Ondrofenitori

Hori a Libi fu Yu Sempel fu Dini Yehovah

SOLEKI FA CLARA GERBER MOYER BEN FRUTERI

Mi abi 92 yari èn pikinmoro mi no man waka, ma mi abi wan krin èn bun frustan ete. ¡Mi de nanga tangi srefisrefi taki mi ben abi a grani fu dini Yehovah fu sensi mi yongu yari! Libi wan sempel libi di no frekti, yepi kefalek furu fu kisi a gudu disi.

MI BEN gebore tapu 18 augustus 1907, na ini Alliance, Ohio, Amerkankondre, leki a moro bigiwan fu feifi pikin. Di mi ben abi aiti yari, wan furuten bedinari fu den Bijbel Ondrosukuman, soleki fa den ben kari Yehovah Kotoigi na ini a ten dati, ben rèi en baisigri kon na a boerderij pe wi ben meki botro nanga kasi. A ben miti mi mama, Laura Gerber, na a doro èn ben aksi efu a ben sabi fu san ede Gado ben gi pasi meki ogridu de. Ala ten Mama ben aksi ensrefi fa a tori dati de.

Baka di Mama aksi Papa, di ben de na dorosei na ini a maksin, dan Mama ben seni teki den siksi pisi fu Studies in the Scriptures (Studie fu den Buku fu Bijbel). A ben leisi den fayafaya èn den Bijbel waarheid di a ben leri ben naki en ati trutru. A ben studeri Pisi 6 The New Creation (Den Nyun Sani Di Gado Kria), èn ben frustan krin fu san ede a de fanowdu fu teki dopu na ini watra. Fu di a no ben sabi fa fu feni den Bijbel Ondrosukuman, meki a ben aksi Papa fu dopu en na ini a pikin kriki di ben de na a boerderij, ala di a ben de a kowru mun maart 1916.

No langa baka dati Mama ben si wan bariwroko-boskopu na ini koranti di meki wan lezing bekènti di den ben o hori na a Daughters of Veterans Hall na ini Alliance. A lezing ben nen „The Divine Plan of the Ages” („A Plan fu Gado na ini den Yarihondro”). A ben handri wantron, fu di Pisi 1 fu a Studies in the Scriptures ben abi a srefi nen leki a lezing. Den ben tai na asi na a wagi, èn a heri osofamiri ben go nanga asi nanga asiwagi  na a fosi konmakandra fu wi. Fu sensi a ten dati wi ben go na den konmakandra na ini den oso fu brada tapu sonde nanga dridewroko mofoneti. Syatu baka dati, wan brada di ben teki presi gi na Kresten gemeente ben dopu Mama baka. Papa di ben abi so furu wroko fu du na a boerderij, ben kisi belangstelling gi bijbelstudie te fu kaba, èn a ben dopu wan tu yari baka dati.

Miti Den Wan Di E Teki Fesi

Tin Juni 1917, J. F. Rutherford, di ben de presidenti fu a Waktitoren Genootschap na a ten dati, ben kon fisiti Alliance fu taki fu a tori “Why Do the Nations War?” („Fu San Ede den Nasi E Feti?”) Mi ben abi neigi yari èn ben go na a konmakandra nanga mi papa, mi mama èn nanga mi tu pikin brada Willie nanga Charles. Wi ben abi wan moi grupu fu moro leki wan hondro fisitiman. Baka a lezing fu Brada Rutherford, moro furu fu den sma di ben de drape ben tanapu fu meki wan fowtow na dorosei fu a Columbia Theater, pe a ben hori a lezing fu en. A tra wiki, na a srefi presi A. H. Macmillan ben hori wan lezing nanga a nen “God’s Coming Kingdom” („Gado En Kownukondre Di E Kon”). A ben de wan grani taki den brada disi ben fisiti a pikin foto fu wi.

Fositen Kongres Di Warti fu Prakseri

A fosi kongres di mi ben fisiti ben de na ini 1918 na Atwater, Ohio, wan tu kilometer fu Alliance. Mama ben aksi den brada di ben teki presi gi a Genootschap drape efu mi ben owru nofo fu kan dopu. Mi ben firi taki a gi di mi ben gi mi srefi abra na Gado fu du en wani ben bun, dati meki mi ben kisi primisi fu dopu a dei dati na ini wan kriki ini a birti fu wan bigi apra pranasi. Mi ben kenki mi krosi na ini wan tenti di den brada ben meki gi na okasi dati èn mi ben dopu ini wan owru, deki sribi-yapon.

