Prisiri Trow-oso Di E Gi Yehovah Grani

Welsh nanga Elthea ben trow na ini Soweto, Zuid-Afrika, na ini 1985. Wanwan leisi den e luku a trow fowtow-buku fu den makandra nanga na umapikin fu den, Zinzi, èn den e prisiri baka fu a dei dati. Zinzi lobi fruteri suma na den sma na tapu a trow-oso èn spesrutu a lobi den fowtow pe en mama weri so moi.

A TROW-OSO ben bigin nanga wan trowlezing di den ben hori na ini wan birti hal na ini Soweto. Baka dati wan grupu fu yongu Kresten ben singi prèisesingi gi Gado nanga fo sten partèi. Baka dati, den sma di ben drape ben nyan wan nyanyan ala di cassette fu Kownukondre poku ben e plèi safri na a background. No wan dringi di abi sopi ben e prati, èn no wan tranga poku no ben e plèi èn no wan dansi no ben e dansi. Na presi fu dati, den sma ben prisiri fu de nanga makandra èn fu fristeri a trowpaar. Ala den sani di den ben du ben tan ala nanga ala dri yuru langa. „A ben de wan trow-oso di sa gi mi switi prakseri ala ten”, na so Raymond, wan Kresten owruman, e taki.

Na a ten fu a trow fu den, Welsh nanga Elthea ben de friwani wrokoman na a bijkantoro fu a Watch Tower Bible and Tract Society na ini Zuid-Afrika. Den ben man orga wan pikin trow-oso nomo. Son Kresten ben teki a bosroiti fu gowe libi a furuten diniwroko èn teki grontapu wroko so taki den kan pai den kostu gi wan bigi trow-oso. Ma Welsh nanga Elthea no e sari taki den ben frukisi fu abi wan pikin trow-oso, bika dati ben gi den na okasi fu go doro fu dini Gado leki furuten bedinari te Zinzi gebore.

Ma fa a de te wan paar e frukisi fu abi grontapu poku nanga dansi na a trow-oso fu den? Ma san efu den e bosroiti fu prati win noso tra dringi di abi sopi na ini? Ma fa a de te den man pai gi wan bigi trow-oso di lai furu sani? Fa den kan sorgu taki na okasi sa tron wan prisiri okasi di e fiti anbegiman fu Gado? Wi musu prakseri heri bun fu den sortu aksi disi, bika Bijbel e komanderi: „Awansi unu e nyan noso unu e dringi noso unu e du iniwan tra sani, du ala sani fu gi Gado glori.”—1 Korentesma 10:31.

No Meki Bradyari Fesa

A muilek fu prakseri wan trow-oso pe prisiri no de. Ma wan moro bigi kefar de te tumusi furu prisiri de na wan trow èn sma e meki tumusi furu bradyari. Na furu trow-oso fu sma di a no Kotoigi, sani e feni presi di no e gi Gado grani. Fu eksempre, a de wan gwenti taki sma e gebroiki sopi teleki den e kon drungu. A de wan sari sani taki disi ben pasa srefi na tapu wan tu Kresten trow-oso.

Bijbel e warskow taki „dringi di e drungu sma e meki dyugudyugu” (Odo 20:1). A Hebrew wortu di vertaal nanga „e meki dyugudyugu” wani taki fu „meki wan tranga babari”. ¡Efu sopi kan meki wan sma e meki babari, dan prakseri san a kan du nanga wan bigi grupu sma di e kon makandra èn e dringi tumusi furu! A de krin taki na wan makriki fasi den sortu okasi disi kan saka kon tron „dringi sopi te fu drungu, bradyari fesa, nanga den sortu sani disi”, di Bijbel e taki fu den leki „wroko fu a skin”. Den sortu sani disi di sma e du e meki den sma di no abi berow, no sa kisi a têgo libi na ondro a tiri fu Gado Kownukondre.—Galasiasma 5:19-21.

A Griki wortu gi „bradyari fesa” ben gebroiki fu taki fu yongusma di ben e waka na ini wan grupu na strati èn ben e meki babari ala di den  ben drungu afu èn ben singi, dansi, èn ben plèi poku. Efu sma e gebroiki tumusi furu sopi na wan trow-oso, èn efu tranga poku de èn den e dansi bruyabruya, dan wan trutru kefar de taki na okasi sa tron leki wan bradyari fesa. Na ini so wan situwâsi, den wan di swaki kan fadon makriki na ini tesi èn du tra wroko fu a skin soleki „hurudu, libi di no krin, lusu fasi fu libi, [noso kisi] faya atibron”. San wi kan du fu no meki den wroko fu a skin pori a prisiri fu wan Kresten trow-oso? Fu piki na aksi dati, meki wi go luku san Bijbel e taki fu wan spesrutu trow-oso.

