A Fasi Fa Yehovah E Tyari Wi
A Fasi Fa Yehovah E Tyari Wi
„Tyari mi na tapu a pasi fu opregtifasi.”—PSALM 27:11.
1, 2. (a) Fa Yehovah e tyari en pipel na ini a ten disi? (b) San wi musu du fu nyan bun dorodoro fu den konmakandra?
YEHOVAH na a Sma di e gi leti nanga waarheid, leki fa wi leri na ini na artikel di ben kon fosi a disi. A Wortu fu en e gi wi leti ala di wi e waka na tapu a pasi fu opregtifasi. Yehovah e tyari wi fu di a e leri wi den pasi fu en (Psalm 119:105). Neleki a psalm skrifiman fu owruten, wi e handri nanga tangi na ati tapu a tyari di Gado e tyari wi èn wi e begi: „Leri mi a pasi fu yu, o Yehovah, èn tyari mi na tapu a pasi fu opregtifasi.”—Psalm 27:11.
2 Wan fasi fa Yehovah e gi sma leri na ini a ten disi de nanga yepi fu den Kresten konmakandra. ¿Wi e nyan bun fu a sani disi di seti na wan lobi fasi fu di wi (1) e go na den konmakandra doronomo, (2) e arki a programa heri bun, èn (3) e teki prati wantewante na ini den pisi pe a publiki abi wan pisi na ini? ¿Moro fara, wi e handri nanga tangi na ati te wi e kisi rai di sa yepi wi fu tan „na tapu a pasi fu opregtifasi”?
Fa A De Nanga A Go Di Yu E Go na Konmakandra?
3. Fa wan furuten dinari ben kweki a bun gwenti fu go na konmakandra doronomo?
3 Son Kownukondre preikiman ben go na konmakandra doronomo sensi den pikin-nengreten. „Di mi nanga den bigi sisa fu mi ben e gro kon bigi na ini den yari pasa 1930 te nanga 1939”, na so wan furuten dinari fu Yehovah Kotoigi e memre, dan „wi no ben abi fu aksi a papa nanga a mama fu wi efu wi ben o go na a konmakandra. Wi ben sabi taki wi ben o go boiti efu wi ben siki. A ben de wan fasti sani taki na osofamiri fu wi no ben misi konmakandra.” Neleki a profeiti-uma Ana, „den no e misi a sisa disi noiti” na ini Yehovah en presi fu anbegi.—Lukas 2:36, 37.
4-6. (a) Fu san ede son Kownukondre preikiman e misi konmakandra? (b) Fu san ede a prenspari srefisrefi fu go na konmakandra?
4 ¿Yu de na mindri den wan di e go na den Kresten konmakandra doronomo, noso yu e kon wanwan leisi nomo? Son Kresten di ben denki taki den ben e du en heri bun, ben teki a bosroiti fu de seiker taki den e du dati. Wan tu wiki, den ben meki notisi fu ibri konmakandra di den ben fisiti. Di den ben luku san den ben skrifi na a kaba fu a ten di den ben poti fu du dati, dan den ben fruwondru fu si omeni konmakandra den ben misi.
5 ’A no de fu fruwondru’, wan sma ben sa kan taki. ’So meni sani e druk na sma tapu na ini a ten disi, so taki a no de makriki gi den fu de na konmakandra doronomo’. A tru srefisrefi taki wi e libi na ini ten di e tyari stress kon. Boiti dati, a druk sa kon moro hebi seiker (2 Timoteus 3:13). ¿Ma dati no e meki taki a de moro prenspari srefisrefi fu go na konmakandra doronomo? Sondro wan bun gwenti fu nyan gosontu nyanyan na yeye fasi fu gi wi krakti, wi no kan fruwakti taki wi o kakafutu gi a druk di a seti disi e poti fu tyari. ¡We, efu wi no abi demakandra doronomo, dan wi ben sa kan kisi a firi fu gowe libi „a pasi fu den regtfardikiwan” krinkrin! (Odo 4:18) A tru, taki te wi e doro oso baka wan dei fu tranga wroko, kande a no ala ten wi e firi fu go na wan konmakandra. Ma te wi e go ala di wi weri, dan wi e du wisrefi bun, èn wi e gi den kompekresten fu wi di de na a Kownukondre zaal deki-ati.
