¿Yu E Rikomanderi Yusrefi na Tra Sma?

’¡Mi no abi bisi san tra sma e denki!’ Na wan momenti te yu atibron noso te yu bruya, dan kande yu du a fruklari disi sondro frede. Ma baka te a deki-ati firi di sori ensrefi wantronso gowe kaba, dan kande yu e broko yu ede srefisrefi. Fu san ede? Bika moro furu fu wi e broko wi ede trutru nanga san tra sma e denki fu wi.

IYA, wi musu broko wi ede nanga den firi fu tra sma. Spesrutu wi leki Kresten, bedinari fu Yehovah Gado di a poti na ini den posisi, musu broko wi ede na wan yoisti fasi nanga a fasi fa tra sma e denki fu wi. Te fu kaba, wi de leki „wan prei na ini wan theater gi grontapu” 1 Korentesma 4:9). Na ini 2 Korentesma 6:3, 4 wi e feni a bun rai fu na apostel Paulus: „Na no wan fasi wi e meki taki sma e naki futu fadon, so taki sma no kan feni fowtu na a diniwroko fu wi, ma na ala fasi wi e rikomanderi wisrefi na Gado leki bedinari.”

Ma san a wani taki fu rikomanderi wisrefi na tra sma? ¿A wani taki dati wi e meki bigi gi wisrefi noso taki wi e poti tumusi furu prakseri na wisrefi èn na den sani di wi man du? Nôno. Ma a de fanowdu taki wi musu du den wortu fu 1 Petrus 2:12: „Tan tyari unsrefi na wan bun fasi na mindri den nâsi, so taki . . . leki wan bakapisi fu den bun wroko fu unu di den ben si nanga den eigi ai, den kan gi glori na Gado.” ¡Kresten e rikomanderi densrefi fu di den e meki a fasi fa den e tyari densrefi de a buweisi fu dati! Te fu kaba, disi e tyari prèise kon, no gi wi, ma gi Gado. Ma toku a rikomanderi di wi e rikomanderi wisrefi na tra sma kan abi wini gi wisrefi tu. Meki wi go ondrosuku dri kontren pe disi ben kan de so gi yu.

Leki wan Sma Di Ben Sa Kan Tron wan Trowpatna

Teki fu eksempre, na afersi fu a trow. A de wan presenti fu Yehovah Gado, a sma „fu suma  ibri famiri na hemel nanga na grontapu kisi en nen” (Efeisesma 3:15). Kande yu e winsi fu trow wan dei. Efu a de so, dan o furu yu e rikomanderi yusrefi leki wan sma di ben sa kan tron wan trowpatna? Iya, sortu nen yu abi leki wan Kresten man noso wan Kresten uma di no trow?

Na ini son kondre disi prenspari srefisrefi gi den famiri. Na ini Gana, fu eksempre, te tu sma wani trow nanga makandra, dan a de a gwenti gi den tu sma disi di wani trow fu fruteri den papa nanga mama dati. Den fu den sei e fruteri tra memre fu a famiri. Dan a famiri fu a man e bigin ondrosuku san na a nen di na uma abi na ini a birti. Te a papa nanga mama sabi trutru taki na uma bun gi den manpikin, dan den sa taigi a famiri fu na uma taki a manpikin fu den wani trow nanga na umapikin. Dan a famiri fu na uma e go ondrosuku a nen di a man abi, bifo den e agri nanga a trow. Fu dati ede wan odo fu Gana e taki: „Aksi den wan di musu sabi a sma di yu wani trow, bifo yu o trow.”

