¿Yu Abi „a Denki fu Krestes”?
¿Yu Abi „a Denki fu Krestes”?
’Meki a Gado di e gi horidoro nanga trowstu sorgu taki unu abi a srefi fasi fu denki, di Krestes Yesus ben abi.’—ROMESMA 15:5.
1. Na sortu fasi den furu skedrei fu Krestenhèit e prenki Yesus, èn fu san ede disi no e sori bun fa Yesus tan?
„NOITI sma si taki a lafu wan leisi.” Disi na san sma ben taki fu Yesus na ini wan dokumenti di sma ben fruklari falsi taki na wan owruten lantiman fu Rome ben skrifi en. A dokumenti disi, di sma sabi leki fa a de nownow fu sensi a di fu 11 yarihondro, abi krakti tapu furu artiest. * Na tapu furu skedrei den e sori Yesus leki wan sma nanga wan sari fesi di wanwan leisi nomo ben lafu, efu a ben lafu. Ma disi a no wan eerlijk prenki fu Yesus kwetikweti, bika den Evangelie e prenki en leki wan waran èn switi man di abi dipi firi.
2. Fa wi kan kweki „a srefi denki di Krestes Yesus ben abi”, èn san disi sa yepi wi fu du?
2 A de krin, efu wi wani sabi a trutru Yesus, dan wi musu furu wi frustan èn wi ati nanga a soifri sabi fu a sma di Yesus ben de trutru di a ben de dyaso na grontapu. Fu dati ede, meki wi ondrosuku wan tu Evangelie tori di e gi wi inzicht na ini „a denki fu Krestes” — dati wani taki, den firi fu en, a fasi fa a ben si sani, den denki fu en, nanga a fasi fa a ben rideneri (1 Korentesma 2:16). Te wi e du dati, dan meki wi luku fa wi kan kweki ’a srefi fasi fu denki di Krestes Yesus ben abi’ (Romesma 15:5). Na so fasi wi sa man sreka moro bun na ini wi libi èn na a fasi fa wi e handri nanga tra sma, fu man waka na baka na eksempre di a ben gi wi.—Yohanes 13:15.
A Makriki fu Go na En
3, 4. (a) San ben de a situwâsi fu a tori di skrifi na ini Markus 10:13-16? (b) Fa Yesus ben handri di den disipel fu en ben pruberi fu tapu den yongu pikin fu kon na en?
3 Sma ben lobi fu de nanga Yesus. Na difrenti okasi sma di abi difrenti yari nanga difrenti fasi fa den ben kweki, ben firi fri fu go na en. Luku a tori di skrifi na ini Markus 10:13-16. A ben pasa pikinmoro na a kaba fu en diniwroko, di a ben de na pasi fu go na Yerusalem a lasti leisi, fu dede wan kefalek hati dede.—Markus 10:32-34.
4 Pruberi fu si a situwâsi. Sma e bigin tyari pikin-nengre, so srefi beibi go na Yesus fu meki a blesi den. * Ma den disipel e pruberi fu tapu den pikin fu kon na Yesus. Kande den disipel e denki taki Yesus trutru no wani meki den pikin kon fruferi en na ini den tumusi muilek wiki disi. Ma den fowtu. Te Yesus e si san den disipel fu en e du, dan a no breiti nanga dati. Yesus e kari den pikin-nengre kon na en, taki: „Meki den yongu pikin kon na mi; èn no pruberi fu tapu den” (Markus 10:14). Dan a e du wan sani di e sori wan trutru safu èn lobi fasi fa a e handri. A tori e fruteri: „A ben teki den pikin ini den anu fu en èn a ben bigin blesi den” (Markus 10:16). A de krin taki den pikin-nengre e firi densrefi bun te Yesus e teki den ini den anu fu en na wan lobi-ati fasi.
5. San a tori na ini Markus 10:13-16 e taigi wi fu a sma di Yesus ben de?
5 A syatu tori dati e fruteri wi furu fu a sortu sma di Yesus ben de. Luku taki sma ben man go na en makriki. Ala di a ben abi wan hei posisi na ini hemel, toku a no ben tapu skreki gi onvolmaakti libisma èn a no ben lagi den tu (Yohanes 17:5). ¿A no de prenspari tu taki srefi pikin-nengre ben firi densrefi bun te den ben de nanga en? ¡Fu tru, den no ben sa firi bun fu go na wan sma di no abi firi èn di no abi prisiri èn di noiti ben lafu! Awansi omeni yari sma ben abi toku den ben kon na Yesus bika den ben firi taki a ben abi waran firi, taki a lobi sma, èn den ben abi a frutrow taki a no ben o seni den gowe.
