Kon Sabi „a Denki fu Krestes”
Kon Sabi „a Denki fu Krestes”
„’Suma kon sabi a denki fu Yehovah, taki a kan gi en leri?’ Ma wi trutru abi a denki fu Krestes.”—1 KORENTESMA 2:16.
1, 2. San Yehovah ben feni bun fu tyari kon na krin fu Yesus, na ini en Wortu?
FA YESUS ben tan? Sortu kloru en wiwiri ben abi? en skin? en ai? O langa a ben de? Omeni a ben wegi? Na ini den furu yarihondro di pasa, artiest ben pruberi fu prenki Yesus na difrenti fasi, na wan reidelek fasi èn so srefi na wan fasi di no kan srefisrefi. Son sma ben prenki en leki wan man di fayafaya èn di tranga, ala di trawan ben prenki en leki wan sma di swaki èn di ben lasi kloru.
2 Ma Bijbel no e poti prakseri na a fasi fa Yesus en skin ben gersi. Na presi fu dati, Yehovah ben feni en moro bun fu tyari wan moro prenspari sani kon na krin: a sortu sma di Yesus ben de. Den Evangelie tori no e fruteri wawan san Yesus ben taki èn ben du, ma den ben sori so srefi den dipi firi fu en èn a fasi fa a ben denki, di de a fondamenti fu den wortu fu en èn fu den sani di a ben du. Den fo tori disi di sma skrifi nanga yepi fu Gado en santa yeye, e yepi wi fu ondrosuku pikinso san na a sani di na apostel Paulus ben kari „a denki fu Krestes” (1 Korentesma 2:16). A prenspari taki wi e kon sabi den prakseri, den firi, nanga a persoonlijkheid fu Yesus. Fu san ede? Fu no moro mendri leki tu sani.
3. Sortu inzicht a kan gi wi te wi kon sabi a denki fu Krestes?
3 Fosiwan, a denki fu Krestes e yepi wi pikinso fu si a denki fu Yehovah Gado. Yesus ben sabi en Tata so kefalek bun dati a ben kan taki: „Boiti a Tata, no wan sma no sabi suma na a Manpikin; èn boiti a Manpikin no wan sma no sabi suma na a Tata, èn iniwan sma gi suma a Manpikin wani tyari En kon na krin” (Lukas 10:22). A de neleki Yesus ben e taki: ’Efu yu wani kon sabi fa Yehovah tan, dan yu musu luku mi’ (Yohanes 14:9). So bun, te wi e studeri san den Evangelie e taki fu a fasi fa Yesus ben prakseri èn ben firi, dan fu taki en leti, wi e leri fa Yehovah e denki èn e firi. A sabi disi e yepi wi fu kon moro krosibei na wi Gado.—Yakobus 4:8.
4. Efu wi musu handri trutru leki Krestes, dan san wi musu leri fosi, èn fu san ede?
4 Di fu tu, te wi sabi a denki fu Krestes, dan dati e yepi wi fu „waka soifri na ini en futustap” (1 Petrus 2:21). Fu waka na baka Yesus a no soso dati wi musu taki den wortu fu en baka èn du san a ben du. Den sani di wan sma e taki èn e du, e kon fu a fasi fa a e prakseri èn den firi fu en di abi krakti na en tapu. Efu wi wani waka na Krestes baka, dan wi musu leri a srefi „fasi fu denki” di a ben abi (Filipisma 2:5). Nanga tra wortu, efu wi musu handri trutru leki fa Krestes ben handri, dan wi musu leri fosi fu denki èn firi leki en, dati wani taki, wi musu du dati so bun leki wi man leki onvolmaakti libisma. Fu dati ede, meki wi nanga a yepi fu den Evangelie skrifiman, go luku na ini a denki fu Krestes. Fosi, wi sa taki fu afersi di ben abi krakti tapu a fasi fa Yesus ben denki èn ben firi.
