’O Gado, Seni a Leti fu Yu Go na Doro
’O Gado, Seni a Leti fu Yu Go na Doro
„Seni yu leti nanga yu waarheid go na doro. Meki den disi srefi tyari mi.”—PSALM 43:3.
1. Fa Yehovah e tyari den prakseri fu en kon na krin?
YEHOVAH e hori den dinari fu en bun na prakseri na a fasi fa a e meki den prakseri fu en bekènti na den. Na presi fu sori a waarheid wantewante so nanga wán brenki leti di e skèin èn e breni sma, a e meki wi kon frustan sani moro krin safrisafri. A waka di wi e teki na tapu a futupasi fu libi, wi ben sa kan teki gersi nanga a waka di wan man e teki di e koiri na wan langa pasi. A e bigin waka fruku mamanten èn a no e si sani so krin. Di a son e bigin opo safrisafri te so fara leki na ai kan si, dan a man di e koiri kan si wan tu sani di de lontu en. Den tra sani a no e si krin. Ma di a son e opo kon moro hei, dan a kan si farawe moro nanga moro. Na so a de nanga a leti na yeye fasi di Gado e gi. Gado e gi pasi taki wi kon frustan wan tu sani nomo ibri leisi. Na a srefi fasi a Manpikin fu Gado, Yesus Krestes, ben meki sma kon frustan sani na yeye fasi moro krin. Meki wi luku fa Yehovah ben meki en pipel kon frustan sani moro krin na ini owruten èn fa a e du disi na ini a ten disi.
2. Fa Yehovah ben meki leti skèin na ini a ten bifo den Kresten?
2 A ben kan de so taki den skrifiman fu a di fu 43 Psalm ben de den manpikin fu Kora. Leki Leifisma, den ben abi a grani fu leri a pipel a Wet fu Gado (Maleaki 2:7). A no de fu taki, dati Yehovah ben de a Gran Leriman fu den, èn den ben frutrow tapu en leki a Sma di abi ala koni (Yesaya 30:20). „O Gado, . . . seni yu leti nanga yu waarheid go na doro”, a psalm skrifiman ben begi. „Meki den disi srefi tyari mi” (Psalm 43:1, 3). So langa den Israèlsma ben de getrow na En, dan Yehovah ben leri den, den pasi fu en. Hondrohondro yari baka dati, Yehovah ben gi den Israèlsma leti nanga waarheid di ben de fu wan moro aparti sortu. Gado ben du dati di a ben seni en Manpikin kon na grontapu.
3. Na sortu fasi a leri di Yesus ben gi ben de wan tesi gi den Dyu?
3 Leki libisma, Yesus Krestes, a Manpikin fu Gado, ben de „a leti fu grontapu” (Yohanes 8:12). A ben leri den sma „furu sani nanga yepi fu agersitori” — nyun sani (Markus 4:2). A ben fruteri Pontius Pilatus: „Mi kownukondre no de wan pisi fu a grontapu disi” (Yohanes 18:36). Dati ben de wan nyun sani gi wan Romesma èn seiker gi den Dyu di ben lobi den eigi kondre, bika den ben prakseri taki a Mesias ben o meki a Gran Kownukondre Rome saka ensrefi na en ondro èn meki Israèl kon kisi a glori baka di a ben abi fosi. Yesus ben skèin leti kon fu Yehovah, ma den wortu fu en no ben plisi den Dyu tiriman, di „ben lobi a glori fu libisma moro leki a glori srefi fu Gado” (Yohanes 12:42, 43). Furu fu den sma ben frukisi fu hori steifi na a libisma gwenti fu den na presi fu erken leti na yeye fasi nanga waarheid fu Gado.—Psalm 43:3; Mateus 13:15.
4. Fa wi kan sabi taki den disipel fu Yesus ben o tan kon frustan sani moro bun?
4 Toku, nanga prisiri wan tu opregti man nanga uma ben teki a waarheid di Yesus ben leri den. Den ben go na fesi doronomo fu frustan den prakseri fu Gado. Ala di a kaba fu a libi na grontapu fu a Leriman fu den ben kon krosibei, toku den ben abi furu fu leri ete. Yesus ben taigi den: „Mi abi furu sani ete fu taigi unu, ma unu no man tyari den now” (Yohanes 16:12). Iya, den disipel ben o tan kon frustan a waarheid fu Gado moro bun.