6. Fa owruman kan sorgu taki sma man go na den moro makriki fu taki nanga den?
6 Te wi e prakseri a tori disi, dan wi kan aksi wisrefi: ’¿Mi abi a denki fu Krestes? ¿Sma man kon makriki na mi? Na ini den muilek ten disi, den skapu fu Gado abi skapuman fanowdu pe den man go makriki, man di de leki „wan kibripresi gi a winti” (Yesaya 32:1, 2; 2 Timoteus 3:1). Owruman, efu unu e kweki wan opregti èn seryusu belangstelling gi den brada fu unu èn unu wani gi unsrefi gi a bun fu den, dan den sa firi taki unu e broko un ede nanga den. Den sa si dati na a fesi fu unu, sa yere dati na ini un sten, èn sa si en na ini a switi fasi fa unu e handri. So wan trutru waran firi di unu e sori, nanga a broko di unu e broko un ede nanga den, kan meki taki den sa frutrow unu èn dati sa meki en moro makriki gi trawan, so srefi gi pikin-nengre fu kon na unu. Wan Kresten uma e fruklari fu san ede a ben man taki nanga wan owruman: „A ben taki nanga mi na wan safu fasi èn nanga sari-atifasi. Noso, kande mi no ben o taki no wan wortu. A ben meki mi firi misrefi seiker.”
Hori Tra Sma na Prakseri
7. (a) Fa Yesus ben sori taki a ben hori tra sma na prakseri? (b) Fu san ede Yesus ben meki wan breni man ben man si pikinsopikinso baka?
7 Yesus ben hori tra sma na prakseri. A ben man firi san tra sma e firi. Soso a si di a ben si den sma di ben ondrofeni kwinsi, ben naki en ati someni taki a ben kisi a firi fu lekti a pina fu den (Mateus 14:14). A ben hori so srefi na prakseri den sani di tra sma no ben man du èn den sani di den ben abi fanowdu (Yohanes 16:12). Wan leisi, sma ben tyari wan breniman kon na en èn den ben begi Yesus fu dresi en. Yesus ben meki a man ben man si baka, ma a ben du dati pikinsopikinso. Na ini a bigin, a man no ben man si tra sma bun ete — „sani di ben gersi bon, ma den e waka lontu”. Dan Yesus ben meki a ben man si krin baka. Fu san ede a ben dresi a man pikinsopikinso? Disi ben kan de so fu man meki wan sma di ben gwenti fu de na ini dungru, no skreki tumusi te wantewante a e si a leti fu a son èn a dangra grontapu.—Markus 8:22-26.
8, 9. (a) San ben pasa heri esi baka di Yesus nanga den disipel fu en ben kon na ini a kontren fu Dekapolis? (b) Taki fa Yesus ben dresi a dofu man.
8 Luku so srefi wan kefal di ben feni presi na baka a Paskafesa fu 32 G.T. Yesus nanga den disipel fu en ben kon na ini a kontren fu a Dekapolis, na owstusei fu a Se fu Galilea. Drape, heri esi bigi ipi sma ben feni den èn ben tyari furu siki sma nanga malengri sma kon na Yesus, èn a ben dresi den alamala (Mateus 15:29, 30). A de moi fu si taki Yesus ben puru wan man na den mindri fu poti spesrutu prakseri na en tapu. Na Evangelie skrifiman Markus, a wan-enkriwan di e fruteri a kefal disi, e fruteri san ben pasa.—Markus 7:31-35.
9 A man ben dofu èn a no ben man taki pikinmoro noti. Kande Yesus ben firi taki a man disi ben e senwe noso ben e syen. Dan Yesus ben du wan sani di a no ben gwenti fu du. A ben tyari a man go na wan sei, puru en fu na ipi sma, go na wan presi pe den ben de den wawan. Dan Yesus ben meki wan tu gebaar fu fruteri a man san a ben o du. A „ben poti den finga fu en na ini den yesi fu a man èn, baka di a ben spiti, a ben fasi en tongo” (Markus 7:33). Baka dati, Yesus ben luku go na hemel èn ben soktu na ini begi. Den sani disi di Yesus ben demo gi a man, ben o taigi a man: ’A sani di mi o du now gi yu, mi e du nanga a krakti fu Gado.’ Te fu kaba, Yesus ben taki: „Opo” (Markus 7:34). Di Yesus ben du dati, dan a man ben man yere baka, èn a ben man taki bun baka.