6 Hebrewsma 10:25 e sori wan tra prenspari reide fu san ede wi musu go na konmakandra doronomo. Drape na apostel Paulus e frumane kompe-bribiman, fu den kon makandra, ’dati moro furu, fu di den e si a dei e kon krosibei’. Iya, wi no musu frigiti taki „a dei fu Yehovah” e kon krosibei (2 Petrus 3:12). Efu wi ben o prakseri taki a kaba fu a sistema de farawe ete, dan wi ben sa kan bigin meki a feti di wi e feti baka wi eigi sani kon na a presi fu wroko na yeye fasi di de fanowdu, soleki a go di wi e go na konmakandra. Ne, soleki fa Yesus ben warskow, ’a dei dati ben sa kan kon na wi tapu wantronso’.—Lukas 21:34.
De wan Bun Arkiman
7. Fu san ede a prenspari taki pikin-nengre e poti prakseri na konmakandra?
7 A no de nofo fu go na den konmakandra nomo. Wi musu arki heri bun, èn poti prakseri na den sani di den e taki drape (Odo 7:24). So srefi den pikin fu wi musu arki bun. Te wan pikin e go na skoro, dan sma e fruwakti taki a e poti prakseri na den sani di a leriman e taki, srefi te wan spesrutu tori no e hari en noso te a no man frustan a tori srefisrefi. A leriman sabi taki efu a pikin e pruberi fu poti prakseri, dan a sa kisi seiker wan pikinso wini fu a les. ¿A no de reidelek fu dati ede taki pikin di e go na skoro ete e poti prakseri na a leri di den e gi na gemeente konmakandra, na presi fu gi den pasi meki den fadon na sribi so esi leki a konmakandra e bigin? A tru, taki na mindri den warti waarheid na ini den Buku fu Bijbel „wan tu sani de di muilek fu frustan” (2 Petrus 3:16). Ma wi no musu denki taki wan pikin no abi nofo koni fu leri sani. Gado no e denki dati. Na ini Bijbel ten, a ben gi den yongu futuboi fu en a komando fu ’arki èn leri èn frede Yehovah èn sorgu taki den e du ala den wortu fu a wet disi’, ala di wan tu wet ben de di pikin-nengre no ben man frustan. (Deuteronomium 31:12; teki gersi Lefitikus 18:1-30.) ¿Yehovah e fruwakti moro mendri fu pikin-nengre na ini a ten disi?
8. San son papa nanga mama e du fu yepi den pikin fu den fu poti prakseri na konmakandra?
8 Kresten papa nanga mama e kon si taki den sani di den pikin fu den e leri na den konmakandra na wan yepi fu frulekti den nowtu na yeye fasi fu den pikin. Fu dati ede, son papa nanga mama e seti en so taki den pikin fu den e didon pikinso bifo den konmakandra, so taki den sa abi nyun krakti baka èn sa de klariklari fu leri te den e doro na a Kownukondre zaal. Wan tu papa nanga mama ben sa kan meki taki den pikin fu den no e luku telefisi furu srefisrefi, noso na wan koni fasi no wani taki den e luku telefisi kwetikweti tapu den neti te konmakandra e hori (Efeisesma 5:15, 16). Èn den papa nanga mama disi e sorgu taki furu sani no de di e puru a prakseri fu den, èn na so wan fasi den e gi den pikin fu den deki-ati fu arki èn leri, akruderi den yari di den abi èn akruderi omeni den man frustan.—Odo 8:32.
9. San kan yepi wi fu kon kisi a koni fu man arki?
9 Yesus ben e taki nanga bigisma di a ben taki: „Poti prakseri na a fasi fa unu e arki” (Lukas 8:18). Na ini a ten disi, nofotron dati moro makriki fu taki leki fu du dati. Wi musu erken taki fu arki nanga bun prakseri na wan tranga wroko, ma sma kan leri fu man arki. Te yu e arki wan Bijbel lezing noso wan pisi fu a konmakandra, dan pruberi fu puru den edepenti. Prakseri na fesi san a takiman e go taki moro fara. Suku penti di yu kan gebroiki na ini yu diniwroko noso di yu kan gebroiki na ini yu libi. Luku den penti baka na ini yu prakseri te den e tyari den kon na fesi. Meki syatu notisi.
