Yehovah​—A Sma Di Tranga na ini Krakti

„Fu di a abi dinamik krakti pasa marki, èn fu di a abi tumusi bigi krakti tu, meki no wan fu den no e misi.”—YESAYA 40:26.

1, 2. (a) Sortu krakti fu a naturu wi alamala abi so tranga fanowdu? (b) Fruklari fu san ede Yehovah na a Sma pe ala krakti e komoto te fu kaba.

KRAKTI na wan sani di furu fu wi e si leki wan sani di e kon fu ensrefi. Fu eksempre, wi no e poti furu prakseri tapu stroom di e gi wi faya nanga waran noso tapu a makriki fasi fa den elektrik wrokosani di wi abi e kisi stroom. Soso te stroom ben tapu sondro taki wi ben fruwakti dati, wi e frustan taki sondro stroom den foto fu sma ben o tapu. Moro furu fu a stroom di wi abi so tranga fanowdu e kon fu a presi di yu kan frutrow moro leki iniwan tra presi na grontapu pe energie e komoto — a son. * Ibri sekonde a son disi di e gi energie, e gebroiki feifi milyun ton nucleair brandstof èn a e gi grontapu bogobogo energie di e meki taki libi de.

² Fu pe ala energie disi fu a son e komoto? Suma ben meki a stroomfabriek disi? Yehovah Gado ben du dati. Psalm 74:16 e taki fu en: „Yusrefi ben meki a leti na hemel, srefi a son.” Iya, te fu kaba, na fu Yehovah ala krakti komoto, soleki fa na en ala libi komoto (Psalm 36:9). Noiti wi musu si a krakti fu en leki wan sani di e kon fu ensrefi. Nanga yepi fu a profeiti Yesaya, Yehovah e memre wi fu luku go na den sani di de na hemel soleki a son nanga den stari, èn fu prakseri dipi fu a fasi fa den sani disi du kon. „Opo un ai go na loktu èn luku. Suma kria den sani disi? Na a Sma di e tyari a legre fu den go na doro, so srefi a nomru fu den, di e kari den alamala srefi na den nen. Fu di a abi dinamik krakti pasa marki, èn fu di a abi tumusi bigi krakti tu, meki no wan fu den no e misi.”—Yesaya 40:26; Yeremia 32:17.

3. Na sortu fasi wi kan kisi wini fu den fasi fa Yehovah e sori a makti fu en?

³ Fu di Yehovah abi tumusi bigi krakti, meki wi kan abi a  frutrow taki a son sa tan gi wi a faya nanga a waran di wi abi so tranga fanowdu fu tan na libi. Ma wi e frutrow tapu a krakti fu Gado fu moro sani ede leki nomo den sani di wi abi fanowdu na skin fasi. A fri di wi kan kon fri fu sondu nanga dede, a howpu fu wi gi a ten di e kon èn a frutrow di wi e frutrow tapu Yehovah, abi furu fu du nanga a fasi fa Yehovah e gebroiki a krakti fu en (Psalm 28:6-9; Yesaya 50:2). Bijbel abi bun furu eksempre di e buweisi taki Yehovah abi a krakti fu man kria sani èn fu man fri sani, fu man frulusu en pipel èn fu man pori den feanti fu en.

A Krakti fu Gado De fu Si na a Kriaturu

4. (a) Fa a luku di David ben luku go na loktu na neti ben abi krakti na en tapu? (b) San den sani di de na hemel e sori fu a krakti fu Gado?