10, 11. Fa wi kan sori taki wi e hori den firi fu tra sma na prakseri na ini a gemeente? ¿èn na ini na osofamiri?
10 ¡Yesus ben sori taki a e hori tra sma na prakseri trutru! A ben man firi san den ben firi, èn a hori di a ben hori na prakseri a fasi fa tra sma ben firi, fu en sei, ben pusu en fu handri na wan fasi di no e hati den firi fu den. Leki Kresten, a bun te wi e leri èn e sori a denki fu Krestes na ini na afersi disi. Bijbel e frumane wi: „Un alamala musu abi a srefi fasi fu denki, sori firi gi trawan, abi brada lobi, abi safu sari-atifasi, abi wan yeye fu sakafasi” (1 Petrus 3:8). Disi trutru e meki a de fanowdu taki wi e taki na wan fasi di e hori den firi fu tra sma na prakseri.
11 Na ini a gemeente wi kan hori den firi fu tra sma na prakseri te wi e sori den wartifasi, e handri nanga den neleki fa wi ben sa wani taki den musu handri nanga wi (Mateus 7:12). Dati ben sa wani taki tu taki wi musu luku bun san wi e taki èn so srefi fa wi e taki en (Kolosesma 4:6). Hori na prakseri taki ’wortu di e taki sondro fu denki, kan dyuku neleki wan feti-owru’ (Odo 12:18). ¿Èn fa a musu de na ini na osofamiri? Wan masra nanga wan wefi di lobi makandra trutru, man firi san a trawan e firi (Efeisesma 5:33). Den no e gebroiki grofu wortu, no e tan suku fowtu nomo, èn no e suku fu hati makandra nanga spotu — ala den sani disi kan hati den firi fu makandra na wan fasi di no man dresi makriki. Pikin-nengre abi firi tu, èn papa nanga mama di abi lobi e hori den firi disi na prakseri. Te a de fanowdu fu gi piri-ai, dan den papa nanga mama disi e gi dati na wan fasi di e lespeki a wartifasi fu den pikin fu den èn den no e meki den firi syen sondro taki a de fanowdu * (Kolosesma 3:21). Te wi e sori na so fasi taki wi e hori tra sma na prakseri, dan wi e sori taki wi abi a denki fu Krestes.
A De Klariklari fu Frutrow Tra Sma
12. Sortu balansi fasi Yesus ben abi ini a fasi fa a ben denki fu en disipel en fa a ben si den leki fa den de trutru?
12 Yesus ben abi wan balansi fasi fu denki fu den disipel fu en èn a ben si den leki fa den ben de trutru. A ben sabi heri bun taki den no ben volmaakti. Na tapu fu dati, a ben man si san de na ini na ati fu libisma (Yohanes 2:24, 25). Ma toku a no ben si den soso nanga den onvolmaaktifasi fu den, ma a ben si den bun eigifasi fu den tu. A ben si so srefi san den man disi di Yehovah ben hari kon na en ben man du (Yohanes 6:44). A positief denki di Yesus ben abi fu den disipel fu en ben de krin fu si na a fasi fa a ben handri nanga den. Wan sani de seiker taki a ben sori taki a de klariklari fu frutrow den.
13. Fa Yesus ben sori taki a ben frutrow den disipel fu en?
13 Fa Yesus ben sori taki a ben frutrow den? Di a ben gowe libi grontapu, a ben poti wan hebi frantwortu tapu den salfu disipel fu en. A ben gi den a frantwortu fu sorgu gi den Kownukondre afersi fu en na heri grontapu (Mateus 25:14, 15; Lukas 12:42-44). Na ini en diniwroko a ben sori srefi na ini pikin sani taki a ben frutrow den. Di nanga wan wondru a ben meki moro nyanyan gi den ipi sma, dan a ben gi den disipel fu en a frantwortu fu prati a nyanyan.—Mateus 14:15-21; 15:32-37.
