Hori a Leri fu Gado Hei na wan Krakti Fasi
Hori a Leri fu Gado Hei na wan Krakti Fasi
Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.”—ODO 3:5, 6.
1. Fa moro leki oiti na fesi wi kan kisi a sabi fu libisma?
NOWNOWDE sma e prati pikinmoro 9000 sortu kranti ala dei na heri grontapu. Ibri yari sma e tyari so wan 200.000 nyun buku kon na doro na ini Amerkankondre wawan. Soleki fa sma teri, dan na ini maart 1998 so wan 275 milyun bladzijde ben de na tapu na Internet na heri grontapu. A nomru disi e gro nanga 20 milyun bladzijde ibri mun. Moro leki oiti na fesi, sma kan kisi bodoi fu pikinmoro ibri tori. Ala di a situwâsi disi abi wan bun sei, toku a bogobogo bodoi disi di sma kan kisi tyari problema kon.
2. Sortu problema kan kon te sma man kisi bodoi pasa marki?
2 Son sma wani nomonomo fu sabi ala sani, fu di ala ten den wani satisferi a tranga angri di den abi fu sabi ala nyun sani, ala di den no e poti prakseri na den moro prenspari sani. Tra sma e teki pisipisi sabi nomo fu dangra sabidensi tori èn dan den e si densrefi leki sabiman. Nanga a pikinso sabi di den abi nomo, den e teki prenspari bosroiti di kan du densrefi noso tra sma ogri. Èn a kefar di de ala ten na taki sma kan arki noso leisi falsi noso fowtu bodoi. Nofotron a de so, taki no wan fasi no de di sma kan frutrow fu kon sabi seiker efu a bodoi di sma e kisi bogobogo, na sani di yoisti èn di reidelek.
3. Sortu warskow de fu feni na ini Bijbel, di abi fu du nanga a feti di sma e feti fu kisi a koni fu libisma?
3 Langaten kaba a de so taki libisma abi na eigifasi taki den wani sabi sani. Den kefar di de taki sma e lasi tumusi furu ten fu kisi bodoi di de fu soso noso di kan du den ogri, ben de wan sani di sma ben erken fositen na ini den dei fu Kownu Salomo. A ben taki: „Arki wan warskow: Noiti sma no e kaba fu meki furu buku, èn te wan sma e gi ensrefi tumusi furu na den, dan dati e weri a skin” (Preikiman 12:12). Furu yarihondro baka dati, na apostel Paulus ben skrifi Timoteus: „Kibri den sani di den gi yu, èn drai yu baka gi soso takitaki di e pori santa sani èn gi den sani di na wan lei fasi den kari „sabi”, ma di no e kruderi nanga makandra. Fu di son sma ben prodo nanga sortu sabi dati, meki den drifi komoto na bribi” (1 Timoteus 6:20, 21). Iya, Kresten na ini a ten disi musu luku bun taki den no e teki idea di kan du den ogri, sondro taki a de fanowdu.
4. San na wan fasi fa wi kan sori taki wi e frutrow tapu Yehovah èn tapu den leri fu en?
4 A pipel fu Yehovah ben o du bun tu fu gi yesi na den wortu fu Odo 3:5, 6: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.” Fu frutrow tapu Yehovah wani taki dati wi no musu teki no wan denki abra di no e kruderi nanga a Wortu fu Gado, awansi a de sani di wisrefi prakseri noso sani di wi teki abra fu tra libisma. Fu kibri a yeyefasi fu wi, dan a de tumusi prenspari taki wi musu oefen a koni di wi abi fu si sani krin, so taki wi kan kon sabi san na den takru denki èn kan tan farawe fu den (Hebrewsma 5:14). Meki wi go taki fu wan tu kontren pe wi kan feni den sortu bodoi disi.
Wan Grontapu Di Satan Abi na ini En Makti
5. San na wan kontren pe takru denki e komoto, èn suma de frantwortu gi den takru denki dati?
5 A grontapu disi na wan kontren pe sma kan kisi kefalek furu ogri denki (1 Korentesma 3:19). Yesus Krestes ben begi Gado gi den disipel fu en: „Mi e begi yu, fu no teki den puru na grontapu, ma fu luku den fu a godelowsuwan ede” (Yohanes 17:15). Na aksi di Yesus ben aksi fu kibri den disipel fu en gi „a godelowsuwan”, e sori taki a ben erken a makti di Satan abi na grontapu. A no fu di wi na Kresten meki dati sa kibri wi teige den takru krakti di a grontapu disi kan abi na wi tapu. Yohanes ben skrifi: „Wi sabi taki wi e komoto na Gado, ma a heri grontapu e didon na ini a makti fu a godelowsuwan” (1 Yohanes 5:19). Spesrutu na ini a lasti pisi disi fu den lasti dei, wi kan fruwakti taki Satan nanga den ogri yeye fu en sa furu a grontapu disi nanga takru bodoi.
