A Nyun Grontapu—¿Yu Sa De Drape?
A Nyun Grontapu—¿Yu Sa De Drape?
„No wan sani moro bun gi den leki fu prisiri èn fu du bun na ini a libi fu den; èn so srefi taki ibriwan sma musu nyan èn dringi trutru èn si a bun fu ala en tranga wroko. A de a presenti fu Gado.”—PREIKIMAN 3:12, 13.
1. Fu san ede wi kan abi wan positief fruwakti fu a ten di e kon?
FURU sma e si na Almakti Gado leki wan sma di strak èn muilek. Ma a tekst di skrifi na tapusei na wan tru sani di yu sa feni na ini Gado Wortu di skrifi nanga yepi fu en santa yeye. Disi e fiti fu di en na „a koloku Gado” èn fu di a ben poti wi fosi papa nanga mama na ini wan paradijs na grontapu (1 Timoteus 1:11; Genesis 2:7-9). Te wi e du muiti fu kon sabi moro fu a ten di e kon èn di Gado pramisi en pipel, dan a no musu fruwondru wi te wi kon sabi den situwâsi di sa tyari têgo prisiri kon gi wi.
2. San na wan tu sani di yu e fruwakti fu kisi?
2 Na ini na artikel na fesi, wi ben ondrosuku dri fu den fo presi pe Bijbel e taki na fesi fu „nyun hemel nanga wan nyun grontapu” (Yesaya 65:17). Wan fu den sani disi di taki na fesi èn di wi kan frutrow, skrifi na ini Openbaring 21:1. Den vers di e kon baka dati, e fruteri fu a ten te na Almakti Gado sa kenki a situwâsi na grontapu srefisrefi, meki a kon bun. A sa figi watra-ai puru fu a sari di sma e sari. Sma no sa dede moro fu di den kon owru, siki, noso kisi wan onkoloku. Sari, babari, nanga pen no sa de moro. ¡Dati na trutru wan switi fruwakti! ¿Ma wi kan de seiker taki a sa kon, èn sortu krakti a fruwakti dati ben kan abi nownow na wi tapu?
Reide fu Abi Frutrow
3. Fu san ede wi kan frutrow a pramisi di Bijbel e gi fu a ten di e kon?
3 Luku fa Openbaring 21:5 e go doro. A e taki fu Gado, di e sidon na tapu en hemel kownusturu, taki a e fruklari: „¡Luku! Mi e meki ala sani kon nyun.” A pramisi dati fu Gado bun moro leki iniwan fruklari di wan kondre e fruklari taki a kisi srefidensi, èn moro bun leki iniwan mamawet fu a ten disi, noso iniwan tranga angri di libisma abi gi a ten di e kon. A de wan fruklari di wi kan frutrow trutru, fu a Sma di Bijbel e taki fu en dati a „no man lei” (Titus 1:2). Wi kan frustan taki yu ben sa kan denki taki noti moro de fanowdu, te wi abi a kefalek moi fruwakti disi èn te wi e frutrow Gado. Ma wi no musu stop dyaso. Wi abi moro ete fu leri fu a ten di e kon.
4, 5. Sortu Bijbel profeititori di wi luku kaba kan tranga a frutrow di wi abi na ini den sani di musu feni presi ete?
4 Prakseri san na artikel na fesi ben buweisi fu den pramisi di Bijbel e gi fu den nyun hemel nanga wan nyun grontapu. Yesaya ben taki na fesi taki so wan nyun sistema ben o kon, èn a profeititori fu en ben kon tru di den Dyu ben drai go baka na den mamakondre èn ben seti a tru anbegi baka (Esra 1:1-3; 2:1, 2; 3:12, 13). ¿Ma dati ben de ala san a profeititori fu Yesaya ben sori? ¡Kwetikweti! Den sani di a ben taki na fesi ben o kon tru na wan moro moi fasi na ini a ten di e kon. Fu san ede wi e bribi dati? Fu den sani ede di wi e leisi na ini 2 Petrus 3:13 nanga Openbaring 21:1-5. Den tori dati e taki fu nyun hemel nanga wan nyun grontapu di sa tyari wini gi Kresten na heri grontapu.
