Teki Trowstu na ini a Krakti fu Yehovah

„Te den prakseri fu mi di e trubu mi, ben kon furu na inisei fu mi, dan a ben de den eigi trowstu fu yu di ben bigin boboi mi sili.”—PSALM 94:19.

 GI ALA den sma di e angri fu kisi trowstu, Bijbel abi wortu di e gi trowstu. Fu dati ede a no e fruwondru wi taki The World Book Encyclopedia e taki dati „kefalek furu sma ben go suku yepi na Bijbel fu kisi trowstu, howpu, nanga tiri na ini ten fu problema nanga tweifri”. Fu san ede?

Bika wi lobi Kriaman, „a Gado fu ala trowstu”, a Sma „di e trowstu wi na ini ala wi banawtu” ben meki sma skrifi Bijbel nanga yepi fu en santa yeye (2 Korentesma 1:3, 4). En na ’a Gado di e gi trowstu’ (Romesma 15:5). Yehovah gi na eksempre fu di a ben gi wi alamala wan yepi fu feni frulekti. A ben seni en wan-enkri gebore Manpikin, Krestes Yesus, kon na grontapu fu gi wi howpu nanga trowstu. Yesus ben leri sma: „Gado ben lobi grontapu so te, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). Bijbel e kari Yehovah a sma „di e tyari a lai gi wi ala dei, a tru Gado fu wi frulusu” (Psalm 68:19). Sma di abi frede gi Gado kan taki nanga frutrow: „Mi poti Yehovah na mi fesi doronomo. Fu di a de na mi reti-anu, den no sa meki mi degedege.”​—Psalm 16:8.

Den sortu pisi disi na ini Bijbel e sori a dipi lobi di Yehovah Gado abi gi wi leki libisma. A e kon krin taki a abi na opregti angri — so srefi a krakti — fu gi bogobogo trowstu èn fu lekti a pen di wi abi na ini ten fu banawtu. „A e gi krakti na den wan di weri, èn a wan di no abi dinamik krakti a e gi krakti pasa marki” (Yesaya 40:29). Fa wi kan teki trowstu dan na ini a krakti fu Yehovah?

A Sorgu Di Yehovah E Sorgu gi Wi, E Trowstu Wi

A psalm skrifiman ben skrifi: „Trowe yu hebi na Yehovah srefi tapu, èn ensrefi sa horibaka gi yu. Noiti a sa meki taki a regtfardikiwan e degedege” (Psalm 55:22). Iya, Yehovah Gado abi belangstelling gi a libisma famiri. Na apostel Petrus ben gi den fosi yarihondro Kresten a dyaranti baka: „A [Gado] e sorgu gi unu” (1 Petrus 5:7). Yesus Krestes ben sori krinkrin o prenspari libisma de gi Gado, di a ben e taki: „¿Sma no e seri feifi pikin fowru gi tu pisi moni di no abi furu waarde? Toku Gado no e frigiti no wan fu den. Ma srefi ala den wiwiri na tapu unu ede teri kaba. No frede; unu warti moro leki furu pikin fowru” (Lukas 12:6, 7). Wi de so prenspari gi Gado taki a e si srefi a moro pikin sani fu wi. A sabi sani di wisrefi no sabi bika a abi belangstelling srefisrefi gi iniwan fu wi.

Fu di Svetlana ben kon firi a belangstelling di Yehovah ben abi gi ensrefi, meki dati ben trowstu en srefisrefi, a yongu huru di wi ben kari na ini na artikel na fesi. A ben de fu kiri ensrefi di a ben miti den Kotoigi fu Yehovah. Ne a ben teki wan bijbelstudie, di ben yepi en fu kon sabi Yehovah leki wan trutru sma di wani meki a go bun nanga en. Disi ben naki en ati, èn ben buweigi en fu kenki en libi èn fu gi en libi abra na Gado. A ben meki Svetlana abi lespeki gi ensrefi tu di a ben abi fanowdu fu horidoro ala di a ben abi problema èn fu abi wan positief denki fu a libi. „Mi e bribi trutru”, a e taki now, „taki noiti Yehovah sa libi mi. Mi kon si taki a sani di skrifi na ini 1 Petrus 5:7 tru. Drape a e taki: ’Trowe ala un broko-ede na en [Yehovah] tapu, bika a e sorgu gi unu.’”