10, 11. Fa son papa nanga mama yepi den pikin fu den fu kon tron moro bun arkiman, èn sortu fasi yu ben feni taki den e yepi bun?
10 Sma kan leri bun gwenti fu arki na a moro bun fasi te den yongu. Srefi bifo den e leri leisi nanga skrifi, son pikin di no e go na skoro ete e kisi deki-ati fu a papa nanga mama fu den fu meki „notisi” te konmakandra e hori. Den e poti wan marki tapu wan pisi papira te sma e gebroiki wortu di den sabi, soleki „Yehovah”, „Yesus”, noso „Kownukondre”. Na a fasi disi, pikin-nengre kan leri fu tan poti prakseri, na den sani di den e taki na tapu a podium.
11 Sontron den moro owru pikin srefi abi deki-ati fanowdu fu poti prakseri. Di na edeman fu wan osofamiri ben si taki a manpikin fu en di abi 11 yari ben dren nanga opo-ai ala di wan Kresten kongres ben hori, dan a ben gi a boi wan Bijbel èn a ben aksi en fu suku den tekst di den takiman ben kari. A papa, di ben meki notisi, ben e luku ala di a boi fu en ben e hori a Bijbel. Baka dati, a boi ben gi yesi nanga moro faya na a programa fu a kongres.
Meki Den Yere Yu Sten
12, 13. Fu san ede a prenspari fu singi tu te sma e singi na ini a gemeente?
12 Kownu David ben singi: „Mi sa waka lontu na altari fu yu, o Yehovah, fu meki a gi fu tangi de fu yere tranga na sma” (Psalm 26:6, 7). Konmakandra fu Yehovah Kotoigi e gi wi tumusi moi okasi fu sori a bribi fu wi nanga tranga sten. Wan fasi fa wi kan du disi na fu singi makandra nanga a gemeente. Disi na wan prenspari fasi fu wi anbegi, ma wi kan misi fu du disi makriki.
13 Son pikin-nengre di no man leisi ete e memre den wortu fu den Kownukondre singi di den ben sa gebroiki na den konmakandra ibri wiki. A e naki den ati taki den man singi makandra nanga den bigiwan. Ma te pikin-nengre e kon pikinso moro bigi, dan den no ben sa wani moksi densrefi so furu moro na ini a singi fu Kownukondre singi. Son bigi sma e syen tu fu singi na den konmakandra. Ma toku, singi na wan pisi fu wi anbegi, neleki fa a velddienst na wan pisi fu wi anbegi (Efeisesma 5:19). Wi e du ala muiti fu prèise Yehovah na ini a velddienst. ¿Wi no man gi en glori tu fu di wi e opo wi sten—awansi a sten moi noso no moi—na ini prèise singi di e komoto na ati?—Hebrewsma 13:15.
14. Fu san ede a de fanowdu fu sreka a materiaal na fesi di wi e studeri na den gemeente konmakandra?
14 Wi e prèise Gado tu te wi e gi komentaar di e gi deki-ati, na den pisi fu den konmakandra fu wi pe a publiki musu teki prati na den. Disi e aksi fu wi taki wi musu sreka wisrefi. A e teki ten fu prakseri fu den moro dipi sani fu a Wortu fu Gado. Na apostel Paulus, wan ondrosukuman di ben ondrosuku den Buku fu Bijbel fayafaya, ben kon frustan disi. A ben skrifi: „O, a dipi fu a gudu nanga a koni nanga a sabi fu Gado!” (Romesma 11:33) Edeman fu osofamiri, a de tumusi prenspari taki unu e yepi ibri memre fu un osofamiri fu ondrosuku a koni fu Gado, soleki fa a tyari kon na krin na ini den Buku fu Bijbel. Poti pikinso ten na wan sei te na osofamiri bijbelstudie e hori fu fruklari muilek penti èn fu yepi na osofamiri fu yu fu sreka densrefi gi den konmakandra.
15. Sortu rai kan yepi wan sma fu gi komentaar na konmakandra?
15 Efu yu ben sa wani gi komentaar moro furu leisi na konmakandra, dan fu san ede yu no e sreka na fesi san yu wani taki? A no de fanowdu fu taki sani finifini. Den sa warderi wan bijbeltekst di e fiti èn di leisi nanga overtoigi noso wan tu wortu di teki nanga koni èn di taki komoto na ati. Son preikiman e aksi a brada di e hori a studie fu hori a fosi komentaar tapu wan spesrutu paragraaf gi den, so taki den no sa misi na okasi fu sori a bribi fu den.
