Wan Man Di De wan Bun Eksempre èn Di Ben Teki Piri-ai

„DEN Bun Bigi Kaiman fu Sambia E Nyan 30 Sma wan Mun.” Na so wan koranti fu Afrika ben skrifi wan tu yari pasa. Soleki fa wan sabidensiman di e ondrosuku meti èn di ben kisi den reptiel disi fu ondrosuku den ben taki, dan „12 man ben de fanowdu fu hori wan bun bigi kaiman na gron”. ¡Nanga wan tranga tere èn den krakti kakumbe, a bun bigi kaiman kan de wan meti di e frede sma!

Soleki fa a sori, dan a Kriaman ben gebroiki a wortu „Lefiatan” gi a bun bigi kaiman èn a ben gebroiki a „kownu” disi „fu ala den kefalek bigi werdri meti” fu leri en futuboi Yob wan prenspari sani (Yob 41:1, 34). Disi ben pasa so wan 3500 yari pasa na ini a kondre Us, kande na a noordsei fu Arabia. Di Gado ben taki san a kriaturu disi gersi, dan a ben taigi Yob: „No wan sma de so asranti taki a ben sa fruferi en. Èn suma na a sma di man tan tanapu kánkan na mi fesi?” (Yob 41:10) ¡Disi na wan tru sani srefisrefi! ¡Efu wi frede a bun bigi kaiman, dan trutru wi musu frede moro furu fu taki wan sani di de teige a Sma di meki en! Yob ben sori taki a ben frustan a les disi di a ben erken en fowtu.—Yob 42:1-6.

Te den e taki fu Yob, dan wi kan memre a getrow eksempre fu en di a ben gi fu di a ben horidoro na ondro tesi (Yakobus 5:11). A ben de trutru so, taki Yehovah ben prisiri nanga Yob, srefi bifo hebi tesi ben kon tapu a bribi fu en. Soleki fa Yehovah ben si en, dan na a ten dati „no wan sma no [ben] de leki en na grontapu, wan man sondro fowtu èn opregti, di e frede Gado èn di e wai pasi gi ogri” (Yob 1:8). Disi musu gi wi deki-ati fu leri moro fu Yob, fu di te wi e du dati, dan dati sa yepi wi fu si fa wi tu kan plisi Gado.

Matifasi Nanga Gado E Kon Tapu a Fosi Presi

Yob ben de wan gudu man. Boiti gowtu a ben abi 7000 skapu, 3000 kameili, 500 umaburiki, 1000 edeman fu den meti èn wan bigi grupu futuboi (Yob 1:3). Ma Yob ben frutrow tapu Yehovah, no tapu gudu. A ben rideneri: „Efu mi e frutrow tapu gowtu, noso mi taigi a gowtu: ’¡Na tapu yu mi e frutrow’! Efu mi ben gwenti fu prisiri fu di mi gudu ben de furu, èn fu di mi anu ben feni furu sani . . . , dan so srefi dati ben sa de wan fowtu sani na ini na ai fu den krutuman, bika mi ben sa  drai baka gi a tru Gado di de na tapusei” (Yob 31:24-28). Neleki Yob, wi musu warderi wan krosibei matifasi nanga Yehovah Gado moro leki materia sani.

Handri Nanga Tra Libisma Sondro Fu Teki Partèi

Fa Yob ben handri nanga den futuboi fu en? Taki sma ben feni taki a no ben teki partèi èn taki sma ben kan go makriki na en, de fu si na den eigi wortu fu Yob: „¿Efu mi ben gwenti weigri fu erken a reti fu mi mansrafu noso fu mi umasrafu na ini a krutu-afersi fu den nanga mi, dan san mi kan du te Gado e opo kon? Èn te a e aksi frantwortu, dan san mi kan piki en?” (Yob 31:13, 14) Yob ben warderi a sari-ati fu Yehovah èn fu dati ede a ben handri nanga den srafu fu en nanga sari-ati. ¡Disi na trutru wan moi eksempre, spesrutu gi den wan di abi posisi fu hori ai tapu sani na ini a Kresten gemeente! Den tu musu de eerlijk èn den no musu teki sma partèi, èn a musu de so taki sma kan go makriki na den.