⁴ Na apostel Paulus ben fruklari taki a „têgo krakti” fu wi Kriaman ’de krin fu si na ini den sani di a meki’ (Romesma 1:20). Hondrohondro yari pasa, a psalm skrifiman David, di leki wan skapuman ben musu luku nofotron go na a loktu na neti, ben frustan taki na universum bigi srefisrefi èn taki a Mekiman abi bigi krakti srefisrefi. A ben skrifi: „Te mi e si yu hemel, den wroko fu yu finga, a mun nanga den stari di yu sreka, dan san na a libisma di man dede, taki yu hori en na prakseri, nanga a manpikin fu a libisma fu grontapu, taki yu e sorgu gi en?” (Psalm 8:3, 4) Ala di David no ben sabi ala sani fu den sani di de na hemel, toku a ben frustan taki ensrefi ben de notinoti srefisrefi te yu teki en gersi a Kriaman fu wi kefalek bigi universum. Na ini a ten disi, den astronoom sabi moro furu fu a bigi di na universum bigi èn fu a makti di e hori en. Fu eksempre, den e fruteri wi taki ibri sekonde wi son e lusu someni energie leki te 100.000 milyun megaton fu TNT (trinitrotoluene) ben o sutu. * Wan kefalek pikin pisi fu na energie dati e doro grontapu; ma toku dati sari fu horibaka gi ala libi tapu a planeiti fu wi. Toku a son fu wi no de a moro krakti stari di de na hemel kwetikweti. Na ini wan sekonde nomo son stari e gi  na energie di a son e gi wan heri dei. ¡Prakseri dan fu a krakti di a Wan di ben kria den sani disi na hemel abi! Nanga reti Elihu ben bari taki: „Fu a sei fu na Almaktiwan, wi no ben kon sabi en finifini; a hei na ini krakti.”—Yob 37:23.

5. Sortu buweisi gi a krakti fu Yehovah wi e feni na ini den wroko fu en?

⁵ Efu wi e ’suku den wroko fu Gado’ soleki fa David ben du, dan wi sa si buweisi fu a krakti fu en na ala presi — na ini winti di e wai èn na ini den skwala, na ini dondru èn na ini koti-faya, na ini bigi liba èn na ini kefalek bigi bergi (Psalm 111:2; Yob 26:12-14). Moro fara, soleki fa Yehovah ben memre Yob, dan den meti e buweisi a tranga fu En. Wan fu den na a Behemot, noso a nijlpaard. Yehovah ben taigi Yob: „A krakti fu en de na ini den dyonku fu en . . . Den tranga bonyo fu en de neleki isri tiki” (Yob 40:15-18). Na ini Bijbel ten sma ben sabi a krakti fu a werdri mankaw tu, di e frede sma srefisrefi, èn David ben begi taki a ben kan kisi kibri fu „a mofo fu a lew, èn fu den tutu fu den werdri mankaw”.—Psalm 22:21; Yob 39:9-11.

6. San a mankaw e prenki na ini den Buku fu Bijbel, èn fu san ede disi de so? (Luku a futuwortu.)

⁶ Fu a krakti di a mankaw abi, meki den e  gebroiki en fu prenki a krakti fu Yehovah. * A fisyun di na apostel Yohanes ben kisi fu a kownusturu fu Yehovah e gi wi wan prenki fu fo libi kriaturu, èn wan fu den ben abi a fesi fu wan mankaw (Openbaring 4:6, 7). Soleki fa a sori, dan wan fu den fo moro prenspari eigifasi fu Yehovah di den fo kerubim disi e prenki, na krakti. Den trawan na lobi, koni, nanga retidu. Fu di krakti na so wan prenspari pisi fu den eigifasi fu Yehovah, meki a frustan di wi e frustan den sani krinkrin fu a makti fu en èn fu a fasi fa a e gebroiki en, sa hari wi kon moro krosibei na en èn a sa yepi wi fu waka na baka en eksempre te wi e gebroiki a makti di wi abi.—Efeisesma 5:1.

„Yehovah fu den Legre, a Makti Wan”

7. Sortu dyaranti wi abi taki bun sa wini ogri?

⁷ Na ini den Buku fu Bijbel den e kari Yehovah „Gado na Almaktiwan”, wan titel di e memre wi taki noiti wi musu si a krakti fu en leki wan pikin sani noso taki wi e tweifri efu a man wini den feanti fu en (Genesis 17:1; Exodus 6:3). A godelowsu seti fu sani fu Satan kan sori fu de tranga, ma na ini den ai fu Yehovah „den nâsi de leki wan dropu na ini wan embre; èn leki a fini stof na tapu a wegi den de” (Yesaya 40:15). Tangi fu a krakti disi fu Gado, meki tweifri no de taki bun sa wini ogri. Na wan ten te godelowsufasi de so furu, wi kan kisi trowstu te wi sabi taki „Yehovah fu den legre, a Maktiwan fu Israèl” sa puru ogri fu têgo.—Yesaya 1:24; Psalm 37:9, 10.