Den Sma Di No Abi Ondrofeni E Kon Koni
16, 17. Sortu rai wan owruman ben gi wan dinari ini a diniwroko, èn fu san ede a rai ben abi bun bakapisi?
16 Furutron den e memre wi na den konmakandra fu Yehovah Kotoigi, fu leisi a Wortu fu Gado ibri dei. Te wi e du disi, dan disi e kowru wi ati. A e yepi wi tu fu teki bosroiti nanga koni, fu puru fowtu na den eigifasi fu wi, fu kakafutu gi tesi, èn fu kisi wi balansi baka na yeye sei efu wi du sani di fowtu.—Psalm 19:7.
17 Gemeente owruman di abi ondrofeni de klariklari fu gi rai di komoto na Bijbel èn di e fiti den nowtu fu wi. Ala sani di wi abi fu du na fu „hari en kon” fu di wi e suku a rai fu den owruman di abi en gron tapu Bijbel (Odo 20:5). Wan dei wan yongu dinari ini a diniwroko di de fayafaya, ben aksi wan owruman fu sori en san a ben musu du so taki den ben kan gebroiki en moro bun na ini a gemeente. Na owruman, di ben sabi a yonkuman bun, ben opo en Bijbel na 1 Timoteus 3:3, di e taki dati man di den poti na wroko musu „handri leki fa a fiti”. Na wan switi fasi na owruman ben sori fasi fa a yonkuman ben kan sori taki a e handri leki fa a fiti na ini en demakandra nanga tra sma. ¿A yongu brada ben firi taki a krin rai di a ben kisi ben afrontu en? ¡Kwetikweti! „Na owruman ben gebroiki Bijbel”, a ben fruteri, „èn fu dati ede mi ben kon frustan taki a rai ben kon fu Yehovah”. Nanga tangi a dinari ini a diniwroko ben gebroiki a rai èn a e go moi na fesi.
18. (a) San ben yepi wan yongu Kresten fu kakafutu gi tesi na skoro? (b) Sortu bijbeltekst yu e memre te tesi e miti yu?
18 A Wortu fu Gado kan yepi yongu sma tu fu „lowe gi den lostu di den yongu sma abi” (2 Timoteus 2:22). Wan yongu Kotoigi fu Yehovah di ben kaba nanga a middelbaar skoro no so langa pasa, ben man kakafutu gi tesi na ini ala den yari di a ben go na skoro fu di a ben prakseri dipi fu son bijbeltekst èn ben gebroiki den. Furutron a ben denki fu a rai di skrifi na Odo 13:20: „A sma di e waka nanga koni sma, sa kon koni”. Na a srefi fasi, a ben luku bun fu kweki matifasi nanga den wan nomo di abi dipi lespeki gi gronprakseri fu Bijbel. A ben taki: „Mi no betre moro trawan. Efu mi e go bumui nanga den takru ipi sma, dan mi ben sa wani plisi den mati fu mi èn dati ben sa kan tyari problema kon”. A rai fu Paulus di skrifi na 2 Timoteus 1:8 ben yepi en tu. Paulus ben skrifi: „No syen fu a kotoigi fu wi Masra, . . . ma teki yu pisi ini a pina fu ogri gi a bun nyunsu”. Akruderi a rai dati, dan nanga deki-ati a ben prati den sani di a ben bribi èn di abi den gron tapu Bijbel, nanga den kompe studenti fu en na ibri okasi di fiti. Ibri leisi te a ben kisi a wroko fu gi wan taki na fesi a klas, a ben teki wan tori di ben gi en na okasi fu gi kotoigi nanga takt, fu a Kownukondre fu Gado.
