ben seti a sani nanga en fu poti den publikâsi na ini a maksin. Den skowtu ben stop èn den ben aksi mi sani fu dati, èn den ben kragi mi taki mi ben poti buku di no de akruderi wet na ini a maksin fu a man disi.

„¿Yu abi wan fu den buku disi?” mi ben aksi.

 „Iya, seiker” den ben piki.

„¿Mi kan si en?” mi ben aksi.

Den ben tyari wan gi mi, èn mi ben sori den na inisei bladzijde, pe ben skrifi: „A Watch Tower Bible & Tract Society druk en na ini Amerkankondre.”

„A sani di yu abi na ini yu anu na Amerkan sani èn a no fu Zaire”, mi ben memre den. „A tirimakti fu yu tapu a corporatie fu na organisâsi fu Yehovah Kotoigi na ini Zaire di de akruderi wet èn den no tapu a Watch Tower Bible & Tract Society fu Amerkankondre. Fu dati ede unu musu luku bun san unu e du nanga den publikâsi disi.”

Den ben gi mi primisi fu gowe bika den no ben abi primisi fu krutubangi taki den kan aresteri mi. A neti dati, wi ben tyari tu truck go na a maksin èn ben puru den publikâsi na ini. Di den lantiman ben kon a dei na baka, dan den ben atibron di den ben si taki a presi ben leigi. Na a ten dati den ben e suku mi, fu di now den ben abi primisi fu krutubangi fu kan aresteri mi. ¡Den ben feni mi, èn fu di den no ben abi wagi, dan misrefi ben rèi misrefi go na strafu-oso! Wan tra Kotoigi ben go nanga mi so taki a ben kan tyari mi wagi gowe bifo den ben o hori a wagi gi densrefi.

Baka di den ben poti aksi gi mi so wan aiti yuru langa, den ben bosroiti fu seni mi gowe fu a kondre. Ma mi ben sori den wan kopi fu wan lanti brifi di e buweisi taki mi kisi a toewijzing fu seri den gudu fu na organisâsi fu Yehovah Kotoigi na ini Zaire di lanti ben tapu na a ten dati. Na so fasi mi ben kisi na okasi fu go doro nanga mi wroko na Bethel.

Fo yari na baka di mi ben dini na ondro a druk fu a tapu di a wroko ben tapu na ini Zaire, mi ben kisi wan sweri na ini mi bere èn di ben e brudu èn di ben de wan kefar gi mi libi. A bosroiti ben teki dati mi ben musu gowe fu kisi datrayepi na ini Zuid-Afrika, pe a bijkantoro ben sorgu bun gi mi, èn mi ben kon betre baka. Baka di wi ben dini aiti yari na ini Zaire, di ben de wan aparti èn prisiri ondrofeni, wi ben froisi go na a bijkantoro fu Zuid-Afrika na ini 1989. Na ini 1998 wi ben drai go baka na a mamakondre fu wi èn fu sensi a ten dati wi ben e dini baka na Bethel na ini Kanada.

Tangi fu Man Dini

Te mi e prakseri den 54 yari na ini a furuten diniwroko, dan mi de so tangi taki mi ben gebroiki mi yongu krakti na ini a prenspari diniwroko fu Yehovah. Ala di Anne ben musu ondrofeni furu situwâsi di ben de wan tesi, toku a no ben kragi, ma a ben yepi mi na ini ala den aktiviteit fu wi. Makandra wi ben abi a grani fu yepi furu sma fu kon sabi Yehovah, èn wan tu fu den de now na ini a furuten diniwroko. ¡A e gi furu prisiri fu si den pikin fu den èn srefi den granpikin fu den e dini wi gran Gado, Yehovah!

Mi abi na overtoigi taki a grontapu disi no kan gi noti di yu kan gersi nanga den grani èn nanga den blesi di Yehovah gi wi. A tru, wi ben ondrofeni furu tesi, ma den alamala ben tranga a bribi fu wi nanga a frutrow fu wi na ini Yehovah. A ben sori trutru taki a de wan toren di e gi krakti, wan kibripresi, èn wan yepi di de wantewante fu feni na ini nowtu.

[Futuwortu]

[Prenki na tapu bladzijde 26]

Wi ben e pionier makandra na ini 1947; nanga Anne na ini a ten disi

[Prenki na tapu bladzijde 29]

Den sma di wi ben miti na ini Zaire ben lobi a waarheid fu Bijbel