A Fasi Fa Yesus Krestes Kan Yepi Wi

DEN sani di Yesus Krestes ben du fu yepi sma di a ben de na grontapu, ben de sani di e fruwondru sma. Disi ben de so wan tru sani taki, baka di wan sma di ben si san ben pasa ben fruteri furu sani di ben pasa na ini a libi fu Yesus, dan a ben taki: „Fu taki en leti, furu tra sani de tu di Yesus ben du, di, efu den ben skrifi den finifini, mi denki taki grontapu srefi no ben sa man teki den lolo di skrifi” (Yohanes 21:25). Fu di Yesus ben du so furu na grontapu, meki wi ben sa kan aksi wisrefi: ’Fa a kan de wi yepiman na hemel? ¿Wi kan kisi wini fu a sari-ati fu Yesus nownowde?’

A piki tapu den aksi disi e prisiri na ati fu sma srefisrefi èn e gi sma wan korostu firi. Bijbel e fruteri wi taki Krestes ben go „na hemel srefi fu sori ensrefi now na fesi a sma di de Gado, fu a bun fu wi” (Hebrewsma 9:24). ¿San a ben du gi wi? Na apostel Paulus e fruklari: „[Krestes] ben go na inisei fu a santa presi [„hemel srefi”], nôno, no nanga a brudu fu bokoboko èn fu yongu mankaw, ma nanga en eigi brudu, èn a ben kisi wan têgo frulusu gi wi, wan tron èn fu ala ten”.—Hebrewsma 9:12; 1 Yohanes 2:2.

¡Dati na trutru bun nyunsu! Na presi taki wan kaba kon na den kefalek bun wroko di Yesus ben du gi libisma, dan na opo di a ben opo go na hemel ben meki a man du moro srefi gi a libisma famiri. Disi de so bika, na ini en no frudini bun-ati, Gado ben poti Yesus fu dini leki „wan publiki futuboi” — wan granpriester — „na a reti-anu fu a kownusturu fu a Gloriwan na hemel”.—Hebrewsma 8:1, 2.

„Wan Publiki Futuboi”

Na hemel na a ten dati, Yesus ben o de wan publiki futuboi gi a libisma famiri. A ben o du wan wroko neleki a wroko di a granpriester fu Israèl ben du gi den anbegiman fu Gado na ini owruten. Èn san ben de a wroko dati? Paulus e fruklari: „Den ben poti ibri granpriester fu òfer presenti èn so srefi ofrandi; fu dati ede a ben de fanowdu gi a wan disi [Yesus Krestes di ben opo go na hemel], taki so srefi en ben musu abi wan sani fu òfer tu”.—Hebrewsma 8:3.

Yesus ben abi wan sani fu òfer di ben hei krinkrin moro leki den sani di a granpriester fu owruten ben òfer. „¿Efu a brudu fu bokoboko èn fu mankaw” ben kan tyari pikinso krinfasi na yeye sei gi na owruten Israèl, „dan o moro betre a brudu fu Krestes . . . sa krin wi konsensi fu dede wroko so taki wi kan du santa diniwroko gi a libilibi Gado?”—Hebrewsma 9:13, 14.

Yesus na wan kefalek bun publiki futuboi tu, bika Gado ben gi en a grani fu de wan sma di no man dede. Na ini Israèl fu owruten „furu fu den ben abi fu kon tron priester [a wan baka a trawan] fu di dede ben tapu den fu tan priester”. Ma fa a de nanga Yesus? Paulus e skrifi: „A . . . abi en priesterwroko sondro sma di musu  kon na en baka. Fu dati ede, a man so srefi fu frulusu den wan di e go na Gado nanga yepi fu en dorodoro, bika ala ten a de na libi fu taki gi den” (Hebrewsma 7:23-25; Romesma 6:9). Iya, na a reti-anu fu Gado na hemel, wi abi wan publiki futuboi di ’de ala ten na libi fu taki gi wi’. ¡Denki nomo san dati wani taki gi wi nownowde!

Di Yesus ben de na grontapu, dan sma ben go ipi-ipi na en fu kisi yepi, èn son leisi den ben waka bun fara fu kan kisi a yepi fu en (Mateus 4:24, 25). Now di Yesus de na ini hemel, a wani yepi sma fu ala nâsi. Èn fu a bun posisi fu en na hemel, a de srekasreka ala ten leki wan publiki futuboi.

¿Sortu Granpriester Yesus De?

