Kownukondre Preikiman E Fruteri

„Yu Sabi So Furu fu Bijbel”

DI YESUS di ben abi 12 yari ben taki nanga den relisi fesiman na ini Yerusalem nanga deki-ati dan „ala den sma di ben e arki en, ben fruwondru ala ten baka fu a fasi fa a ben frustan sani èn fu den piki fu en” (Lukas 2:47). Na so a de tu na ini a ten disi, taki furu yongu futuboi fu Yehovah e teki a deki-ati fu taki fu Gado èn fu Bijbel nanga den leriman èn den skoromati fu den, èn nofotron den abi bakapisi di e gi den a srefi prisiri di Yesus ben abi.

Tiffany, di abi 14 yari, ben kisi les pe den ben taki fu a Bijbel profeititori fu den 70 yariwiki, di de fu feni na Danièl 9:24-27. A leriman ben fruteri wan tu sani fu den vers èn esi-esi a ben luku a tori frafra.

Fosi, Tiffany ben draidrai fu opo en anu. „Ma fu wan sani ede”, na so a e taki, „a ben trobi mi trutru taki a no ben fruklari den vers dorodoro. Èn fosi yu denki, mi opo mi anu go na loktu.” A leriman ben fruwondru taki wan sma ben de di trutru ben wani taki wan sani fu a tori, fu di moro fu den skoropikin ben abi problema fu frustan a tori.

Di Tiffany ben kisi na okasi fu fruklari a profeititori, dan a ben opo tanapu èn ben taki sondro fu a ben sreka ensrefi gi a tori. Di a ben kaba taki, dan a heri klas ben tan pî. Senwe ben naki Tiffany pikinso. Ne a heri klas ben bigin klap gi en èn den ben du dati wan heri pisi ten.

„Dati bun srefisrefi, Tiffany, dati bun srefisrefi”, a leriman ben taki ibritron baka. A ben erken taki a ben sabi dati den vers ben musu wani taki moro, ma Tiffany ben de a fosi sma di oiti fruklari den vers gi en na so wan krin fasi. Na a kaba fu a les, a ben aksi Tiffany fa a ben sabi so furu fu Bijbel.

„Na fu di mi na wan Kotoigi fu Yehovah”, a ben piki. „Mi papa nanga mama ben musu fruklari a profeititori dati gi mi furu leisi bifo mi ben man frustan en.”

Den skoromati ben fruwondru tu taki a ben sabi so furu fu Bijbel. Wán meisje fu en klas ben taigi Tiffany: „Now mi sabi fu san ede yu Yehovah Kotoigi e go oso fu oso; na fu di unu sabi so furu fu Bijbel.” Trawan ben pramisi taki noiti moro den ben o dreigi Tiffany fu den sani ede di a e bribi.

Di Tiffany ben fruteri en papa nanga mama san ben pasa, dan den ben gi en a rai fu gi a leriman fu en a buku Sabi di e tjari joe go na têgo libi. Di a ben du dati èn ben sori a leriman a pisi di e fruklari a profeititori fu Danièl, dan a leriman ben teki a buku wantewante èn ben taigi en tangi gi dati.

A tru, taki te yongu Kresten e taki nanga deki-ati fu den sani di a papa nanga a mama fu den leri den fu Gado nanga Bijbel, dan den yonguwan disi e prèise Yehovah èn e gi en grani èn fu dati ede a e go bun nanga den.—Mateus 21:15, 16.