¿Yu E Si Sma Di E Du Ogri Nanga Tranga, Neleki Fa Gado E Si Den?

Wan heri pisi ten, sma lespeki tranga man èn den gi den grani, man di tranga èn di abi deki-ati. Heracles noso Hercules, soleki fa den romesma ben sabi en, ben de so wan deki-ati man na ini den anansitori fu owruten Grikikondre.

 HERCULES ben de wan deki-ati man di ben tranga kefalek èn di ben pôpi trutru, a moro tranga fetiman. Soleki fa fositen tori e fruteri, dan a ben de afu gado afu libisma, a pikin fu a Griki gado Zeus èn fu Alcmene, wan mama di ben de wan libisma. A ben bigin du den kefalek sani fu en ala di a ben de wan nyofi beibi ete. Di wan dyarusu umagado ben seni tu bigi sneki kon fu kiri Hercules, dan Hercules ben tyokro den kiri. Di a ben kon moro owru dan a ben feti bigi feti, a ben kiri kefalek bigi èn takru meti, èn a ben feti nanga dede fu kibri a libi fu wan mati. A ben wai foto puru tu, a ben dwengi umasma fu abi seks nanga en, na tapu wan toren a ben trowe wan boi go na gron, èn a ben kiri en wefi èn den pikin fu en.

Ala di Hercules na ini den anansitori no de wan trutru sma, toku granwe kaba den ben taki fu en na ini den tori fu den owruten kondre di den Grikisma ben sabi. Den Romesma ben anbegi en leki wan gado; bisnisman nanga sma di ben reis ben begi en fu a meki sani waka bun gi den èn fu a kibri den meki ogri no pasa nanga den. Dusundusun yari langa, sma ben lobi den tori di e taki fu den kefalek sani di a du.

A Rutu fu a Fositen Tori

¿Wan sani pasa trutru meki sma e fruteri den tori fu Hercules èn fu tra deki-ati man na ini anansitori? Yu ben sa kan taki so. Bijbel e fruteri fu wan ten, a bigin fu a historia fu libisma, di den „gado” nanga den „afu gado afu libisma” ben de trutru na grontapu.

Moses ben taki fu a ten dati di a ben skrifi: „Now a ben kon de so taki di libisma ben bigin kon furu na tapu a doti fu grontapu èn den ben kisi umapikin, dan den manpikin fu a tru Gado ben bigin luku den umapikin fu libisma, èn den ben si taki den ben moi; èn den ben go teki wefi gi densrefi, dati wani taki, alamala di den ben wani.”—Genesis 6:1, 2.

Den „manpikin fu a tru Gado” no ben de libisma; den ben de den engel manpikin fu Gado. (Teki gersi Yob 1:6; 2:1; 38:4, 7.) A Bijbel skrifiman Yudas e fruteri taki wan tu engel „no ben hori a posisi fu den di den ben abi biginbigin, ma [den] ben gowe libi den eigi reti tanpresi” (Yudas 6). Fu taki en tra fasi, den ben gowe libi a presi di den ben kisi na ini Gado organisâsi na hemel, fu di den ben wani libi nanga den moi uma na grontapu. Yudas e taki moro fara taki den opruru engel disi ben de leki den sma fu Sodom nanga Gomora, di ’ben du sutadu pasa marki èn di ben go na skin baka fu gebroiki dati na wan fasi di de teige a naturu’.—Yudas 7.

Bijbel no e fruteri wi finifini san den trangayesi engel disi ben du. Ma den owruten tori fu Grikikondre èn fu tra presi e taki fu wan lo gado nanga umagado di ben libi na mindri libisma, awansi sma ben man si den noso no ben man si den. Te den ben teki libisma skin, dan den ben moi srefisrefi. Den ben nyan, ben dringi, ben sribi èn ben abi seks nanga makandra èn nanga libisma. Ala di sma ben denki taki den ben santa èn taki den no ben man dede, toku den ben lei èn den ben bedrigi sma, den ben meki trobi èn den ben feti, den ben kori sma èn den ben dwengi trawan fu abi seks nanga den. Ala di sma e fruteri den sortu anansitori disi na wan moro moi fasi leki fa den ben de trutru èn ala di den kenki wan tu sani na den, toku den tori disi kan sori fa a situwâsi ben de trutru bifo a Frudu, soleki fa a Bijbel buku Genesis e taki fu en.

Tranga Man fu Owruten, Man Di Ben Pôpi

Den trangayesi engel di ben teki libisma skin, ben abi seks nanga umasma, èn den umasma ben kisi pikin. Den no ben de gewoon pikin. Den ben de Nefilim, afu libisma afu engel. A Bijbel tori e taki: „A ben kon na krin taki den Nefilim ben de na grontapu na a ten dati, èn so srefi baka a ten dati, di den manpikin fu a tru Gado ben tan hori a gwenti fu go didon nanga den umapikin fu libisma èn den umapikin disi ben kisi manpikin fu den; den ben de den tranga man fu owruten, den man di ben pôpi.”—Genesis 6:4.