Na ini september 1919, mi nanga mi papa nanga mama ben rèi nanga loko go na Sandusky, Ohio, na Lake Erie. Drape wi ben go na tapu wan veerboto, èn na ini wan syatu ten wi ben doro na Cedar Point pe a kongres fu wi di warti fu prakseri ben sa hori. Di wi ben komoto na a boto, wan pikin presi di ben seri nyanyan ben de na syoro. Mi ben kisi wan hamburger, san ben de trutru wan kefalek switi sani di mi no ben man nyan ala dei na ini den dei dati. ¡A ben tesi heri bun! A heimarki fu fisitiman na a aiti-dei kongres fu wi ben de 7000. No wan sistema fu geluid gi a publiki ben de, dati meki mi ben musu arki heri bun.

Na a kongres disi a sisatijdschrift fu A Waktitoren, di ben abi leki nen The Golden Age (now Ontwaakt!), ben kon na doro. Fu ben kan de na a kongres dati, mi ben misi a fosi wiki fu skoro, ma a ben warti dati srefisrefi. Cedar Point ben de wan presi pe sma ben hori fakansi, èn den ben abi boriman drape na a restaurant di ben sreka nyanyan gi den sma di ben kon na a kongres. Ma wan sani ben meki taki den boriman nanga den sma di e poti a nyanyan nanga a dringi na tapu tafra ben tapu nanga wroko, dati meki Kresten brada di ben sabi fa fu sreka nyanyan ben go na ini a kukru fu sreka nyanyan gi den sma di ben kon na a kongres. Furu tenti yari baka dati, a pipel fu Yehovah ben sreka den eigi nyanyan na den bigi konmakandra nanga den kongres.

Wi ben abi a grani tu fu go baka na Cedar Point na ini september fu a yari 1922 na wan neigi-dei kongres pe wan heimarki fu moro leki 18.000 sma ben de. Na drape Brada Rutherford ben gi wi a deki-ati fu „preiki, preiki, preiki, a Kownu nanga en Kownukondre”. Ma mi eigi diniwroko ben bigin a yari na fesi nanga a prati fu traktaat èn The Golden Age.

Warderi gi a Diniwroko

Na ini a bigin fu 1918, mi ben yepi fu tyari a traktaat The Fall of Babylon (A Fadon fu Babilon) go na den boerderij na ini a birti fu wi. Fu a kowru ede meki wi ben sa wani fu waran wan bigi plata ston na tapu na udufaya na oso èn tyari en nanga wi ini na asiwagi fu hori den futu fu wi waran. Wi ben weri deki dyakti nanga ati, fu di na asiwagi ben abi soso wan daki nanga garden na ala tu sei, ma a no ben abi wan sani fu gi waran. Ma disi ben de switi ten.

Na ini 1920 den ben meki wan spesrutu uitgave fu The Finished Mystery, di ben abi a nen ZG, èn den ben meki en leki wan tijdschrift. * Mi ben go nanga mi papa nanga mi mama fu preiki nanga a  publikâsi disi na ini Alliance. Na ini den dei dati ala sma ben go den wawan na den doro, na so nanga frede mi ben kren go na wan barkon pe furu sma ben sidon. Baka di mi ben du mi pristeri, wan uma ben taki: „Dati ben de wan moi syatu taki di a gi”, èn a ben teki a publikâsi. Mi ben prati a dei dati 13 ZG, a fosi leisi dati mi ben gi wan moro langa pristeri ini na oso-fu-oso-wroko.

Di mi ben de na ini a di fu neigi klas fu skoro, dan Mama ben kisi longontsteking èn ben didon ini bedi moro leki wan mun. Mi moro pikin sisa, Hazel, ben de wan yongu pikin, so bun mi libi skoro fu yepi nanga a wroko na a boerderij èn fu sorgu gi den pikin. Toku na osofamiri fu wi ben teki a waarheid fu Bijbel seryusu, èn wi ben go na ala konmakandra na wan fasti ten.

Na ini 1928 na a Memrefesa fu Krestes dede, den ben gi wan traktaat di ben abi leki nen „Where Are the Nine?” („Pe den Neigi De?”) na ala den sma di ben de drape. A ben taki fu Lukas 17:11-19, pe Bijbel e taki dati soso wan fu den tin gwasiman di ben kon krin, nanga sakafasi ben taki Yesus tangi fu di a ben meki en kon betre na wan wondru fasi. Dati ben naki mi ati. Mi ben aksi misrefi: ’O bigi a tangi fu mi de?’