A Leti E Tan Skèin
5. Sortu aksi ben kon na ini a fosi yarihondro, èn suma ben abi a frantwortu fu lusu na aksi?
5 Baka a dede nanga na opobaka fu Yesus, dan leti fu Gado ben skèin moro brenki leki fosi. Na ini wan fisyun di Yehovah ben gi Petrus, Yehovah ben fruklari taki fu bigin nanga a ten dati Heiden di no besnij ben kan tron bakaman fu Krestes (Tori fu den Apostel 10:9-17). ¡Dati ben de trutru wan nyun sani! Ma toku wan aksi ben kon baka dati: ¿Yehovah ben aksi den Heiden disi fu besnij, baka di den ben tron Kresten? Na aksi dati no ben piki na ini a fisyun, èn na afersi ben tron wan tori fu fayafaya hari-taki na mindri Kresten. Den ben musu lusu na afersi, efu den no ben wani lasi a warti wánfasi fu den. Fu dati ede „den apostel nanga den owruman ben kon makandra fu luku na afersi disi” na ini Yerusalem.—Tori fu den Apostel 15:1, 2, 6.
6. Sortu sani den apostel nanga den owruman ben du di den ben luku na aksi fu a besnij tori?
6 Fa den wan di ben de na a konmakandra dati, ben kan sabi san a wani fu Gado ben de gi Heiden di e bribi? Yehovah no ben seni wan engel fu de fesiman na den takimakandra, èn a no ben gi den wan di ben drape wan fisyun. Toku den apostel nanga den owruman no ben de krinkrin sondro tiri. Den ben luku a kotoigi di wan tu Dyu Kresten ben gi, di ben si fa Gado ben bigin handri nanga sma fu den nâsi èn ben kanti en santa yeye go na tapu Heiden di no besnij. Den ben ondrusuku den Buku fu Bijbel tu fu kisi tirilin. A bakapisi fu disi ben de taki a disipel Yakobus ben gi rai di abi en gron tapu wan tekst di ben tyari sani kon na krin. Di den ben prakseri bun fu den buweisi, dan a wani fu Gado ben kon na krin. Den sma fu den nâsi no ben abi fu besnij fu meki Yehovah feni den bun. Den apostel nanga den owruman no ben lasi ten fu skrifi a bosroiti, so taki disi ben kan tiri kompekresten.—Tori fu den Apostel 15:12-29; 16:4.
7. Fa den fosi yarihondro Kresten ben du sani fu go na fesi?
7 Tra fasi leki den Dyu relisi fesiman, di ben hori steifi na den gwenti fu den afo, a moro bigi pisi fu den Dyu Kresten ben prisiri di den ben kisi a kefalek moi nyun fasi disi fu frustan a prakseri fu Gado ini a tori fu den sma fu den nâsi, ala di a ben wani taki dati efu den ben o teki a prakseri disi, dan den ben musu kenki a denki fu den di ben abi fu du nanga Heiden. Yehovah ben blesi a yeye fu sakafasi fu den, èn „den gemeente ben tan kon tranga na ini bribi èn ibri dei den ben kon moro furu”.—Tori fu den Apostel 15:31; 16:5.
8. (a) Fa wi sabi taki wi ben kan fruwakti moro leti baka di a fosi yarihondro ben kon na wan kaba? (b) Sortu aksi di fiti wi sa luku?
8 Leti na yeye fasi ben tan skèin na ini a heri fosi yarihondro. Ma Yehovah no ben sori den fosi Kresten ibri fasi fu den prakseri fu en. Na apostel Paulus ben fruteri fosi yarihondro kompe-bribiman: „Nownowde wi e si sani frafra nanga wan isri spigri” (1 Korentesma 13:12). A tapusei fu so wan spigri no ben de a moro bun sortu pe yu ben man si sani krin. Fu dati ede, na ini a bigin a leti na yeye fasi ben sa de pikinso. Baka a dede fu den apostel, a leti ben kon dof fu wan pisi ten, ma na ini a ten disi a sabi fu den Buku fu Bijbel kon furu srefisrefi (Danièl 12:4). Fa Yehovah e meki en pipel kon frustan sani moro krin na ini a ten disi? ¿Èn fa wi musu handri te a e meki wi frustan den Buku fu Bijbel moro bun?