14. Fa yu ben o taki syatu fu a tori di skrifi na ini Markus 4:35-41?
14 Luku so srefi a tori di skrifi na ini Markus 4:35-41. Na a okasi disi, Yesus nanga den disipel fu en ben go na ini wan boto èn ben seiri go na owstusei fu go na tra sei fu a Se fu Galilea. Syatu baka di den ben komoto na syoro, Yesus ben go didon na bakasei fu a boto èn heri esi a ben fadon dipi na sribi. Ma heri esi „wan bigi winti ben broko lusu”. So wan bigi winti no ben de wan freimde sani na tapu a Se fu Galilea. Bika a lagi (so wan 200 meter moro lagi leki a se), meki a loktu drape waran moro leki a loktu na ini den birti kontren, èn disi e tyari bruya kon na ini a loktu. Na tapu fu dati, tranga winti e wai pasa a Lagipresi fu Jordan komoto na a Hermonbergi, di de na a noordsei. A bedari di sani bedari tapu wan momenti kan kenki wantronso kon tron wan seryusu bigi winti. Prakseri fu disi: Yesus ben sabi trutru taki furu leisi bigi winti e opo kon, bika Yesus ben kweki na ini Galilea. Toku a ben sribi na ini vrede, èn a ben frutrow tapu den bekwaamfasi fu den disipel fu en, èn wan tu fu den ben de fisiman.—Mateus 4:18, 19.
15. Fa wi kan waka na baka a de di Yesus ben de klariklari fu frutrow den disipel fu en?
15 ¿Wi kan waka na baka a de di Yesus ben de klariklari fu frutrow den disipel fu en? Son sma e feni en wan muilek sani fu gi tra sma frantwortu. Ala ten na den musu tyari a boto, fu taki en so. Den e prakseri kande: ’¡Efu mi wani taki wan sani e du bun, dan mi musu du en misrefi!’ Ma efu wi musu du ala sani wisrefi, dan a kefar de taki wi kan weri wisrefi tumusi èn kande wi sa teki prenspari ten di wi musu gebroiki gi wi osofamiri. Boiti dati, efu wi no e gi tra sma wroko nanga frantwortu di den man du, dan wi no e gi den na okasi fu kisi na ondrofeni èn a leri di den abi fanowdu. A ben o de wan koni sani fu leri frutrow tra sma so taki wi kan gi den a frantwortu fu du sani. A bun fu aksi wisrefi na wan eerlijk fasi: ’¿Mi abi a denki fu Krestes na ini na afersi disi?’ ¿Mi de klariklari fu prati wroko gi tra sma, èn mi e frutrow taki den sa du san den man?’
A Ben Sori Taki A Ben Frutrow den Disipel fu En
16, 17. Sortu dyaranti Yesus ben gi den disipel fu en tapu a lasti neti fu en libi na grontapu, ala di a ben sabi taki den ben o gowe libi en?
16 Yesus ben sori taki a abi wan positief denki fu den disipel fu en na wan tra prenspari fasi. A ben meki den sabi taki a ben frutrow den. Disi ben de krin fu si na ini den wortu fu èn di ben de wan dyaranti gi den, di a ben taigi den disipel fu en tapu a lasti neti fu en libi na grontapu. Luku san ben pasa.
17 A ben de wan neti pe Yesus ben abi furu fu du. A ben gi den apostel fu en wan praktisch les fu abi sakafasi, di a ben wasi den futu fu den. Baka dati, a ben seti na avondmaal di ben sa musu de wan fasi fu memre a dede fu en. Baka dati, den apostel ben kon baka na ini wan fayafaya kesekese di abi fu du nanga suma fu den na a moro bigiwan. Nanga pasensi, Yesus no ben krutu den, ma a ben rideneri nanga den. A ben taigi den san den kan fruwakti: „Un alamala sa naki futu fadon fu mi ede, bika Buku skrifi: ’Mi sa naki a skapuman, èn den skapu fu na ipi sa panya na ala sei’” (Mateus 26:31; Sakaria 13:7). A ben sabi taki den moro krosibei kompe fu en ben o gowe libi en tapu a momenti di a ben o abi den fanowdu. Toku a no ben krutu den. Heri tra fasi leki dati, a ben taigi den: „Ma baka te mi opo baka, dan mi sa go fosi unu na Galilea” (Mateus 26:32). Iya, a ben gi den a dyaranti taki ala di den ben o gowe libi en, a no ben o gowe libi den. Te a kefalek takru situwâsi disi ben pasa kaba, dan a ben o miti den baka.
18. Sortu hebi wroko Yesus ben gi den disipel fu en na ini Galilea, èn fa den apostel ben du a wroko?
18 Yesus ben du san a ben pramisi. Baka ten, na ini Galilea, Yesus di ben kisi wan opobaka, ben kon na den 11 getrow apostel, di soleki fa a ben sori, ben kon makandra nanga furu tra sma (Mateus 28:16, 17; 1 Korentesma 15:6). Drape Yesus ben gi den wan hebi wroko: „Go fu dati ede, èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu” (Mateus 28:19, 20). A buku, Tori fu den Apostel, e gi wi krinkrin buweisi taki den apostel ben du a komando dati. Den ben teki fesi na ini a wroko disi na wan getrow fasi, fu preiki a bun nyunsu na ini a fosi yarihondro.—Tori fu den Apostel 2:41, 42; 4:33; 5:27-32.