6. Fa ala den sani di sma e du fu meki prisiri e meki taki sma no e firi taki dati no bun na moreel sei?
6 Wi kan fruwakti tu taki wan tu fu den takru bodoi disi kan gersi sani di no sa du wi ogri (2 Korentesma 11:14). Fu eksempre, luku ala den sani di sma e du fu meki prisiri, soleki den show tapu TV, den kino, poku, nanga sani di sori na ini buku. Furu sma e agri taki na ini moro nanga moro situwâsi, wan tu fasi fu prisiriten e gi sma deki-ati fu du lagi sani, soleki hurudu, ogri di e du nanga tranga, nanga a gebroiki di sma e gebroiki drug. A fosi leisi te sma e si prisiri di sma e meki èn di lagi srefisrefi na moreel sei, dan dati kan skreki den. Ma te den e si en ibritron baka, dan dati kan meki taki den e tron sma di no e firi moro taki dati no bun. Noiti wi no musu si prisiriten di e horibaka gi takru denki, leki bun sani noso leki sani di no kan du wi ogri.—Psalm 119:37.
7. Sortu koni fu libisma kan broko a bribi di wi e bribi na ini Bijbel?
7 Luku wan tra kontren pe bodoi di kan du wi ogri de fu kisi — den furu denki di son sabidensiman nanga sabiman e tyari kon na doro, èn di e fruklari taki Bijbel no e taki tru. (Teki gersi Yakobus 3:15.) Den sortu bodoi disi de furutron na ini den moro prenspari tijdschrift nanga pôpi buku, èn a kan puru a frutrow di sma abi na ini Bijbel. Son sma e firi densrefi bigi te den e swaki a makti fu Gado Wortu nanga yepi fu kefalek furu idea di e meki sma e tweifri. Wan srefi sortu kefar ben de na ini den dei fu den apostel, soleki fa wi kan si dati na den wortu fu na apostel Paulus: „Luku bun: kande wan sma de, di sa tyari unu gowe leki wan sani di a kisi nanga yepi fu filosofia nanga bedrigifasi di de wan soso sani, akruderi den fondamenti sani fu grontapu èn no akruderi Krestes.”—Kolosesma 2:8.
Feanti fu a Waarheid
8, 9. Fa a fadon di sma e fadon komoto na bribi de fu si na ini a ten disi?
8 Den sma di fadon komoto na bribi, kan de ete wan kefar gi a yeyefasi fu wi. Na apostel Paulus ben taki na fesi taki sma di fadon komoto na bribi ben o opo na mindri sma di e fruklari taki den na Kresten (Tori fu den Apostel 20:29, 30; 2 Tesalonikasma 2:3). Leki wan kontru fu den wortu fu en, baka a dede fu den apostel, dan a bigi fadon di sma ben fadon komoto na bribi ben meki taki Krestenhèit ben kon de. Na ini a ten fu wi, furu sma no e fadon komoto na bribi moro na mindri a pipel fu Gado. Toku wan tu sma ben gowe libi a grupu fu wi, èn wan tu fu den abi a fasti bosroiti fu pori a nen fu den Kotoigi fu Yehovah nanga a lei di den e lei gi den èn nanga den falsi tori di den e panya. Wan tu fu den e wroko makandra nanga tra grupu fu gens a soifri anbegi na wan orga fasi. Fu di den e du dati, meki den e teki a sei fu a fosiwan di ben fadon komoto na bribi, Satan.
9 Wan tu sma di fadon komoto na bribi e gebroiki moro nanga moro fasi fu komunikâsi, soleki radio nanga telefisi, so srefi na Internet, fu panya falsi tori fu den Kotoigi fu Yehovah. Fu dati ede, te opregti sma e ondrosuku a bribi fu wi, dan den kan miti propaganda fu sma di fadon komoto na bribi. Srefi wan tu Kotoigi arki noso leisi den sortu takru tori disi, sondro taki den ben sabi dati srefi. Na tapu fu dati, den sma di fadon komoto na bribi e teki prati son leisi na programa tapu telefisi noso tapu radio. San na a koni sani fu du te wi e prakseri a sani disi?