5 Soleki fa wi ben taki kaba, Bijbel e gebroiki den wortu „nyun hemel nanga wan nyun grontapu” fo leisi. Wi ondrosuku dri fu den èn wi kon si wan tu sani di e gi wi deki-ati. Fu taki en krin, Bijbel e taki na fesi taki Gado sa puru ogridu nanga tra sani di e meki sma pina èn taki baka dati a sa blesi a libisma famiri moro fara na ini a nyun sistema di a pramisi.
6. San a di fu fo profeititori fu „den nyun hemel nanga wan nyun grontapu” e taki na fesi?
6 Meki wi go ondrosuku now a lasti presi pe den wortu „den nyun hemel nanga wan nyun grontapu” de fu feni, na ini Yesaya 66:22-24: „’Neleki fa den nyun hemel nanga a nyun grontapu di mi e meki e tanapu na mi fesi,’ na so Yehovah taki, ’na so den bakapikin fu un pipel èn a nen fu un pipel sa tan tanapu. Èn a sa pasa trutru taki fu wan nyun mun te go miti wan nyun mun èn fu wan sabadei te go miti wan sabadei ala skin sa kon fu boigi na mi fesi’, na so Yehovah taki. ’Èn den sa go na dorosei trutru èn den sa si den dedeskin fu den man di ben sondu teige mi; bika den woron srefi di de na den tapu no sa dede èn a faya fu den srefi no sa dede, èn den musu tron wan tegu sani gi ala skin.’”
7. Fu san ede wi musu bribi taki Yesaya 66:22-24 sa abi wan kontru na ini a ten di e kon?
7 A profeititori disi ben kon tru na mindri den Dyu di ben seti densrefi baka na ini a kondre fu den, ma wan tra kontru ben o de. Dati ben o de furu yari baka di a di fu tu brifi fu Petrus èn a buku Openbaring ben skrifi, bika den ben taki fu wan ’nyun hemel nanga grontapu’ na ini a ten di e kon. Wi kan fruwakti a bigi èn lasti kontru dati na ini a nyun sistema. Luku wan tu fu den situwâsi di wi kan fruwakti fu nyan bun fu den.
8, 9. (a) Na sortu fasi a pipel fu Gado sa „tan tanapu”? (b) San a profeititori wani taki, te a e taki dati den futuboi fu Yehovah sa anbegi „fu wan nyun mun te go miti wan nyun mun èn fu wan sabadei te go miti wan sabadei”?
8 Openbaring 21:4 ben sori taki dede no sa de moro. A syatu pisi tori na ini Yesaya kapitel 66 e agri nanga dati. Wi kan si na ini vers 22 taki Yehovah sabi taki den nyun hemel nanga a nyun grontapu no sa de fu wan pisi ten, fu wan syatu ten nomo. Boiti dati, en pipel sa horidoro; den sa „tan tanapu” na en fesi. Den sani di Gado du kaba gi a pipel fu en di a frukisi e gi wi reide fu abi frutrow. Tru Kresten ben miti ogri-ati frufolgu, èn sma ben du fayafaya muiti srefi fu figi den puru (Yohanes 16:2; Tori fu den Apostel 8:1). Ma srefi kefalek makti feanti fu a pipel fu Gado, soleki Nero a Keiser fu Rome, nanga Adolf Hitler, no ben man fu figi den loyaalwan fu Gado puru, di e tyari a nen fu en. Yehovah kibri a gemeente fu en pipel, èn wi kan de seiker taki a kan meki a gemeente tan tanapu fu têgo.
