Suku Yehovah Nanga wan Ati Di Sreka

ESRA, wan priester fu Israèl, ben de wan kefalek bun ondrusukuman, sabiman, kopiman, nanga leriman fu a Wet. Gi Kresten na ini a ten disi Esra na wan bun eksempre tu fu du diniwroko nanga a heri sili. Fu san ede? Fu di a ben tan gi ensrefi na ini a dini fu Gado, srefi di a ben libi na ini Babilon di ben de wan foto di ben furu nanga falsi gado èn nanga na anbegi fu ogri yeye.

A gi di Esra ben gi ensrefi na ini a dini fu Gado, no ben pasa somarso. A ben du muiti fu man du dati. Iya, a e fruteri wi taki a „ben sreka na ati fu en fu go suku rai na a wet fu Yehovah èn fu du en”.—Esra 7:10.

Neleki Esra, a pipel fu Yehovah na ini a ten disi wani du ala sani di Yehovah e aksi den, ala di den e libi na ini wan grontapu di de feanti fu a tru anbegi. So bun, meki wi ondrusuku wan tu fasi fa wi kan sreka na ati fu wi, a sma di wi de na inisei — so srefi den prakseri, den denki, den winsi fu wi, nanga den sani di e buweigi wi fu handri — fu „go suku rai na a wet fu Yehovah èn fu du en”.

A Sreka Di Wi E Sreka Wi Ati

„Fu sreka” wani taki „fu seti sani na fesi gi wan sani di yu abi na prakseri: fu tyari en kon na ini wan situwâsi, so taki yu kan gebroiki en na wan spesrutu fasi, noso so taki a de na ini wan aparti yeye fasi”. A no de fu taki, efu yu kon abi wan soifri sabi fu a Wortu fu Gado èn yu gi yu libi abra na Yehovah, dan a de fu si trutru taki na ati fu yu sreka èn wi kan teki en gersi nanga „a bun gron” di Yesus ben taki fu dati na ini na agersitori fu a man di ben sai.—Mateus 13:18-23.

Ma toku wi musu poti prakseri na a ati fu wi èn krin en doronomo. Fu san ede? Fu tu reide ede. A fosi reide na fu di firi fu du ogri sani, kan kisi rutu makriki neleki takru wiwiri na ini wan dyari, spesrutu na ini den „lasti dei” disi pe „a loktu” fu a seti fu Satan furu nanga takru siri fu grontapu denki leki noiti bifo (2 Timoteus 3:1-5; Efeisesma 2:2). A di fu tu reide abi fu du nanga a gron srefi. Efu sma no e sorgu a gron, dan a kan kon drei heri esi, a kan kon tranga èn a kan taki a no o meki froktu. A kan de so tu taki tumusi furu sma kan waka tapu a dyari sondro fu broko den ede èn kan traputrapu a gron te leki a kon tranga. Na so a de tu nanga wi ati di wi kan agersi nanga a gron. A no sa man meki froktu efu wi no e sorgu en noso efu sma di no abi belangstelling gi a gosontu fu wi na yeye fasi, e trapu na en tapu.

Fu dati ede a prenspari taki wi alamala e gebroiki a frumane na Bijbel: „Kibri yu ati, moro leki ala tra sani di de fu kibri, bika na drape den rutu fu libi de.”—Odo 4:23.

Sani Di E Meki a „Gron” fu Wi Ati Kon Moro Bun

Meki wi luku wan tu sani, noso eigifasi, di sa meki a „gron” fu wi ati kon moro bun, so taki a kan meki sani gro na wan gosontu fasi. A no de fu taki dati someni sani de fu meki na ati fu wi kon moro bun, ma wi sa luku siksi fu den: taki wi e erken dati wi abi yeye nowtu, sakafasi, eerlijkfasi, frede gi Gado, bribi, nanga lobi.

„Koloku fu den sma di sabi den yeye nowtu”, na so Yesus ben taki (Mateus 5:3). Neleki fa angri na skin sei e memre wi taki wi abi nyanyan fanowdu, na so a sabi di wi sabi taki wi  abi yeye nowtu, e meki wi tan angri fu nyan na yeye fasi. A fasi fa libisma meki, dan den abi wan bigi angri gi a sortu nyanyan disi bika a e meki taki a libi wani taki wan sani èn taki a abi marki. A druk fu a seti fu sani fu Satan noso a lesi di wi lesi fu studeri, kan meki a sabi di wi sabi taki wi abi a nowtu disi, e kon swaki. Na so Yesus ben taki tu: „Libisma no musu libi fu brede wawan, ma fu ibri wortu di e kon fu Yehovah en mofo.”—Mateus 4:4.