Den sani di den Evangelie tori e skrifi fu Yesus Krestes, e sori wi krinkrin taki a lobi fu yepi trawan èn taki a abi safu sari-ati gi sma. ¡A ben de wan sma di ben e òfer ensrefi trutru! Na moro leki wan okasi, a no ben man de en wawan moro, di en nanga den disipel fu en ben e pruberi fu kisi a rostu di den ben abi so tranga fanowdu. Na presi taki a ben feni taki a ben lasi warti momenti fu abi rostu, „a ben kisi sari nanga” den sma di ben suku a yepi fu en. Srefi di Yesus ben weri, ben abi angri èn ben dreiwatra, toku „a ben ontfanga den sma na wan switi fasi” èn a ben wani poti en nyanyan na wan sei fu ben kan yepi opregti sondari.—Markus 6:31-34; Lukas 9:11-17; Yohanes 4:4-6, 31-34.

Fu di a ben firi sari nanga den sma, meki Yesus ben du wan sani tu trutru fu sorgu gi den sani di den abi fanowdu na skin sei, na emotioneel sei, èn na yeye sei (Mateus 9:35-38; Markus 6:35-44). A ben leri den moro fara fu feni frulekti nanga trowstu di e tan (Yohanes 4:7-30, 39-42). Fu eksempre, a kari di a ben gi ibri sma persoonlijk, ben switi srefisrefi: „Kon na mi, un alamala di e wroko tranga èn di abi hebi lai, èn mi sa gi unu kowru-ati. Teki mi tyatyari na un tapu èn leri fu mi, bika mi abi safrifasi èn sakafasi fu ati, èn unu sa feni kowru-ati gi un sili.”—Mateus 11:28, 29.

A lobi fu Yesus gi sma ben de so furu taki te fu kaba a ben gi a libi fu en gi a sondu libisma famiri (Romesma 5:6-8). Fu a tori disi na apostel Paulus ben taki: „En [Yehovah Gado] di no ben kibri en eigi Manpikin srefi, ma di ben gi en abra gi wi alamala, èn fu san ede makandra nanga en a no sa gi wi ala tra sani na wan switi fasi? . . . Krestes Yesus na a sma di dede, iya, a sma srefi di ben kisi wan opobaka fu dede, di de na a reti-anusei fu Gado, èn di e taki gi wi tu”.—Romesma 8:32-34.

Wan Granpriester Di Kan Firi Nanga Wi

Leki wan libisma, Yesus ben sabi san na angri, dreiwatra, wan weriskin, sari, pen, nanga dede. A hebi druk di a ben musu tyari ben meki a de bekwaam na wan aparti fasi fu dini leki Granpriester gi a libisma famiri di e pina. Paulus ben skrifi: „[Yesus] ben musu fu kon de neleki den ‘brada’ fu en na ini ala sani, so taki a ben sa kan tron wan granpriester di abi sari-ati èn di de getrow na ini sani di abi fu du nanga Gado, so taki a kan gi wan zoen-ofrandi gi den sondu fu a pipel. Bika na ini disi, fu di ensrefi ben pina di a ben kisi tesi, meki a man fu yepi den wan di e kisi tesi.”—Hebrewsma 2:17, 18; 13:8.

Yesus ben sori taki a de bekwaam èn a wani yepi sma fu kon moro krosibei na Gado. ¿Ma dati wani taki dati a musu overtoigi wan grofu Gado di no abi sari-ati èn di no wani gi sma pardon? Kwetikweti, bika Bijbel e gi wi a dyaranti taki ’Yehovah bun èn taki a de klariklari fu gi pardon’. Bijbel e taki tu: „Efu wi e bekènti den sondu fu wi, dan a de getrow èn regtfardiki, so  taki a gi wi pardon fu wi sondu èn e krin wi fu ala onregtfardikifasi” (Psalm 86:5; 1 Yohanes 1:9). A de trutru so, taki den switi wortu fu Yesus nanga den sani di a e du e sori a sari-ati, nanga a lobi fu en Tata srefi.—Yohanes 5:19; 8:28; 14:9, 10.

Fa Yesus e tyari frulekti kon gi sondari di abi berow? Fu di a e yepi den fu feni prisiri nanga satisfaksi na ini den opregti muiti di den e meki fu plisi Gado. Di Paulus ben skrifi go na den kompe salfu Kresten, dan a ben taki fu a tori, taki: „Fu dati ede, fu di wi abi so wan bigi granpriester di pasa go na ini hemel, Yesus a Manpikin fu Gado, dan meki wi tan horidoro fu meki en bekènti na publiki. Bika wi no abi leki granpriester, wan sma di no kan firi nanga wi na ini den swakifasi fu wi, ma wan sma di den ben tesi neleki wi na ini ala fasi, ma sondro sondu. Fu dati ede, meki wi go nanga fri fu taki na a kownusturu fu no-frudini bun-ati, so taki wi kan kisi sari-ati èn kan feni no-frudini bun-ati leki yepi na a yoisti ten.”—Hebrewsma 4:14-16.

