Wi Na a Sortu Sma Di Abi Bribi

Prati a Kresten Howpu Nanga Sma na ini Senegal

FISI na wan aladei nyanyan sensi owru ten. Dusundusun yari langa, sma fisi na ini den se, bigi watra nanga liba fu grontapu. Son wan fu den apostel fu Yesus Krestes ben de fisi man na a Se fu Galilea. Ma Yesus ben meki den kon sabi wan tra sortu fisiwroko. Disi ben de a fisi di den ben e fisi na yeye fasi, di no ben o abi wini gi den fisiman wawan, ma so srefi gi den fisi.

Ini a tori disi, Yesus ben taigi a fisiman Petrus: „Fu bigin nanga now yu sa e kisi sma libilibi” (Lukas 5:10). A sortu fisiwroko disi na wan wroko di sma e du te now ete na ini moro leki 230 kondre èn so srefi na ini Senegal (Mateus 24:14). Dyaso, den disiten „fisiman fu libisma” e prati a Kresten howpu fu den dyaso nanga trawan èn disi den e du nanga deki-ati.—Mateus 4:19.

Senegal e didon na a moro farawe pikin westsei pisi fu Afrika. A kondre disi e waka komoto na den santi woestijn kontren na a grens fu a Sahara na noordsei, te go miti den nati busi fu a Kasamansa kontren na zuidsei. Senegal na wan kondre pe den woestijn winti di e bron sani èn so srefi den kowru, switi winti fu na Atlantisch Se e wai pasa. Moro leki neigi milyun sma e libi dyaso. Sma sabi den sma fu Senegal leki sma di lobi fu teki sma na oso. Moro furu fu den no e taki dati den na Kresten. Furu fu den na skapuman, ala di trawan na sma di e sorgu meti, kameili nanga bokoboko. Gronman de tu di e prani pinda, katun, nanga aleisi. Iya, èn fisiman de, di e tyari net kon di furu nanga fisi fu na Atlantisch Se èn fu difrenti bigi liba di e waka kronkron na ini a kondre. A fisi bisnis e plèi wan tumusi prenspari rol na ini na ekonomia fu Senegal. Fu taki en leti, dan a moro bekènti nyanyan fu a kondre na ceebu jën, wan switi nyanyan fu aleisi, fisi, nanga gruntu.

„Fisiman fu Libisma”

Den abi 863 fayafaya preikiman fu a Kownukondre fu Gado na ini Senegal. A fisiwroko na yeye fasi ben bigin dyaso na ini a pisi ten syatu baka 1950. Na ini 1965 den ben opo wan bijkantoro fu a Waktitoren Genootschap na ini na edefoto Dakar. Zendeling „fisiman” fu furu farawe kondre ben bigin doro drape. A fisiwroko” ben bigin, èn a prati di den ben e prati a Kresten howpu na ini Senegal ben go na fesi safrisafri. Te fu kaba, den ben bow wan nyun bijkantoro na Almadies, na dorosei fu Dakar, èn den ben gi dati abra na Yehovah na ini yuni 1999. ¡Fa disi ben de wan ten fu prisiri!

A Tyalensi Fu Teki a Waarheid

Den gwenti fu miti sma fu difrenti kulturu èn son sma teki a boskopu fu howpu di de fu feni na ini Gado Wortu. Ala di furu fu den sma no abi sabi fu Bijbel, toku den e prisiri fu leri dati den sani di Yehovah Gado ben pramisi den getrow profeiti fu owruten o kon tru heri esi.

Nofotron a e aksi deki-ati fu wan sma fu teki wan fasti bosroiti fu libi akruderi den Kresten gronprakseri, spesrutu te den sani di wan famiri e bribi èn gwenti fu du de ini a tori. Fu eksempre, a trowlibi nanga moro leki wan patna na wan sani di sma e du na ala sei fu Senegal. Luku a tori fu wan man di ben abi tu wefi di a ben bigin studeri Bijbel. ¿A ben sa abi a deki-ati fu teki a Kresten waarheid èn fiti ensrefi na den markitiki fu a Bijbel fu de wan man di abi soso wan wefi? (1 Timoteus 3:2). ¿Èn a ben sa tan hori a wefi fu en yongu yari, na uma nanga suma a ben trow a fosi leisi? Dati na san a ben du, èn nownowde a e dini leki wan fayafaya owruman na ini wan fu den moro bigi gemeente na a kontren fu Dakar. A fosi uma fu en teki a waarheid tu, makandra nanga ala den 12 pikin fu en, 10 fu a fosi wefi fu en nanga 2 fu a di fu tu wefi di a ben abi bifo.

