¿Yu E Memre Disi Ete?

¿Yu warderi en fu leisi den uitgave fu A Waktitoren fu no so langa pasa? We, luku efu yu kan gi wan piki na tapu den aksi di e kon now:

• San ben meki a makriki fu sma teki Kresneti abra na ini Korea?

Wan owru bribi ben de na ini Korea nanga wan tu tra kondre, di abi fu du nanga wan gado fu a kukru èn di sma ben prakseri fu en taki a ben pasa kon na ini a schoorsteen èn tyari kado kon na ini a mun december. So srefi, baka a di fu Tu Grontapufeti, den Amerkan srudati ben prati kado èn ben gi yepi na den kerki fu den sma drape.​—15/12, bladzijde 4, 5.

• Sortu „waktiman” Gado ben abi na ini a ten fu wi, leki kontru fu Yesaya 21:8?

Kresten di salfu nanga yeye èn di e dini leki wan waktiman grupu, warskow sma gi den sani di e pasa na grontapu èn di de wan kontru fu Bijbel profeititori. Den yepi bijbelstudenti tu fu kon sabi èn fu wai pasi gi leri nanga gwenti di no de akruderi Bijbel.​—1/1, bladzijde 8, 9.

• Suma ben de den „Pôlsu Brada”?

Den ben de wan pikin relisi grupu na ini Polen na ini a di fu 16 èn a di fu 17 yarihondro, di ben gi sma deki-ati fu hori densrefi na Bijbel èn fu dati ede den no ben bribi den prenspari kerki leri, soleki a Dri-wánfasi, a dopu fu beibi, nanga helfaya. Baka ten, sma ben frufolgu den fayafaya èn ben dwengi den fu panya go na ini tra kondre.​—1/1, bladzijde 21-23.

• Fu san ede wi kan frutrow den profeititori fu Bijbel, na presi fu frutrow den sani di den futuroloog noso astroloog e taki na fesi?

Libisma di wani prei profeiti e sori taki den no de fu frutrow, bika den e poti Yehovah nanga a Bijbel na wan sei. Soso den profeititori fu Bijbel kan yepi yu fu kon sabi san den sani di e feni presi abi fu du nanga a prakseri fu Gado, èn di sa abi wini gi yusrefi èn gi yu osofamiri fu têgo.​—15/1, bladzijde 3.

• San na wan tu buweisi di e sori taki wi e libi na ini den lasti dei?

Wi kan si den bakapisi fu a trowe di den trowe Satan komoto na hemel (Openbaring 12:9). Wi e libi na ini a ten fu a lasti „kownu” di kari na ini Openbaring 17:9-11. A nomru fu trutru salfu Kresten e kon moro mendri, ma toku a gersi taki son wan fu den sa de na grontapu ete te a bigi banawtu e bigin.​—15/1, bladzijde 12, 13.

• O ten a buku Habakuk ben skrifi, èn fu san ede wi musu abi belangstelling gi en?

A Bijbel buku disi ben skrifi pikinmoro na ini a yari 628 b.G.T. A abi a krutu fu Yehovah teige na owruten Yuda èn teige Babilon. A e taki so srefi fu a krutu fu Gado di sa kon didyonsro na tapu a disiten godelowsu sistema.​—1/2, bladzijde 8.

• Pe na ini Bijbel wi kan feni a koni rai fu wan mama gi bekwaam wefi?

A lasti kapitel fu a buku Odo, kapitel 31, na wan kefalek bun presi fu kisi den sortu rai disi.​—1/2, bladzijde 30, 31.

• Fu san ede wi kan de nanga tangi taki Yehovah ben meki wi kon sabi „a denki fu Krestes”? (1 Korentesma 2:16)

Nanga yepi fu den Evangelie di skrifi, Yehovah ben meki wi man leri Yesus en denki, en firi, den sani di a ben du, èn den sani di a ben poti na a fosi presi. Disi kan yepi wi fu gersi Yesus moro, spesrutu na a fasi fa wi e poti prakseri na a preikiwroko di kan kibri a libi fu sma.​—15/2, bladzijde 25.

• ¿Gado e gi piki na tapu begi na ini a ten disi?

Iya. Ala di Bijbel e sori taki Gado no e gi piki na tapu ala begi, toku den disiten ondrofenitori e sori taki nofotron a handri, di sma begi fu kisi trowstu èn fu kisi yepi nanga den sortu afersi leki a lusu fu problema na ini den trowlibi.​—1/3, bladzijde 3-7.

• San wi kan du fu kisi a krakti fu Gado?

Wi kan aksi dati na ini begi, wi kan kisi krakti fu Bijbel na yeyefasi, èn wi kan kisi krakti nanga yepi fu Kresten demakandra.​—1/3, bladzijde 15, 16.

• Fa papa nanga mama kan yepi den pikin fu den fu kisi moro wini fu Kresten konmakandra?

Den kan yepi den pikin fu den fu tan na ai, kande fu di den e meki den sribi pikinso bifo a konmakandra. Den kan gi den pikin deki-ati fu meki „notisi”, soleki fu di den e hari wan strepi na tapu wan pisi papira ibri leisi te den yere wortu noso nen di den sabi.​—15/3, bladzijde 17, 18.

• San na wan tu sani di wi kan leri fu na eksempre fu Yob?

Yob ben poti a matifasi di a abi nanga Gado na a fosi presi, a no ben teki sma partei te a ben handri nanga tra libisma, a ben du muiti fu de loyaal na en trowpatna, a ben sori taki a ben broko en ede nanga a yeyefasi fu en osofamiri, èn a ben horidoro na wan getrow fasi na ondro tesi.​—15/3, bladzijde 25-27.

• ¿Bijbel abi wan sikrit boskopu di e gi wi koni fu sabi boskopu di skrifi na wan sikrit fasi?

Nôno. A taki di sma e taki dati wan sokari sikrit boskopu de na ini Bijbel, den ben kan taki tu fu son grontapu buku. Den sokari sikrit boskopu na ini Bijbel ben o de fu soso fu di difrenti sortu spelling de na ini den Hebrewtongo manuscript.​—1/4, bladzijde 30, 31.