„Yepi na a Yoisti Ten”

Ma san wi kan du, efu wi abi fu du nanga problema di wi feni taki den bigi moro wi — seryusu siki, a hebi di konsensi fonfon hebi na wi tapu, lasi-ati di e moro wi, nanga depressie? Wi kan gebroiki a srefi seti di Yesus srefi ben gwenti fu poti en frutrow tapu — a bigi grani fu begi. Fu eksempre, a neti bifo a ben gi en libi gi wi, „a ben go doro fu begi nanga moro faya; èn a sweti fu en ben kon tron leki dropu brudu di ben fadon na gron” (Lukas 22:44). Iya, Yesus ben sabi fa a ben de fu begi Gado fayafaya. „Nanga tranga babari èn nanga watra-ai, [Krestes] ben seni tranga begi, so srefi begi tu go na a Sma di ben man frulusu en na dede, èn Gado ben arki en fu di a ben abi frede gi Gado.”—Hebrewsma 5:7.

Yesus sabi o prenspari a de gi libisma taki „Gado ben arki den” èn ben tranga den (Lukas 22:43). A ben pramisi moro fara: „Efu unu e aksi a Tata iniwan sani, dan a sa gi unu dati na ini mi nen. . . . Aksi èn unu sa kisi, so taki a prisiri fu unu sa de dorodoro” (Yohanes 16:23, 24). Fu dati ede wi kan aksi Gado nanga frutrow fu meki en Manpikin gebroiki a krakti fu en èn a waarde fu en frulusu-ofrandi gi a bun fu wi.—Mateus 28:18.

Wi kan abi a dyaranti taki nanga a makti di a abi na a hemel, Yesus sa gi a yoisti sortu yepi na a yoisti ten. Fu eksempre, efu wi du wan sondu èn wi abi opregti berow fu dati, dan wi kan kisi trowstu fu a dyaranti taki, „wi abi wan yepiman na a Tata, Yesus Krestes, wan regtfardikiwan” (1 Yohanes 2:1, 2). A Yepiman nanga a  Trowstuman fu wi na hemel o taki gi wi, so taki Gado o gi piki na tapu begi fu wi di wi taki na ini Yesus nen èn di de akruderi den Buku fu Bijbel.—Yohanes 14:13, 14; 1 Yohanes 5:14, 15.

Sori Warderi gi a Yepi fu Krestes

Wi musu du moro leki nomo fu begi Gado nanga yepi fu en Manpikin. „Krestes ben bai” wi nanga a waarde fu en frulusu-ofrandi èn a ben kon tron, soleki fa a ben o de, „na eiginari di ben bai” a libisma famiri (Galasiasma 3:13; 4:5; 2 Petrus 2:1). Wi kan sori taki wi de nanga tangi na ati gi ala den sani di Krestes e du gi wi fu di wi e erken taki en na wi eiginari èn fu di wi e teki a kari fu en nanga prisiri: „Efu iniwan sma wani waka na mi baka, dan meki a drai en baka gi ensrefi èn meki a teki en pina-udu ibri dei baka èn waka na mi baka doronomo” (Lukas 9:23). Fu ’drai baka gi ensrefi’ no de soso wan sani di wan sma e taki fu sori taki a abi wan tra eiginari. Te yu luku en bun, dan Krestes „dede gi ala sma, so taki den wan di e libi, no musu libi moro langa gi densrefi, ma gi a sma di dede gi den” (2 Korentesma 5:14, 15). Fu dati ede, warderi gi a lusu-paiman sa abi wan dipi krakti tapu a denki fu wi, den marki fu wi nanga a fasi fa wi e libi. A têgo paiman di wi abi na „Krestes Yesus, di ben gi ensrefi gi wi” musu pusu wi fu leri moro fu en nanga fu en lobi Tata, Yehovah Gado. Wi musu wani fu gro tu na ini bribi, fu libi akruderi den markitiki fu Gado di e gi wi wini, èn fu de „fayafaya gi tumusi bun wroko”.—Titus 2:13, 14; Yohanes 17:3.

A Kresten gemeente na a yepisani di e gi wi nyanyan na yeye fasi, deki-ati nanga tiri na a yoisti ten (Mateus 24:45-47; Hebrewsma 10:21-25). Fu eksempre, efu wan sma siki na yeye fasi, dan den kan „kari den owruman [owruman di poti] fu a gemeente”. Yakobus e gi a dyaranti: „Èn a begi fu bribi sa meki a wan di no e firi bun, kon betre, èn Yehovah sa opo en. Èn efu a du sondu, dan a sa kisi pardon fu dati”.—Yakobus 5:13-15.

