¡Tan na Dorosei fu a Kontren Pe Kefar De!

A DE a wroko fu den sabidensiman di e ondrosuku vulkaantori fu luku fa sani fu a vulkaan e waka èn fu luku san den marki wani taki di e sori taki wan vulkaan e wroko èn baka dati den musu warskow sma te a vulkaan o sutu. (Baka di Fugenbergi ben sutu, dan skowtu ben musu hori den sma na dorosei fu a kontren pe kefar ben de.) Na a srefi fasi, bijbelstudenti e ondrosuku a marki di e sori san na „a bosroiti fu a seti fu sani” èn den e warskow trawan fu a kefar di e kon.​—Mateus 24:3.

Na ini a srefi kapitel fu Bijbel di e warskow wi fu wan rampu di o kon na heri grontapu, wi kan leisi san skrifi fu den sani di musu pasa fosi: „Nâsi sa opo go feti nanga nâsi èn kownukondre nanga kownukondre, èn na a wan presi baka a trawan mankeri fu nyanyan nanga bigi gronseki sa de. . . . Furu falsi profeiti sa kon èn kori furu sma; èn fu di kruktudu sa kon moro furu, meki a lobi fu moro furu sma sa kon kowru. . . . Èn a bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon.”—Mateus 24:7-14.

A no de fanowdu taki wi musu de sma di e ondrosuku a nyunsu finifini fu si krin fa a profeititori disi e kon tru nownowde. Wi ondrofeni dati, spesrutu sensi 1914. A yarihondro disi ben abi tu grontapufeti, bun furu feti na mindri borgu, feti di den feti na spesrutu presi, èn trobi na mindri sma fu difrenti ras èn na mindri sma fu difrenti relisi. Libisma pina tu fu a mankeri di nyanyan mankeri leki wan bakapisi fu den sortu feti disi, boiti a pina di sma pina fu den naturu rampu ede. Den gronseki meki furu sma lasi libi. Sekte di abi fesiman di yu no kan frutrow èn so srefi sma di de fayafaya fu waka na baka den fesiman disi, opo ede kon. „Fu di kruktudu . . . kon moro furu” meki sma no lobi trawan moro èn a no de wan gwenti moro taki sma wani yepi trawan.

A preikiwroko di e du na heri grontapu èn di de ete wan pisi fu a marki, e du trutru. Go baka na a kafti fu a tijdschrift disi nomo, èn yu sa si taki den wortu „A E Bariwroko gi Yehovah Kownukondre” de wan pisi fu a titel. A Waktitoren, di den e tyari kon na doro na ini 132 tongo èn di den e druk moro leki 22 milyun tijdschrift fu en, na wan prenspari wrokosani gi den sma di e meki  „a bun nyunsu disi fu a kownukondre” bekènti na a heri grontapu pe sma e libi. A bun nyunsu dati e fruteri wi tu fu a boskopu taki a Kriaman fu na universum, Yehovah Gado, seti a Kownukondre fu hemel di o pori a godelowsu seti fu sani èn di o tyari wan paradijs kon na grontapu. Fu tru, a marki taki dyonsro Gado sa du wan sani de fu si nownow, èn disi e sori wi taki a libi fu den sma na ini a seti fu sani disi de na ini kefar.​—Teki gersi 2 Timoteus 3:1-5; 2 Petrus 3:3, 4; Openbaring 6:1-8.

Yehovah En Dei Di E Meki Sma Kon Frede

San sa pasa te a ten doro taki Yehovah o tyari a krutu fu en kon? Arki a fasi fa ensrefi e fruteri na wan tumusi moi fasi san o pasa na a ten dati: „Mi sa sori wondru sani na hemel èn na grontapu, brudu nanga faya nanga smoko di e opo go na loktu. Srefi son sa kenki kon tron dungru, èn mun sa tron brudu, bifo a bigi èn frede dei fu Yehovah e kon.”​—Yoèl 2:30, 31.

