Bescheidenfasi​—Wan Eigifasi Di E Yepi fu Meki Vrede De

Grontapu ben o de wan switi presi srefisrefi efu ala sma ben bescheiden. Sma no ben o aksi someni fu trawan, den memre na ini wan osofamiri no ben o meki someni trobi, bisnisman no ben o strei someni nanga makandra, èn kondre no ben o feti someni nanga makandra ¿Yu ben sa wani libi na ini so wan grontapu?

TRU futuboi fu Yehovah Gado e sreka densrefi gi a nyun grontapu di a pramisi, pe ala sma sa si bescheidenfasi leki wan tranga eigifasi di bun, no leki wan swaki eigifasi (2 Petrus 3:13). Te yu luku en bun, dan nownow kaba den e leri na eigifasi fu de bescheiden. Fu san ede? Spesrutu fu di disi na san Yehovah e aksi fu den. En profeiti Mika ben skrifi: „A fruteri yu, o sma fu grontapu, san bun. Èn san Yehovah e aksi fu yu baka, leki fu du retidu èn fu lobi switifasi èn fu waka bescheiden nanga yu Gado?”—Mika 6:8.

Bescheidenfasi kan wani taki wan lo sani, soleki a prakseri di wan sma no e prakseri tumusi fu ensrefi, noso na abi di wan sma no abi bigifasi, èn a wani di wan sma no wani dyaf fu den sani di a man du, den sani di a doro, èn den gudu di a abi. Soleki fa wan buku e taki en, dan bescheidenfasi wani taki  tu „no pasa den marki”. Wan sma di bescheiden no e pasa den marki di abi fu du nanga bun maniri. A e erken tu taki a no ala sani a musu du èn taki a no ala sani a man du. A sabi taki sani de di a no abi a makti fu du den. Fu tru wi lobi sma di bescheiden. „No wan enkri sani moi so, leki trutru bescheidenfasi”, na so na Ingrisi puwemaman Joseph Addison ben skrifi.

Bescheidenfasi a no wan eigifasi di onvolmaakti libisma gebore nanga en. Wi musu du muiti fu leri na eigifasi disi. Fu gi wi deki-ati, dan Gado Wortu e taki fu furu sani di ben pasa èn di e sori wi den difrenti fasi fu bescheidenfasi.

Tu Kownu Di Ben De Bescheiden

Wan fu den moro loyaal futuboi fu Yehovah ben de David, di ben de wan yonkuman di den ben salfu fu tron kownu fu Israèl. Baka dati, Kownu Saul di ben de kownu na a ten dati, ben kwinsi David trutru fu di a ben pruberi fu kiri David èn fu di a ben dwengi en fu libi leki wan loweman.—1 Samuèl 16:1, 11-13; 19:9, 10; 26:2, 3.

Srefi na ini den situwâsi disi, David ben erken taki a no ala sani a ben mag du fu kibri a libi fu en. Wan leisi na ini a gran sabana, David ben weigri fu gi Abisai pasi fu du Kownu Saul di ben e sribi, ogri. A ben taki: „¡Soleki fa Yehovah e si en, dan fu mi sei, a no kan kwetikweti, taki mi e langa mi anu fu du a salfuwan fu Yehovah wan ogri!” (1 Samuèl 26:8-11) David ben sabi taki a no ben abi a reti fu puru Saul leki kownu. Dati meki David ben sori taki a ben bescheiden a leisi disi, fu di a no ben pasa den marki di abi fu du nanga bun maniri. So srefi, den futuboi fu Gado na ini a ten disi sabi taki „soleki fa Yehovah e si en”, sani de di den no mag du kwetikweti, so srefi te libisma kan lasi libi.—Tori fu den Apostel 15:28, 29; 21:25.