A de so, taki nyanyan di sma e teki doronomo, di de na ini balansi èn di abi bun sani na ini, e meki a skin gosontu èn den e meki a skin lostu a tra nyanyan te a ten e doro. Na so a de tu na yeye fasi. Kande yu e prakseri taki yu no de wan sma di lobi fu studeri, ma efu yu e meki a tron wan gwenti fu leisi a Wortu fu Gado ala dei èn doronomo yu e studeri publikâsi di abi den gron tapu Bijbel, dan yu sa si taki a lostu fu yu sa kon tranga. Fu taki en leti, yu o angri fu den okasi fu bijbelstudie. So bun, yu no musu gi abra so esi; wroko tranga fu kweki wan bun lostu gi yeye sani.

Sakafasi E Safu na Ati

Sakafasi na wan tumusi prenspari sani fu abi wan ati di sreka bika a e meki a de makriki gi sma fu gi wi leri èn a e yepi wi fu teki lobi rai nanga piri-ai wantewante. Prakseri a moi eksempre fu Kownu Yosia. Na ini a ten fu a tiri fu en den ben feni wan papira di ben abi a Wet fu Gado na ini èn di den ben kisi nanga yepi fu Moses. Di Yosia ben yere den wortu fu a Wet èn ben kon si o fara den afo fu en ben gowe libi a soifri anbegi, dan a ben priti den krosi fu en èn a ben krei na fesi Yehovah. Fu san ede a Wortu fu Gado ben naki na ati fu a kownu srefisrefi? A tori e taki dati na ati fu en ben „safu”, so taki a ben saka ensrefi di a ben yere den wortu fu Yehovah. Yehovah ben si na ati fu Yosia di ben abi sakafasi èn di ben teki rai, èn Yehovah ben blesi Yosia fu dati ede.—2 Kownu 22:11, 18-20.

Sakafasi ben meki taki den disipel fu Yesus di „no ben sabi leisi noso skrifi” èn di „ben de neleki ala tra sma” ben man frustan èn gebroiki den waarheid na yeye fasi di den „koniwan nanga den sabiman” ma soso „na wan skin fasi”, no ben kisi fu si (Tori fu den Apostel 4:13; Lukas 10:21; 1 Korentesma 1:26). A lasti grupu disi no ben wani teki a wortu fu Yehovah bika na ati fu den ben kon tranga fu di den ben abi bigimemre. ¿A e fruwondru wi taki Yehovah no lobi bigimemre kwetikweti?—Odo 8:13; Danièl 5:20.

Eerlijkfasi Nanga Frede gi Gado

A profeiti Yeremia ben skrifi taki „na ati feradelek moro leki iniwan tra sani èn de godelowsu. Suma kan sabi en?” (Yeremia 17:9) A feradelekfasi disi de fu si na difrenti fasi, soleki te wi e suku reide fu puru den fowtu na wi tapu te wi meki den. A e kon na krin tu te wi e pruberi fu prakseri taki wi no abi seryusu swaki eigifasi. Ma eerlijkfasi sa yepi wi fu wini a feradelek ati fu di a sa yepi wi fu kon sabi trutru suma na wi, so taki wi kan tyari bun kenki kon. A psalm skrifiman ben sori a sortu eerlijkfasi disi di a ben begi: „Ondrosuku mi, o Yehovah, èn tesi mi; krin den niri fu mi nanga na ati fu mi.” A de krin taki a psalm skrifiman ben sreka na ati fu en, fu meki Yehovah soifri en èn tesi en, ala di a ben kan wani taki dati a ben musu erken taki eigifasi de di gersi doti skuma, so taki a ben kan wini den.—Psalm 17:3; 26:2.

Frede gi Gado, di wani taki tu „fu no wani si ogri na ai”, na wan bun yepisani na ini a wroko disi fu meki sani kon soifri (Odo 8:13). Ala di wan sma e warderi a lobi bun-ati nanga a bunfasi fu Yehovah, toku wan sma di abi frede gi Yehovah trutru sabi heri bun taki Yehovah abi a makti fu strafu, èn srefi fu kiri den wan di e trangayesi en. Yehovah ben sori taki den wan di abi frede gi en ben o gi yesi na en tu, di a ben taki fu Israèl: „¡Efu den ben o sreka na ati disi fu den nomo fu frede mi èn fu hori ala den komando fu mi ala ten, so taki a ben kan go bun nanga den èn nanga den manpikin fu den te ten di no skotu!”—Deuteronomium 5:29.

A de krin taki a frede gi Gado a no fu meki wi tan saka wisrefi na en ondro fu di wi e frede kefalek, ma fu buweigi wi fu gi yesi na wi lobi Tata, fu di wi sabi taki a abi soso a bun fu wi na prakseri. Fu taki en leti, so wan frede gi Gado e meki wi firi bun èn e meki wi prisiri, èn Yesus Krestes srefi ben sori disi furu.—Yesaya 11:3; Lukas 12:5.