A Leti E Kon Moro Brenki Safrisafri
9. Sortu aparti èn bun fasi fu studeri Bijbel den fosi Bijbel Ondrosukuman ben gebroiki?
9 Na ini a ten disi a fosi trutru pikinso skèin fu leti ben de fu si na ini den lasti 25 yari fu a tinaneigi yarihondro di wan grupu fu Kresten man nanga uma ben bigin wan seryusu studie fu den Buku fu Bijbel. Den ben kon abi wan bun fasi fu studeri Bijbel. Wan sma ben o kon nanga wan aksi; dan a grupu ben o luku ala den bijbeltekst finifini di abi fu du nanga na aksi. Te a ben gersi taki wan bijbelvers ben taki kontrari wan tra wan, dan den opregti Kresten disi ben pruberi fu meki den tu tekst kruderi nanga makandra. Tra fasi leki den relisi tiriman fu a ten dati, den Bijbel Ondrosukuman (soleki den ben sabi Yehovah Kotoigi na a ten dati) ben abi a fasti bosroiti fu no meki gwenti noso leri di libisma prakseri tiri den, ma den Santa Buku fu Bijbel. Baka di den ben luku ala Bijbel buweisi di den ben abi, dan den ben skrifi den bosroiti di den ben teki. Na a fasi dati den ben kon frustan furu fondamenti leri fu Bijbel krin.
10. Sortu bun yepisani di sma ben kan gebroiki bun fu studeri Bijbel Charles Taze Russell ben skrifi?
10 Wan man na mindri den Bijbel Ondrosukuman di ben de kefalek bun ben de Charles Taze Russell. A ben skrifi siksi pisi yepisani di sma ben kan gebroiki bun fu studeri Bijbel èn di nen Studies in the Scriptures. Brada Russell ben wani skrifi wan di fu seibi pisi, di ben o fruklari den Bijbel buku Esekièl nanga Openbaring. „Te mi feni a sroto”, a ben taki, „dan mi sa skrifi a di fu Seibi Pisi”. Ma a ben taki moro fara: „Efu Masra e gi wan tra sma a sroto, dan a tra sma kan skrifi en.”
11. Sortu kruderi de na mindri yoisti ten nanga a frustan di wi e frustan den prakseri fu Gado?
11 A sani disi di C. T. Russell ben taki, e sori taki wan prenspari sani de di e meki taki wi man frustan son pisi fu Bijbel — a yoisti ten. Brada Russell ben sabi taki a no ben kan dwengi a leti fu skèin na tapu a buku Openbaring, neleki te wan man di e angri fu go koiri no kan meki a son opo bifo en fasti ten doro fu opo.
A Kon na Krin—Ma na Gado En Reti Ten
12. (a) O ten sma kan frustan profeititori fu Bijbel na a moro bun fasi? (b) Sortu eksempre e sori taki a man di wi man frustan Bijbel profeititori e anga fu a ten di Gado seti fu du sani? (Luku futuwortu.)
12 Neleki fa den apostel ben frustan furu profeititori di ben abi fu du nanga a Mesias soso baka a dede nanga na opobaka fu Yesus, na so Kresten na ini a ten disi e frustan ala pikin pisi fu Bijbel profeititori soso baka di a ben kon tru (Lukas 24:15, 27; Tori fu den Apostel 1:15-21; 4:26, 27). Openbaring na wan buku fu profeititori, èn fu dati ede wi musu fruwakti taki wi kan frustan a buku na a moro krin fasi te den sani di a e fruteri e feni presi. Fu eksempre, C. T. Russell no ben kan frustan na wan yoisti fasi san a simbôlis redi-kloru werdri meti wani taki di kari na Openbaring 17:9-11, fu di den organisâsi di a meti e prenki, namku, a Folkubontu nanga den Verenigde Nâsi, no ben de ete srefisrefi te leki baka a dede fu en. *
13. San e pasa sontron te leti e skèin na tapu wan spesrutu tori fu Bijbel?
13 Di den fositen Kresten ben kon sabi taki Heiden di no besnij ben kan tron kompe-bribiman, dan a kenki dati ben tyari wan nyun aksi kon efu a ben de fanowdu taki den sma fu den nâsi ben musu besnij. Disi ben buweigi den apostel nanga den owruman fu ondrosuku a heri afersi fu besnijdenis ete wan leisi. Na ini a ten disi a srefi model de fu si. Sontron, wan tumusi brenki leti di e skèin tapu wan tori fu Bijbel e meki taki den salfu dinari fu Gado, „a getrow èn koni srafu”, e go ondrusuku tori di abi fu du nanga makandra, leki fa na eksempre disi fu no so langa pasa e sori.—Mateus 24:45.