A Libi fu En Bifo A Ben Tron Libisma
5, 6. (a) Sortu krakti den kompe fu wi kan abi na wi tapu? (b) Sortu demakandra a fosi gebore Manpikin fu Gado ben abi na ini hemel bifo a ben kon na grontapu, èn sortu krakti disi ben abi na en tapu?
5 Den krosibei kompe fu wi kan abi krakti na wi tapu, den abi krakti tapu den prakseri fu wi, den firi fu wi, èn tapu den sani di wi e du, na wan bun fasi noso na wan takru fasi * (Odo 13:20). Luku a demakandra di Yesus ben abi na ini hemel bifo a ben kon na grontapu. Na Evangelie fu Yohanes e taki fu a libi fu en bifo Yesus ben tron wan libisma, taki a ben de „a Wortu”, noso a Takiman fu Gado. Yohanes e taki: „Na ini a bigin a Wortu ben de, èn a Wortu ben de nanga Gado, èn a Wortu ben de wan gado. A wan disi ben de nanga Gado na ini a bigin” (Yohanes 1:1, 2). Fu di Yehovah no ben abi wan bigin, meki a de di a Wortu ben de nanga Gado fu sensi „a bigin”, ben musu wani taki fu a bigin di Gado ben bigin kria sani (Psalm 90:2). Yesus na „a fosi geborewan fu ala den sani di Gado kria”. So bun, a ben de kaba bifo Gado ben kria den tra yeye kriaturu èn a trutru universum.—Kolosesma 1:15; Openbaring 3:14.
6 Soleki fa sabidensiman e denki, dan a trutru universum de so wan 12 milyard yari kaba. Efu a fasi dati fu bereken a ten de pikinmoro yoisti, dan a fosi gebore Manpikin fu Gado ben abi krosibei matifasi nanga en Tata milyardmilyard yari kaba bifo Gado ben kria Adam. (Teki gersi Mika 5:2.) Na so fasi wan lobi-ati èn tranga banti ben kon de na mindri Gado nanga en Manpikin. Leki koni di prenki leki libisma, a fosi gebore Manpikin disi di ben libi kaba bifo a ben tron libisma, ben e taki: „Mi ben tron a sma di spesrutu [Yehovah] ben abi waran firi gi dei na dei, èn mi ben breiti na en fesi ala ten” (Odo 8:30). ¡Fu tru, a kefalek langa pisi ten di a ben abi krosibei demakandra nanga a Sma pe lobi bigin, ben abi wan tranga krakti tapu a Manpikin fu Gado! (1 Yohanes 4:8) A Manpikin disi ben kon sabi èn ben sori den prakseri, den firi, nanga den fasi fu en Tata, na wan fasi di no wan tra sma ben sa kan du.—Mateus 11:27.
En Libi na Grontapu, èn Sani Di Ben Abi Krakti na En Tapu
7. San na wan fu den reide fu san ede a ben de prenspari taki a fosi gebore Manpikin fu Gado ben musu kon na grontapu?
7 A Manpikin fu Gado ben abi fu leri moro sani, bika a ben de a prakseri fu Gado fu sreka en Manpikin fu meki a tron wan Granpriester di abi sari-ati, di man „firi nanga wi na ini den swakifasi fu wi” (Hebrewsma 4:15). Fu man doro den markitiki gi a frantwortu disi ben de wan fu den reide fu san ede a Manpikin ben musu kon na grontapu leki wan libisma. Dyaso, leki wan libisma fu skin nanga brudu, Yesus ben kon na ini situwâsi èn na ini sani di ben kan abi krakti na en tapu, di fositen a ben si soso komoto fu pe a ben de na hemel. Now ensrefi ben man ondrofeni den firi nanga den emotie fu libisma. Son leisi a ben weri, watra ben kiri en, èn angri ben kiri en (Mateus 4:2; Yohanes 4:6, 7). Moro leki dati srefi, a ben ondrofeni ala sortu problema nanga pina. Na so fasi a „ben leri fu gi yesi” èn a ben doro den markitiki dorodoro fu du en frantwortu leki Granpriester.—Hebrewsma 5:8-10.