9 Na so a de tu, taki ibriwan fu den wan di de getrow na Gado leki wan pisi fu a nyun grontapu, a libimakandra fu tru anbegiman na ini a nyun grontapu, sa tan tanapu, bika den sa gi soifri anbegi na a Kriaman fu ala sani. Den no sa anbegi wanwan leisi nomo noso na wan bruya fasi. A Wet fu Gado, di a ben gi Israèl nanga yepi fu Moses, ben aksi taki den ben musu du spesrutu sani na ini na anbegi ibri mun, te a ben de nyun mun, èn ibri wiki na tapu a Sabadei (Lefitikus 24:5-9; Numeri 10:10; 28:9, 10; 2 Kroniki 2:4). So bun, Yesaya 66:23 e taki dati a gwenti musu de fu anbegi Gado doronomo, ibri wiki èn ibri mun. A bribi di sma no e bribi na ini Gado èn a hoigrifasi fu relisi, no sa de na a ten dati. „Ala skin sa kon fu boigi na fesi” Yehovah.
10. Fu san ede yu kan abi a frutrow taki den godelowsu sma no sa pori a nyun grontapu fu ala ten?
10 Yesaya 66:24 e gi wi a dyaranti taki a vrede nanga a regtfardikifasi fu a nyun grontapu no sa de na ini kefar noiti. Godelowsu sma no sa pori en. Memre taki 2 Petrus 3:7 e taki dati ’a dei fu krutu èn a pori di godelowsu sma sa kisi’ de na wi fesi. Den godelowsu sma na den wan di sa kon na wan kaba. No wan ogri sa miti den sma di no abi fowtu, èn dati na heri tra fasi leki san e pasa na ini den orloku fu libisma, pe den borgu di e lasi den libi de moro furu leki den srudati di e lasi den libi. A Gran Krutuman e gi wi a dyaranti taki a dei fu en sa de wan pori fu den godelowsu sma.
11. Fa a ten di e kon sa de gi iniwan sma di de teige Gado èn teige na anbegi fu En, soleki fa Yesaya e sori?
11 Den regtfardiki sma di sa tan na libi sa si taki a profeiti wortu fu Gado tru. Vers 24 e taki na fesi taki „den dedeskin fu den man di ben sondu teige” Yehovah, sa de wan buweisi fu a krutu fu En. Den krin èn libilibi wortu di Yesaya ben gebroiki kan skreki son sma. Ma a de akruderi wan sani di ben pasa trutru na ini a historia. Na dorosei fu den skotu fu na owruten Yerusalem yu ben abi presi pe den ben trowe doti èn, wanwan leisi, den dedeskin fu ogriman di den ben kiri èn di den no ben feni bun fu gi wan bun beri. * Drape den woron nanga a kefalek hati faya ben o pori a doti èn den dedeskin dati. Soleki fa a sori, dan na agersifasi fa Yesaya e taki sani e sori a fasti bosroiti fu a krutu fu Yehovah na tapu sondari.
San A Pramisi
12. Sortu tra sani Yesaya e sori wi fu a libi na ini a nyun grontapu?
12 Openbaring 21:4 e fruteri wi fu wan tu sani di no sa de na ini a nyun sistema di e kon. Ma san sa de na a ten dati? Fa a libi sa de? ¿Wi kan kisi wan pingi di wi kan frutrow? Iya. Na wan profeiti fasi Yesaya kapitel 65 e taki fu den situwâsi di wi sa abi efu Yehovah feni wi bun fu libi na a ten te A sa meki den nyun hemel nanga a nyun grontapu disi te fu kaba. Den sma di A blesi fu tan fu têgo na ini a nyun grontapu no sa kon owru èn no sa dede te fu kaba. Yesaya 65:20 e gi wi a dyaranti: „No wan nyunyun pikin di owru wan tu dei nomo, sa komoto na a presi dati moro, èn srefi no wan granisma di no sa doro den yari fu en; bika wan sma sa dede te a de soso wan boi ete, awansi a abi wan hondro yari; èn fu a sei fu a sondari, awansi a abi wan hondro yari, a sa meki ogri kon na en tapu.”