Di Kownu David en manpikin Salomo ben de wan yonkuman, dan a ben sori tu taki a ben bescheiden, ala di disi ben de pikinso tra fasi. Di Salomo ben tron kownu, dan a ben denki taki a no ben o man tyari a hebi frantwortu fu wan kownu. A ben begi: „Yehovah mi Gado, yusrefi meki a dinari fu yu kon de kownu ini a presi fu mi papa, èn mi na wan soso pikin boi nomo. Mi no sabi fa mi musu go na doro èn fa mi musu kon inisei.” A de krin taki Salomo ben sabi taki a no ben man du ala sani èn taki a no ben abi nofo ondrofeni. A ben bescheiden na a ten dati, fu di a no ben prakseri tumusi fu ensrefi, noso a no ben abi bigifasi. Salomo ben aksi Yehovah a koni fu man si sani krin, èn Gado ben gi en a koni disi.—1 Kownu 3:4-12.

A Mesias Nanga a Sma Di Ben Waka na En Fesi

Moro leki 1000 yari baka a ten fu Salomo, dan Yohanes a Dopuman ben du a wroko fu sreka a pasi gi a Mesias. Yohanes, di ben de a sma di ben waka na fesi a Salfuwan, ben meki Bijbel profeititori kon tru. A ben kan dyaf fu a grani di a ben kisi. Yohanes ben kan pruberi tu fu gi ensrefi grani fu di a ben de wan famiriman fu a Mesias. Ma Yohanes ben taigi trawan taki a no ben warti srefi fu lusu Yesus en sandaal. Èn di Yesus ben kon na Yohanes fu dopu na ini Yordanliba, dan Yohanes ben taki: „Yu na a sma di musu dopu mi, èn ¿yu e kon na mi?” Disi e sori taki Yohanes no ben de wan sma di ben e dyaf. A ben bescheiden.—Mateus 3:14; Maleaki 4:5, 6; Lukas 1:13-17; Yohanes 1:26, 27.

Baka di Yesus ben dopu, dan a ben bigin nanga wan furuten diniwroko di a ben e preiki a bun nyunsu fu Gado Kownukondre. Ala di Yesus ben de wan volmaakti man, toku a ben taki: „Mi no man du no wan sani fu misrefi . . . Mi no e suku mi eigi wani, ma a wani fu en di ben seni mi kon.” Boiti dati, Yesus no ben suku a grani fu sma, ma a ben gi Yehovah glori fu ala sani di a ben du (Yohanes 5:30, 41-44). ¡Ai, fa a ben bescheiden!

A de krin, fu dati ede, taki loyaal futuboi fu Yehovah — leki David, Salomo, Yohanes a Dopuman, èn srefi a volmaakti man Yesus Krestes — ben bescheiden. Den no ben dyaf, den no ben abi bigifasi, noso ben prakseri tumusi fu densrefi, èn den no ben pasa den marki. Soso na eksempre fu den kaba musu meki disiten futuboi fu Yehovah leri bescheidenfasi èn fu sori disi. Ma tra sani de ete di musu meki wi de bescheiden.

Na ini a bruya ten disi fu a libisma historia, bescheidenfasi na wan eigifasi di de tumusi prenspari gi tru Kresten. A e meki taki wan sma abi vrede nanga Yehovah Gado, nanga tra libisma, èn nanga ensrefi.

 Vrede Nanga Yehovah Gado

Wi kan abi vrede nanga Yehovah soso te wi no e pasa den marki di a poti gi a tru anbegi. Wi fosi papa nanga mama, Adam nanga Eva, ben pasa den marki di Gado ben poti, èn den ben tron den fosi libisma di no ben bescheiden. Den ben lasi a bun nen di den ben abi na Yehovah, so srefi na oso di den ben abi, a libi di den ben o abi, èn a libi fu den (Genesis 3:1-5, 16-19). ¡Ke, so wan bigi paiman den ben pai!