Fu di sani ben waka bun na oso now èn mi ben gosontu èn no wan frantwortu ben de fu hori mi na oso, meki mi ben teki a bosroiti fu gowe libi oso èn go na ini a pionierwroko, soleki fa den ben kari a furuten diniwroko. Mi papa nanga mama ben gi mi a deki-ati fu du disi. So bun, mi nanga mi patna Agnes Aleta ben kisi a toewijzing fu wi, èn 28 augustus 1928, wi ben teki wan loko 9.00 na neti. Ibriwan fu wi ben abi soso wan kofru nanga wan smara tas fu tyari a Bijbel lektuur fu wi. Na a lokostation, mi sisa nanga mi papa nanga mama ben e krei, èn wi ben e krei tu. Mi ben denki taki noiti mi ben o si den moro, fu di wi ben bribi taki Armagedon ben de krosibei. A tra mamanten, wi ben doro na ini Brooksville na Kentucky, a toewijzing fu wi.

Wi ben yuru wan pikin kamra na wan pension èn wi ben bai spaghetti na ini blik èn ben sreka brede gi wisrefi tu. Ibri dei wi ben waka go na wan tra sei, wi ben wroko wi wawan en ben pristeri den ososma feifi buku fu wan bijdrage fu 1,98 Amerkan dala. Safrisafri wi ben wroko a heri foto, wi ben miti furu sma di ben sori belangstelling gi a Bijbel trutru.

Na ini so wan dri mun, wi ben fisiti ala sma na ini èn lontu Brooksville so srefi Augusta. Na so wi ben go doro fu wroko den foto Maysville, Paris, nanga Richmond. Na ini den tra dri yari, wi ben go na furu distrikt na ini Kentucky pe no wan gemeente ben de. Furutron wi ben kisi yepi fu mati nanga memre fu a famiri fu Ohio di ben kon èn ben wroko nanga wi na ini a diniwroko wan wiki noso moro langa te a ben de fanowdu.

Tra Kongres Di Warti fu Memre Den

A kongres na ini Columbus, Ohio, 24-30 yuli 1931, ben de trutru wan fu memre. Drape den ben meki bekènti taki wi ben wani sma kon sabi wi nanga a Bijbel nen Yehovah Kotoigi (Yesaya 43:12). Na ini a ten na fesi, te wan sma ben aksi wi fu sortu relisi wi de, dan wi ben taki „Internationaal Bijbel Ondrosukuman”. Ma dati no ben meki wi de so tra fasi, fu di yu ben abi bijbelstudenti na ini difrenti tra relisi grupu.

A patna fu mi Agnes, ben trow, èn mi ben de mi wawan; so bun mi ben prisiri sote di den brada ben meki bekènti taki den wan di ben suku wan pionier patna musu go na wan seiker presi. Drape mi ben miti Bertha nanga Elsie Garty nanga Bessie Ensminger. Den ben abi tu oto èn ben suku wan di fu fo pionier sisa fu wroko nanga den. Baka a kongres wi ben gowe makandra, ala di wi no ben sabi makandra na fesi.

Na ini a zomer, wi ben wroko a distrikt Pennsylvania dorodoro. Dan, di a winter ben doro, wi ben aksi toewijzing na ini den moro waran distrikt na a zuidsei fu North Carolina, Virginia, nanga Maryland. Na ini a lente wi ben go baka na a noordsei fu Amerkankondre. Dati ben de a gwenti di den pionier ben abi na ini a ten dati. Na ini 1934, John Booth nanga Rudolph Abbuhl di ben waka na baka a gwenti disi, ben teki Ralph Moyer nanga a yongu brada fu en Willard nanga den fu go na Hazard, Kentucky.

Mi ben miti Ralph na furu okasi, èn wi ben kon sabi makandra moro bun na a ten fu wan bigi kongres na ini Washington, D.C., di ben hori fu 30 mei–3 yuni, 1935. Mi nanga Ralph ben sidon sei makandra na a barkon di wan brada ben hori  a lezing fu a tori fu a „bigi grupu” noso „bigi ipi” (Openbaring 7:9-14). Te leki a ten dati wi ben bribi taki den wan fu a bigi grupu ben de memre fu wan grupu sma di o go na hemel èn di no de so getrow leki den 144.000 (Openbaring 14:1-3). ¡Fu dati ede mi no ben wani fu de wan fu den!