13. Fa Yesaya 65:20 e gi wi a dyaranti taki Gado pipel sa abi seikerfasi?
13 Di disi ben kon tru a fosi leisi gi a pipel fu Yesaya, dan dati ben wani taki dati no wan ogri ben kan pasa nanga den beibi na ini a kondre. No wan feanti ben kon na inisei, soleki fa den Babilonsma ben du wan leisi, fu tyari pikin di de na bobi gowe noso fu kiri den man di ben de na ini a moro bun pisi ten fu den libi (2 Kroniki 36:17, 20). Na ini a nyun grontapu di e kon, ogri no sa miti sma, den sa abi seikerfasi, èn den sa man nyan bun fu a libi. Efu wan sma e frukisi fu opruru teige Gado, dan a no sa kisi na okasi fu tan libi go doro. Gado sa puru en. Ma san dan efu wan sondari di e opruru abi wan hondro yari? A sa dede „te a de soso wan boi ete”, te yu teki dati gersi nanga a têgo libi.—1 Timoteus 1:19, 20; 2 Timoteus 2:16-19.
14, 15. Sortu sani di sa tyari wini gi wi, wi kan fruwakti, soleki fa Yesaya 65:21, 22 e sori?
14 Na presi fu poti prakseri na a fasi fa Gado ben sa kan puru wan sma di e sondu fu espresi, Yesaya e taki fu den situwâsi pe wi sa libi na ini èn di sa de furu na ini a nyun grontapu. Pruberi fu si yusrefi na ini a situwâsi dati. Den sani di ben sa kan kon fosi na ini a prakseri fu yu na sani di yusrefi abi belangstelling gi. Yesaya e taki fu dati na ini vers 21 nanga 22: „Den sa bow oso trutru èn libi na ini, èn den sa prani droifi-dyari trutru èn nyan fu den froktu fu den. Den no sa bow èn wan tra sma go libi na ini; den no sa prani èn wan tra sma go nyan fu en. Bika den dei fu mi pipel sa de leki den dei fu wan bon; èn den sma di mi frukisi sa gebroiki a wroko fu den eigi anu krinkrin.”
15 Efu yu no sabi fu bow noso fu du dyariwroko ete, dan a profeititori fu Yesaya e sori taki yu o kisi leri fu du dati. ¿Ma yu ben sa wani leri nanga a yepi fu bekwaam leriman, kande birtisma di abi switifasi èn di e breiti fu yepi yu? Yesaya no ben taki efu yu oso sa abi bigi fensre sondro grasi èn nanga yarsin, so taki yu kan prisiri fu a tropisch winti di e wai, noso taki yu sa abi grasi fensre di tapu, pe yu kan luku go na dorosei fu si den difrenti pisi ten fu a yari. ¿Yu sa meki wan oso nanga wan skoinsi daki fu na alen nanga snew kan fadon komoto? ¿Noso a klimaat fu a kontren sa meki a de fanowdu fu abi wan plata daki — leki wan fu den daki na ini den Mindri-Owstu — wan daki pe yu kan kon makandra nanga yu famiri fu nyan switi nyanyan èn fu abi takimakandra?—Deuteronomium 22:8; Nehemia 8:16.
16. Fu san ede yu kan fruwakti taki a nyun grontapu sa gi satisfaksi fu têgo?
16 A sani di moro prenspari leki fu sabi den finifini tori disi, na taki yu sa abi yu eigi oso. A sa de fu yu — a no sa de leki na ini a ten disi te yu ben sa kan wroko tranga srefisrefi fu bow wan oso, ma dan wan tra sma abi wini fu en. Yesaya 65:21 e taki tu dati yu sa prani èn yu sa nyan den froktu. A de krin taki disi e taki fa a heri situwâsi sa de. Yu sa kisi trutru satisfaksi fu den muiti di yu e meki, den froktu fu yu eigi tranga wroko. Yu sa man du dati wan langa pisi ten — „leki den dei fu wan bon”. ¡Dati sa wani taki trutru dati „ala sani nyun”!—Psalm 92:12-14.