10. San na a koni sani di wi musu du nanga a propaganda fu sma di fadon komoto na bribi?
10 Na apostel Yohanes ben taigi Kresten fu no teki sma di fadon komoto na bribi na ini den oso fu den. A ben skrifi: „Efu wan sma e kon na unu èn no e tyari a leri disi, dan noiti teki en na ini un oso noso no taigi en odi. Bika a sma di e gi en odi, abi wan prati tu na ini den godelowsu wroko fu en” (2 Yohanes 10, 11). Te wi no abi no wan kontakti nanga den gensman disi, dan dati sa kibri wi gi den takru denki fu den. Te wi e arki noso leisi den leri fu den sma di fadon komoto na bribi nanga yepi fu den difrenti disiten fasi fu komunikâsi, dan dati ogri a srefi leki te wi ben teki a sma di fadon na bribi, na ini wi oso. ¡Noiti wi musu meki na angri di wi e angri fu sabi sani, kisi wi fu du so wan sani di kan tyari rampu kon!—Odo 22:3
Na ini a Gemeente
11, 12. Fu pe idea ben komoto di ben sa kan du sma ogri, na ini a fosi yarihondro gemeente? (b) Fa wan tu Kresten no ben hori den leri fu Gado hei na wan krakti fasi?
11 Luku ete wan tra kontren pe wi kan kisi fu du nanga idea di kan du wi ogri. Ala di wan loyaal Kresten no abi a prakseri fu leri sma falsi sani, toku a kan kisi a gwenti fu taki sani sondro fu denki (Odo 12:18). Fu di wi onvolmaakti, meki wi alamala e sondu sontron nanga wi tongo (Odo 10:19; Yakobus 3:8). Soleki fa a sori, na ini den dei fu na apostel Paulus, dan wan tu sma di no ben man dwengi den tongo èn di ben kesekese abra wortu, ben de na ini a gemeente (1 Timoteus 2:8). Tra sma ben de tu di ben prakseri tumusi furu fu den eigi denki èn den ben go so fara srefi taki den ben tyalensi a makti fu Paulus (2 Korentesma 10:10-12). So wan yeye ben meki taki trobi ben de sondro taki a ben de fanowdu.
12 Son leisi den trobi disi ben kon tron „bigi haritaki fu pikinpikin sani”, di ben pori a vrede fu a gemeente (1 Timoteus 6:5; Galasiasma 5:15). Paulus ben skrifi fu den sma disi di ben meki kesekese de, taki: „Efu wan sma e kon nanga tra leri èn disi no e agri nanga gosontu wortu, di fu wi Masra Yesus Krestes, noso nanga a leri di de akruderi a gi di wan sma e gi ensrefi na ini a dini fu Gado, dan a e meki ensrefi bigi nanga heimemre èn a no e frustan noti, ma a siki na yeye fasi na ini sani di abi fu du nanga aksi di e tyari trobi kon èn a hari di sma e haritaki nanga wortu. Fu den sortu sani disi e komoto: dyarusu, strei, skempi takitaki, ogri prakseri.”—1 Timoteus 6:3, 4.
13. Fa moro furu fu den Kresten ben tyari densrefi na ini a fosi yarihondro?
13 Koloku taki a moro bigi pisi fu den Kresten na ini a ten fu den apostel ben de getrow èn ben tan poti ala a prakseri fu den na a meki di den ben e meki a bun nyunsu fu Gado Kownukondre bekènti. Den ben du furu fu sorgu gi „pikin di no abi papa nanga mama èn den weduwe na ini a banawtu fu den” èn den no ben „meki grontapu flaka” den, fu di den no ben lasi ten e haritaki abra wortu fu soso (Yakobus 1:27). Den ben wai pasi gi „takru kompe”, srefi na ini a Kresten gemeente, fu man kibri a yeyefasi fu den.—1 Korentesma 15:33; 2 Timoteus 2:20, 21.
14. Efu wi no e luku bun, dan fa a kenki di wi e kenki prakseri na wan normaal fasi kan kon tron haritaki di kan du ogri trutru?
14 Na so a de tu taki den situwâsi di kari na ini paragraaf 11, a no sani di pasa furu na ini den gemeente fu Yehovah Kotoigi na ini a ten disi. Ma toku wi ben o du bun fu erken taki den sortu soso haritaki disi kan kon tu na ini a gemeente. A no de fu taki dati a de wan gewoon sani fu taki nanga makandra fu Bijbel tori noso fu aksi wisrefi fu sani di o pasa na ini a nyun grontapu di Gado pramisi èn di no tyari kon na krin ete. Èn a no fowtu fu taki nanga makandra fu den persoonlijk idea di wi abi fu sani soleki krosi, a fasi fa wi musu sorgu wi skin noso a fasi fa wi e meki prisiri. Ma efu wi e denki taki wi eigi idea wawan tru èn wi e atibron te tra sma no e agri nanga wi, dan a gemeente kan prati fu pikinpikin sani ede. Iya, wan takimakandra di e bigin leki wan sani di no de prenspari èn di no e du ogri, kan tron wan sani di kan du ogri trutru.
