San Yu Musu Sabi fu den Sani Di Heks E Du

A TRANGA fu taki finifini san na den sani di heks e du na ini a ten disi. Disi de so fu di den sma di e du den sani disi, e difrenti srefisrefi. Den no e erken no wan enkri prenspari makti noso leri noso santa buku di musu meki taki den alamala e bribi a srefi sani. Den e difrenti tu na ini den gwenti di den abi, na ini a fasi fa sani musu orga, na ini den seremonia fu den, èn na ini a fasi fa den e denki fu sortu gado den musu gi grani. Wan skrifiman e taki: „Na ini afkodrei tori yu abi ’wan wowoyo’ pe wan sma kan feni ala sortu idea.” Wan tra skrifiman e taki: „Moro furu fu den Nyun Heiden no e agri nanga pikinmoro no wan sani.”

Gi furu sma, a no de wan problema te den sani di den e bribi de kontrari makandra. Wan buku di e gi tirilin na sma di wani tron heks e taki: „Te yu e kisi fu du nanga tori di gersi leki den de kontrari densrefi, dan ondrosuku den tori disi èn teki wan bosroiti sortu wan yu sa waka na en baka. Arki san den firi na inisei fu yu e taki. Nanga tra wortu, yu musu firi fri fu gebroiki iniwan fu den seremonia di sma skrifi fu den èn den buku di e leri sma sani fu seremonia, so taki yu kan bosroiti sortu sani yu e firi taki a bun.”

Gi den wan di sabi san na waarheid, dan den sani disi di de kontrari densrefi de wan problema. Waarheid na tru tori, den sani di de trutru. Sani no tru soso fu di wan sma e firi noso e howpu noso e bribi taki den sani dati tru. Fu eksempre, wan leisi datra ben bribi taki den ben kan dresi longontsteking fu di den ben koti wan fowru na tu di ben de na libi ete, èn den ben poti den pisi fu a fowru na tapu a borsu fu a sikisma. A no de fu taki, dati furu sikisma ben bribi trutru taki a fasi disi fu dresi a siki, ben sa meki den kon betre. Ma a bribi nanga den howpu fu den, no ben de akruderi tru tori — so wan fasi fu handri no e dresi longontsteking. Sma no e meki waarheid; den e du muiti fu frustan san na waarheid trutru.

Bijbel e fruklari taki a abi a waarheid ini a tori fu yeye afersi. Di Yesus Krestes ben de na grontapu, dan a ben taigi en Tata na ini begi: „Yu wortu na waarheid” (Yohanes 17:17). Na apostel Paulus ben skrifi: „Na Gado ben meki sma skrifi ala den Buku fu Bijbel nanga yepi fu en santa yeye” (2 Timoteus 3:16). Furu heks no e agri nanga disi. Na presi fu dati, den e suku idea nanga tirilin na ini anansitori, na ini fositen relisi, èn srefi na ini tori fu sabidensi di no de tru. ¿Ma a no de wan reidelek sani fu luku san Bijbel srefi e taki? Te yu e luku en bun, dan pikinmoro na ala presi sma e erken Bijbel leki wan buku di santa. A de so srefi wan fu den moro  owru relisi buku di de te now ete. Bijbel ben skrifi na ini wan pisi ten fu 1600 yari, ma toku den leri fu en de akruderi makandra. Meki wi teki den leri fu Bijbel gersi wan tu sani di moro furu sma di e horibaka gi den sani di heks e du, noso gi obiawroko, e bribi nownowde.

Suma E Libi na ini a Yeye Kondre?

Wan prenspari aksi na ini a suku di sma e suku fu frustan sani na yeye sei, na disi: Suma e libi na ini a yeye kondre? Ala di moro furu disiten heks e waka na baka wan bribi di gron tapu a naturu èn pe den e anbegi moro leki wan gado, toku sonwan e anbegi wan gran mamagado, di den e prenki leki dri sma, wan nyunwenke, wan mama, nanga wan owru uma. Den sani disi e prenki den prenspari pisi fu a libi. A freiri fu en na wan gado nanga tutu. Tra heks e anbegi wan man-gado nanga wan umagado makandra. Wan skrifiman e taki: „Na Umagado nanga a Man-gado e prenki den umasma krakti nanga den man-nengre krakti fu a naturu. Ibriwan fu den [abi] aparti eigifasi di, te den moksi kon na wan, abi leki bakapisi taki wan kriaturu e kon na libi di de heri moi.” Wan tra skrifiman e taki: „Wan fu den moro prenspari bosroiti di yu musu teki na ini a tori fu Obia na sortu gado (Man-gado/Umagado) yu sa wroko makandra nanga en. . . . Obia e gi yu a fri fu teki a gado di yu wani, èn baka dati yu abi a fri fu gi grani na yu eigi sortu gado.”