 Wan Ati Di Sreka Abi Furu Bribi

Wan ati di abi tranga bribi, sabi taki ala sani di Yehovah e aksi noso e komanderi nanga yepi fu a Wortu fu en, de yoisti ala ten èn de fu a bun fu wi (Yesaya 48:17, 18). Wan sma di abi so wan ati, e kisi bun satisfaksi nanga prisiri te a e gebroiki a frumane na Odo 3:5, 6, di e taki: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na tapu en na ini ala yu pasi, èn ensrefi sa meki yu pasi kon reti.” Ma wan ati di no e bribi, no ben o wani frutrow tapu Yehovah, spesrutu efu dati wani taki dati a ben musu fu tyari òfer, soleki fu meki a libi fu en kon moro sempel so taki a kan poti en prakseri soso na Kownukondre afersi (Mateus 6:33). Nanga reti Yehovah e feni taki na ati di no abi bribi na wan „godelowsu” ati.—Hebrewsma 3:12.

A bribi fu wi na ini Yehovah de fu si na furu okasi, èn so srefi na den sani di wi e du na wi eigi oso. Teki fu eksempre, a gronprakseri na Galasiasma 6:7: „No kori unsrefi: Gado no e meki sma spotu nanga en. Bika san wan sma e sai, na dati a sa koti tu.” A bribi fu wi na ini a gronprakseri disi o de fu si na ini den sortu sani disi soleki den film di wi e luku, den buku de wi e leisi, omeni bijbelstudie wi e du, èn na ini den begi fu wi. Iya, wan prenspari sani fu abi wan ati di sreka fu teki a Wortu fu Yehovah èn fu gi yesi na dati, na fu abi wan tranga bribi di e buweigi wi fu sai „nanga a yeye na prakseri”.—Galasiasma 6:8.

Lobi​—A Moro Bigi Eigifasi

Moro leki ala tra eigifasi, lobi trutru e meki a gron fu wi ati arki a Wortu fu Yehovah. Fu dati ede, di na apostel Paulus ben e gersi lobi nanga bribi èn nanga howpu, dan a ben kari lobi „a moro bigiwan fu den” eigifasi disi (1 Korentesma 13:13). Wan ati di abi furu lobi gi Gado, e kisi kefalek bigi satisfaksi nanga prisiri fu di a e gi yesi na Gado; a no e kragi tapu den sani di Gado e aksi. Na apostel Yohanes ben taki: „Disi na san a lobi fu Gado wani taki, dati wi e hori den komando fu en; èn toku den komando fu en no de wan hebi lai” (1 Yohanes 5:3). Nanga wortu di ben gersi den wan disi, Yesus ben taki: „Efu wan sma lobi mi, dan a sa hori a wortu fu mi, èn mi Tata sa lobi en” (Yohanes 14:23). Luku taki a sortu lobi disi e komoto na tu sei. Iya, Yehovah lobi den wan trutru di e kon na en fu di den lobi en.

Yehovah sabi taki wi na onvolmaakti sma èn taki wi e sondu na en doronomo. Ma toku a no de so, taki Gado no wani abi noti fu du nanga wi. A sani di Yehovah e suku na ini den futuboi fu en na „wan heri ati”, wan ati di e buweigi wi fu de klariklari fu dini En nanga „wan prisiri sili” (1 Kroniki 28:9). A no de fu taki, dati Yehovah sabi taki ten nanga muiti de fanowdu fu kweki bun eigifasi na ini wi ati fu kan sori froktu fu a yeye (Galasiasma 5:22, 23). Fu dati ede, Yehovah abi pasensi nanga wi, „bika ensrefi sabi heri bun fa wi meki, fu di a e hori na prakseri taki wi na doti” (Psalm 103:14). Yesus ben sori a srefi denki disi fu di noiti a ben krutu den disipel fu en hebi fu den fowtu fu den, ma nanga pasensi a ben yepi den èn a ben gi den deki-ati. ¿A sortu lobi disi, sari-ati, nanga pasensi fu Yehovah nanga Yesus no e buweigi yu fu lobi den moro furu?—Lukas 7:47; 2 Petrus 3:9.

Efu sontron yu e feni taki a de wan tranga feti fu hari gwenti puru di gersi takru wiwiri di gro dipi noso fu broko pikin eigifasi puru di gersi tranga klei, dan yu no musu brokosaka noso lasi-ati. Na presi fu dati, tan du muiti fu tyari bun kenki kon ala di yu e „horidoro na ini begi”, pe yu e begi Yehovah gi a yeye fu en doronomo (Romesma 12:12). Nanga a yepi di Yehovah wani gi wi, dan neleki Esra yu sa man abi wan ati di sreka dorodoro „fu go suku rai na a wet fu Yehovah èn fu du en”.

[Prenki na tapu bladzijde 31]

Esra ben tan gi ensrefi na ini a dini fu Gado, srefi na ini Babilon

[Sma di abi a reti fu a prenki na tapu bladzijde 29]

Garo Nalbandian