Meki wi leri fu a fowtu fu Adam nanga Eva, bika a tru anbegi e sori wi san wi musu du noso no musu du. Fu eksempre, Bijbel e taki dati „no wan huruman, no wan anbegiman fu kruktu gado, no wan sutaman, no wan man di den e hori fu du sani di a no meki fu dati, no wan man di e didon nanga man, no wan fufuruman, no wan sma di abi bigi-ai, no wan drunguman, no wan skempiman, no wan bedrigiman sa kisi a kownukondre fu Gado” (1 Korentesma 6:9, 10). Na wan koni sani taki Yehovah e poti den marki disi fu wi eigi bun, èn te wi no e pasa den marki disi, dan wi e sori taki wi koni (Yesaya 48:17, 18). Odo 11:2 e fruteri wi: „Koni de na den sma di de bescheiden.”

¿Ma san efu wan relisi organisâsi e fruteri wi taki wi kan pasa den marki disi èn taki toku wi kan abi vrede nanga Gado? Na organisâsi dati e pruberi fu bedrigi wi. Na a tra sei, bescheidenfasi e yepi wi fu kisi wan tranga banti nanga Yehovah Gado.

Vrede Nanga Tra Libisma

Bescheidenfasi e yepi wi tu fu libi ini vrede nanga tra sma. Fu eksempre, te papa nanga mama e gi na eksempre fu de sma di de tevrede nanga den sani di den abi fanowdu èn di e poti yeye afersi na a fosi presi, dan a kan de taki den pikin fu den sa abi a srefi denki. Den moro yonguwan sa feni en moro makriki fu de tevrede, srefi te den no kan kisi ala ten san den wani. Disi sa yepi den fu libi bescheiden, èn moro vrede sa de na ini na osofamiri libi.

Den sma di abi a frantwortu fu teki fesi, musu luku bun spesrutu taki den bescheiden èn taki den no e gebroiki a makti di den kisi na wan fasi di no fiti. Fu eksempre, Kresten e leri: „No go moro fara leki den sani di skrifi” (1 Korentesma 4:6). Gemeente owruman e frustan taki den no musu pruberi fu dwengi trawan fu du sani na a fasi fa densrefi wani. Na presi fu dati, den e gebroiki Gado Wortu fu gi sma deki-ati fu meki den du a yoisti sani tapu a kontren fu a fasi fa den musu tyari densrefi, tapu a kontren fu san den  musu weri, èn fa den musu sorgu densrefi, noso tapu a kontren fu ontspanning (2 Timoteus 3:14-17). Te sma fu a gemeente e si taki owruman no e pasa den marki di Bijbel poti, dan disi e yepi den fu lespeki den man disi èn a e meki taki sma ini a gemeente abi switifasi, taki den lobi makandra èn den e libi na ini vrede.

Abi Vrede Nanga Yusrefi

Den sma di sori taki den bescheiden, abi vrede na ini den ati. Wan sma di bescheiden no abi wan tranga lostu fu kisi grani noso posisi. Dati no wani taki dati a sma disi no e suku fu doro wan marki gi ensrefi. Fu eksempre, kande a wani kisi moro grani na ini a diniwroko, ma a e wakti Gado, èn iniwan grani di a e kisi leki Kresten, a e taki dati na fu Yehovah ede meki a kisi en. A sma no e si den leki wan sani di ensrefi du. Na so fasi a sma di bescheiden e kon moro krosibei na Yehovah, „a Gado fu vrede”.—Filipisma 4:9.

Kon meki wi taki dati son leisi wi abi a firi taki sma frigiti wi. ¿A no ben o moro bun efu sma frigiti wi fu di wi bescheiden, na presi taki wi e poti prakseri na wi tapu na wan fasi di e sori taki wi no bescheiden? Sma di bescheiden no abi a tranga lostu fu furu den ede nanga fa den kan kisi grani noso posisi. So bun, den abi vrede nanga densrefi, èn dati bun gi a gosontu na emotioneel sei èn na skin sei.

