Gado E Gi Piki na Tapu Begi

Kornelius ben de wan man di ben suku bun na Gado nanga yepi fu furu opregti begi. Moro fara, a ben meki bun gebroiki fu en posisi leki wan legre ofsiri. Soleki fa Bijbel e taki, „a ben gi furu presenti fu sari ati na sma di ben abi dati fanowdu”.—Tori fu den Apostel 10:1, 2.

NA A ten dati, a Kresten gemeente ben abi Dyu, proselietsma nanga Samariasma di ben e bribi. Kornelius ben de wan Heiden di no ben besnij èn a no ben de wan pisi fu a Kresten gemeente. ¿Disi wani taki dati den begi fu en ben de fu soso? Nôno. Yehovah Gado ben teki notisi fu Kornelius èn fu den wroko di a ben du na ini begi.—Tori fu den Apostel 10:4.

Nanga yepi fu engel, Kornelius ben kon na ini kontakti nanga a Kresten gemeente (Tori fu den Apostel 10:30-33). A bakapisi ben de taki en nanga en osofamiri ben abi a grani fu tron den fosi Heiden di no ben besnij èn di den ben teki na ini a Kresten gemeente. Yehovah Gado ben si Kornelius en eigi ondrofeni leki wan prenspari sani fu poti en na ini Bijbel. Èn seiker, a ben tyari furu kenki kon fu meki en libi de krinkrin leki fa den markitiki fu Gado e taki (Yesaya 2:2-4; Yohanes 17:16). Na ondrofenitori fu Kornelius musu de wan trutru deki-ati gi sma fu ala nâsi fu suku bun na Gado na ini a ten disi. Luku wan tu eksempre.

Eksempre fu a Ten Disi

Wan yongu uma na ini India ben abi trowstu tranga fanowdu. A ben trow di a ben abi 21 yari èn a ben abi tu pikin. Ma syatu baka di a kisi a di fu tu pikin, dan en masra dede. Wantronso, di a ben abi 24 yari, a ben de wan weduwe nanga wan beibi fu tu mun èn wan boi fu 22 mun. ¡A no de fu fruwondru taki a ben abi trowstu fanowdu! Pe a ben kan go fu suku trowstu? Wan neti, ini dipi banawtu, a ben begi, taki: „Tata na hemel, grantangi trowstu mi nanga yepi fu yu Wortu.”

A tra mamanten a ben abi wan fisitiman. A ben de wan fu den Kotoigi fu Yehovah. A dei dati, na oso-fu-oso diniwroko fu a Kotoigi ben muilek bika wan tu sma nomo ben opo den doro gi en. Fu di a ben weri èn ben lasi-ati, a ben wani fu go na oso, ma na wan noso tra fasi a ben kisi a firi fu go na ete wan oso. Dati ben de pe a ben miti a yongu weduwe. Na uma disi ben meki a kon inisei èn ben teki wan publikâsi di ben fruklari Bijbel. Na uma ben kisi furu trowstu fu di a ben leisi a publikâsi disi èn fu den takimakandra di a ben abi nanga a  Kotoigi. A ben leri fu a pramisi fu Gado fu opo den dedewan baka èn fu a Kownukondre fu Gado di heri esi sa meki grontapu kon tron wan paradijs. Moro prenspari, a ben kon sabi èn lobi a wan-enkri tru Gado, Yehovah, di ben gi piki na tapu a begi fu en.

Nora, di e libi na ini a foto George, Zuid-Afrika, ben meki wan mun fri fu dini ini a furuten preikiwroko. Bifo a ben bigin, a ben begi Yehovah seryusu fu yepi en fu feni wan sma di ben abi belangstelling trutru fu studeri Bijbel. Ini a kontren pe den ben seni en fu wroko, wan oso ben de fu wan sma di ben handri trutru grofu nanga Nora, di Nora ben fisiti en wan tu leisi na fesi. Nanga deki-ati, Nora ben go na a oso dati baka. A ben fruwondru, di a ben kon sabi taki wan nyun sma ben kon libi ini na oso, di nen Noleen. Moro fara, Noleen nanga en mama ben begi Gado fu yepi den fu man frustan Bijbel. „Di mi ben aksi den efu den ben sa wani studeri Bijbel”, Nora taki, „den ben breiti srefisrefi”. Noleen nanga en mama ben go na fesi esi-esi. Baka ten, den ala tu ben bigin dini nanga Nora ini a wroko di e dresi sma na yeye sei.