Di Brada Rutherford ben tyari kon na krin dati den wan fu a bigi grupu ben de wan getrow grupu sma di sa pasa Armagedon libilibi, dan furu sma ben fruwondru. Dan a ben gi ala den wan fu a bigi grupu sma a kari fu go tanapu. We, mi no ben go tanapu, ma Ralph ben go tanapu. Baka ten, sani ben kon moro krin na ini mi frustan, dati meki 1935 ben de a lasti yari taki mi ben teki fu a brede nanga a win na a memrefesa fu Krestes dede. Ma mi Mama, ben go doro fu gebroiki fu a brede nanga a win te leki mama dede na ini november 1957.

Wan Fasti Patna

Mi nanga Ralph ben go doro fu skrifi makandra. Mi ben dini na ini Lake Placid, New York, èn Ralph ben de na ini Pennsylvania. Na ini 1936 a ben bow wan pikin oso na tapu wiel di a ben kan hari nanga a wagi fu en. A ben froisi disi fu Pottstown, Pennsylvania, go na Newark, New Jersey, fu di a kongres ben hori drape 16-18 oktober. Baka a programa wan neti, difrenti wan fu wi di ben pionier ben go luku na nyun oso fu Ralph tapu wiel. Mi nanga en ben tanapu inisei fu na oso disi tapu wiel na a smara wasibaki di a ben aksi: „¿Yu lobi na oso disi tapu wiel?”

Di mi seki mi ede fu taki iya, a ben aksi: „¿Yu wani libi na ini en?”

„Iya”, mi ben piki, èn a gi mi wan switi bosi di noiti mi sa frigiti. Wan tu dei na baka, wi ben kisi wan papira fu lanti fu kan trow. Tin na neigi oktober, a dei baka a kongres, wi ben go na Brooklyn èn go luku a drukkerij fu a Waktitoren Genootschap. Dan wi ben aksi wan toewijzing fu wroko wan gebied. Grant Suiter ben abi a frantwortu fu a gebied, èn a ben aksi suma sa wroko en. Ralph ben taki: „Wi kan du en efu wi kan trow.”

„Efu yu kon 5.00 bakadina baka, wi kan seti dati”, Brada Suiter ben piki. A srefi neti dati wi ben trow na ini na oso fu wan Kotoigi di ben de wan brada na ini Brooklyn Heights. Wi ben nyan nanga wan tu mati na wan restaurant ini a birti èn teki bus go na a oso fu Ralph na ini Newark, New Jersey.

Syatu baka dati, wi ben de na a pasi fu go na Heathsville, Virginia, a fosi pionier toewijzing fu wi makandra. Wi ben wroko a Distrikt Northumberland èn baka dati wi froisi go na den distrikt Fulton nanga Franklin na ini Pennsylvania. Na ini 1939, Ralph ben kisi a kari fu du a zonewroko, wan wroko pe wi ben sa go fisiti wan lo gemeente èn baka dati wan tra grupu. Wi ben go wroko nanga den gemeente na ini a distrikt Tennessee. A tra yari a manpikin fu wi, Allen, ben gebore, èn na ini 1941 a zonewroko no ben go doro. Wi ben kisi a toewijzing fu go na Marion, Virginia, leki spesrutu pionier. Na ini den dei dati, a ben wani taki fu wroko 200 yuru ini wan mun na ini a diniwroko.

 Meki wan Tu Kenki

Na ini 1943, mi ben feni en fanowdu fu stop nanga a spesrutu pionierwroko. Libi ini wan pikin oso na tapu wiel, sorgu gi wan pikin-nengre, sreka nyanyan, sorgu taki wi alamala abi krin krosi, èn wroko wan sani fu 60 yuru na ini a diniwroko ala mun ben de san mi ben man du. Ma Ralph ben go doro leki wan spesrutu pionier.

Wi ben froisi go baka na Alliance, Ohio, na ini 1945, seri na oso na tapu wiel di ben de na oso fu wi neigi yari langa, èn go libi na ini na oso fu a boerderij nanga mi papa nanga mama. Ma a ben de drape na a fesi barkon, taki na umapikin fu wi Rebeka ben gebore. Ralph ben teki wan wroko di a no ben du aladei na ini a foto èn ben go doro leki wan gewoon pionier. Mi ben wroko na a boerderij èn ben du san mi ben man du fu kan yepi en fu e tan pionier. Ala di mi famiri ben wani fu gi wi sondro fu wi pai wan pisi gron nanga wan oso, toku Ralph ben weigri. A ben wani fu tan sondro hebi so taki wi ben kan du tranga muiti fu du Kownukondre afersi dorodoro.