8. San wi sabi fu a bigin fu Yesus en libi na grontapu?
8 Fa a de nanga den sani di Yesus ben ondrofeni na ini a bigin fu en libi na grontapu? A tori fu en pikin-nengreten syatu srefisrefi. Fu taki en leti, soso Mateus nanga Lukas ben fruteri den sani di ben feni presi na a ten di a ben gebore. Den Evangelie skrifiman ben sabi taki Yesus ben libi na ini hemel bifo a ben kon na grontapu. Moro leki iniwan tra sani, a ben de a libi dati di a ben libi bifo a ben tron libisma, di ben fruklari sortu sma a ben tron. Ma toku Yesus ben de wan libisma trutru. Ala di a ben volmaakti, toku a ben gro leki beibi kon tron wan pikin-nengre èn fu wan tini kon tron wan bigisma, ala di a ben e leri sani (Lukas 2:51, 52). Bijbel e sori wi wan tu sani fu Yesus en libi na grontapu di trutru ben abi krakti na en tapu.
9. (a) San e sori taki Yesus ben gebore na ini wan pôti osofamiri? (b) Na ini sortu situwâsi Yesus ben gro kon bigi kande?
9 Soleki fa buweisi e sori, dan Yesus ben gebore na ini wan pôti osofamiri. Disi de fu si na a òfer di Yosef nanga Maria ben tyari go na a tempel so wan 40 dei na baka di Yesus ben gebore. Na presi fu tyari wan yongu bokoboko leki wan bron-ofrandi èn wan yongu osodoifi noso wan stondoifi leki wan sondu-ofrandi, den ben tyari „tu stondoifi noso tu yongu osodoifi” (Lukas 2:24). Akruderi a Wet fu Moses, na ofrandi disi ben de wan seti gi den pôti sma (Lefitikus 12:6-8). Baka ten na osofamiri disi di abi sakafasi, ben kon moro bigi. Yosef nanga Maria ben abi kande ete siksi tra pikin na wan natuurlijk fasi, baka di Yesus ben gebore na wan wondru fasi (Mateus 13:55, 56). So bun, Yesus ben gro kon bigi na ini wan bigi osofamiri, kande na ini bescheiden situwâsi.
10. San e sori taki Maria nanga Yosef ben de sma di ben abi frede gi Gado?
10 Yesus ben kisi kweki fu papa nanga mama di ben abi frede gi Gado èn di ben lobi en. En mama, Maria, ben de wan tumusi bun uma. Prakseri taki di na engel Gabriel ben gi en odi, dan na engel ben taki: „Odi, yu di kisi furu grani, Yehovah de nanga yu” (Lukas 1:28). Yosef tu ben de wan loyaal man. Ibri yari na wan getrow fasi a ben go 150 kilometer na Yerusalem gi a Paskafesa. Maria ben go tu, ala di soso mansma ben de fruplekti fu go (Exodus 23:17; Lukas 2:41). Wan fu den leisi disi, baka di Yosef nanga Maria ben suku Yesus fayafaya, den ben feni Yesus di ben abi 12 yari na ini a tempel na mindri den leriman. Yesus ben taigi en papa nanga mama di ben e broko den ede: „¿Unu no ben sabi taki mi musu de na ini na oso fu mi Tata?” (Lukas 2:49). „Tata” — a wortu dati ben musu meki a yongu Yesus kisi wan bun èn waran firi. A ben de so kande taki den ben taigi en taki Yehovah ben de en trutru Tata. Na tapu fu dati, Yosef ben musu de wan bun kweki-papa gi Yesus. ¡Fu tru, Yehovah no ben o teki wan grofu noso ogri-ati man fu kweki En lobi Manpikin!