Wan Trow-oso Pe Yesus Ben Go

Yesus nanga den disipel fu en ben kisi wan kari fu go na wan trow-oso na ini Kana, Galilea. Den ben teki a kari, èn Yesus ben yepi srefi fu meki prisiri ben de na a okasi dati. Di a win ben kaba, dan na wan wondru fasi a ben meki moro fu a moro bun sortu win. A ben musu de so taki a trowmasra nanga en osofamiri di ben de nanga tangi, ben gebroiki a win di ben tan abra ete wan langa pisi ten na baka a trow-oso.—Yohanes 2:3-11.

Wi kan leri furu sani fu a trow-oso pe Yesus ben go. Na a fosi presi, Yesus nanga den disipel fu en no ben broko kon na a trowfesa sondro taki den ben kisi wan kari. Bijbel e taki spesrutu taki den ben kisi wan kari (Yohanes 2:1, 2). Na a srefi fasi Yesus ben e taki ibritron baka, na ini tu agersitori di abi fu du nanga trowfesa, taki den sma ben de drape fu di den ben kisi wan kari.—Mateus 22:2-4, 8, 9; Lukas 14:8-10.

Na ini son kondre a de a gwenti taki ala sma na ini a birti ben fri fu go na wan trowfesa awansi a no ben kisi wan kari. Ma disi kan tyari problema kon na moni sei. Kande wan paar di no gudu e go meki paiman fu sorgu taki nofo nyanyan nanga dringi de gi wan bigi grupu sma. Fu dati ede, efu wan Kresten trowpaar e bosroiti fu abi wan pikin fesa nanga wan spesrutu grupu sma, dan kompekresten di no kisi wan kari musu frustan disi èn lespeki dati. Wan man di ben trow na ini Kaapstad, Zuid-Afrika, ben memre taki a ben kari 200 sma kon gi a trow-oso fu en. Ma 600 sma ben kon, èn heri esi ala nyanyan ben kaba. Na mindri den sma di no ben kisi wan kari, wan bus ben de tu di ben lai nanga sma di ben e koiri na ini Kaapstad na ini a weekend fu a trow-oso. ¡A man di ben tyari den sma di ben koiri nanga bus, ben de wan fara famiri fu a trowmisi èn a ben denki taki a ben abi a leti fu tyari a heri grupu sma disi nanga en sondro fu taki srefi nanga a trowmisi noso a trowmasra!

Boiti efu den ben taki dati wan fesa na gi ala sma, wan tru bakaman fu Yesus no sa go na wan trow-oso sondro taki den gi en wan kari èn gebroiki a nyan nanga dringi di ben poti gi den sma di ben kisi wan kari. Den wan di abi a firi fu go sondro taki den kisi wan kari, musu aksi densrefi: ’¿Efu mi ben o go na a trowfesa disi, dan dati no ben sa sori taki mi no lobi a nyun trowpaar? ¿Mi no ben o tyari problema kon èn pori a prisiri fu na okasi dati?’ Na presi fu atibron taki a no kisi wan kari, dan wan Kresten di e frustan sani kan seni wan boskopu go fu fristeri a trowpaar èn winsi den a blesi fu Yehovah. A kan prakseri srefi fu yepi a trowpaar, fu di a e seni wan kado go fu meki den prisiri moro nanga a trowdei fu den.—Preikiman 7:9; Efeisesma 4:28.

Suma Abi a Frantwortu?

Na ini son presi fu Afrika, a de a gwenti taki den moro owru famiriman e teki a frantwortu fu sreka den sani gi a trow. Den trowpaar kan de nanga tangi gi disi, fu di dati e lekti den plekti di den abi na moni sei. Den kan feni taki a e puru a frantwortu tu na den tapu gi iniwan sani di ben sa kan pasa. Ma bifo wan trowpaar teki iniwan sortu yepi fu famiri di wani du den wan bun, dan den musu de seiker taki sma sa lespeki den winsi di den abi leki a trowpaar .

Ala di Yesus ben de a Manpikin fu Gado di „ben saka komoto na hemel”, toku no wan sani e sori taki a ben teki a frantwortu èn ben tiri moro furu fu den afersi na a trow-oso na ini Kana (Yohanes 6:41). Na presi fu dati, a Bijbel tori e taigi wi taki den ben poti wan tra sma fu handri leki „a fesiman fu a fesa” (Yohanes 2:8). A man disi, fu en sei, ben musu gi frantwortu na a nyun edeman fu na osofamiri, namku, a trowmasra.—Yohanes 2:9, 10.