Yob ben sori belangstelling tu gi den wan di no de na ini en osofamiri. A ben sori taki a ben e broko en ede gi tra sma di a ben taki: „Efu mi ben abi a gwenti fu tapu den mofinawan fu abi prisiri, èn mi ben sa meki taki den ai fu a weduwe ben kon swaki, . . . efu mi ben wai mi anu go-kon teige a boi sondro papa, te mi ben sa si taki sma abi a yepi fu mi fanowdu na a portu, dan meki a bigi plata bonyo fu mi skowru fadon komoto na mi skowru, èn meki den broko mi eigi anu puru fu a tapusei bonyo fu na anu fu mi” (Yob 31:16-22). Meki wi hori den wan na prakseri di wi sabi na ini a gemeente èn di no abi en so bun.

Fu di Yob ben abi belangstelling gi a sma na en sei sondro fu a ben prakseri en eigi wini nomo, meki a ben ontfanga freimde sma na en oso. Fu dati ede a ben kan taki: „No wan freimde sma di ben e libi drape no ben abi fu sribi na dorosei; mi doro mi ben hori opo go na a pasi” (Yob 31:32). ¡Disi na wan heri moi eksempre gi den futuboi fu Gado na ini a ten disi! Te nyun sma di abi belangstelling na ini a waarheid fu Bijbel e kon na a Kownukondre zaal, dan te wi e ontfanga den na wan switi fasi dan dati kan yepi den fu go na fesi na yeye fasi. A no de fu taki dati wi musu ontfanga den opziener di e reis èn tra Kresten na wan lobi fasi tu.—1 Petrus 4:9; 3 Yohanes 5-8.

Srefi nanga den feanti fu en, Yob ben handri na a yoisti fasi. A no ben prisiri te rampu ben sa kan miti wan sma di no ben wani si en na ai (Yob 31:29, 30). Na presi fu dati, a ben wani fu du bun gi den sortu sma disi, soleki fa a ben de krin fu di a ben de klariklari fu begi gi den dri falsi trowstuman fu en.—Yob 16:2; 42:8, 9; teki gersi Mateus 5:43-48.

Krin na Seks Sei

Yob ben de loyaal na a trowpatna fu en, fu di noiti a ben meki en ati kisi firi di  no yoisti gi wan tra uma. Yob ben taki: „Mi meki wan frubontu nanga mi ai. So bun, fa mi ben sa kan poti prakseri dan na wan nyun wenke? Efu mi ati kori mi fu go na wan uma, èn mi ben e wakti na a doromofo fu mi mati, dan meki a wefi fu mi miri gi wan tra man, èn meki tra man kindi abra en. Bika dati ben de wan yayo fasi fu libi, èn dati ben sa de wan sondu di den krutuman musu krutu.”—Yob 31:1, 9-11.

Yob no ben meki hurudu lostu pori en ati. Na presi fu dati, a ben feti fu libi wan opregti libi. ¡Trutru a no de fu fruwondru taki Yehovah Gado ben prisiri nanga a getrow man disi di ben feti nanga hurudu firi!—Mateus 5:27-30.

A Ben Broko En Ede Nanga a Yeyefasi fu na Osofamiri

Son leisi den manpikin fu Yob ben orga nyanyan fesa pe ala den manpikin nanga den umapikin fu en ben de. Baka di den nyanyan fesa dei disi ben pasa kaba, dan Yob ben frede taki den pikin fu en ben sondu teige Yehovah. So bun, Yob ben du wan sani, bika a Bijbel tori e taki: „A ben pasa taki, te den dei na tapu san den ben hori den nyanyan fesa na ini a heri grupu ben pasa, dan Yob ben meki den kon na en èn a ben santa den; èn a ben opo fruku mamanten èn a ben bron srakti-ofrandi akruderi a nomru fu sma di den de; bika Yob ben taki, ’kande den manpikin fu mi sondu èn fluku Gado na ini den ati’” (Yob 1:4, 5). ¡A broko di Yob ben broko en ede nanga en osofamiri trutru ben musu meki den memre fu en osofamiri frustan moro bun taki den musu abi lespeki frede gi Yehovah èn taki den musu waka En pasi!