A dei dati di de moro ogri èn di e tyari moro pori kon leki iniwan vulkaan di sutu noso leki iniwan gronseki, de krosibei. A profeiti Sefania e taki: „A bigi dei fu Yehovah de krosibei. A de krosibei, èn a e hasti ensrefi fu tru. . . . A faya di a abi fu du sani fayafaya, sa nyan heri grontapu, bika a sa pori ala den sma di e libi na grontapu, iya na wan ogri fasi.” Ala di „no a solfru fu den, no a gowtu fu den sa man frulusu den tapu a dei fu Yehovah en atibron”, toku wan fasi de fu no dede na a dei dati di e meki sma kon frede.​—Sefania 1:14-18.

Sefania di e sori wi fa, e taki: „Bifo a faya atibron fu Yehovah e kon na un tapu, bifo a dei fu Yehovah en atibron e kon na un tapu, suku Yehovah, ala un safri-atisma fu grontapu . . . Suku regtfardikifasi, suku safrifasi. Kande unu sa kisi kibri tapu a dei fu Yehovah en atibron” (Sefania 2:2, 3). Wi kan kisi kibri te wi e suku Yehovah, te wi e suku regtfardikifasi èn te wi e suku safrifasi’. Suma na ini a ten disi e suku Yehovah?

Fu a preikiwroko ede di den e du, meki sondro misi yu sa taki dati a wortu „Yehovah” abi fu du nanga Yehovah Kotoigi. Kande yu kisi a tijdschrift disi fu wan fu den. Sma sabi den leki borgu di e hori densrefi na bun gwenti nanga wet èn di e libi na wan opregti fasi. Den e meki muiti fu weri a „nyun persoonlijkheid”, san wani taki tu fu kweki sari-ati (Kolosesma 3:8-10). Disi, na so den e erken, de wan bakapisi fu a leri di den kisi fu Yehovah en organisâsi di sma kan si èn na heri grontapu den gemeente fu Yehovah Kotoigi na ibri presi e teki presi gi na organisâsi dati. Iya, yu kan kisi kibri makandra nanga ’a heri libimakandra fu brada’ na mindri den Kotoigi fu Yehovah na heri grontapu.​—1 Petrus 5:9.

Suku Kibri Now

Efu wi wani kisi kibri te wi e aksi Yehovah fu yepi wi, dan wi musu de mati fu en. San dati wani taki? A Bijbel e piki: „¿Unu no sabi taki matifasi nanga grontapu na feantifasi nanga Gado? Fu dati ede, a sma di wani fu de wan mati fu grontapu, e meki ensrefi tron wan feanti fu Gado” (Yakobus 4:4). Fu de wan mati fu Gado, dan wi musu fri wisrefi fu iniwan firi di e tai sma na a disiten godelowsu grontapu di sma sabi taki a no wani gi yesi na a tiri fu Gado.

Bijbel e frumane wi: „No lobi grontapu noso den sani na ini grontapu. Efu wan sma lobi grontapu, dan a lobi fu a Tata no de na en ini; bika ala sani na ini grontapu — a lostu fu skin nanga a lostu fu den ai nanga a prodo di wan sma e prodo nanga den sani di a abi fu tan na libi —  no e komoto na a Tata, ma e komoto na grontapu. Boiti dati, grontapu e pasa gowe èn so srefi a lostu fu en, ma a sma di e du a wani fu Gado, e tan fu têgo” (1 Yohanes 2:15-17). Moro furu sma na ini a ten disi e du sani fu di den wani satisferi den lostu fu a skin — seks lostu di sma no man dwengi, wan gridi fasi fu feti na baka moni, nanga a gebroiki di den no e gebroiki a makti fu den na wan bun fasi. Ma wan sma di wani de na a sei fu Yehovah, musu wini den sortu lostu disi.​—Kolosesma 3:5-8.

Kande yu leisi a tijdschrift disi wanwan leisi, èn a kan taki yu agri nanga a fasi fa den e sori fa den Bijbel profeititori e kon tru. Ma toku kande yu e draidrai ete fu bigin abi demakandra nanga Yehovah Kotoigi. ¿Ma efu wi o kisi fu du nanga wan rampu, dan a nofo fu arki a warskow nomo? Soleki fa wi kan si nanga Fugenbergi di ben sutu, dan wi musu gi yesi na a warskow. Memre taki, no moro mindri leki 15 nyunsuman nanga kameraman di ben wani kon sabi sani soifri, ben lasi libi. Fu taki en leti, wan fowtowman dede nanga  en finga ete na tapu a knop fu en kamera di ben musu druk fu puru a fowtow. Wan sabidensiman di e ondrosuku vulkaantori, di ben taki: „Efu mi musu dede wan dei, dan mi wani taki dati musu pasa na a lanki fu wan vulkaan”, ben lasi libi soifri soleki fa a ben winsi. Alamala ben gi densrefi abra na a wroko fu den èn na den sani di den ben feti na baka. Ma den ben pai gi dati nanga den libi — a paiman di sma e kisi te den no wani gi yesi na a warskow.