A Hebrew wortu „nefilim” trutru wani taki „kiriman”, den wan di ben kiri trawan, noso di ben meki taki trawan ben dede, nanga na ogri di den ben du nanga tranga. So bun, wi no musu fruwondru taki Bijbel e fruteri moro fara: „Grontapu ben kon furu nanga ogri di sma e du nanga tranga” (Genesis 6:11). Den afu gado afu libisma na ini den anansitori, den wan leki Hercules nanga a deki-atiman Gilgamesj fu Babilon, gersi den Nefilim trutru.

 Luku taki den ben kari den Nefilim „tranga man” èn „man di ben pôpi”. Den Nefilim no ben wani horibaka gi a nen fu Yehovah, soleki fa a regtfardiki man Noa ben du dati èn di ben libi na ini a srefi ten dati. Den ben prakseri soso den eigi pôpi fasi, den eigi glori nanga den eigi nen. Den bigi wroko di den ben du, èn a no abi misi taki den ben du disi nanga tranga èn nanga kiri, ben meki den kon pôpi soleki fa den ben wani dati fu a godelowsu grontapu pe den ben de na ini. Den ben de den deki-ati man fu den ten di ben tranga kefalek — sma ben frede den, sma ben lespeki den, èn a ben gersi leki no wan sma ben man wini den.

Ala di den Nefilim nanga den engel papa fu den di ben lagi densrefi, ben pôpi na den sma fu den ten, toku den no ben pôpi kwetikweti na Gado. A fasi fa den ben libi ben de wan tegu sani. Dati meki Gado ben du wan sani teige den engel di ben fadon komoto na bribi. Na apostel Petrus ben skrifi: „Gado no ben meki noti tapu en fu strafu den engel di ben sondu, ma, fu di a ben trowe den go na ini Tartarus, a ben gi den abra na den peti fu deki dungru fu hori den kibri gi a krutu; èn a no ben meki noti tapu en fu strafu wan owruten grontapu, ma a ben kibri Noa, wan preikiman fu regtfardikifasi, makandra nanga seibi trawan, di a ben tyari wan frudu kon na tapu wan grontapu fu godelowsu sma.”—2 Petrus 2:4, 5.

Di a Frudu ben kon na heri grontapu, dan den opruru engel ben puru a libisma skin èn den ben drai go baka na yeye kondre na wan syen fasi. Gado ben strafu den fu di a ben tapu den fu den no teki libisma skin baka. Ala den Nefilim, den afu gado afu libisma pikin fu den trangayesi engel, dede. Soso Noa nanga a pikin osofamiri fu en no dede na ini a Frudu.

Den Pôpi Man na ini a Ten Disi

Na ini a ten disi, gado nanga afu gado no e waka na grontapu moro. Toku bun furu ogri de di e du nanga tranga. Den pôpi man fu a ten disi e kisi glori na ini buku, na ini kino, na tapu telefisi èn na ini poku. Noiti den ben o drai a tra seifesi fu den fu sma klapu dati, èn noiti den ben o lobi den feanti fu den, noso suku vrede, gi trawan pardon, noso drai den baka gi ogri di e du nanga tranga (Mateus 5:39, 44; Romesma 12:17; Efeisesma 4:32; 1 Petrus 3:11). Na presi fu dati, sma e lespeki a krakti fu den tranga man fu a ten disi fu di den man feti, den man teki refensi gi densrefi, èn den man gebroiki wan tumusi tranga fasi fu du ogri so taki den kan kakafutu gi ogri di e du nanga tranga. *

A fasi fa Gado e si den sortu sma dati no kenki sensi a ten fu Noa. Yehovah no e lespeki den sma di lobi du ogri nanga tranga, èn a no e prisiri tu nanga den kefalek sani di den e du. A psalm skrifiman ben singi: „Yehovah srefi e ondrosuku a regtfardikisma èn so srefi a godelowsusma, èn en sili kwetikweti no wani si wan sma na ai di lobi ogridu di e du nanga tranga.”—Psalm 11:5.

Wan Tra Sortu Krakti

Wan sma di ben de heri tra fasi leki den tranga man di e du ogri nanga tranga, na Yesus Krestes, a moro barinen sma di oiti ben libi, wan man fu vrede. Di a ben de na grontapu, dan a no ben du „no wan ogri di e du nanga tranga” (Yesaya 53:9). Di den feanti fu en ben kon na ini a dyari fu Getsemane fu sroto en, dan den bakaman fu en ben abi wan tu feti-owru na den (Lukas 22:38, 47-51). Den ben kan seti wan fetigrupu fu pruberi tapu den feanti fu no tyari Yesus go na den Dyu.—Yohanes 18:36.