11. Sortu wroko Yesus ben leri, èn san a wroko disi ben wani taki na ini Bijbel ten?
11 Na ini den yari di a ben de na ini Nasaret, Yesus ben leri a temreman wroko, kande fu en kweki-papa, Yosef. Jesus ben musu sabi a wroko heri bun fu di sma ben kari en „a temreman” (Markus 6:3). Na ini Bijbel ten den temreman ben e bow oso, ben meki meubel (so srefi tafra, sturu, nanga bangi), èn e meki wrokosani fu du gronwroko. Na ini en Dialogue With Trypho, Justin Martyr, fu a di fu tu yarihondro G.T., ben skrifi fu Yesus: „A ben abi a gwenti fu wroko leki wan temreman di a ben de na mindri libisma, ala di a ben meki plugu nanga tyatyari.” A wroko disi no ben makriki, bika a fositen temreman kande no ben man bai en udu. A ben sa kan de moro so, taki a ben musu go suku wan bon, koti a bon, èn tyari na udu go na oso. So bun, Yesus ben sa sabi den tyalensi kande fu wroko moni èn sorgu ensrefi, fu du bisnis nanga baiman, èn fu drai wan osofamiri na monisei.
12. San e sori taki kande Yosef dede bifo Yesus, èn san disi ben sa wani taki gi Yesus?
12 Leki a moro owru manpikin, Yesus ben yepi kande fu sorgu gi na osofamiri, spesrutu fu di a gersi taki Yosef dede bifo Yesus dede. * Zion’s Watch Tower fu 1 yanuari 1900 ben taki: „Den gwenti fu sma e sori taki Yosef dede di Yesus ben yongu ete, èn taki Yesus ben bigin nanga a temreman wroko èn ben tron a sma di ben sorgu gi na osofamiri. Wan buweisi fu disi de na ini Bijbel pe den e kari Yesus srefi wan temreman, èn den e kari en mama nanga den brada fu en tu, ma Yosef den no e kari (Markus 6:3). . . . So bun, a kan srefisrefi taki a langa pisi ten fu tin na aiti yari fu a libi fu wi Masra, fu a ten di a sani disi ben pasa [di skrifi na Lukas 2:41-49] te go miti a ten fu en dopu, Yesus ben gebroiki fu du den wroko di abi fu du nanga na aladei libi.” Maria nanga den pikin fu en, so srefi Yesus, ben sabi kande a pen di de te wan lobi masra nanga papa dede.
13. Di Yesus ben bigin nanga en diniwroko, dan fu san ede a ben abi koni, inzicht, nanga a dipi firi di no wan tra sma ben kan abi?
13 A de krin taki Yesus no ben gebore na ini wan libi di ben makriki. Na presi fu dati, ensrefi ben ondrofeni langalanga fa den gewoon sma e libi. Baka dati, na ini 29 G.T., a ten ben kon gi Yesus fu du a wroko di Gado ben gi en èn di ben wakti en. Na ini a herfst fu a yari dati, a ben dopu na ini watra èn a ben gebore leki wan yeye Manpikin fu Gado. ’Den hemel ben opo gi en’, èn disi wani taki kande taki now a ben kan memre a libi di a ben abi na ini hemel bifo a ben tron wan libisma, so srefi den prakseri nanga den firi di a ben abi fosi (Lukas 3:21, 22). So bun, di Yesus ben bigin nanga en diniwroko, dan a ben abi sabi, inzicht, èn dipi firi di no wan tra sma ben kan abi. Na fu dati ede den Evangelie skrifiman ben skrifi furu sani di abi fu du nanga sani di pasa na ini a diniwroko fu Yesus. Na so a ben de tu taki den no ben man skrifi ala sani srefi di a ben taki èn ben du (Yohanes 21:25). Ma den sani di Gado ben meki den skrifi nanga yepi fu en santa yeye, e yepi wi fu ondrosuku a denki fu a moro bigi man di oiti ben libi.