Na ini a ten disi den Kresten famiri edeman musu leri den osofamiri a Wortu fu Gado, Bijbel (1 Timoteus 5:8). Èn a e fiti trutru fu begi gi den memre fu na osofamiri.—Romesma 12:12.

Horidoro na wan Getrow Fasi na Ondro Tesi

Moro furu Bijbel leisiman sabi a seryusu tesi di ben kon tapu Yob. Satan Didibri ben fruklari taki Yob ben sa fluku Gado na ondro situwâsi di de wan tesi. Yehovah ben teki a tyalensi disi, èn sondro draidrai Satan ben tyari rampu kon tapu Yob. A ben lasi ala den meti fu en. Moro takru srefi, a ben sari fu di a ben lasi ala den pikin fu en na ini dede. Syatu baka dati, Satan ben naki Yob nanga takru soro fu en ede te go miti en futu.—Yob kapitel 1, 2.

San ben de a bakapisi? Di na uma fu en ben gi en deki-ati fu fluku Gado, dan Yob ben taki: „Neleki fa wan uma sondro frustan e taki, na so yu e taki tu. ¿Wi sa teki soso den bun sani fu a tru Gado èn no teki den ogri sani tu?” Bijbel e fruteri moro fara: „Na ini ala den sani disi Yob no ben sondu nanga den mofobuba fu en” (Yob 2:10). Iya, Yob ben horidoro na wan getrow fasi èn na so wan fasi a ben sori taki Didibri na wan leiman. Meki wi horidoro na ondro tesi na a srefi fasi èn sori taki trutru lobi gi Yehovah e meki wi du wi diniwroko gi Gado.—Mateus 22:36-38.

A Ben Teki Rai na wan Saka Fasi

Ala di Yob ben de wan eksempre na ini furu sani, toku a no ben de wan volmaakti man. Ensrefi ben taki: „Suma kan meki wan krin sma komoto na wan sma di no krin? No wan sma” (Yob 14:4; Romesma 5:12). So bun, di Gado ben taki dati Yob ben de wan man sondro fowtu, dan disi ben de wan tru sani fu di a wani taki dati a ben libi akruderi ala san Gado ben fruwakti fu wan fu den onvolmaakti èn sondu futuboi fu En. ¡Disi e gi wi deki-ati trutru!

Yob ben horidoro na ondro a tesi fu en, ma a tesi ben sori taki a ben abi wan swakifasi. Di dri so-kari trowstuman ben yere ala den rampu di ben kon na en tapu, dan den ben fisiti en (Yob 2:11-13). Den ben taki dati Yehovah ben e strafu Yob fu di a ben e du seryusu sondu. A no de fu taki dati den falsi kragi disi ben hati Yob, èn na wan krakti fasi a ben suku fu opo taki gi ensrefi. Ma a ben lasi balansi fu di a ben e pruberi fu regtfardiki ensrefi tumusi. ¡Iya, Yob ben taki srefi taki a ben de moro regtfardiki moro leki Gado!—Yob 35:2, 3.