Wan tra problema di kan kon te sma wani teki a Kresten howpu, kan de a leisi di sma no man leisi. ¿Disi wani taki dati wan sma di no man leisi, no man teki a waarheid èn libi akruderi dati? Kwetikweti. Luku na eksempre fu Marie, wan mama di e wroko tranga èn di abi aiti yongu pikin. Esi-esi a ben si taki a de prenspari fu takimakandra fu wan Bijbel tekst nanga den yongu pikin fu en ibri dei bifo den ben go na skoro èn bifo Marie ben go na wroko. Ma fa a ben kan du disi, fu di a no ben  man leisi? Ibri mamanten frukufruku a ben teki a pikin buku Ondrosuku den Buku fu Bijbel Ibri Dei èn ben tanapu na a santi pasi na fesi en oso. Te sma ben e waka pasa, dan a ben aksi den efu den ben man leisi. Te a ben feni wan sma di ben man leisi, dan a ben gi en a pikin buku èn a ben taki seryusu: „¿Mi no man leisi, so bun grantangi, yu ben wani leisi a pisi disi gi mi tide?” A ben arki den sani di a sma ben e leisi nanga ala prakseri. ¡Dan a ben taigi a sma di ben waka pasa grantangi èn ben go esi-esi na ini na oso fu en fu abi wan libilibi takimakandra fu na tekst nanga den pikin fu en bifo den ben go na skoro!

Ala Sortu Sma E Teki a Waarheid

Na ini Senegal, yu kan si sma di e sidon na strati e seri fisi, gruntu, noso froktu na a wowoyo noso e sidon na ondro den bigi baobab bon ala di den e dringi ataya, wan grun te di bita pikinso. Fu di tu brada ben teki a fasti bosroiti fu prati a bun nyunsu nanga ala sma di den ben miti, meki den ben taki nanga wan malengri man di ben e begi na strati. Baka di den ben taki en odi, den ben taki: „Furu sma e gi yu moni ma den no e stop fu taki nanga yu. Wi kon fu taki fu wan tumusi prenspari sani di abi fu du nanga a tamara fu yu.” A begiman ben fruwondru. „Wi ben sa wani poti wan aksi gi yu”, den brada ben taki moro fara. „Fu san ede yu e denki taki someni pina de na ini grontapu?” „Na a wani fu Gado”, a begiman ben piki.

Dan den brada ben rideneri nanga en nanga yepi fu den Buku fu Bijbel èn ben fruklari Openbaring 21:4. A boskopu disi fu howpu nanga a tru tori taki wan sma ben abi nofo belangstelling fu stop fu taki nanga en ben naki na ati fu a begiman srefisrefi. En ai ben furu nanga watra. ¡Na presi fu aksi moni, a ben begi den brada fu teki ala moni di a ben abi na ini a begikan fu en! A ben tan begi den na so wan fasi taki disi ben hari a prakseri fu ibri wan sma di ben e waka pasa. Nanga bun furu muiti wawan, den brada ben man overtoigi en fu hori a moni. Te fu kaba a ben agri, ma a ben wani nomonomo taki den musu fisiti en agen.

Na a bigi universiteit na ini Dakar den e kisi fisi tu na ini a fisinet na yeye fasi. Drape Jean-Louis, wan studenti di studeri fu kon tron datra ben bigin studeri a Bijbel. A ben teki a waarheid esi-esi, ben gi ensrefi abra na Yehovah èn ben teki dopu. A ben angri fu dini Gado na ini a furuten pionier diniwroko, ma a ben abi a datra studie fu en tu. Fu wan kontrakt ede, nanga a mamakondre fu en, meki a ben de fruplekti fu go doro nanga a studie fu en te leki a ben kaba dati. Ma toku, na a srefi ten a ben bigin nanga a yepi pionierwroko. Syatu baka di a ben kisi en diploma leki wan bekwaam datra, a ben kisi wan kari fu dini na ini a bigi Bethel oso na ini Afrika leki datra gi a famiri. So srefi wan tra yonkuman di den ben miti na a Dakar Universiteit e dini nownow tu makandra nanga a Bethel famiri na ini a mamakondre fu en.

A fisiwroko na yeye fasi na ini Senegal e pai trutru. Sma e warderi den Bijbel publikâsi fu Yehovah Kotoigi srefisrefi èn nownowde den e tyari den kon na doro na ini a Woloftongo di den e taki drape. A yere di den e yere a bun nyunsu na ini a mamatongo fu den, gi furu reti-ati sma deki-ati fu du wan sani nanga warderi. Te den fayafaya „fisiman fu libisma” na ini Senegal e go doro fu prati a Kresten howpu na wan getrow fasi èn nanga deki-ati, dan sondro tweifri, den sa kisi moro furu simbôlis fisi nanga a blesi fu Yehovah.

[Karta/​Prenki na tapu bladzijde 31]

(Efu yu wani si pe den sani disi skrifi, luku a tijdschrift)

SENEGAL

[Prenki]

Prati a Kresten howpu na ini Senegal

[Sma di abi a reti fu a prenki]

Mountain High Maps® Copyright © 1997 Digital Wisdom, Inc.