17. Sortu pramisi sa de wan spesrutu deki-ati gi papa nanga mama?
17 Efu yu na wan papa noso mama, dan den wortu disi sa naki yu ati: „Den no sa wroko tranga fu soso, èn den no sa meki pikin di e gi problema, bika den na den pikin di de den blesiwan fu Yehovah, èn den bakapikin fu den makandra nanga den. Èn a sa pasa seiker taki fosi den bari kari, misrefi sa piki, èn ala di den e taki ete, misrefi sa yere” (Yesaya 65:23, 24). ¿Yu ondrofeni a pen kaba di yu e kisi te yu „meki pikin di e gi problema”? Wi no abi fu kari den furu problema di pikin kan abi, di e tyari broko-ede gi den papa nanga mama èn gi tra sma. So srefi, wi alamala ben si papa nanga mama di ben abi so furu fu du nanga den eigi wroko, aktiviteit, noso prisiri, taki den e gebroiki pikinso ten nomo nanga den pikin fu den. Kontrari fu dati, Yehovah e gi wi a dyaranti taki a sa yere wi èn a sa gi wi den sani di wi abi fanowdu, èn a sabi den na fesi srefi.
18. Fu san ede yu kan fruwakti fu prisiri nanga den meti na ini a nyun grontapu?
18 Ala di yu e prakseri fu a prisiri di yu kan abi na ini a nyun grontapu, pruberi fu si a situwâsi di a profeiti wortu fu Gado e sori wi: „’Srefi a wolfu nanga a pikin skapu sa nyan nanga makandra leki wán, èn a lew sa nyan drei grasi neleki a mankaw; èn fu a sei fu a sneki, na doti a sa nyan. Den no sa du ogri èn den no sa pori no wan sani na tapu heri mi santa bergi’, na so Yehovah taki” (Yesaya 65:25). Sma di sabi meki skedrei ben pruberi fu ferfi a situwâsi dati, ma disi a no wortu nomo fu sori wan prakseri fu sma, nanga yepi fu a fri di wan artist abi. Disi sa de wan trutru sani. Vrede sa de furu na mindri libisma èn vrede sa de tu nanga den meti. Furu biologiaman nanga sma di lobi meti e gebroiki a moro bigi pisi fu den libi fu leri sabi wan tu sortu meti, noso wan sortu ras nomo. Kontrari fu dati, prakseri san yu sa man leri te a frede gi libisma no e basi den meti moro. Dan yu sa man go miti den fowru èn den kefalek pikin kriaturu srefi di e libi na ini busi — iya, yu sa man ondrosuku den, leri fu den, èn prisiri nanga den (Yob 12:7-9). Yu sa man du dati sondro taki ogri sa miti yu, sondro taki libisma noso meti kan du yu ogri. Yehovah e taki: „Den no sa du ogri èn den no sa pori no wan sani na tapu heri mi santa bergi.” ¡Dati sa de wan bigi kenki te yu e teki en gersi den sani di wi e si èn e ondrofeni na ini a ten disi!
19, 20. Fu san ede a pipel fu Gado de heri tra fasi leki moro furu sma na ini a ten disi?
19 Soleki fa wi ben taki kaba, dan libisma no man taki soifri na fesi san sa pasa na ini a ten di e kon, ala di na furu presi sma e broko den ede nanga wan nyun millennium. Dati e meki furu sma e bruya, no e sabi san fu du, noso e lasi-ati. Peter Emberley, driktoro fu wan universiteit na ini Kanada, ben skrifi: „Furu [bigisma] e kisi fu du te fu kaba nanga prenspari aksi fu a de di den de na libi. Suma na mi? San mi e pruberi fu kisi trutru? San na a erfenis di mi e libi gi a tra geslakti? Te den pasa 40 yari kaba èn e doro 60 yari, dan den e feti fu tyari rostu kon èn fu abi wan marki na ini a libi fu den.”
