Aksi fu Leisiman

Dri fu den Evangelie e taki fu a kragi di abi fu du nanga a salfu fu Yesus nanga diri oli. ¿Na furu apostel ben kragi, noso na Yudas spesrutu ben du dati?

Wi kan leisi na afersi disi ini den Evangelie fu Mateus, Markus nanga Yohanes. A gersi leki Yudas ben teki fesi ini a kragi di ben feni presi, èn a musu de so taki wan tu tra apostel ben e agri nanga en. A tori disi e sori fu san ede wi kan de nanga tangi taki wi abi fo Evangelie tori. San ibriwan fu den skrifiman skrifi ben de soifri, ma a no den alamala e taki fu den srefi finifini tori. Te wi e teki tori di e taki fu a srefi afersi èn gersi den nanga makandra, dan wi e kon frustan den pikinpikin pisi fu furu sani di pasa, moro bun.

A tori na Mateus 26:6-13 e taki pe a sani pasa — na a oso fu Simon a gwasiman, na ini Betania — ma a no e kari a nen fu na uma di ben bigin kanti a switismeri oli na tapu na ede fu Yesus. Mateus e taki: „Di den disipel si disi, den ati kon bron” èn den ben kragi taki na oli ben kan seri èn den ben kan gi a moni na den pôtisma.

Ini a tori fu Markus wi kan feni moro furu fu den finifini tori dati. Ma a e taki tu dati a e broko a sani opo pe na oli ben de na ini. A ben abi switismeri oli na ini di ben de „soifri nardus”, wan sortu di kande den ben tyari komoto fu India. Fu taki fu a kragi, Markus e taki dati „son sma ben de di ben sori taki den ati ben bron”, èn „den no ben firi prisiri nanga en” (Markus 14:3-9). So bun den tu tori e sori taki moro leki wan apostel ben de ini a kragi afersi. Fa a ben bigin?

Yohanes di ben si san ben pasa, ben skrifi moro soifri finifini pisi fu a tori. A kari a nen fu na uma — Maria, a sisa fu Marta nanga Lasarus. Yohanes ben gi wi a finifini tori disi tu, di wi kan si leki wan pisi moro fu a tori, na presi fu a de kontrari den trawan: „A ben nati den futu fu Yesus èn drei den futu nanga en wiwiri.” Te wi e poti den tori sei na sei, dan wi kan si taki a musu de so taki Maria ben poti na oli, di Yohanes e taki dati a ben de „soifri nardus”, na tapu Yesus ede èn na tapu en futu. Yohanes ben de krosibei fu Yesus èn a ben firi atibron te sma ben e wisiwasi En. Wi e leisi: „Yudas Iskariot, wan fu den disipel fu en, di ben de fu tori en, ben taki: ’Fu san ede a switismeri oli disi no ben seri gi drihondro denari èn ben gi na den pôti sma?’”—Yohanes 12:2-8

A de so taki, Yudas ben de „wan fu den disipel fu en”, ma yu kan firi taki na atibron fu Yohanes e kon fu di wan sma di abi so wan posisi ben e seti sani fu tori Yesus. Dr. C. Howard Matheny, wan sma di e du vertaalwroko, ben taki fu Yohanes 12:4 taki: „A tegenwoordig deelwoord ’a ben o’ [noso, „a ben de fu”] nanga a werkwoord ini a tegenwoordige tijd ’a e tori en’ [noso, „a ben de na a momenti fu tori en”] ala tu e sori na tapu wan sani di ben e pasa noso di ben e go doro. A sani disi e sori taki a tori di Yudas ben tori Yesus no ben de wan sani di ben pasa so onfruwakti bika a ben go denki fu dati èn a ben teki furu dei fu seti sani fu du en.” Yohanes ben gi na inzicht tu taki Yudas ben kragi „no fu di a ben broko en ede nanga den pôtisma, ma fu di a ben de wan fufuruman èn ben abi a monikisi èn a ben gwenti fu teki a moni di ben poti na ini”.

So bun a de wan sani di no kan de tra fasi taki a fufuruman Yudas bigin nanga a kragi bika a ben sa abi moro moni fu kan fufuru efu a diri oli ben seri èn a moni ben poti na ini a monikisi di en ben e tyari. Ne, di Yudas ben bigin a kragi, dan wan tu tra apostel kande krutukrutu fu di den ben kon agri nanga a sani di ben sori leki a de wan bun gron fu kragi. Ma na Yudas spesrutu ben de a sma di ben sutu faya gi a kragi.