Fu di Gado ben lobi Yob, meki a ben gebroiki wan yonkuman fu sori a fowtu fu Yob. A tori e taki: „Ma na ati fu Elihu . . . ben kon faya. En ati ben bron nanga Yob fu di a [Yob] ben e fruklari taki en eigi sili regtfardiki, moro leki fu fruklari Gado regtfardiki.” Soleki fa Elihu ben taki: „Yob taki: ’Mi de seiker tapu mi reti, ma Gado srefi meki a reti gowe fu mi’” (Yob 32:2; 34:5). Ma toku Elihu no ben moksi ensrefi nanga den dri „trowstuman” fu taki dati Gado ben e strafu Yob gi den  sondu fu en. Na presi fu dati, Elihu ben sori taki a abi frutrow na ini a getrowfasi fu Yob èn a ben gi en a rai: „A krutu afersi de na fesi [Yehovah], fu dati ede yu musu wakti na en tapu nanga faya.” Fu tru, Yob ben musu wakti tapu Yehovah na presi fu taki sondro fu denki, di a ben opo taki gi ensrefi. Elihu ben gi Yob a dyaranti: „Retidu èn regtfardikifasi pasa marki [Gado] no sa si leki wan soso sani.”—Yob 35:14; 37:23.

A denki fu Yob ben musu kenki. Fu dati ede Yehovah ben leri en taki libisma pikin srefisrefi te yu gersi den nanga a bigi di Gado bigi. Yehovah ben sori go na grontapu, a se, hemel di lai nanga stari, den meti, èn furu tra wondru sani di Gado meki. Te fu kaba Gado ben taki fu a Lefiatan — bun bigi kaiman. Na wan saka fasi Yob ben teki piri-ai, èn na ini disi a ben de ete wan eksempre gi wi.

Ala di wi ben kan du en bun na ini a diniwroko fu Yehovah, toku wi sa meki fowtu. Efu wan fowtu seryusu, dan Yehovah kan poti wi reti baka nanga yepi fu a wan sani (Odo 3:11, 12). Wi ben kan memre wan tekst di kan gi wi konsensi fonfon. Kande A Waktitoren noso son tra publikâsi fu a Waktitoren Genootschap kan taki wan sani di meki wi kon sabi wan fowtu fu wi. Noso a kan taki wan kompekresten sori wi na wan switi fasi taki wi no gebroiki wan Bijbel gronprakseri. Fa wi sa handri te wi kisi so wan piri-ai? Yob ben sori taki a ben abi berow, di a ben taki: „Mi e teki mi wortu baka, èn mi abi trutru berow ini saka èn asisi.”—Yob 42:6.

Yehovah Ben Pai En

Yehovah ben pai Yob, di a ben gi a futuboi fu en pasi fu libi ete 140 yari. Na a ten dati a ben kisi moro sani leki san a ben lasi. Èn ala di Yob dede te fu kaba, toku a abi a dyaranti fu kisi wan opobaka na ini a nyun grontapu fu Gado.—Yob 42:12-17; Esekièl 14:14; Yohanes 5:28, 29; 2 Petrus 3:13.

Wi tu kan abi a dyaranti taki Gado sa feni wi bun èn taki wi sa kisi blesi fu en, efu wi e dini en na wan loyaal fasi èn efu wi e teki ala piri-ai di wi kisi fu Bijbel. Leki wan bakapisi wi sa abi a trutru howpu fu libi na ini a nyun seti fu sani fu Gado. Ma a sani di de moro prenspari srefi, na taki wi sa gi Gado grani. Te wi e tyari wisrefi na wan getrow fasi, dan wi sa kisi pai. Èn dati sa gi moro buweisi taki sma e dini Gado, no fu di den e denki den eigi wini nomo, ma fu di den abi trutru lobi. ¡Wi abi wan moi grani fu meki na ati fu Yehovah prisiri, soleki fa a getrowman Yob ben du, fu di a ben teki piri-ai na wan saka fasi!—Odo 27:11.

[Prenki na tapu bladzijde 26]

Yob ben sori lobi èn ben broko en ede gi pikin di no abi papa noso mama, gi den weduwe èn gi tra sma

[Prenki na tapu bladzijde 28]

Yob ben kisi pai pasa marki fu di a ben teki piri-ai na wan saka fasi