8. Sortu hemel legre Yehovah abi na ondro en makti èn sortu eksempre wi abi fu a krakti fu den?

⁸ Den wortu „Yehovah fu den legre” di de fu feni 285 leisi na ini Bijbel, na wan tra sani di e memre wi na a krakti fu Gado. Den „legre” e sori dyaso go na a legre fu yeye kriaturu di Yehovah abi na ondro en makti (Psalm 103:20, 21; 148:2). Na ini wan enkri neti, wan fu den engel disi nomo ben kiri 185.000 srudati fu Asiria di ben de wan kefar gi Yerusalem (2 Kownu 19:35). Efu wi e erken a krakti fu a hemel legre fu Yehovah, dan gensman no sa tapu skreki makriki gi wi. A profeiti Elisa no ben broko en ede di a ben de na ini a trapu fu wan heri legre di ben e suku en, bika tra fasi leki a futuboi fu en, a ben kan si nanga den ai fu bribi taki wan tumusi bigi hemel legre ben horibaka gi en.—2 Kownu 6:15-17.

9. Fu san ede wi musu abi a frutrow, neleki Yesus, taki Gado sa kibri wi?

⁹ Na a srefi fasi Yesus ben sabi taki den engel ben e horibaka gi en na ini a dyari fu Getsemane di a ben abi fu du nanga wan opruru ipi sma di ben abi feti-owru nanga kodya na den. Baka di a ben taigi Petrus fu poti en feti-owru na en presi baka, dan Yesus ben taigi en taki efu a de fanowdu, dan a ben kan aksi en Tata fu „moro leki twarfu legioen engel” (Mateus 26:47, 52, 53). Efu wi abi a srefi warderi gi den hemel legre di Gado abi, dan wi sa frutrow so srefi sondro tweifri tapu a yepi fu Gado. Na apostel Paulus ben skrifi: „San wi sa taki dan fu den sani disi? Efu Gado de nanga wi, dan suma sa de teige wi?”—Romesma 8:31.

10. Te Yehovah e gebroiki en makti, dan fu a bun fu sortu sma a e du dati?

¹⁰ Fu dati ede wi abi ala reide fu frutrow taki Yehovah sa kibri wi. A e gebroiki a makti fu en ala ten gi bun sani èn akruderi den tra eigifasi fu en — retidu, koni nanga lobi (Yob 37:23; Yeremia 10:12). Ala di makti sma nofotron e lagi den pôtiwan èn den wan di abi sakafasi soso fu kan kisi wini gi densrefi wawan, toku Yehovah ’e opo a mofinawan puru na doti srefi’ èn a ’abi krakti pasa marki fu frulusu sma’ (Psalm 113:5-7; Yesaya 63:1). Neleki fa Maria, a bescheiden mama fu Yesus ben frustan, „a Maktiwan” e gebroiki en krakti fu a bun fu den wan di abi frede gi en sondro fu denki Ensrefi wawan, ala di a e saka den heimemre sma èn a e hei den lagiwan.—Lukas 1:46-53.

Yehovah E Sori den Futuboi fu En a Krakti fu En

11. Sortu buweisi fu a krakti fu Gado den Israèlsma ben si na ini a yari 1513 b.G.T.?

¹¹ Na difrenti okasi Yehovah ben sori den  futuboi fu en a makti fu en. Wan fu den okasi disi ben de na Sinaibergi na ini 1513 b.G.T. Na ini a yari dati den Israèlsma ben si buweisi kaba fu Gado en makti di ben naki den ati. Tin plaag di ben tyari pori kon ben sori a tranga anu fu Yehovah èn a ben sori taki den gado fu Egipti no abi makti. Syatu baka dati, a koti di den ben koti a Redi Se abra na wan wondru fasi èn a pori di Gado ben pori a legre fu Farao ben gi moro buweisi fu a tranga fu Gado. Dri mun baka dati, na a futu fu Sinaibergi, Yehovah ben gi den Israèlsma wan kari fu tron en „spesrutu gudu na mindri fu ala tra pipel”. Fu den sei, den ben pramisi: „Ala sani di Yehovah taki, wi wani fu du” (Exodus 19:5, 8). Dan Yehovah ben sori den a krakti fu en na wan libilibi fasi. Ala di dondru ben bari nanga koti-faya ben de fu si èn a bigi babari fu tutu ben de fu yere, a Sinaibergi ben puru smoko èn ben seki. A pipel di ben tanapu fara ben e frede. Ma Moses ben taigi den taki na ondrofeni disi musu leri den fu abi frede gi Gado, wan frede di ben musu yepi den fu gi yesi na a wan enkri tru Gado di abi ala makti, Yehovah.—Exodus 19:16-19; 20:18-20.