Bijbel no e horibaka gi no wan fu den idea disi. Yesus Krestes ben gebroiki en heri diniwroko fu leri trawan fu Yehovah, „a wan-enkri tru Gado” (Yohanes 17:3). Bijbel e taki: „Yehovah bigi èn a musu kisi prèise srefisrefi, èn wi musu frede en moro leki ala tra gado. Bika ala den gado fu den sma na gado di no warti notinoti.”—1 Kroniki 16:25, 26.

Fa a de nanga Didibri? Webster’s Ninth New Collegiate Dictionary e taki fu a wortu obia, noso den sani di heks e du, leki „komunikâsi nanga didibri”. A no ben sa de makriki fu feni wan heks na ini a ten disi di e agri nanga a fruklari disi, bika furu fu den no e bribi srefi taki Satan Didibri de. Wan yongu uma, di den e taki fu en na ini The Irish Times leki wan „heihei heks nanga fesiman fu wan fu den moro prenspari konmakandra fu heks na ini Ierland”, e rideneri na a fasi disi: „Bribi na ini Didibri wani taki dati yu e feni Krestendom bun . . . [Didibri] no kan libi na ini wan universum pe no wan Gado no de.”

Bijbel e sori taki Didibri de trutru èn taki en na a wan di meki taki furu pina nanga bruya de na grontapu (Openbaring 12:12). Yesus no wawan ben leri taki Didibri de trutru, ma a ben sori tu taki wan sma kan du a wani fu Didibri, sondro taki a sma sabi dati srefi. Fu eksempre, den relisi fesiman fu a fosi yarihondro di ben denki taki den ben de regtfardiki, ben fruklari taki na a wan noso tra fasi, den ben de manpikin fu Gado, èn dati den ben bribi taki den ben du a wani fu Gado. Yesus, di ben man si krin san ben de na ini na ati fu den, ben sabi taki sani ben de tra fasi. Sondro draidrai a ben taigi den: „Unu na fu un tata Didibri, èn unu wani fu du den winsi fu un tata” (Yohanes 8:44). Moro fara, a Bijbel buku Openbaring e taki dati Didibri „e kori heri grontapu pe sma e libi”.—Openbaring 12:9.

Wan Fasi fu Bonu De, Di Bun?

A no de fu taki, dati ala ten bonu ben abi fu du nanga afkodrei. * Furu sma fu fositen èn sma na ini a ten disi e bribi taki a bonuwroko di den heks e  du, na fu du trawan ogri. Sma e taki fu heks dati den abi a makti fu gi hebi skin-ati na trawan èn taki den kan kiri sma srefi nanga yepi fu bonu. Soleki fa a gwenti de, dan heks kisi a fowtu fu pikinmoro ala takru sani di pasa, so srefi siki, dede, èn a waka di a kotiwroko no waka bun srefisrefi.

Na ini a ten disi, heks e taki na wan krakti fasi dati den sani disi di sma e taki fu den, no tru. Ala di den e erken taki son leisi takru heks de di e du sma ogri, toku moro furu fu den e taki dati den e gebroiki a bonu fu den fu tyari wini kon gi sma, èn no fu du den ogri. Heks nanga obiaman e leri taki bonu sa tyari bogobogo bun bakapisi gi a sma di e du en, èn den e taki dati disi na wan prenspari sani di e hori den fu fluku tra sma. Eksempre fu a sani disi di sma e kari bun bonu na a taki di yu e taki wan mofo fu kibri yusrefi, fu krin yu oso fu takru krakti di den sma di ben libi na ini na oso fosi ben libi na baka, fu kroi wan sma meki a kon kisi lobi firi gi yu, fu taki wan mofo fu horibaka gi a betre di wan sma e kon betre èn kon gosontu baka, fu sorgu taki yu no e lasi yu wroko, èn fu kisi moni. Fu di sma e taki dati den sani di heks e du abi someni krakti, dan a no de fu fruwondru taki a kon tron so wan pôpi sani.

Ma Bijbel no e meki no wan difrenti na mindri bun bonu nanga takru bonu. Gado ben sori disi krinkrin na ini a wet di a ben gi Moses. A ben taki: „Unu no musu du bonu” (Lefitikus 19:26). Wi e leisi tu: „No wan sma musu de na yu mindri . . . di e du bonu noso no wan sma di e suku marki fu san o pasa, noso wan towfruman, noso no wan sma di e taki mofo fu wisi wan tra sma, noso no wan sma di e suku rai na wan sma di de leki wan asi fu den yeye.”—Deuteronomium 18:10, 11.