Fa Yesus Ben De Leki wan Sma
14. Fa den Evangelie e prenki Yesus leki wan man di abi safu waran firi èn dipi firi?
14 A persoonlijkheid fu Yesus di wi e si na ini den Evangelie na di fu wan man di abi safu waran firi èn dipi firi. A ben sori furu difrenti sortu tranga firi: a ben firi sari gi wan gwasiman (Markus 1:40, 41); a ben hati en taki a pipel no ben arki (Lukas 19:41, 42); nanga reti a ben atibron nanga den gridi sma di ben wissel moni (Yohanes 2:13-17). Leki wan man di e firi nanga tra sma, Yesus ben kan krei tu, èn a no ben kibri den firi fu en. Di en lobi mati Lasarus dede, èn a ben si Maria, Lasarus sisa, ben e krei, dan dati ben naki Yesus ati so kefalek taki ensrefi ben bigin krei, èn a ben krei na wan fasi di tra sma ben kan si heri bun.—Yohanes 11:32-36.
15. Fa den safu firi fu Yesus ben de fu si na a fasi fa a ben denki fu tra sma èn fa a ben handri nanga den?
15 Den safu firi fu Yesus ben de spesrutu fu si na a fasi fa a ben prakseri fu tra sma èn a fasi fa a ben handri nanga den. A ben wani yepi den pôtiwan nanga den wan di de ondro kwinsi, fu den man ’feni kowru-ati gi den sili’ (Mateus 11:4, 5, 28-30). A no ben abi en tumusi druk fu du wan sani gi den nowtu fu den wan di ben pina, awansi a ben de wan uma di ben e lasi brudu èn di ben fasi En krosi safri, noso wan breni begiman di no ben wani tapu fu begi en (Mateus 9:20-22; Markus 10:46-52). Yesus ben suku bun sani na ini tra sma èn ben prèise den; toku a ben de klariklari fu gi piri-ai te a ben de fanowdu (Mateus 16:23; Yohanes 1:47; 8:44). Na ini wan ten pe umasma no ben abi furu reti, Yesus ben handri den nanga wartifasi èn nanga lespeki na wan fasi di de na ini balansi (Yohanes 4:9, 27). Wi kan frustan fu dati ede taki wan grupu uma ben de klariklari fu dini en nanga den eigi gudu fu den.—Lukas 8:3.
16. San e sori taki Yesus ben abi wan balansi fasi fu denki fu a libi èn fu materia sani?
16 Yesus ben abi wan balansi fasi fu denki fu a libi. Materia sani no ben de a moro prenspari sani gi en. Na materia sei a gersi leki a ben abi kefalek pikinso sani nomo. A ben taki dati a no ben abi „no wan presi fu poti en ede” (Mateus 8:20). Na a srefi ten, Yesus ben meki taki tra sma ben abi prisiri. Di a ben fisiti wan trowfesa — wan trutru okasi pe poku, singi, nanga prisiri de — a de krin taki a no ben drape fu pori a prisiri fu trawan. Iya, Yesus ben du en fosi wondru drape. Di a win ben kaba, dan a ben meki watra tron bun win, wan dringi di „e meki na ati fu sma di e dede, prisiri” (Psalm 104:15; Yohanes 2:1-11). Na so fasi a fesa ben kan go doro, èn a trowmisi nanga a trowmasra no ben kisi syen. A balansi fasi fu en de fu si tu na ini den furu okasi di kari pe Yesus ben wroko langa èn tranga na ini en diniwroko.—Yohanes 4:34.
17. Fu san ede a no e fruwondru wi taki Yesus ben de wan Gran Leriman, èn san den leri fu en e sori?
17 Yesus ben de wan Gran Leriman. Furu fu den sani di a ben leri sma ben abi fu du nanga sani di de trutru so na ini na aladei libi, sani di a ben sabi heri bun (Mateus 13:33; Lukas 15:8). No wan sma ben man gi leri leki fa en ben gi leri — en leri ben krin fu frustan, eenvoudig, èn sma ben kan gebroiki den. Ma wan sani di ben moro prenspari, ben de den sani di a ben leri sma. Den leri fu en ben sori a trutru angri di a ben abi fu meki den arkiman fu en kon sabi den prakseri, den firi, nanga den fasi fu Yehovah.—Yohanes 17:6-8.