Leri fu De èn fu Tan Bescheiden

Adam nanga Eva ben kon de sma di no ben bescheiden — wan eigifasi di den ben gi den pikin fu den. San kan yepi wi fu no meki a srefi fowtu di a fosi papa nanga mama fu wi ben meki? Fa wi kan leri a moi eigifasi fu de bescheiden?

Na a fosi presi, te wi e frustan soifri san na a posisi di wi abi na Yehovah, a Kriaman fu hemel nanga grontapu, dan dati sa yepi wi. Sortu sani di wisrefi du, wi kan agersi oiti nanga den sani di Gado du? Yehovah ben aksi en getrow futuboi Yob: „Pe yu ben de di mi ben seti grontapu? Taigi mi, efu yu abi frustan trutru” (Yob 38:4). Yob no ben man piki. ¿A no de so tu taki wi no man sabi ala sani, wi no man du ala sani, èn wi no abi nofo ondrofeni? ¿A no bun te wi e erken taki wi no man du ala sani?

Bijbel e taigi wi moro fara: „Na Yehovah abi grontapu nanga den sani di e furu en, a gron di e gi furu nyanyan èn den sma di e libi na en tapu.” Dati wani taki „ibri werdri meti fu busi na fu mi, den meti na tapu dusun bergi”. Yehovah kan taki: „A solfru na fu mi, èn a gowtu na fu mi” (Psalm 24:1; 50:10; Hagai 2:8). Sortu gudu wi kan sori di wi kan agersi nanga den gudu fu Yehovah? ¡Iya, srefi a moro gudu sma no abi reide fu dyaf fu den sani di a abi! Dati meki a de wan koni sani fu teki a rai di na apostel Paulus ben gi Kresten na Rome, na ondro a krakti fu santa yeye: „Nanga a no-frudini bun-atifasi di mi ben kisi, mi e taigi ibriwan sma drape na un mindri, fu no denki fu ensrefi moro leki a de fanowdu.”—Romesma 12:3.

Wi, leki futuboi fu Gado di wani leri fu de bescheiden, musu begi fu kisi den froktu fu a yeye — lobi, prisiri, vrede, langa pasensi, switifasi, bun-ati, bribi, safri-ati, nanga a dwengi di wan sma e dwengi ensrefi (Lukas 11:13; Galasiasma 5:22, 23). Fu san ede? Fu di ibriwan fu den eigifasi disi sa meki en moro makriki gi wi fu de bescheiden. Fu eksempre, te wi lobi tra libisma dan dati sa yepi wi fu feti nanga a firi fu dyaf noso fu prakseri tumusi fu wisrefi. Èn te wi e dwengi wisrefi dan dati sa meki wi prakseri fu sani fosi, bifo wi e du wan sani di no bescheiden.

¡Meki wi de na ai! Doro wi musu luku bun gi den trapu di kan meki taki wi no bescheiden. Tu fu den kownu di wi ben taki fu den kaba, no ben bescheiden ala ten. Kownu David ben go teri a pipel fu Israèl sondro fu go prakseri den bakapisi fosi, wan sani di Yehovah no ben wani. Kownu Salomo ben kon de wan sma di no ben bescheiden, èn a ben go so fara srefi taki a ben teki prati na falsi anbegi.—2 Samuèl 24:1-10; 1 Kownu 11:1-13.

So langa a godelowsu seti fu sani disi de ete, wi musu luku bun ala ten taki wi bescheiden. Ma te wi e meki muiti fu disi, dan soso bun sa kon fu en. Na ini a nyun grontapu fu Gado, soso den sma di bescheiden sa libi drape. Den sa si bescheidenfasi leki wan tranga eigifasi èn no leki wan swaki eigifasi. ¡Fa a sa de wan moi sani trutru te Gado sa blesi ibriwan sma èn so srefi den osofamiri, nanga a vrede di e kon te wan sma bescheiden!

[Prenki na tapu bladzijde 23]

Na wan bescheiden fasi Yesus ben gi Yehovah grani fu ala sani di a ben du