Fu eksempre: Wan man di e koti strafu na ini wan strafu-oso na ini Zuid-Afrika ben skrifi wan brifi go na wan gemeente owruman, na ini san  a ben e sori warderi gi „ala Kotoigi fu Yehovah di e du a bun wroko di Yesus ben bigin, fu di den ben e yepi sma fu feti fu kisi a Kownukondre fu Gado”. Dan a ben skrifi: „Mi ben prisiri pasa marki di mi ben kisi yu brifi. A broko di yu ben broko yu ede fu frulusu mi na yeye fasi ben naki mi ati srefisrefi. Disi e gi mi moro reide fu bigin gi yesi na a kari di Yehovah Gado e gi fu abi berow. Twenti na seibi yari langa mi ben e fadon na ini sondu èn mi ben e lasi pasi na ini a dungru fu sondu, bedrigifasi, afersi di no de akruderi wet, èn na ini hurudu, nanga relisi di no abi bun prakseri. Baka di mi ben miti den Kotoigi fu Yehovah, mi firi te fu kaba taki mi ben feni a pasi — ¡a reti pasi! Ala sani di mi abi fu du, na fu waka na en tapu.”

Moro Yepi na ini a Krosibei Tamara

Den situwâsi na grontapu di e takru moro nanga moro na krin buweisi taki wi e libi na ini a muilek ten di ben o kon bifo „a bigi banawtu” bigin. Nownowde wan bigi ipi fu ala nâsi, lo, pipel, nanga tongo e „wasi den langa krosi fu den èn meki den kon weti na ini a brudu fu a Pikin Skapu” (Openbaring 7:9, 13, 14; 2 Timoteus 3:1-5). Fu di den e poti bribi na ini a frulusu-ofrandi fu Yesus, meki den e kisi pardon fu den sondu fu den èn den e kisi yepi fu abi wan krosibei matifasi nanga Gado — fu taki en leti, fu tron en mati.—Yakobus 2:23.

A Pikin Skapu, Yesus Krestes, „sa wei [sma di pasa a bigi banawtu libilibi] èn a sa tyari den go na fonten fu watra fu libi. Èn Gado sa figi ala watra-ai puru na den ai fu den” (Openbaring 7:17). Krestes sa du den plekti fu en leki Granpriester te leki a kaba. A sa yepi ala mati fu Gado fu kisi wini dorodoro fu „fonten fu watra fu libi” — na yeye fasi, na skin fasi, na frustan sei èn na emotioneel sei. A wroko di Yesus ben bigin na ini 33 G.T. èn a sani di a du moro fara na hemel sensi a ten dati, o tyari kon na wan kaba na wan volmaakti fasi.

Noiti no tapu, fu dati ede, fu sori dipi warderi gi ala sani di Gado nanga Krestes du — èn e du — gi wi. Na apostel Paulus ben gi deki-ati: „Ala ten abi prisiri na ini Masra. . . . No broko un ede nanga noti, ma meki Gado kon sabi den faya begi fu unu na ini ala sani nanga yepi fu begi nanga tranga begi makandra nanga tangi; èn a vrede fu Gado, di e pasa ala prakseri, sa kibri un ati nanga un krakti fu denki nanga yepi fu Krestes Yesus.”—Filipisma 4:4, 6, 7.

Wan prenspari fasi de fu sori a warderi fu yu gi Yesus Krestes, wi Yepiman na ini hemel. Baka sondongo, tapu dridewroko, 19 april 2000, den Kotoigi fu Yehovah na heri grontapu sa kon makandra fu hori a Memrefesa fu Krestes dede (Lukas 22:19). Disi sa de wan okasi gi yu fu meki a warderi fu yu gi a frulusu-ofrandi fu Krestes kon moro bigi. Wi e gi yu wan switi kari fu fisiti èn fu yere fa a kefalek moi seti disi fu Gado fu frulusu sma nanga yepi fu Krestes kan gi yu wini fu têgo. Grantangi aksi den Kotoigi fu Yehovah na a presi pe yu e tan, san na a yoisti ten nanga a yoisti presi pe a spesrutu konmakandra disi sa hori.

[Prenki na tapu bladzijde 7]

Yesus sabi fa a de fu begi Gado fayafaya

[Prenki na tapu bladzijde 8]

Krestes sa yepi wi fu kakafutu gi problema di bigi moro wi

[Prenki na tapu bladzijde 9]

Krestes e yepi wi nanga yepi fu lobi owruman