14-16. Fa wan kenki na ini a fasi fa wi ben denki fu a yeye tempel ben abi krakti tapu a frustan di wi ben frustan Esekièl kapitel 40 te nanga 48?
14 Na ini 1971 den ben tyari wan fruklari fu a profeititori fu Esekièl kon na doro na ini a buku „De natiën zullen weten dat ik Jehovah ben” — Hoe? Wan kapitel fu a buku dati ben taki syatu fu a fisyun fu Esekièl fu wan tempel (Esekièl, kapitel 40-48). Na a ten dati, den ben luku soso fa a tempel fisyun fu Esekièl ben o kon tru na ini a nyun grontapu.—2 Petrus 3:13.
15 Ma tu artikel di kon na doro na ini De Wachttoren fu 1 april 1973, ben abi krakti tapu a frustan di wi ben frustan a fisyun fu Esekièl. Den ben taki fu a bigi yeye tempel di Paulus ben fruteri fu dati na ini Hebrewsma kapitel 10. De Wachttoren ben fruklari taki a Santa presi nanga na inisei fesi dyari fu a yeye tempel abi fu du nanga a situwâsi fu den salfuwan ala di den de na grontapu. Di den ben luku Esekièl kapitel 40 te nanga 48 furu yari baka dati, dan den ben kon si taki neleki fa a yeye tempel e wroko na ini a ten disi, na so a tempel di Esekièl ben si na ini wan fisyun ben musu wroko tu na ini a ten disi. Fa so?
16 Na ini a fisyun fu Esekièl, priester de fu si di e waka lontu na ini den fesi dyari fu a tempel ala di den e dini den lo di no de priester. A krin taki den priester disi e prenki a „kownu priesterwroko”, den salfu dinari fu Yehovah (1 Petrus 2:9). Ma na ini a heri Tiri fu Dusun Yari fu Krestes den no sa dini na ini a fesi dyari na grontapu (Openbaring 20:4). Na ini a moro bigi pisi fu a ten dati, efu a no a heri ten dati, dan den salfuwan sa dini Gado na ini a Moro Santa presi fu a tempel, „hemel srefi” (Hebrewsma 9:24). Fu di den e si taki den priester e go-kon na ini den fesi dyari fu a tempel fu Esekièl, dati meki a musu de so taki a fisyun dati e kon tru na ini a ten disi, ala di wan tu fu den salfuwan de na grontapu ete. Na so tu, na uitgave fu 1 maart 1999 fu a tijdschrift disi ben gi wan tra luku na tapu a tori disi. Na so fasi, te leki na a kaba fu a di fu tutenti yarihondro, leti na yeye fasi ben skèin na tapu a profeititori fu Esekièl.
De Klariklari fu Kenki Yu Fasi fu Denki
17. Sortu kenki yu tyari kon na ini yu eigi fasi fu denki sensi yu ben kon kisi sabi fu a waarheid, èn fa den ben de fu a bun fu yu?
17 Ibri sma di wani kon kisi sabi fu a waarheid, musu de klariklari fu tyari „ibri prakseri kon na ini katibo, fu meki a gi yesi na Krestes” (2 Korentesma 10:5). Dati no makriki ala ten, spesrutu te sani rutu dipi na ini a denki. Fu eksempre, bifo yu ben leri a waarheid fu Gado, a ben kan de so taki yu ben lobi hori wan tu fu den relisi fesa nanga yu famiri. Baka di yu ben bigin studeri Bijbel, dan yu ben kon si taki den fesa disi trutru ben abi en rutu na den heiden. Na ini a bigin, yu ben draidrai kande fu du san yu ben e leri. Ma te fu kaba, a ben sori taki a lobi gi Gado ben moro tranga moro leki a fasi fa sma e firi gi relisi, èn yu ben tapu fu teki prati na fesa di no e plisi Gado. ¿Yehovah no blesi a bosroiti fu yu?—Teki gersi Hebrewsma 11:25.
