Kownukondre Preikiman E Fruteri

Koloku Osofamiri-libi E Hari Tra Sma Kon na Gado

YEHOVAH ben blesi Yosef nanga bigi koni èn nanga a koni fu man si sani krin (Tori fu den Apostel 7:10). Leki bakapisi, dan na inzicht fu Yosef „ben bun na ini na ai fu Farao èn na ini na ai fu ala den futuboi fu en.”—Genesis 41:37.

Na so a de ini a ten disi tu, taki Yehovah e gi en pipel inzicht nanga a koni fu man si sani krin nanga yepi fu a studeri di den e studeri Bijbel (2 Timoteus 3:16, 17). A koni disi nanga a koni fu man si sani krin e meki bun froktu te sma e gebroiki rai di abi en gron tapu Bijbel. A bun fasi fa den e tyari densrefi, nofotron ’sori taki a bun na ini na ai fu den sma di e si dati’, soleki fa den ondrofenitori fu Zimbabwe di e kon now e sori.

• Wan uma ben abi birtisma di ben de Kotoigi fu Yehovah. Ala di a no ben lobi den Kotoigi, toku a ben lobi a fasi fa den ben e tyari densrefi, spesrutu na osolibi fu den. A ben si taki a man nanga a wefi ben abi wan heri bun matifasi nanga makandra, èn taki den pikin fu den ben e gi yesi. A ben si spesrutu taki a masra ben abi tranga lobi gi en wefi.

Wan sani di furu sma e bribi na ini son kulturu fu Afrika de taki efu wan man lobi en wefi, dan a musu de so taki a wefi „kroi” a man. Ne na uma ben go na a Kotoigi en wefi èn a aksi en: „Grantangi, yu ben sa kan gi mi na obia di yu gi a masra fu yu so taki mi masra ben sa kan lobi mi neleki fa di fu yu lobi yu? A Kotoigi ben piki: „O, iya, mi o tyari en gi yu tamara bakadina.”

A tra dei, a sisa ben fisiti a birtisma fu en nanga na „obia” fu en. San ben de na obia? A ben de a Bijbel, makandra nanga a publikâsi Sabi di e tjari joe go na têgo libi. Baka di den poti prakseri na den bodoi na ini a Sabi-buku di abi fu du nanga a tori „Bow wan osofamiri di e gi Gado grani”, a taigi na uma: „Disi na a ’obia’ di mi nanga mi masra e gebroiki fu ’kroi’ makandra, èn disi na fu san ede wi lobi makandra so furu.” Den ben bigin wan bijbelstudie, èn na uma ben go gawgaw na fesi te a doro so fara fu dopu na ini watra leki wan marki taki a gi ensrefi abra na Yehovah.

• Tu spesrutu pionier di ben musu wroko na ini wan pikin gemeente krosibei fu a noord-owstu grens fu Zimbabwe nanga Mosambik, no ben go na ini na oso-fu-oso wroko so wan tu wiki langa. Fu san ede? Bika sma ben e kon na den fu arki san den ben abi fu taki. Wan fu den pionier e fruteri fa disi du kon: „Wi ben e reis 15 kilometer fu go hori wan alawiki oso-bijbelstudie nanga wan sma di ben abi belangstelling. A no ben makriki gi wi fu doro na a kontren disi. Wi ben abi fu waka na ini tokotoko, èn wi ben abi fu koti abra liba di ben e lon hebi èn pe a watra ben e doro te na wi neki. Disi ben wani taki dati wi ben abi fu poti un krosi nanga susu na tapu un ede èn e balansi nanga den, koti a liba abra, èn weri un krosi baka na a tra sei.

A faya fu wi ben naki na ati fu den birtisma fu a sma di ben abi belangstelling. Na mindri den sma di ben luku san ben e pasa yu ben abi a fesiman fu a relisi organisâsi fu a presi drape. A ben taigi den bakaman fu en: ¿’Unu no ben sa wani de so faya leki den tu yonkuman dati di de Kotoigi fu Yehovah?’ A tra dei, furu fu den bakaman fu en ben kon na wi oso fu kon sabi fu san ede wi ben e horidoro. ¡Boiti dati, den tu wiki di ben e kon, wi ben kisi someni fisitiman taki wi no ben abi ten srefi fu bori nyanyan gi wisrefi!”

Wan fu den sma di ben fisiti na oso fu den pionier na ini a pisiten fu den tu wiki disi ben de a relisi fesiman. ¡Prakseri pikinso o prisiri den pionier ben de di a relisi fesiman ben teki wan oso-bijbelstudie!