A Bijbel Howpu E Gi Trowstu

Wan spesrutu fasi fa Gado e gi trowstu de nanga yepi fu en Wortu di a skrifi, di abi wan kefalek moi howpu gi a ten di e kon. Na apostel Paulus ben skrifi: „Ala sani di ben skrifi fositen ben skrifi fu gi wi leri, taki nanga a hori di wi e horidoro èn nanga a trowstu fu den Buku fu Bijbel, wi ben sa abi howpu” (Romesma 15:4). Paulus ben sori krinkrin san a tru howpu abi fu du nanga trowstu, di a ben skrifi: „Meki . . . Gado wi Tata, di ben lobi wi èn di ben gi wi têgo trowstu nanga bun howpu nanga yepi fu no-frudini bun-ati, trowstu un ati èn meki unu kánkan na ini ibri bun du èn wortu” (2 Tesalonikasma 2:16, 17). A „bun howpu” disi na so srefi a fruwakti fu libi wan volmaakti koloku libi di no e kaba, na wan paradijs grontapu.—2 Petrus 3:13.

So wan trutru èn kefalek moi howpu ben gi Laimonis  deki-ati, a lan sopiman di wi ben kari na ini na artikel na fesi. Di a ben leisi den Bijbel publikâsi fu den Kotoigi fu Yehovah, a ben breiti fu leri sani fu a nyun grontapu na ondro a Kownukondre fu Gado, pe a gosontu fu en ben sa kan kon bun dorodoro. Na ini Bijbel, a ben leisi a kefalek moi pramisi di e taki fu a gosontu di sma sa kon gosontu na wan wondru fasi: „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede” (Yesaya 35:5, 6). Fu doro den markitiki fu man libi na ini a Paradijs dati, dan Laimonis ben tyari bigi kenki kon. A no ben dringi sopi moro, èn den birtisma nanga den mati fu en ben si taki a ben kenki. Now a e hori difrenti bijbelstudie, èn a e gi tra sma a trowstu di a Bijbel howpu e gi.

San Begi Kan Du

Te wi ati e sari fu wan sani ede, dan wi kan feni trowstu te wi e begi Yehovah. Dati kan puru a hebi na wi tapu. Te wi e begi, wi kan feni trowstu te wi e prakseri sani di ben taki na ini a Wortu fu Gado. A moro langa psalm na ini Bijbel de leki wan moi begi. A skrifiman fu a psalm ben singi: „Mi prakseri den krutu bosroiti fu yu fu ten di no skotu, o Yehovah, èn misrefi feni trowstu” (Psalm 119:52). Na ini kefalek muilek situwâsi, spesrutu den wan di abi fu du nanga wan problema fu wi gosontu, nofotron wan-enkri piki no de gi ala sani. Nanga wi eigi krakti wi no man sabi soifri pe wi musu suku yepi. Furu sma si taki te den du ala sani kaba di wan libisma kan du, dan a e gi furu trowstu fu suku yepi na Gado na ini begi, èn sontron a e gi lusu di wi no ben fruwakti.—1 Korentesma 10:13.

Pat, di ben tyari go esi-esi na a yepikamra fu wan ati-oso, ben ondrofeni a trowstu disi di begi e gi. Baka di a ben kon betre, a ben taki: „Mi ben begi Yehovah èn mi ben leri trutru taki mi ben musu poti mi libi na ini en anu, èn frutrow en fu du awansi san a ben wani. A heri pisi ten disi, mi ben bedari; mi ben ondrofeni a vrede fu Gado di den ben taki fu en na ini Filipisma 4:6, 7.” ¡Den wortu disi kan gi wi alamala furu trowstu fu tru! Drape Paulus e frumane wi: „No broko un ede nanga noti, ma meki Gado kon sabi den faya begi fu unu na ini ala sani nanga yepi fu begi nanga tranga begi makandra nanga tangi; èn a vrede fu Gado, di e pasa ala prakseri, sa kibri un ati nanga un krakti fu denki nanga yepi fu Krestes Yesus.”