Fu taki en leti, na apostel Petrus ben hari en feti-owru fu feti gi Yesus, ma Yesus ben taigi en: „Poti a feti-owru fu yu na en presi baka, bika ala  den wan di e teki a feti-owru, sa lasi den libi nanga a feti-owru” (Mateus 26:51, 52). Iya, ogri di sma e du nanga tranga e tyari ogri kon di e du nanga tranga, soleki fa a historia fu libisma sori someni leisi kaba. Boiti taki Yesus ben abi na okasi fu gebroiki fetisani fu feti gi ensrefi, a ben abi wan tra fasi tu fu feti gi ensrefi. Baka dati a ben taigi Petrus: „¿Noso yu denki taki mi no kan aksi mi Tata fu gi mi na a momenti disi moro leki twarfu legioen engel?”—Mateus 26:53.

Na presi taki Yesus ben gebroiki ogri di e du nanga tranga noso taki a ben aksi den engel fu kibri en, a ben meki den sma di kiri en, grabu en hori. Fu san ede? Wan sani ben de, taki a ben sabi taki a ten no ben doro ete taki en Tata na hemel ben o tyari wan kaba kon na ogri di e du na grontapu. Na presi taki Yesus ben du sani na en fasi, a ben frutrow na tapu Yehovah.

Disi no ben de fu di a ben swaki, ma fu di a ben tranga na inisei. Yesus ben sori taki a ben bribi tranga taki Yehovah ben o meki sani kon bun baka na En eigi ten èn na En eigi fasi. Fu di Yesus ben gi yesi na Gado, meki Gado ben meki en kon hei so taki a ben kisi barinen moro leki ala tra sma, boiti Yehovah srefi. Na apostel Paulus ben skrifi fu Yesus: „Moro leki dati, di a ben de ini a fasi fu wan libisma, a ben saka ensrefi èn ben gi yesi te na dede, iya, dede na wan pina-udu. Fu dati ede tu, Gado ben meki a kon moro hei na ini wan moro hei posisi èn na wan bun-ati fasi a ben gi en a nen di hei moro ibri tra nen, so taki na ini a nen fu Yesus ibri kindi ben sa boigi fu den wan di de na hemel èn den wan di de na grontapu èn den wan di de na ondro gron, èn ibri tongo ben sa erken na publiki taki Yesus Krestes na Masra gi a glori fu Gado, a Tata.”—Filipisma 2:8-11.

Gado Pramisi fu Tyari wan Kaba Kon na Ogri Di E Du Nanga Tranga

Tru Kresten e pruberi fu libi akruderi na eksempre fu Yesus èn akruderi den sani di a ben leri. Den no e lespeki den grontapu man di pôpi èn di e du ogri nanga tranga èn den no e du leki den tu. Den sabi taki na Gado en reti ten, den sma disi sa puru na pasi fu têgo, neleki san ben pasa trutru nanga den godelowsu sma na ini a ten fu Noa.

Gado na a Kriaman fu grontapu èn fu libisma. A de so srefi a Sma di abi a reti fu de Soeverein (Openbaring 4:11). Efu wan libisma krutuman abi a reti fu teki krutu bosroiti, dan Gado abi moro reti fu du disi srefi. A lespeki di a e lespeki en eigi regtfardiki gronprakseri, èn a lobi di a lobi den sma di lobi en, sa pusu en fu tyari wan kaba kon na ala godelowsu fasi èn na den sma di e du disi.—Mateus 13:41, 42; Lukas 17:26-30.

Disi sa tyari têgo vrede kon na grontapu, vrede di gron steifi na tapu retidu nanga regtfardikifasi. Wan barinen profeititori di e taki fu Yesus Krestes, ben taki disi na fesi: „Bika wan pikin kon gebore gi wi, wan manpikin den ben gi wi; èn a kownu tirimakti sa kon na tapu en skowru. Èn en nen sa de: Tumusi Bun Raiman, Tranga Gado, Têgo Tata, Granman fu Vrede. Na a kownu tirimakti di de pasa marki èn na vrede, wan kaba no sa kon, na tapu a kownusturu fu David èn na tapu en kownukondre so taki a kan seti en bun èn fu horibaka gi en nanga yepi fu retidu èn nanga yepi fu regtfardikifasi, fu bigin nanga now èn te ten di no skotu. Iya, a faya fu Yehovah fu den legre sa du disi.”—Yesaya 9:6, 7.

Fu dati ede Kresten abi bun reide fu poti prakseri na a rai di Gado ben meki sma skrifi nanga yepi fu en santa yeye langa ten pasa kaba: „No kisi bigi-ai gi a man fu tranga ogridu, èn no teki no wan fu den pasi fu en. A sma di abi triki, na wan tegu sani gi Yehovah, ma A e hori bun kompe nanga den opregti wan.”—Odo 3:31, 32.

[Futuwortu]

[Prenspari pisi na tapu bladzijde 29]

SMA E LUKU DEN MAKTIMAN FU A TEN DISI NANGA FRUWONDRU BIKA DEN TRANGA SO, ÈN BIKA DEN MAN KAKAFUTU GI OGRIDU FU DI DENSREFI E GEBROIKI MORO BIGI OGRI

[Sma di abi a reti fu a prenki na tapu bladzijde 26]

Alinari/​Art Resource, NY