Den famiriman di de Kresten musu lespeki na edeman di Gado poti na ini a nyun osofamiri  (Kolosesma 3:18-20). Na en na a sma di musu teki a frantwortu gi den sani di e feni presi na a trow-oso fu en. A no de fu taki, dati wan trowmasra musu de reidelek èn, efu a kan, a musu hori den winsi fu en trow-misi, en papa nanga mama, èn fu den famiri fu en wefi na prakseri. Toku, te famiriman wani nomonomo fu sreka afersi kontrari den winsi fu a trowpaar, dan a trowpaar ben sa kan weigri a yepi fu den na wan switifasi èn densrefi ben kan pai gi den eigi pikin trow-oso. Na a fasi disi, no wan sani sa feni presi di te fu kaba sa meki a trowpaar tan nanga a prakseri fu a trow-oso di no ben prisiri. ¡Fu eksempre, na wan Kresten trow-oso na ini Afrika, wan famiri di no de na ini waarheid èn di ben handri leki a sma di e ontfanga den fisitiman, ben aksi den sma fu dringi makandra nanga en fu gi den dede afo grani!

Sontron wan trowpaar e gowe fu go na a trowfakansi fu den bifo a trowfesa kaba. Na ini so wan situwâsi, a trowmasra musu poti sma di abi frantwortu so taki den kan sorgu taki den sma e tan hori densrefi na den markitiki fu Bijbel èn taki a fesa e tapu na wan yoisti ten.

Meki Plan Finifini, èn Hori Sani na ini Balansi

Soleki fa a sori, furu bun nyanyan ben de na a trow-oso pe Yesus ben go, bika Bijbel e kari en wan trowfesa. Soleki fa wi ben si kaba, furu win ben de tu. Fu tru, yoisti poku nanga yoisti dansi ben de tu, bika disi ben de wan sani di sma gwenti ini a Dyu libimakandra. Yesus ben sori disi na ini a pôpi agersitori fu a manpikin di ben lasi. A gudu papa na ini a tori dati ben breiti so kefalek di en manpikin di ben abi berow ben drai kon baka, dati a ben taki: „Meki wi nyan èn prisiri.” Soleki fa Yesus ben taki, dan a fesa ben abi so srefi ’poku nanga dansi’.—Lukas 15:23, 25.

Ma a de prenspari fu si taki Bijbel no e taki krinkrin taki poku nanga dansi ben de na a trow-oso na ini Kana. Fu taki en leti, Bijbel no e kari dansi na no wan fu den tori di abi fu du nanga trow-oso. A ben sa gersi taki na mindri den getrow futuboi fu Gado na ini a ten fu Bijbel, dansi ben de wanwan leisi nomo èn a no ben de a moro prenspari pisi fu den trow-oso fu den. ¿Wi kan leri wan sani fu disi?

Na wan tu Kresten trow-oso na ini Afrika, den e gebroiki bun krakti poku sani. A poku kan tranga so kefalek taki den sma no man taki na wan bun fasi nanga makandra. Son leisi a de krin taki nofo nyanyan no de, ma dansi di na wan makriki fasi e tron wan sani di den no man basi moro no e mankeri. Na presi taki den de wan trowfesa, den sortu okasi disi kan de soso wan reide fu hori wan bigi dansi. Boiti dati, a tranga poku nofotron e hari trobiman, freimde sma di e kon sondro taki den ben kisi wan kari.

¿Fu di den tori na ini Bijbel di e taki fu trow-oso no e poti krakti tapu poku nanga dansi, dan disi no musu tyari wan paar di e meki plan gi wan trow-oso di sa gi Yehovah grani? Toku, leki sreka gi furu trow-oso na ini Zuid-Afrika no so langa pasa, Kresten yonguwan di den ben teki fu de wan pisi fu a trowfesa, ben gebroiki furu yuru e oefen muilek dansi. Furu mun langa den ben gebroiki kefalek furu fu a ten fu den na a fasi disi. Ma Kresten musu ’bai a ten’ gi „den moro prenspari sani”, soleki a preikiwroko, a studeri di densrefi musu studeri, èn fu fisiti den Kresten konmakandra.—Efeisesma 5:16; Filipisma 1:10.