12, 13. Sortu situwâsi ben meki Elia gowe libi en wroko, ma fa Yehovah ben tranga en?

¹² Furu hondro yari baka dati, na a ten fu Elia, sma ben de kotoigi fu wan tra buweisi fu a krakti fu Gado na Sinaibergi. A profeiti ben si kaba fa a krakti fu Gado e wroko. Dri nanga afu yari Gado ben „tapu den hemel” fu di a nâsi Israèl ben fadon komopo na bribi (2 Kroniki 7:13). Na a pisi ten fu a dreiten di ben kon leki wan bakapisi fu dati, den blaka fowru ben gi Elia nyanyan na a lagipresi fu Krith, èn baka dati a pikinso blon nanga a pikinso oli fu wan weduwe ben kon moro furu na wan wondru fasi, fu gi en nyanyan. Yehovah ben gi Elia makti srefi fu wiki a manpikin fu a weduwe disi. Te fu kaba, fu sori taki En na Gado, dan faya ben komopo na hemel èn ben bron na ofrandi fu Elia na Karmelbergi (1 Kownu 17:4-24; 18:36-40). Toku esi-esi baka dati, Elia ben kon frede èn a ben lasi-ati di Iseibèl ben wani kiri en (1 Kownu 19:1-4). A ben lowe fu a kondre, ala di a ben e denki taki a wroko fu en leki profeiti ben kaba. Fu gi en a dyaranti baka èn fu tranga en, meki na wan switifasi Yehovah srefi ben gi en wan buweisi fu a krakti di a abi leki Gado.

¹³ Ala di Elia ben kibri na ini wan ston-olo, a ben si dri krakti di Yehovah e tiri èn disi ben gi en lespeki frede: wan tranga winti, wan gronseki èn te fu kaba wan faya. Ma di Yehovah ben taki nanga Elia, dan a ben du disi nanga „wan tiri, safri sten”. A ben seni en fu du moro wroko èn a ben taigi en taki 7000 getrow anbegiman fu Yehovah ben de ete na ini a kondre (1 Kownu 19:9-18). Efu neleki Elia wi e firi oiti taki wi lasi-ati fu di wi no abi bakapisi na ini wi diniwroko, dan wi kan begi Yehovah fu gi wi „a krakti di e pasa san de normaal” — wan krakti di kan tranga wi fu go doro nanga a preiki fu a bun nyunsu sondro fu tapu.—2 Korentesma 4:7.

A Makti fu Yehovah E Gi Wi a Dyaranti Taki den Pramisi fu En Sa Kon Tru

14. San a nen di Yehovah ensrefi abi e tyari kon na krin, èn san a makti fu en abi fu du nanga a nen fu en?

¹⁴ A makti fu Yehovah abi bun furu fu du tu nanga a nen fu en èn a du di wi musu du a wani fu en. Na aparti nen Yehovah di wani taki „A E Meki Kon De”, e tyari kon na krin taki a e meki ensrefi kon tron a Sma di e meki en pramisi kon tru. No wan sani noso no wan sma kan tapu Gado fu meki den prakseri fu en kon tru, ma sma di e tweifri pasa marki na sani, kan denki taki dati kan. Soleki fa Yesus ben taigi den apostel fu en wan leisi, dan „na Gado ala sani man”.—Mateus 19:26.

15. Fa Yehovah ben memre Abraham nanga Sara taki no wan sani de, di de tumusi bigi gi En?

¹⁵ Fu sori disi nanga wan eksempre, wan leisi Yehovah ben pramisi Abraham nanga Sara taki a ben sa meki den bakapikin fu den kon tron wan bigi nâsi. Ma furu yari langa den no ben abi pikin. Den ala tu ben owru srefisrefi di Yehovah ben taigi den taki a pramisi ben o kon tru, èn Sara ben lafu. Na engel ben piki taki: „¿Wan sani de, di de tumusi bigi gi Yehovah?” (Genesis 12:1-3; 17:4-8; 18:10-14) Fo hondro yari baka dati, di te fu kaba Moses ben tyari den bakapikin fu Abraham kon makandra — di ben de wan bigi nâsi now — na den lagi presi fu Moab, dan  a ben memre den taki Gado ben meki a pramisi fu en kon tru kaba. Moses ben taki: „Yu e tan libi, bika [Yehovah] ben lobi den fositen tata fu yu sote, so taki a ben teki a siri fu den di ben kon na baka den èn a ben tyari yu komoto na Egipti ai na ai, na en fesi nanga a bigi makti fu en, fu kan yagi den nâsi di moro bigi èn moro makti leki yu komoto na yu fesi, fu tyari yu na ini a kondre èn fu gi yu a kondre fu den leki wan famiri-gudu, soleki na a dei disi.”—Deuteronomium 4:37, 38.