19. San den sani di Yesus ben du baka di a ben opo baka, e leri wi fu a denki fu Krestes?
19 San a tori disi di e tyari sani kon na krin, e leri wi fu a denki fu Krestes? Yesus ben si a moro takru sei fu den apostel fu en, ma toku a „ben lobi den te na a kaba” (Yohanes 13:1). Ala di den ben abi fowtu, toku a ben meki den sabi taki a e bribi den. Luku taki a frutrow di Yesus ben abi na ini den no ben de fu soso. A frutrow nanga a bribi di a ben abi na ini den, seiker ben tranga den fu teki a bosroiti na ini den ati fu du a wroko di a ben komanderi den fu du.
20, 21. Fa wi kan sori wan positief denki fu wi kompe-bribiman?
20 Fa wi kan sori a denki fu Krestes na ini na afersi disi? No denki takru fu wi kompe-bribiman. Efu yu e denki takru fu den, dan yu wortu nanga den sani di yu e du, sa sori dati (Lukas 6:45). Ma Bijbel e taigi wi taki lobi „e bribi ala sani” (1 Korentesma 13:7). Lobi de positief, a no de negatief. A e tranga wan sma, na presi fu broko en. Sma sa du sani moro esi te wi e sori lobi èn e gi den deki-ati, na presi taki wi e tapu skreki gi den. Wi kan tranga trawan èn gi den deki-ati te wi e taki dati wi e frutrow den (1 Tesalonikasma 5:11). Efu, leki Krestes, wi abi wan positief denki fu den brada fu wi, dan wi sa handri nanga den na wan fasi di e tranga den èn di e meki den du ala san den man.
21 Te wi e leri èn e sori a denki fu Krestes, dan dati wani taki dati wi musu du moro leki soso fu du wan tu sani neleki fa Yesus ben du den. Soleki fa wi ben taki kaba na ini na artikel na fesi, efu wi wani handri trutru leki Yesus, dan wi musu leri fosi fu si sani leki fa en e si den. Den Evangelie e yepi wi fu si wan tra sei fu en persoonlijkheid, den prakseri fu en nanga a fasi fa a ben feni a wroko di a kisi fu du, soleki fa a tra artikel sa taki fu dati.
[Futuwortu]
^ paragraaf 1 Na ini a dokumenti, a bedrigiman e sori a sokari fasi fa Yesus tan na skin fasi, so srefi a kloru fu en wiwiri, en barba, nanga en ai. Bijbel vertaler Edgar J. Goodspeed e fruklari taki a bedrigi sani disi ben „du fu buweisi taki a fasi fa a skedreiman e taki fa Yesus tan, na ini den handleiding buku fu en, ben tru”.
^ paragraaf 4 Soleki fa a sori, den pikin ben abi difrenti yari. A wortu di vertaal dyaso nanga „yongu pikin” gebroiki so srefi gi na umapikin fu Ya-irus di ben abi 12 yari (Markus 5:39, 42; 10:13). Ma na ini a srefi tori di Lukas e fruteri, Lukas e gebroiki wan wortu di den e gebroiki so srefi gi beibi.—Lukas 1:41; 2:12; 18:15.
^ paragraaf 11 Luku na artikel „¿Joe e lespeki a wartifasi foe den?”, na ini A Waktitoren fu 1 april 1998.
¿Yu Kan Tyari Disi Kon na Krin?
• Fa Yesus ben handri di den disipel fu en ben pruberi fu tapu den pikin fu kon na en?
• Na sortu fasi Yesus ben sori taki a ben hori tra sma na prakseri?
• Fa wi kan waka na baka a de di Yesus ben de klariklari fu frutrow den disipel fu en?
• Fa wi kan waka na baka a frutrow di Yesus ben sori na ini den apostel fu en?
[Aksi fu a tori disi]
[Prenki na tapu bladzijde 16]
Pikin-nengre ben firi densrefi bun te den ben de nanga Yesus
[Prenki na tapu bladzijde 17]
Yesus ben handri tra sma nanga sari-ati
[Prenki na tapu bladzijde 18]
Owruman di sma man go makriki fu taki nanga den, de wan blesi