Kibri den Sani Di Wi Kisi
15. O furu ogri den „leri fu den ogri yeye” kan du wi na yeye fasi, èn sortu rai den Buku fu Bijbel e gi wi?
15 Na apostel Paulus e gi a warskow: „Den wortu di taki na ondro a krakti fu santa yeye e taki krinkrin dati na ini tra pisi ten son sma sa fadon komoto na bribi, fu di den e poti prakseri na wortu nanga leri di e kori sma èn di taki na ondro krakti fu ogri yeye” (1 Timoteus 4:1). Iya, takru denki de wan kefar trutru. Wi kan frustan fu dati ede taki Paulus ben gi en lobi mati Timoteus tranga: „O Timoteus, kibri den sani di den gi yu, èn drai yu baka gi soso takitaki di e pori santa sani èn gi den sani di na wan lei fasi den kari „sabi”, ma di no e kruderi nanga makandra. Fu di son sma ben prodo nanga a sortu sabi dati, meki den drifi komoto na a bribi.”—1 Timoteus 6:20, 21.
16, 17. San Gado poti na ondro a frantwortu fu wi, èn fa wi musu kibri en?
16 Fa wi na ini a ten disi kan kisi wini fu a warskow disi di gi nanga lobi? Timoteus ben kisi wan sani di ben poti na ondro en frantwortu — wan warti sani di a ben musu sorgu gi èn di a ben musu kibri. San ben de a sani dati? Paulus e fruklari: „Tan hori a model fu gosontu wortu di yu ben yere fu mi, nanga a bribi nanga lobi di abi fu du nanga Krestes Yesus. Kibri a tumusi bun panti disi di den frutrow na unu, nanga yepi fu a santa yeye di e libi na ini wi” (2 Timoteus 1:13, 14). Iya, den sani di ben poti na ondro a frantwortu fu Timoteus ben de so srefi den „gosontu wortu”, „a leri di de akruderi a gi di wan sma e gi ensrefi na ini a dini fu Gado” (1 Timoteus 6:3). Soleki fa den wortu disi e sori, dan den Kresten na ini a ten disi abi a fasti bosroiti fu kibri a bribi fu den èn a heri waarheid di ben poti na ondro a frantwortu fu den.
17 Fu kibri a sani dati di poti na ondro wi frantwortu wani taki tu dati wi musu abi bun gwenti fu studeri Bijbel èn taki wi musu horidoro na ini begi, ala di wi e du „bun gi ala sma, ma spesrutu gi den wan di de na ini a srefi bribi leki wi” (Galasiasma 6:10; Romesma 12:11-17). Paulus e frumane moro fara: „Feti baka regtfardikifasi, a gi di yu e gi yusrefi ini a dini fu Gado, feti baka bribi, lobi, horidoro, safri-atifasi. Feti a tumusi bun feti fu a bribi, grabu a têgo libi bun steifi, di unu ben kisi kari fu en èn di unu ben gi wan tumusi moi publiki fruklari fu en na fesi fu furu kotoigi” (1 Timoteus 6:11, 12). A gebroiki di Paulus e gebroiki den wortu soleki „feti a tumusi bun feti” èn ’grabu bun steifi’, e sori krin taki fayafaya èn nanga wan fasti bosroiti wi musu kakafutu gi den krakti di kan du wi ogri na yeye fasi.
A De Fanowdu fu Abi a Koni fu Man Si Sani Krin
18. Fa wi kan sori taki wi abi balansifasi leki Kresten te a abi fu du nanga a fasi fa wi e si den bodoi fu grontapu?
18 A no de fu taki dati te wi wani feti a tumusi bun feti gi a bribi, dan wi musu abi a koni fu man si sani krin (Odo 2:11; Filipisma 1:9). Fu eksempre, a no ben sa de wan reidelek sani fu no frutrow ala bodoi di e kon fu grontapu (Filipisma 4:5; Yakobus 3:17). A no ala denki fu libisma de kontrari a Wortu fu Gado. Yesus ben sori taki a de fanowdu taki sikisma ben musu suku yepi na wan bun datra — sani di de wan grontapu wroko (Lukas 5:31). Ala di a datra-yepi na ini den dei fu Yesus ben du na wan owruten fasi, toku a ben erken taki sma ben kan kisi pikinso wini fu a yepi fu wan datra. Kresten na ini a ten disi abi balansifasi te den abi fu du nanga bodoi fu a grontapu disi, ma den e kakafutu gi bodoi di kan du den ogri na yeye fasi.