Na ini 1950 wi ben froisi go na Pottstown, Pennsylvania, èn ben yuru wan oso fu 25 Amerkan dala wan mun. Na ini den tra 30 yari, a yuru ben kren go te 75 Amerkan dala nomo. Wi ben firi taki Yehovah ben yepi wi fu hori wi libi sempel (Mateus 6:31-33). Ralph ben wroko dri dei na ini wan wiki leki wan barbir. Ibri wiki wi ben studeri Bijbel nanga den tu pikin fu wi, ben fisiti gemeente konmakandra, èn ben preiki a bun nyunsu fu a Kownukondre leki wan osofamiri. Ralph ben dini leki wan fesiman opziener fu a gemeente di ben de drape. Fu di wi ben e hori a libi fu wi sempel, meki wi ben man du furu na ini a diniwroko fu Yehovah.

A Lasi Di Mi Lasi Mi Lobi Patna

Tinaseibi mei 1981, wi ben sidon e arki wan lezing na ini a Kownukondre zaal. Ralph no ben firi bun, a ben waka go na bakasei fu a zaal, èn ben aksi wan dinari fu tyari wan brifi gi mi di ben taki dati a ben e go na oso. Disi no ben de a gwenti fu Ralph, so taki mi ben aksi wan sma fu rèi mi go na oso wantewante. Ralph dede fu wan tumusi hebi bururtu na ini wan yuru ten. Di a Waktitoren-studie ben kaba a mamanten dati, den brada ben meki bekènti na a gemeente taki a dede.

A mun dati Ralph ben wroko moro leki 50 yuru kaba na ini a diniwroko. A furuten wroko fu en leki wan pionier a ben du moro leki 46 yari. A ben hori bijbelstudie nanga moro leki wan hondro sma di te fu kaba ben tron dopu Kotoigi fu Yehovah. Den blesi na yeye sei di wi kisi ben warti moro ala ofrandi di wi ben meki na ini den yari.

Mi De Nanga Tangi gi den Grani Di Mi Kisi

Na ini den 18 yari di pasa, mi libi mi wawan, mi ben fisiti den konmakandra, preiki gi tra sma te mi man èn e studeri a Wortu fu Gado. Now mi e libi ini wan presi pe sma e libi di e kisi pensyun èn di owru. Mi abi soso wan tu sani na ini na oso èn frukisi fu no abi wan telefisi. Ma mi libi furu nanga sani èn gudu na yeye sei. Mi papa nanga mama nanga mi tu brada ben de getrow te na a dede fu den, èn den tu sisa fu mi e go doro ini a waarheid na wan getrow fasi.

Mi breiti taki a boi fu mi, Allen, e dini leki wan Kresten owruman. Furu yari kaba a seti geluid na Kownukondre zaal nanga Kongres Hal èn ben wroko na a geluid installatie gi den kongres na ini zomer. A wefi fu en na wan loyaal futuboi fu Gado, èn den tu boi fu den e dini leki owruman. Mi umapikin, Rebeka Karres, de moro leki 35 yari na ini a furuten diniwroko, èn so srefi fo yari na a edekantoro fu Yehovah Kotoigi na ini Brooklyn. En nanga a masra fu en ben gebroiki den 25 yari di pasa leki opziener di e reis na ini difrenti presi fu Amerkankondre.

Yesus ben taki dati a Kownukondre de leki wan gudu di kibri èn di sma kan feni (Mateus 13:44). Mi de nanga tangi taki mi famiri ben feni a gudu dati furu yari pasa kaba. ¡Fa a de wan grani fu luku baka go na a gi di mi gi misrefi na ini a diniwroko fu Gado 80 yari langa—sondro fu sari! Efu mi ben o man libi a libi fu mi baka, dan mi ben o libi en a srefi fasi, bika trutru, ’Gado en lobi bun-ati bun moro a libi’.—Psalm 63:3.

[Futuwortu]

[Prenki na tapu bladzijde 23]

Wi ben yere a lezing fu Brada Rutherford na ini 1917 na ini Alliance, Ohio

[Prenki na tapu bladzijde 23]

Nanga Ralph na fesi na oso na tapu wiel di a ben bow

[Prenki na tapu bladzijde 24]

Nanga den tu pikin fu mi na ini a ten disi