Furu sma na ini a ten disi e yere a boskopu fu a bosroiti di Gado teki fu pori a godelowsu seti fu sani disi, èn te na wan seiker marki den e si krin taki a warskow disi tru. ’A kan taki a o kon te fu kaba,’ na so den e rideneri kande, ’ma no tide.’ Makriki den e skoifi a dei fu Yehovah go na wan moro lati ten, so taki noti kan hari den prakseri puru fu sani di nownowde sori moro prenspari na ini den ai.

Baruk ben abi so wan problema. Di Baruk ben de a sekretarsi fu na owruten profeiti Yeremia, dan a ben warskow den Israèlsma fu Yerusalem nanga deki-ati taki Gado ben o pori Yerusalem. Ma toku wan leisi, a ben kon weri fu a wroko di a ben kisi. Di dati pasa, dan Yehovah ben sori Baruk tapu en fowtu: „Yu fu yu sei, yu e tan suku bigi sani gi yusrefi. No tan suku den.” Awansi disi abi fu du nanga gudu, wan hei posisi noso seikerfasi na materia sei, toku Baruk no ben musu ’suku bigi sani gi ensrefi’. Wán sani nomo a ben musu prakseri èn dati ben de taki a ben musu du a wani fu Gado èn yepi sma fu tanapu na Gado sei. A bakapisi ben de taki, a ben o kisi ’en sili leki wan sani di a ben wini na ini feti’ (Yeremia 45:1-5). So srefi, na presi fu ’suku bigi sani gi wisrefi’, wi musu suku Yehovah èn dati kan abi leki bakapisi taki wi no e lasi a libi fu wi.

Na Fugenbergi, furu skowtu nanga friwani brandweerman ben de na wroko di a bun faya lava di ben lon komoto na ini a vulkaan ben kon na den tapu. Den ben e pruberi fu yepi sma di ben de na ini kefar, so taki ogri no ben o miti den. Den ben de leki den man nanga den uma di trutru abi na prakseri fu du bun gi sma èn di e du sani fu meki a grontapu disi kon moro bun. Awansi sortu moi reide den abi kande, toku „a sani di meki kon kron, no kan meki kon reti baka” (Preikiman 1:15). A kruka seti fu sani no kan meki kon reti. ¿A de wan bun sani te wan sma e meki ensrefi kon tron wan „mati fu grontapu” fu di a e pruberi fu frulusu a grontapu sistema di Gado bosroiti kaba fu puru en?

Te Yu Lon Komoto Kaba, Dan No Drai Go Baka Moro

Fu lon komoto na a sistema di de na ini kefar na wán sani, ma fu tan na ini „a heri brada libimakandra” pe wi e kisi kibri na wan heri tra sani (1 Petrus 2:17). No meki wi frigiti den gronman di, baka di den ben froisi go na wan tra presi, den ben go baka fu luku a gron fu den krosibei fu Fugenbergi. Kande den ben angri fu drai go baka na a „aladei” fasi fu libi soleki fa den ben gwenti. Ma yu e frustan taki a bosroiti di den teki fu go baka no ben de wan koniwan. Kande a no ben de a fosi leisi di den ben pruberi fu pasa a lin di ben marki a kontren pe kefar ben de. Kande den ben go na ini a kontren pe kefar ben de, soso fu wan syatu ten nomo èn no wan enkri sani ben pasa nanga den. A ben sa kan, taki a tra leisi den ben tan pikinso moro langa èn toku noti no ben pasa. Kande esi-esi den ben kon gwenti fu pasa a lin di sori pe a kefar ben de èn den ben kisi deki-ati fu tan draidrai na ini a kontren di ben de na ini kefar.