19, 20. (a) Fa owruman e handri nanga koni fu man si sani krin te den e yepi den wan di e taki na wan don fasi? (b) Fa a gemeente e handri nanga den wan di e tan horibaka gi falsi leri?
19 A koni fu man si sani krin de prenspari tu gi den owruman te a de fanowdu fu yepi den wan di e taki na wan don fasi (2 Timoteus 2:7). Sontron den memre fu wan gemeente kan poti densrefi na ini situwâsi pe den e kisi trobi fu pikinpikin sani èn fu di den e haritaki fu sani di den no sabi seiker. Fu kibri a wánfasi fu a gemeente, dan den owruman musu handri esi-esi fu du wan sani nanga den sortu problema disi. Na a srefi ten den e luku bun fu no denki taki den brada nanga sisa fu den abi takru sani na prakseri èn den no e prakseri tumusi esi taki den na sma di fadon komoto na bribi.
20 Paulus ben fruteri na sortu fasi den sma ben musu gi yepi. A ben taki: „Brada, srefi efu wan sma e meki wan fowtu stap bifo a sabi dati, dan unu di abi eigifasi na yeye fasi, pruberi ini wan yeye fu safri-atifasi fu meki so wan sma kon bun baka” (Galasiasma 6:1). Yudas di ben taki spesrutu fu Kresten di ben tweifri, ben skrifi: „Tan sori sari-ati so srefi na son wan di e tweifri; frulusu den fu di unu e hari den puru fu a faya” (Yudas 22, 23). A no de fu taki dati efu furutron den owruman ben frumane wan sma, ma a e tan horibaka gi falsi leri, dan den owruman musu opo fu du wan sani fu kibri a gemeente.—1 Timoteus 1:20; Titus 3:10, 11.
Furu Wi Frustan Nanga Sani Di Musu Kisi Prèise
21, 22. Nanga sortu sani wi musu luku bun te wi e frukisi sortu bodoi wi o teki, èn nanga san wi musu furu wi frustan?
21 A Kresten gemeente e tan farawe fu wortu di kan du sma ogri èn di „e panya ensrefi leki wan takru siki” (2 Timoteus 2:16, 17; Titus 3:9). Disi de so awansi den wortu disi de a „koni” fu grontapu di e kori sma, propaganda fu sma di fadon komoto na bribi, noso awansi na a taki di sma e taki sondro fu denki na ini a gemeente. Ala di a kan abi wini fu abi wan bun angri fu leri sabi nyun sani, toku na angri di sma e angri fu sabi sani nomonomo kan opo wi gi idea di kan du wi ogri. A no de so taki wi no sabi san Satan abi na prakseri (2 Korentesma 2:11). Wi sabi taki a e du furu muiti fu puru wi prakseri so taki wi e go du en moro safri na ini wi diniwroko gi Gado.
22 Leki tumusi bun dinari, meki wi hori den leri fu Gado hei na wan krakti fasi (1 Timoteus 4:6). Meki wi gebroiki wi ten na wan koni fasi, fu di wi e luku bun sortu bodoi wi e frukisi fu teki na ini wi. Dan den propaganda di e kon fu Satan no sa seki wi na wan makriki fasi. Iya, meki wi tan prakseri „ala sani san tru, ala sani san de wan seryusu afersi, ala sani san regtfardiki, ala sani san krin, ala sani san de fu lobi, ala sani san sma e taki bun fu en, sortu bunfasi de tu èn sortu sani san musu kisi prèise”. Efu wi e furu wi frustan nanga wi ati nanga den sortu sani disi, dan a Gado fu vrede sa de nanga wi.—Filipisma 4:8, 9.
San Wi Ben Leri?
• Fa a koni fu grontapu kan de wan kefar gi a yeyefasi fu wi?
• San wi kan du fu kibri wisrefi teige den tori fu sma di fadon komoto na bribi, di kan du wi ogri?
• Sortu fasi fu taki wi musu wai pasi gi na ini a gemeente?
• Fa wi kan sori balansifasi leki Kresten te wi abi fu du nanga a bogobogo bodoi di de na ini a ten disi?
[Aksi fu a tori disi]
[Prenki na tapu bladzijde 9]
Furu pôpi tijdschrift nanga buku no e agri nanga den Kresten markitiki fu wi
[Prenki na tapu bladzijde 10]
Kresten kan kenki prakseri nanga makandra sondro fu denki taki den eigi idea wawan tru