16. Fu san ede den Saduseisma ben meki a fowtu fu taki dati na opobaka no de wan tru sani?

¹⁶ Furu hondro yari baka dati, Yesus ben krutu den Saduseisma di no ben bribi na ini na opobaka. Fu san ede den ben weigri fu bribi a pramisi fu Gado taki a sa tyari den dede wan kon baka? Yesus ben taigi den: „Unu no sabi den Buku noso a makti fu Gado” (Mateus 22:29). Den Buku fu Bijbel e gi wi a dyaranti taki ’ala sma di de na ini den memre-grebi, sa yere a sten fu a Manpikin fu libisma èn sa kon na doro’(Yohanes 5:27-29). Efu wi sabi san Bijbel e taki fu na opobaka, dan a frutrow di wi abi na ini a makti fu Gado o overtoigi wi taki den dedewan sa opo. Gado „seiker sa swari dede fu têgo, . . . bika Yehovah srefi taki en”.—Yesaya 25:8.

17. Tapu sortu dei na ini a ten di e kon a frutrow di wi e frutrow tapu Yehovah sa de prenspari na wan spesrutu fasi?

¹⁷ Heri esi na ini a ten di e kon, wan ten sa kon te ibriwan fu wi sa musu frutrow tapu a makti fu Gado di sa frulusu wi na wan spesrutu fasi. Satan Didibri sa bigin fu feti nanga Gado en pipel, di sa gersi fu de sondro fu wan sma kibri en (Esekièl 38:14-16). Dan Gado o sori en bigi makti fu a bun fu wi, èn ibriwan sma o musu sabi taki en na Yehovah (Esekièl 38:21-23). Now na a ten fu tranga a bribi fu wi èn a frutrow fu wi na ini Gado na Almaktiwan, so taki wi no sa degedege na a tumusi prenspari ten dati.

18. (a) Sortu winimarki wi e kisi te wi e prakseri dipi fu a makti fu Yehovah? (b) Sortu aksi wi sa luku na ini na artikel di e kon now?

¹⁸ Sondro tweifri, wi abi furu sani fu san ede wi kan prakseri dipi fu a makti fu Yehovah. Te wi e prakseri dipi den wroko fu en, dan disi e pusu wi nanga sakafasi fu prèise wi Gran Kriaman èn gi en tangi fu di a e gebroiki en makti na so wan koni èn lobi fasi. Noiti wi sa meki sma tapu skreki gi wi efu wi e frutrow tapu Yehovah fu den legre. A bribi fu wi na ini den pramisi fu en no sa degedege. Ma hori na prakseri taki Yehovah ben kria wi akruderi a prenki fu En. Fu dati ede wi tu abi makti — awansi a makti disi skotu. Fa wi kan waka na baka wi Kriaman na ini a fasi fa wi e gebroiki a makti fu wi? Disi na wan sani di wi sa luku na ini na artikel di e kon now.

[Futuwortu]

¿Yu Kan Piki den Aksi Disi?

• Fa a kriaturu e gi buweisi fu a krakti fu Yehovah?

• Sortu legre Yehovah kan gebroiki fu horibaka gi a pipel fu en?

• San ben de wan tu okasi di Yehovah ben sori a makti fu en?

• Sortu dyaranti wi abi taki Yehovah sa meki den pramisi fu en kon tru?

[Aksi fu a tori disi]

[Prenki na tapu bladzijde 10]

„Opo un ai go na loktu èn luku. Suma kria den sani disi?”

[Sma di abi a reti fu a prenki]

Fowtow fu Malin, © IAC/​RGO 1991

[Prenki na tapu bladzijde 13]

Te yu e prakseri dipi fu a makti fu Yehovah, dan dati sa tranga yu bribi na ini den pramisi fu en