Te yu luku a furu win di Yesus ben gi, dan a gersi taki a trow-oso na ini Kana ben de wan bigiwan, di ben abi furu orga fanowdu. Ma wi kan de seiker taki na okasi no ben bradyari tumusi èn taki den sma no ben gebroiki tumusi furu sopi soleki fa a ben de na wan tu Dyu trow-oso (Yohanes 2:10). Fa wi kan de seiker fu disi? Bika Masra Yesus Krestes ben de drape. Moro leki iniwan tra sma, Yesus ben o de a sma di ben o luku moro bun fu gi yesi na a komando di Gado gi fu takru kompe: „No kon na mindri sma di e dringi win pasa marki, na mindri den wan di e nyan meti na wan gridi fasi.”—Odo 23:20.

 Fu dati ede, efu wan paar e bosroiti fu prati win noso tra dringi di abi sopi na a trow-oso fu den, dan den musu seti sani so taki den dringi dati musu prati na ondro a tiri fu sma di sabi teki frantwortu. Èn efu den e bosroiti fu abi poku, dan den musu teki poku di e fiti èn den musu meki wan brada di sabi teki frantwortu hori ai na tapu o tranga a poku e plèi. Den sma no musu kisi na okasi fu teki a frantwortu èn bigin nanga takru poku, noso fu meki a poku e plèi tumusi tranga. Efu dansi musu de, dan a kan bigin nanga poku di abi wartifasi èn na wan safri fasi. Efu famiri di no de na ini waarheid noso Kresten di no lepi e dansi morsu noso e meki seks buweigi te den e dansi, dan a trowmasra ben sa kan abi fu kenki a sortu poku noso aksi na wan koni fasi taki sma no musu dansi moro. Noso a trowfesa ben kan saka kon tron wan bruya afersi èn ben kan meki tra sma e naki futu fadon.—Romesma 14:21.

Fu di kefar de na ini wan tu disiten dansi, tranga poku, nanga a de di furu sopi de fu kisi, meki wan tu Kresten trowmasra bosroiti fu no abi den sani disi na den trow-oso fu den. Sma ben krutu wan tu fu den di ben du disi, ma na presi fu dati, den musu kisi prèise gi na angri di den abi fu wai pasi gi sani di ben sa kan meki syen kon na tapu a santa nen fu Gado. Na a tra sei, son trowmasra ben seti sani gi yoisti poku, wan ten gi dansi, èn gi sopi di musu prati na wan bescheidenfasi. Awansi san den e du, a trowmasra de frantwortu gi den sani di e feni presi na a trow-oso fu en.

Na ini Afrika son sma di no lepi e wisiwasi den Kresten trow-oso di e sori lespeki èn den e taki dati a de neleki te sma e go na wan beri. Ma dati a no wan bun fasi fu si a tori. Sondu wroko fu a skin kan tyari prisiri kon gi wan syatu ten, ma den e meki Kresten e kisi konsensi fonfon èn e tyari syen kon na tapu Gado en nen (Romesma 2:24). Na a tra sei, a santa yeye fu Gado e tyari prisiri kon (Galasiasma 5:22). Furu Kresten trowpaar e firi bun te den e prakseri a trowdei fu den baka, fu di den sabi taki a ben de wan prisiri okasi èn a no ben de wan sani di „e meki taki sma e naki futu fadon”.—2 Korentesma 6:3.

Te now ete Welsh nanga Elthea e memre den furu bun komentaar fu famiriman di no de na ini waarheid èn di ben de na a trow-oso fu den. Wan fu den ben taki: „Wi kon weri fu den trow-oso pe furu babari de èn di e feni presi na ini den dei disi. A ben de so switi fu go wan leisi na wan bun trow-oso.”

Ma san de moro prenspari na taki den trow-oso fu Kresten di e gi prisiri èn di abi wartifasi, e gi grani na a Sma di bigin a trowlibi, Yehovah Gado.

[Faki/​Prenki na tapu bladzijde 22]

DEN PENTI DI YU KAN LUKU GI WAN TROW-OSO

• ¿Efu yu e aksi wan famiriman di no de na ini waarheid fu taki wan sani na a trow, dan a de so dan taki yu de seiker taki a no sa kon nanga wan gwenti di no de akruderi a Kresten bribi?

• ¿Efu poku sa plèi, dan yu teki soso singi di fiti?

• ¿A poku fu yu no sa plèi tumusi tranga?

• ¿Efu sma e kisi na okasi fu dansi, dan a sa feni presi na wan lespeki fasi?

• ¿Sopi sa prati soso na wan bescheiden fasi?

• ¿Sma di sabi teki frantwortu sa hori ai na tapu a sopi di o prati?

• ¿Yu poti wan bun ten te a trow-oso musu tapu?

• ¿Sma di sabi teki frantwortu sa de drape fu sorgu taki ala sani sa waka na wan orde fasi te na a kaba?