Fa a de nanga den Westsei kondre pe a de moro furu so taki ibri sma mag teki en eigi trowpatna? Srefi drape wan lepi Kresten man noso uma ben o du bun fu suku eerlijk rai na den wan di sabi wan sma bun di ben sa kan tron en trowpatna , soleki na den papa nanga mama noso na lepi mati. Soleki fa a buku A sroto gi wan kolokoe osofamiri e taki, dan wan yongu uma ben sa kan aksi: „’Sortu nen a man disi abi? Suma na den mati fu en? ¿A sabi fa fu dwengi ensrefi? Fa a e handri nanga owrusma? Sortu famiri a abi? Fa a de nanga den famiri fu en? Fa a e denki fu moni? ¿A e gebroiki sopi na wan fasi di no bun? ¿A e atibron esi, noso e du ogri nanga tranga srefi? Sortu frantwortu a abi na ini a gemeente, èn fa a e du den? ¿Mi ben kan abi dipi lespeki gi en?’—Lefitikus 19:32; Odo 22:29; 31:23; Efeisesma 5:3-5, 33; 1 Timoteus 5:8; 6:10; Titus 2:6, 7.” *

Wan man ben sa wani ondrosuku sani tu fu wan Kresten uma di a abi na prakseri fu trow nanga en. Soleki fa Bijbel e sori, dan Boas ben abi so wan belangstelling gi Rut, na uma di a ben trow baka ten. Di Rut ben aksi: „Fa a du kon taki yu feni mi bun, so taki sma e poti prakseri na mi tapu, ala di mi na wan trakondre-sma?”, Boas ben taki: „Den ben gi mi a heri verslag fu ala sani di yu du” (Rut 2:10-12). Iya, boiti taki Boas srefi ben si taki Rut ben de wan uma di ben de loyaal, taki a ben de fayafaya, èn taki a ben wroko tranga, dan a ben kisi bun komentaar tu fu tra sma.

Na a srefi fasi, a fasi fa yu e tyari yusrefi sa du furu efu tra sma sa si yu leki wan bun trowpatna. Fu taki en soifri, fa yu e rikomanderi yusrefi na tra sma ini a tori disi?

Leki wan Wrokoman

A wrokopresi na wan tra kontren pe a kan abi wini gi yu te yu e tyari yusrefi na wan bun fasi. A kan hebi te sma e feti fu feni a srefi wroko. Wrokoman di sma sabi leki sma di no e arki tiri, di gwenti kon lati, èn di no eerlijk, nofotron e lasi den wroko. Bedrijf kan seni bun wrokoman gowe tu soso fu meki moro mendri kostu. Te den sma di no abi wroko e go suku wan nyun wroko, dan  den e si kande taki den bedrijf e meki kontakti nanga den fosi wrokobasi fu den fu sabi fa den ben gwenti wroko, fa den e denki, èn sortu ondrofeni den abi. Furu Kresten rikomanderi densrefi bun na den wrokobasi fu di den e tyari densrefi nanga lespeki, den e weri bescheiden krosi, den abi switifasi gi tra sma, èn den abi kefalek bun Kresten eigifasi.

Eerlijkfasi na wan fu den eigifasi disi — wan eigifasi di furu wrokobasi e si leki wan prenspari sani srefisrefi. Leki na apostel Paulus, wi wani „de eerlijk na ini ala sani” (Hebrewsma 13:18). Na ini wan mijnbedrijf na ini Gana, den ben taki dati sma ben e fufuru. A wrokobasi na a wrokopresi na wan Kotoigi, èn a ben tan hori en wroko ala di den ben seni trawan gowe. Fu san ede? Na ini den furu yari di pasa den driktoro ben si taki a eerlijk. A tranga wroko fu en èn a lespeki di a abi gi tiri, den ben sabi heri bun tu. ¡Iya, na opregti fasi fa a ben tyari ensrefi ben meki a ben man tan hori en wroko!

San na wan tu tra sani di wan Kresten kan du fu rikomanderi ensrefi fu feni wan wroko? Leri fu sabi du ibri wroko bun di sma e gi yu (Odo 22:29). Wroko fayafaya èn na wan opregti fasi (Odo 10:4; 13:4). Sori lespeki gi a sma di gi yu a wroko èn gi a wrokobasi (Efeisesma 6:5). A hori di yu e hori yusrefi na ten, eerlijkfasi, èn a du di yu e du yu wroko finifini èn a wroko di yu e wroko tranga, na eigifasi di den sma di e gi wroko e warderi, èn den eigifasi dati kan yepi yu fu feni wroko, srefi te wroko no de fu feni makriki.

