Fu San Ede a Libisma Famiri Abi wan Yepiman Fanowdu

’MI BEN de wan asrantisma di ben frufolgu trawan’, na so wan ogri man di ben abi bigifasi fositen ben erken. A ben de wan grofu sma di ben afrontu trawan, di na wan ogri-ati fasi ben trobi Yesus Krestes en bakaman di ben abi frede gi Gado èn a ben feti nanga den. „Ma toku”, a ben taki nanga tangi, „Gado ben sori mi sari-ati”. Ala di a sori fu de wan sani di sma no sa wani bribi, toku a tumusi ogri man disi di ben frufolgu trawan ben kon tron a getrow Kresten apostel Paulus.—1 Timoteus 1:12-16; Tori fu den Apostel 9:1-19.

A no ala sma du den sortu sani di Paulus ben du. Ma toku wi alamala no man doro den markitiki fu Gado. Fu san ede? Bika „den alamala sondu èn no e doro a glori fu Gado” (Romesma 3:23). Na tapu fu dati, a makriki srefisrefi taki a lasi-ati di wi e lasi-ati e moro wi, ala di wi e firi taki wi ogri tumusi fu kan kisi a sari-ati fu Gado. Ala di Paulus ben e prakseri dipi fu den firi di a abi fu du sondu, ensrefi ben bari taki: „¡Ke, mofina sma di mi de! Suma sa frulusu mi fu a skin di e ondrofeni a dede disi?” A ben e piki en eigi aksi, di a ben skrifi: „¡Tangi fu Gado nanga yepi fu Yesus Krestes, wi Masra!”—Romesma 7:24, 25.

Fa wan regtfardiki Kriaman kan bemui nanga sondari? (Psalm 5:4) Luku taki Paulus ben taki: „Tangi fu Gado nanga yepi fu Yesus Krestes, wi Masra.” Wan tra sma di ben kisi a sari-ati fu Gado ben fruklari: „Efu wan sma du wan sondu, dan wi abi wan yepiman na a Tata, Yesus Krestes, wan regtfardikiwan. Èn a de wan zoen-ofrandi gi den sondu fu wi, ma no wawan gi di fu wi, ma so srefi tu gi di fu a heri grontapu.”—1 Yohanes 2:1, 2.

Fu san ede den e kari Yesus Krestes „a yepiman na a Tata”? Èn fa Yesus de wan „zoen-ofrandi” gi den sondu fu wi?

Fu San Ede wan Yepiman De Fanowdu

Yesus ben kon na grontapu „fu gi en sili leki wan lusu-paiman gi furu sma” (Mateus 20:28). Wan lusu-paiman na a moni di ben pai fu  bai noso fri wan sma noso wan sani. A fasi fa den e gebroiki a werkwoord di kon fu a Hebrew wortu gi wan „lusu-paiman”, abi na idea na ini fu tapu noso fu verzoen sondu (Psalm 78:38). Den ben gebroiki a Griki wortu, soleki a wan di skrifi na ini Mateus 20:28, spesrutu fu sori go na a moni di sma ben pai fu frulusu strafuman di den ben kisi na ini feti noso fu lusu srafu. Fu kan doro den markitiki fu retidu, meki den e gi wan sani na presi fu wan tra sani di abi a srefi waarde.

Libisma ben kon na ini katibo fu di a fosi man ben meki opruru. Soleki fa Genesis kapitel 3 e sori, dan a volmaakti man dati — Adam — ben frukisi fu trangayesi Yehovah Gado. Fu di a ben du so, meki a ben seri ensrefi nanga den bakapikin fu en di no ben gebore ete go na ini katibo fu sondu nanga dede. Na a fasi disi Adam ben lasi a presenti fu volmaakti libisma libi gi ensrefi èn gi ala den bakapikin fu en.—Romesma 5:12, 18, 19; 7:14.

Na ini Israèl fu owruten, Gado ben seti sani so taki den meti ofrandi ben kan verzoen sma, noso tapu den sondu fu sma (Lefitikus 1:4; 4:20, 35). Fu taki en leti, dan den ben gi a libi fu a meti di den ben tyari leki ofrandi na presi fu gi a libi fu a sondari (Lefitikus 17:11). Fu dati ede den ben kan kari a „verzoendei” leki a „dei fu den lusu-paiman”.—Lefitikus 23:26-28.

Ma fu di meti lagi moro libisma, meki ’a brudu fu mankaw nanga bokoboko no ben man puru sondu’ [krinkrin] (Hebrewsma 10:1-4). Fu kan meki wan ofrandi abi nofo waarde fu man verzoen, noso puru sondu fu ala ten, dan na ofrandi ben o musu abi a srefi waarde fu a sani di Adam ben lasi. Den markitiki fu retidu ben meki a de fanowdu taki wan volmaakti man (Yesus Krestes) ben musu feni a sani baka di wan tra volmaakti man (Adam) ben lasi. Soso a libi fu wan volmaakti libisma ben kan pai a lusu-paiman fu fri den bakapikin fu Adam fu a katibo na ini san a fositata fu den ben seri den. Wan ’sili gi wan sili’ na wan sani di ben o doro den markitiki fu tru retidu.—Exodus 21:23-25.

Di Adam ben sondu èn ben kisi a krutustrafu fu dede, dan den bakapikin fu en di no ben gebore ete ben de ete na ini en mindribere èn fu dati ede den dede nanga en. Nanga en friwani, a volmaakti man Yesus, „a lasti Adam”, no ben seti wan famiri (1 Korentesma 15:45). A ben abi bakapikin di no gebore ete na ini a mindribere fu en, di a dede leki wan volmaakti libisma ofrandi. Fu dati ede sma ben sa kan taki dati a libisma famiri di Yesus ben kan seti, dede makandra nanga en, ala di a famiri disi ben de na ini en mindribere. Yesus ben teki a sondu famiri fu Adam di ben e dede, leki den na en eigi famiri. A no ben gebroiki a reti fu abi wan famiri gi ensrefi. Yesus ben bai ala libisma bakapikin fu Adam baka di a ben òfer a volmaakti libisma libi fu en so taki den ben kan kon tron a famiri fu En, en dati meki A tron a „Têgo Tata” fu den.—Yesaya 9:6, 7.

A frulusu-ofrandi fu Yesus ben opo a pasi gi a libisma famiri di e gi yesi fu kisi a sari-ati fu Gado èn fu kisi têgo libi. Fu dati ede na apostel Paulus ben skrifi: „A pai fu sondu na dede, ma a presenti di Gado e gi, na têgo libi nanga yepi fu Krestes Yesus, wi Masra” (Romesma 6:23). Disi e pusu wi fu prèise Yehovah gi a lobi nanga a sari-ati di abi fu du nanga a lusu-paiman, di ben aksi bun furu fu ensrefi èn fu a lobi Manpikin fu en (Yohanes 3:16). Èn Yesus ben sori fu de trutru „wan yepiman na a Tata” di a ben kisi wan opobaka fu kisi libi na ini hemel èn a ben pristeri a waarde fu a frulusu-ofrandi fu en na Gado na ini hemel * (Hebrewsma 9:11, 12, 24; 1 Petrus 3:18). Ma fa Yesus Krestes e sori nownowde taki a de wi yepiman na ini hemel?

[Futuwortu]

[Prenki na tapu bladzijde 4]

A volmaakti libisma libi fu Yesus ben kon tron a paiman fu frulusu den bakapikin fu Adam