18. San wi musu du te a frustan fu wi fu a waarheid fu Bijbel e kon moro krin?
18 Wi e nyan bun ala ten te wi e du sani na a fasi fa Gado wani (Yesaya 48:17, 18). ¡So bun, te a fasi fa wi e frustan wan pisi fu Bijbel e kon moro krin, dan meki wi prisiri fu di a frustan di wi e frustan waarheid kon moro bun! Fu tru, a tan di wi e tan go doro fu kisi sabi fu frustan sani moro krin, e sori taki wi de na tapu a reti pasi. A de „a pasi fu den regtfardikiwan”, di „de leki a brenki leti di e kon krin moro nanga moro, te leki a dei poti kon steifi” (Odo 4:18). A tru taki nownowde wi e si wan tu „sani” fu a prakseri fu Gado „frafra”. Ma te Gado en reti ten e doro, dan wi sa si a heri moi fasi fu a waarheid, efu den futu fu wi tan steifi na tapu „a pasi”. Nownowde, meki a de so taki wi e prisiri nanga den waarheid di Yehovah tyari kon na krin, ala di wi e wakti fu leti skèin na tapu den wan di wi no man frustan krinkrin ete.
19. San na wán fasi fu sori taki wi lobi a waarheid?
19 Fa wi kan sori na wan bun fasi taki wi lobi a leti? Wán fasi na fu leisi a Wortu fu Gado doronomo — ibri dei efu a kan. ¿Yu abi wan programa fu leisi Bijbel doronomo? Den Waktitoren nanga den Ontwaakt! tijdschrift e gi wi bun furu gosontu nyanyan na yeye fasi tu fu nyan bun fu den. Luku den buku, den brochure nanga tra publikâsi tu di den sreka fu a bun fu wi. Èn fa a de nanga den verslag fu den Kownukondre-preikiwroko di e gi deki-ati èn di den e tyari kon na doro na ini a Jaarboek van Jehovah’s Getuigen?
20. Sortu kruderi de na mindri leti nanga waarheid fu Yehovah èn a de di wi de na den Kresten konmakandra?
20 Iya, Yehovah piki a begi na wan wondru fasi di ben taki na Psalm. Na a kaba fu a vers dati, wi e leisi: „Meki [a leti nanga a waarheid fu yu] tyari mi go na yu santa bergi èn na yu bigi tabernakel”. ¿Yu e angri fu anbegi Yehovah makandra nanga ipi-ipi tra sma? A leri na yeye fasi di den e gi na den konmakandra fu wi na wan prenspari fasi fa Yehovah e meki leti skèin na ini a ten disi. San wi kan du fu meki a warderi gi den Kresten konmakandra kon moro bigi? Wi e gi yu wan kari fu luku na afersi disi na ini begi, na ini na artikel di e kon.
[Futuwortu]
^ paragraaf 12 Baka a dede fu C. T. Russell, den ben sreka wan publikâsi di den ben kari a di fu seibi pisi fu Studies in the Scriptures, fu pruberi fu gi wan fruklari fu den buku Esekièl nanga Openbaring. Pikinso fu a di fu seibi pisi ben abi en gron tapu den sani di Russell ben taki fu den Bijbel buku dati. Ma a ten fu sori san den profeititori dati wani taki no ben kon ete èn moro furu a ben de so taki a fruklari di ben gi na ini a pisi dati fu Studies in the Scriptures no ben de krin. Na ini den yari di ben kon baka dati, a no-frudini bun-ati fu Yehovah nanga den sani di ben feni presi na grontapu ben yepi Kresten fu abi a koni fu si krin moro soifri san den profeiti buku dati wani taki.
Yu Kan Gi Piki?
• Fu san ede Yehovah e sori den prakseri fu en safrisafri?
• Fa den apostel nanga den owruman na ini Yerusalem ben lusu na afersi fu besnijdenis?
• Sortu fasi fu studeri Bijbel den fosi Bijbel Ondrosukuman ben teki abra, èn fu san ede disi ben de aparti?
• Fruteri fa leti na yeye fasi e kon na krin na Gado en reti ten.
[Aksi fu a tori disi]
[Prenki na tapu bladzijde 12]
Charles Taze Russell ben sabi taki leti ben o skèin na tapu a buku Openbaring na Gado en reti ten