Fu san ede Gado ben taki dati? A no fu di a no wani fu gi wi san bun. Yehovah ben gi den wet disi na a pipel fu en fu di a ben lobi den èn a no ben wani fu den kon tron srafu fu frede nanga kruktu bribi. Na presi fu dati, a e kari den futuboi fu en fu kon na en efu den abi wan sani fanowdu. En na a Giman fu „ibri bun presenti nanga ibri volmaakti kado” (Yakobus 1:17). Na apostel Yohanes ben gi kompe-bribiman a dyaranti: „Ala sani di wi e aksi wi e kisi fu [Gado], fu di wi e hori den komando fu en èn fu di wi e du den sani di bun na ini en ai.”—1 Yohanes 3:22.

Fa A De Nanga Ogri Yeye?

Furu heks e agri nanga Bijbel na a sani disi: Ogri yeye de trutru. Wan sma di e horibaka gi den sani di heks e du e warskow na ini wan artikel: „Den Yorka de drape: Den de, na ini a grontapu di wi no kan si èn di de a srefi leki a grontapu fu wi leki libi kriaturu. . . . Den nen ’Bakru’ nanga ’Ogri Yeye’ yoisti srefisrefi. Den yeye disi abi furu krakti. . . . Den moro koni yeye . . . kan kon na ini a grontapu fu wi (efu wan sma e yepi den noso e gi den pasi  fu kon na inisei). . . . Den kan kon na ini yu skin . . . , èn den kan basi yu srefi. Iya, disi na trutru neleki den owru tori fu ogri yeye di e kon na sma tapu.”

Na ini Bijbel ten, a kon di den ogri yeye ben kon na sma tapu ben kwinsi sma na difrenti fasi. Wan tu fu den sma di ogri yeye ben de na den tapu no ben man taki, son wan ben breni, son wan ben du law sani, èn wan tu ben abi krakti moro leki di fu wan libisma (Mateus 9:32; 12:22; 17:15, 18; Markus 5:2-5; Lukas 8:29; 9:42; 11:14; Tori fu den Apostel 19:16). Sontron a pina ben kon moro hebi te furu ogri yeye ben kon na tapu wan sma na a srefi ten (Lukas 8:2, 30). Trutru, Yehovah sabi fu san ede a e warskow en pipel fu tan farawe fu den sani di heks e du noso fu obiawroko, nanga tra wroko di abi fu du nanga afkodrei.

Relisi Di Gron Tapu Waarheid

Den sani di heks e du e hari furu sma na ini a ten disi, fu di a gersi leki a de wan relisi di no e du ogri, di bun èn di gron tapu a naturu. Na ini son libimakandra a kon tron wan gewoon sani. Sma no frede gi den sani di heks e du. Na presi fu dati, a kon tron wan sani di sma e si leki noti. Now di wan lo sma e horibaka gi a relisi fu trawan, meki den e teki srefi den moro dangra sani abra. Dati meki furu sma kon si den sani di heks e du leki wan bun sani.

Iya, den furu relisi di de, tron wan wowoyo pe sma de fri fu teki iniwan relisi di de bun gi den, neleki fa wan sma ben o bai wan tu susu. Kontrari fu dati, Yesus ben taki dati sma ben kan teki fu tu sani nomo. A ben taki: „Pasa go na ini a smara doro; bika bradi èn bigi a pasi de di e tyari sma go na pori, èn furu sma de di e pasa go na ini; ma smara a doro de èn smara a pasi de di e tyari sma go na libi, èn pikinso sma de di e feni en (Mateus 7:13, 14). A no de fu taki, dati wi de fri fu teki iniwan pasi di wi wani. Ma a pasi di wi e teki de wan tumusi prenspari sani, fu di wi têgo tamara de ini a tori. Fu kan kisi sabi na yeye sei, wi musu waka a pasi fu waarheid​— a pasi di wi e feni na ini Bijbel, a Wortu fu Gado.

[Futuwortu]

[Prenki na tapu bladzijde 5]

Furu sma na ini a ten disi e si den sani di heks e du leki wan relisi di no e du ogri èn di gron tapu a naturu

[Prenki na tapu bladzijde 6]

Ala ten bonu ben abi fu du nanga afkodrei

[Prenki na tapu bladzijde 6]

¿Den heks e du a wani fu Didibri sondro taki den sabi dati?

[Prenki na tapu bladzijde 7]

Bijbel e fruteri wi san na a pasi fu waarheid