Yesus Krestes ben sori go na wan srefi sortu situwâsi di ben o pasa na a ten fu „a bosroiti fu a seti fu sani”. A ben taki: „Neleki fa den ben du na ini den dei dati bifo a frudu, den ben e nyan èn den ben e dringi, mansma ben e trow èn umasma den ben e gi fu trow, te leki a dei taki Noa ben go na ini na ark, èn den no ben poti prakseri na tapu te leki a frudu ben kon èn ben figi den alamala puru, na so a denoya fu a Manpikin fu libisma sa de.”​—Mateus 24:3, 38, 39.

Luku taki Yesus ben taki fu a nyan di sma e nyan, a dringi di sma e dringi nanga a trow di sma e trow. No wan fu den sani disi srefi fowtu na ini na ai fu Yehovah. San ben fowtu dan? A pipel na ini a ten fu Noa „no ben poti prakseri”, ala di den ben e libi wan libi di ben abi fu du nomo nanga den sani di den ben gwenti fu du. Na ini wan ten fu nowtu wan sma no kan libi na wan „aladei” fasi. Efu yu lon komoto kaba na a disiten grontapu di kisi krutu noso efu yu no de wan pisi fu en moro, dan yu musu feti nanga iniwan tranga firi di yu e kisi fu go na grontapu baka so  taki yu ben sa kan abi wini fu iniwan sani di yu kan tyari kon na wan (1 Korentesma 7:31). Kande yu kan waka komoto na a kontren na yeye fasi pe noti no kan pasa nanga yu èn kon baka sondro wan mankeri èn sondro fu wan sma si dati srefi. Ma kande dati sa gi yu deki-ati èn meki taki yu e drai go baka na ini grontapu, ala di yu e tan draidrai na ini en pikinso moro langa. Esi-esi yu kan bigin denki na a fasi disi: „A kaba no sa kon tide.”

So srefi, prakseri den dri taximan di lasi libi tu ala di den ben e wakti den nyunsuman nanga den kameraman di a lava ben komoto na ini a vulkaan lon na sei a bergiskin go na gron. Kande wan tu sma na ini a ten disi go makandra nanga trawan di prefuru fu go baka na ini grontapu. Awansi fu sortu sani ede den e du disi, a de krin taki a hari di sani e tan hari den fu drai go baka na ini a kontren pe kefar de, no warti a tyans di den e teki.

Ala den sma di dede fu di Fugenbergi ben sutu, ben pasa a lin di ben sori pe o fara kefar no ben de ete èn den ben go na ini a kontren pe kefar ben de. Ala di den ben fruwakti taki a bergi ben o sutu wan dei, toku no wan sma ben denki taki dati ben o pasa na a dei dati. Te sma e ondrosuku a marki di e sori san na a bosroiti fu a seti fu sani, dan furu fu den e fruwakti taki a dei sa kon wan leisi, ma kande a no sa kon esi. Son wan e prakseri srefi taki noiti a dei dati ben kan de „tide”. So wan fasi fu denki no bun kwetikweti.

„A dei fu Yehovah sa kon leki wan fufuruman”, na apostel Petrus ben warskow. Wi musu de na ai, „e fruwakti èn e hori a denoya fu a dei fu Yehovah bun na prakseri”, ala di wi e du „ala muiti fu a feni unu sondro flaka èn sondro fowtu èn na ini vrede te fu kaba” (2 Petrus 3:10-14). Baka te Gado pori a disiten godelowsu seti fu sani, dan wi kan fruwakti wan paradijs grontapu na ondro a Kownukondre fu Gado. No meki noiti sani kori wi fu abi ati fu go na ini a kontren pe kefar de awinsi sortu sani ben o gi wi primisi fu go, bika a dei di wi e pasa a lin fu go baka na ini grontapu, ben kan de a dei fu Yehovah.

Suku kibri makandra nanga a pipel fu Yehovah èn tan nanga den.

[Prenki na tapu bladzijde 7]

Suku kibri makandra nanga a pipel fu Yehovah èn tan nanga den

[Sma di abi a reti fu a prenki na tapu bladzijde 4]

Iwasa/​Sipa Press