18, 19. (a) Nanga sortu krinkrin agersitori Yesus ben sori suma na en Tata? (b) Fu san wi sa taki na ini na artikel di e kon?
18 Nanga a fasi fa Yesus ben e gebroiki agersitori furutron, a ben sori suma na en Tata, fu di a ben gebroiki krinkrin wortu di sma no ben sa kan frigiti esi. A makriki fu taki na wan algemeen fasi fu a sari-ati fu Gado. Ma a de wan heri tra sani fu gersi Yehovah nanga wan papa di e gi pardon èn di en ati e naki en so kefalek te a e si en manpikin e drai kon baka, taki a ’e lon èn e brasa en èn e bosi en na wan safu fasi’ (Lukas 15:11-24). Yesus no ben erken a strak kulturu pe den relisi fesiman ben wisiwasi a gewoon pipel, ma a ben fruklari taki en Tata ben de wan Gado di sma kan taki makriki nanga En èn di ben arki den begi fu a belastingman di ben abi sakafasi, na presi fu arki a skepi Fariseiman di ben meki bigi nanga a begi fu en (Lukas 18:9-14). Yesus ben prenki Yehovah leki wan Gado di e sorgu gi sma èn di sabi te wan pikin fowru e fadon na gron. „No frede”, Yesus ben gi den disipel fu en a dyaranti, „unu warti moro leki furu pikin fowru” (Mateus 10:29, 31). Wi kan frustan fu dati ede taki furu sma ben fruwondru fu „a fasi fa [Yesus] e gi leri”, èn dati ben hari den kon na en (Mateus 7:28, 29). ¡Iya, wan leisi „wan bigi ipi” sma ben tan na en dri dei langa, srefi sondro nyanyan!—Markus 8:1, 2.
19 ¡Wi kan de nanga tangi taki Yehovah ben sori wi a denki fu Krestes na ini En Wortu! Ma fa wi kan kisi èn sori a denki fu Krestes na ini a fasi fa wi e handri nanga tra sma? Wi sa taki fu disi na ini a tra artikel.
[Futuwortu]
^ paragraaf 5 Openbaring 12:3, 4, e sori taki den kompe fu den yeye kriaturu kan abi krakti na den tapu. Drape a e kari Satan wan „draak” di ben man gebroiki en makti fu kori tra „stari”, noso yeye manpikin, fu meki opruru nanga en.—Teki gersi Yob 38:7.
^ paragraaf 12 A lasti leisi di den e taki langalanga fu Yosef ben de di den ben feni Yesus di ben abi 12 yari, na ini a tempel. Na no wan presi den e taki dati Yosef ben de na a trowfesa na ini Kana, na a bigin fu Yesus en diniwroko (Yohanes 2:1-3). Na ini 33 G.T., Yesus di ben anga na a postu, ben gi a lobi apostel Yohanes a frantwortu fu sorgu gi Maria. Soleki fa a sori, dati na wan sani di Yesus no ben o du efu Yosef ben de na libi ete.—Yohanes 19:26, 27.
¿Yu E Memre Disi Ete?
• Fu san ede a de prenspari taki wi e kon sabi „a denki fu Krestes”?
• Sortu demakandra Yesus ben abi na ini en libi bifo a ben tron wan libisma?
• Na ini en libi na grontapu, sortu situwâsi nanga sani di ben abi krakti na en tapu, Yesus ben ondrofeni ensrefi?
• San den Evangelie e sori fu a persoonlijkheid fu Yesus?
[Aksi fu a tori disi]
[Prenki na tapu bladzijde 10]
Yesus ben gro kon bigi na ini wan bigi osofamiri, kande na ondro bescheiden situwâsi
[Prenki na tapu bladzijde 12]
Den leriman ben fruwondru fu a frustan nanga den piki fu Yesus, di a ben abi 12 yari