A Santa Yeye Leki Trowstuman

A neti bifo Yesus dede, a ben sori den apostel fu en taki heri esi a ben o gowe libi den. Disi ben trobi den èn ben meki den firi sari (Yohanes 13:33, 36; 14:27-31). Fu di Yesus ben si taki den ben abi trowstu fanowdu doronomo, meki a ben pramisi den: „Mi sa aksi a Tata èn a sa gi unu wan tra yepiman [noso, trowstuman] di sa de nanga unu fu têgo” (Yohanes 14:16; futuwortu). Dyaso Yesus ben e taki fu a santa yeye fu Gado. Boiti tra sani, a yeye fu Gado ben trowstu den apostel na ini den tesi fu den èn a ben gi den krakti fu go doro fu du Gado wani.—Tori fu den Apostel 4:31.

Angie, di en masra pikinmoro ben dede di a ben abi wan seryusu mankeri, ben man handri bun nanga ala den banawtu nanga sari na ini en situwâsi. San ben yepi en? A e taki: „Sondro a yepi fu Yehovah en santa yeye, wi no ben o man pasa den sani di wi ondrofeni èn wi no ben o man tan tranga. A krakti fu Yehovah ben de fu si trutru di wi ben swaki, èn a ben de wan fortresi ini den banawtu fu wi.”

Wan Bradafasi Di E Gi Trowstu

Awansi san a situwâsi na ini a libi fu wan sma kan de, awansi sortu sari situwâsi kan de, a sma musu man feni trowstu na ini a bradafasi di de na ini a gemeente fu Yehovah. A bradafasi disi e gi yepi na yeye fasi èn e horibaka gi den wan di abi demakandra nanga en. Drape wan sma kan feni wan grupu fu mati  di abi lobi, di e broko den ede gi tra sma, èn di e gi trowstu, èn di de klariklari èn wani fu yepi èn fu trowstu trawan di de ini banawtu.—2 Korentesma 7:5-7.

Den memre fu a Kresten gemeente e leri fu „du bun gi ala sma, ma spesrutu gi den wan di de na ini a srefi bribi leki [den]” (Galasiasma 6:10). A Bijbel leri di den e kisi e buweigi den fu sori brada lobi èn safu lobi firi gi makandra (Romesma 12:10; 1 Petrus 3:8). Brada nanga sisa na yeye fasi na ini a gemeente e kisi a deki-ati fu abi switifasi, fu gi trowstu, fu abi safu sari-atifasi.—Efeisesma 4:32.

Joe nanga Rebecca di ben lasi den manpikin na ini dede di wan onkoloku ben pasa, ben kisi a yepi disi di e gi trowstu fu den memre fu a Kresten gemeente. Den e taki: „Yehovah nanga en lobi gemeente yepi wi na ini den muilek ten fu wi. Wi ben kisi hondrohondro karta, brifi, èn hondrohondro sma ben bel wi. Disi e meki wi frustan o prenspari wi bradafasi de. Di wi ben bruya ete fu a rampu, dan furu birti gemeente ben kon yepi wi, fu di den ben gi wi nyanyan èn ben krin wi oso.”

¡Teki Trowstu!

Te gens e bigin wai kon tranga na wi tapu leki wan tranga winti, èn banawtu e tan kon na wi tapu srefisrefi leki hebi alen nanga pisipisi ijs, dan Gado de klariklari fu gi wi kibri di e trowstu wi. Disi na fa wan fu den psalm e taki fu En leki wan sma di e gi kibri di e trowstu: „Nanga en frei a sa tapu a pasi fu go na yu, èn na ondro en frei yu sa kisi kibri” (Psalm 91:4). Na eksempre dyaso kan de di fu wan aka. Na wan prenki fu wan fowru di e si kefar èn di e bradi en frei na tapu den pikin fu en fu kibri den. Na wan moro bigi fasi, Yehovah e tron wan trutru Kibriman gi ala sma di e feni kibri na en.—Psalm 7:1.

Efu yu wani leri moro fu Gado, en persoonlijkheid, den prakseri fu en, nanga a man di a man gi trowstu, dan wi e gi yu a kari fu studeri en Wortu. Den Kotoigi fu Yehovah sa breiti fu yepi yu fu du dati. ¡Iya, yu tu kan teki trowstu na ini a krakti fu Yehovah!

[Prenki na tapu bladzijde 7]

A howpu di Bijbel e gi, gi a ten di e kon kan gi trowstu