Grani fu Dini na ini Gemeente

Now moro leki oiti bifo, lepi man de fanowdu fu teki fesi na ini a Kresten gemeente. Fu san ede? Yesaya ben taki na fesi: „Meki a presi fu yu tenti kon moro bradi. Èn meki den bradi den tentiduku fu yu bigi tabernakel” (Yesaya 54:2). Leki a kontru fu a profeititori disi, a gemeente fu Yehovah na heri grontapu e tan gro nomonomo.

¿Fu dati ede, efu yu na wan Kresten man, dan fa yu kan rikomanderi yusrefi leki wan sma di de bekwaam fu dini ini wan posisi na ini a gemeente? Luku na eksempre fu a yonkuman Timoteus. Lukas e fruteri taki „den brada na Listra èn na Ikonium ben taki bun” fu Timoteus. Iya, nanga a bun fasi fa a ben tyari ensrefi, meki a yonkuman disi ben rikomanderi ensrefi na tra sma na ini tu difrenti foto. Fu dati ede Paulus ben aksi Timoteus fu wroko makandra nanga en na ini a diniwroko pe den ben e reis.—Tori fu den Apostel 16:1-4.

Fa wan man na ini a ten disi kan „suku fu kisi wan wroko leki opziener” na wan yoisti fasi di Gado feni bun? A no de fu taki dati no fu di a e meki propaganda fu kisi a posisi, ma fu di a e leri abi den eigifasi na yeye fasi di de fanowdu gi den sortu frantwortu disi (1 Timoteus 3:1-10, 12, 13; Titus 1:5-9). A kan sori tu taki a „wani wan tumusi bun wroko” fu di a abi wan bun prati na ini a wroko fu preiki èn fu meki disipel (Mateus 24:14; 28:19, 20). Den wan di e rikomanderi densrefi leki Kresten man di sabi tyari den frantwortu, abi trutru belangstelling gi a bun fu den brada fu den na yeye fasi. Den e du san na apostel Paulus ben gi leki rai: „Prati sani nanga den santawan akruderi san den abi fanowdu. Waka a pasi fu lobi fu ontfanga sma bun” (Romesma 12:13). Te wan Kresten man e du den sani disi dan a kan ’rikomanderi ensrefi trutru leki wan bedinari fu Gado’.

Ala Ten

Te wi e rikomanderi wisrefi na tra sma dan dati no wani taki dati wi e tyari wi srefi na wan fasi di wi no gwenti, noso taki wi tron „sma di e suku fu plisi libisma” (Efeisesma 6:6). Te fu kaba, a wani taki dati wi e rikomanderi wisrefi na wi Kriaman, Yehovah Gado, te wi e waka na wan opregtifasi baka den wet nanga den gronprakseri fu en. Efu yu e meki yu yeyefasi e gro èn yu e tranga yu matifasi nanga Yehovah Gado, dan tra sma sa si taki yu e go na fesi ini a fasi fa yu e handri nanga den memre fu yu osofamiri, yu wrokokompe, èn nanga yu kompe Kresten. Den sa si tu taki yu e tanapu steifi na tapu yu futu èn taki yu e si sani na wan balansi fasi, taki yu sabi krutu sani bun, taki yu man tyari frantwortu, èn taki yu abi sakafasi. ¡Disi sa meki taki den sa lobi èn lespeki yu èn, moro prenspari, taki Yehovah Gado sa feni yu bun bika yu e rikomanderi yusrefi na tra sma!

[Futuwortu]

[Prenki na tapu bladzijde 19]

Furu papa nanga mama e handri koni te den e ondrosuku a nen di wan sma abi nanga suma a manpikin noso umapikin fu den wani trow

[Prenki na tapu bladzijde 20]

Wan brada e rikomanderi ensrefi fu kisi grani fu dini te a e hori tra sma na prakseri