19. Fu san ede wan yonkuman no ben man kakafutu gi a druk fu a grontapu disi, ma san ben gi en krakti na yeye fasi?
19 Efu oiti wi ben sa gowe libi „a pasi fu den regtfardikiwan”, dan a Wortu fu Gado kan yepi wi fu poti wi futu bun na pasi baka (Odo 4:18). Wan yonkuman di e libi na Afrika ben kon ondrofeni disi ensrefi. Di wan Kotoigi fu Yehovah ben fisiti en, dan a ben teki wan bijbelstudie. A ben prisiri fu den sani di a ben leri, ma heri esi a ben kon kisi fu du nanga takru kompe na skoro. Baka ten, a ben go libi wan immoreel fasi fu libi. „Mi konsensi ben tan fon mi, èn mi ben abi fu stop fu go na konmakandra”, a e erken. Baka ten, a ben bigin go na konmakandra baka. A yonkuman ben fruteri krin: „Mi ben kon sabi taki a moro prenspari reide fu san ede ala den sani disi pasa, ben de fu di mi ben dede fu angri bika mi ben mankeri nyanyan na yeye fasi. Mi no ben abi persoonlijk studie. Fu dati ede mi no ben man kakafutu gi tesi. Dan mi ben bigin leisi A Waktitoren nanga Ontwaakt! Safrisafri, mi ben kisi mi krakti na yeye fasi baka èn mi ben krin a fasi fa mi ben libi. Disi ben de wan bun kotoigi gi den wan di ben si den kenki di mi tyari kon. Mi ben teki dopu, èn now mi koloku”. ¿San ben gi a yonkuman disi a krakti fu wini den swakifasi fu en na skin sei? A ben kisi en krakti na yeye fasi baka fu di a ben studeri nanga ensrefi doronomo.
20. Fa wan yongu sma kan kakafutu gi den feti di Satan e feti fu kon du en ogri?
20 ¡Kresten yonguwan, furu sani de fu du yu ogri na ini a ten disi! Efu yu wani kakafutu gi den feti di Satan e feti fu kon du yu ogri, dan yu musu teki nyanyan na yeye fasi na ini yu doronomo. A psalm skrifiman, di a de krin taki ensrefi ben de wan yonkuman, ben frustan disi. A ben taigi Yehovah tangi fu di a ben gi a Wortu fu en, so taki ’wan yonkuman ben sa kan krin en pasi.’—Psalm 119:9.
Awansi Pe Gado E Tyari Wi, Drape Wi Sa Go
21, 22. Fu san ede wi no musu denki taki a pasi fu waarheid muilek tumusi?
21 Yehovah ben tyari a nâsi Israèl komoto na Egipti go na ini a Pramisi Kondre. Na a fasi fa sma e denki, dan a ben kan gersi leki a no ben de fanowdu fu waka a muilek pasi di a ben teki. Na presi fu teki a pasi di gersi leki a ben de moro makriki èn di ben kan tyari den langalanga, pasa a Mindrikondre Se, Yehovah ben tyari en pipel go na wan muilek woestijn pasi. Ma disi ben de trutru wan switifasi fu a sei fu Gado. Ala di a pasi fu a se ben de moro syatu, a ben o teki den Israèlsma go na ini a kondre fu den Filistijnsma di ben abi feantifasi. Fu di Yehovah ben teki wan tra pasi, a ben sorgu taki en pipel no ben o abi fu kisi trobi nanga den Filistijnsma so fruku.
22 Na a srefi fasi, a kan gersi sontron taki a pasi pe Yehovah e tyari wi go na ini a ten disi, muilek. Ibri wiki, wi abi wan schema di furu nanga Kresten aktiviteit èn so srefi gemeente konmakandra, persoonlijk studie, nanga velddienst. Tra pasi kan gersi moro makriki. Ma soso te wi e waka na baka a tiri fu Gado, wi sa doro na a presi di wi e wroko so tranga na en fu doro. ¡Fu dati ede, meki wi go doro fu teki tumusi prenspari leri fu Yehovah èn tan na tapu „a pasi fu opregtifasi” fu têgo!—Psalm 27:11.
¿Yu Kan Tyari Disi Kon na Krin?
• Fu san ede a de spesrutu fanowdu taki wi e go na Kresten konmakandra doronomo?
• San papa nanga mama kan du fu yepi den pikin fu den fu poti prakseri na den konmakandra?
• San a wani taki fu de wan bun arkiman?
• San kan yepi wi fu gi komentaar na konmakandra?
[Aksi fu a tori disi]
[Prenki na tapu bladzijde 16, 17]
A go di wi e go na Kresten konmakandra e yepi wi fu hori a dei fu Yehovah na prakseri
[Prenki na tapu bladzijde 18]
Difrenti fasi de fu prèise Yehovah na Kresten konmakandra