20 Yu kan frustan fu san ede disi de so nanga furu sma. Den e pruberi kande fu abi wan switi libi nanga yepi fu den hobby di den abi noso nanga yepi fu kefalek ontspanning. Ma den no sabi san sa pasa na ini a ten di e kon, èn fu dati ede a kan gersi taki a libi no prenspari, taki a bruya, noso taki a no wani taki wan sani trutru. We poti disi na sei a fasi fa yu e si a libi, te yu luku den sani di wi taki fu den. Yu sabi taki na ini den nyun hemel nanga wan nyun grontapu di Yehovah pramisi, wi sa man luku lontu èn taki nanga wi heri ati: ¡’Fu tru, Gado meki ala sani kon nyun!’ ¡Iya, wi sa prisiri fu dati srefisrefi!
21. San na a srefi penti di wi e feni na ini Yesaya 65:25 nanga Yesaya 11:9?
21 A no bigimemre wi abi taki wi e prakseri fu libi na ini a nyun grontapu fu Gado. Gado e gi wi a kari, e gi wi deki-ati srefi, fu anbegi en na ini waarheid now èn fu doro den markitiki fu kisi a libi te ’den no sa du ogri èn den no sa pori no wan sani na tapu heri en santa bergi’ (Yesaya 65:25). ¿Ma yu sabi taki moro na fesi, Yesaya ben taki wan srefi sortu sani kaba èn taki a ben taki fu wan penti tu di de tumusi prenspari efu wi wani nyanbun trutru fu a nyun grontapu? Yesaya 11:9 e taki: „Sma no sa du no wan sortu ogri èn no sa pori no wan sani na tapu heri mi santa bergi; bika grontapu sa kon furu trutru nanga a sabi fu Yehovah, soleki fa watra e tapu se.”
22. Sortu bosroiti fu wi musu kon moro krakti, baka di wi ben ondrosuku fo Bijbel profeititori?
22 „A sabi fu Yehovah.” Te Gado e meki ala sani kon nyun, dan den sma di e libi na grontapu sa abi soifri sabi fu en èn fu a wani fu en. Dati sa wani taki moro furu leki fu leri sani nomo fu den meti di a kria. A abi fu du tu nanga en Wortu di skrifi nanga en santa yeye. Fu eksempre, prakseri o furu wi ben kon si di wi ben ondrosuku soso den fo profeititori di e taki fu „nyun hemel nanga wan nyun grontapu” (Yesaya 65:17; 66:22; 2 Petrus 3:13; Openbaring 21:1). Yu abi bun reide fu leisi Bijbel ibri dei. ¿Dati na wan fu den gwenti fu yu? Efu a no de so, dan sortu kenki yu kan tyari kon so taki ibri dei yu sa leisi wan tu fu den sani di Gado abi fu taki? Yu sa si taki boiti taki yu sa abi a fruwakti fu nyan bun fu a nyun grontapu, yu sa kisi moro prisiri nownow kaba, soleki fa a psalm skrifiman ben kisi dati.—Psalm 1:1, 2.
[Futuwortu]
^ paragraaf 11 Luku Inzicht in de Schrift, Pisi 1, bladzijde 764, di a Watchtower Bible and Tract Society of New York, Inc., tyari kon na doro.
Fa Yu Ben Sa Piki?
• Fu san ede wi kan taki dati Yesaya 66:22-24 e taki san sa pasa na ini a ten di e kon?
• Sortu sani yu e fruwakti spesrutu, na mindri den sani di ben kari na ini den profeititori fu Yesaya 66:22-24 nanga Yesaya 65:20-25?
• Sortu reide yu abi fu abi frutrow na ini a ten di e kon?
[Aksi fu a tori disi]
[Prenki na tapu bladzijde 15]
Yesaya, Petrus, nanga Yohanes ben taki na fesi fu wan tu sani fu den „nyun hemel nanga wan nyun grontapu”