Wan tra eksempre di e sori a krakti di begi abi na a wan fu wan trowpaar di e libi na Zuid-Afrika na ini a foto Johannesburg. Tapu wan satra neti ini 1996, a trowlibi fu Dennis nanga Carol ben de fu broko. Leki wan lasti yepi, den ben teki a bosroiti fu begi fu kisi yepi, èn disi den ben du furu leisi te lati neti. A tra mamanten, wan ten fu 11 yuru, tu Kotoigi fu Yehovah ben klop na den doro. Dennis ben opo a doro èn ben taigi den fu wakti fu di a o go kari en wefi. Dan Dennis ben warskow Carol taki efu a e meki den Kotoigi kon na inisei, a no ben sa de makriki fu puru den na yu tapu. Carol ben memre Dennis taki den ben begi fu kisi yepi èn a ben taki dati disi ben sa kan de a piki fu Gado na tapu den begi fu den. Fu dati ede den Kotoigi ben kisi a kari fu kon inisei, èn wan bijbelstudie ben bigin nanga den ini a buku Sabi di e tjari joe go na têgo libi. Dennis nanga Carol ben prisiri nanga san den ben leri. A srefi bakadina dati, den ben fisiti den fosi konmakandra ini a Kownukondre zaal fu Yehovah Kotoigi. Fu di den du san den leri na ini Bijbel, Dennis nanga Carol ben feni lusu gi den problema fu den na ini den trowlibi. Now den de sma di koloku, sma di dopu èn di e prèise Yehovah èn e fruteri den birtisma fu den bribi fu den di abi Bijbel leki fondamenti.

San Efu Yu E Firi Taki Yu No Warti fu Begi?

Son opregti sma kan firi taki den no warti fu begi fu di den e libi wan takru libi. Yesus Krestes ben fruteri a tori fu so wan man, wan fru-akti belastingman. Di a man ben e kon na ini a fesi dyari fu a tempel, a man disi ben feni taki a no warti fu kon na ini a presi disi pe sma gwenti fu kon begi. „[A] ben tanapu fara . . . ma a ben tan naki ensrefi na tapu en borsu, èn ben taki: ’O Gado, abi sari-ati nanga mi, wan sondari’” (Lukas 18:13). Soleki fa Yesus ben taki, dan Gado ben arki a man disi bun. Disi e sori taki Yehovah Gado trutru abi sari-ati èn wani yepi den sondari di trutru abi berow.

Luku wan yonkuman fu Zuid-Afrika di nen Paul. Di a ben de wan boi, Paul ben fisiti den Kresten konmakandra nanga en mama. Ma di a ben de ini den tini-yari fu en, a ben bigin abi demakandra nanga yongu sma di no ben waka Gado pasi. Baka di  a libi skoro, a ben go dini ini a legre fu a fositen apartheid tirimakti fu Zuid-Afrika. Dan sondro taki a ben fruwakti dati, na uma-freiri fu en ben broko a matifasi fu den. A libi disi di no ben gi Paul satisfaksi ben meki taki a ben firi brokosaka. „Wan neti,” a e taki, „mi ben begi Yehovah èn aksi en fu yepi mi, ala di furu yari langa kaba mi no ben begi Gado na wan opregti fasi.”

No langa baka di a begi, Paul en mama ben gi en a kari fu go na a Memrefesa fu Krestes dede (Lukas 22:19). Paul ben feni en wan freimde sani taki en mama ben du disi, fu di Paul ben tranga-ede èn ben sori pikinmoro no wan belangstelling gi Bijbel. „Mi ben si a kari disi leki a piki fu Yehovah na tapu a begi fu mi, èn mi ben firi taki mi ben musu drai go baka na en.” Fu a ten dati, Paul ben bigin fisiti ala den Kresten konmakandra. Baka di a ben studeri a Bijbel fo mun langa, a ben doro den markitiki fu teki dopu. Moro fara, a ben libi a studie fu en gi monteur èn ben bosroiti fu teki a furuten preikiwroko leki wroko. Now, Paul de wan koloku man, èn a no e firi brokosaka moro fu a libi di a ben abi fosi. Den 11 yari di pasa a ben dini na a bijkantoro fu a Waktitoren Genootschap na ini Zuid-Afrika.

Iya, nanga switifasi Yehovah Gado e gi piki na tapu begi nanga sari-ati èn „e tron a sma di e pai den wan di e suku en seryusu” (Hebrewsma 11:6). Heri esi a bigi dei fu Yehovah sa kon èn sa tyari wan kaba kon na ala ogri sani. Ma nownowde, Yehovah e gi piki na tapu den begi fu en pipel fu kisi krakti èn fu abi a tiri fu en, ala di den abi wan faya prati ini a prenspari wroko fu gi kotoigi. Na so fasi, den e tyari milyunmilyun sma fu ala nâsi kon ini kontakti nanga a Kresten gemeente èn e kisi a blesi fu a sabi fu Bijbel di e tyari sma go na têgo libi.—Yohanes 17:3.

[Prenki na tapu bladzijde 5]

Na opregti begi fu Kornelius ben abi leki bakapisi taki na apostel Petrus ben fisiti en

[Prenki na tapu bladzijde 6]

Begi yepi furu sma ini ten fu banawtu

[Prenki na tapu bladzijde 7]

A bun fu begi fu kisi yepi fu frustan Bijbel

Trowpaar kan begi fu kisi yepi fu tranga a trowlibi fu den