Yehovah Bigi Moro Wi Ati

„YEHOVAH e prisiri nanga den wan di e frede en.” Fu tru, a Kriaman e prisiri te a e luku ibriwan fu den libisma futuboi fu en te den e meki muiti fu hori den regtfardiki markitiki fu en hei. Gado e blesi den sma di de loyaal, a e gi den deki-ati èn a e trowstu den te den lasi-ati. A sabi taki den anbegiman fu en no volmaakti, so bun a de reidelek nanga den sani di a e aksi fu den.—Psalm 147:11.

Kande a no de wan problema gi wi fu bribi taki, Yehovah abi furu lobi gi furu fu den futuboi fu en. Toku, a gersi leki son wan e broko den ede tumusi nanga den eigi fowtu, taki den abi na overtoigi dati Yehovah noiti ben sa man lobi den. „Mi de tumusi onvolmaakti fu Yehovah lobi mi”, den e prakseri kande. A no de fu taki, dati ten na ten ibriwan fu wi abi takru firi. Ma a gersi leki son sma e feti doronomo nanga den firi taki den no warti noti.

Den Firi Fu Brokosaka

Na ini Bijbel ten, difrenti getrow sma ben pina fu di den ben lasi-ati srefisrefi. Yob ben tegu gi a libi èn a ben firi taki Gado ben gowe libi en. Hana, di ben kon tron a mama fu Samuèl, wan leisi ben  lasi-ati srefisrefi fu di a no ben man meki pikin èn a ben krei nanga dipi sari. David ben ’saka fu boigi ensrefi bun dipi’, èn Epafroditus ben lasi-ati bika a nyunsu fu a siki fu en ben meki en brada firi sari.—Psalm 38:6; 1 Samuèl 1:7, 10; Yob 29:2, 4, 5; Filipisma 2:25, 26.

Fa a de nanga Kresten na ini a ten disi? Kande siki, na owru di sma e kon owru, noso tra situwâsi na ini a libi fu den, e meki taki son wan no man du so furu leki den ben sa wani du ini a santa diniwroko. A sani disi kan meki taki den e kisi a prakseri taki den no man du san Yehovah nanga den kompe-bribiman e fruwakti fu den. Noso a kan taki son wan e tan krutu densrefi fu sani di den ben du fowtu na ini a ten di pasa, ala di den e tweifri efu Yehovah ben gi den pardon. Kande trawan di abi wan background fu wan osofamiri libi di ben muilek srefisrefi abi na overtoigi taki den no warti kwetikweti fu kisi lobi. Fa a sani disi kan?

Son wan e gro na ini osofamiri pe a yeye di ben de fu si moro furu no ben de di fu lobi, ma fu a prakseri di sma e prakseri densrefi nomo, fu taki wortu di e hati sma èn fu frede. A kan taki noiti den o kon sabi wan papa di lobi den srefisrefi, di e suku okasi pe a kan prèise den èn gi den deki-ati, di e luku pasa pikinpikin fowtu èn di de klariklari fu gi pardon fu moro seryusu fowtu srefi, èn di a lobi fu en e meki a heri osofamiri abi wan korostu firi. Fu di noiti den ben abi wan lobi-ati papa na grontapu, meki kande a hebi gi den fu frustan san a wani taki fu abi wan lobi-ati Tata na hemel.

Fu eksempre, Frits e skrifi: „A fasi fa mi papa ben handri sondro fu sori lobi ben abi wan tranga krakti na tapu mi pikin-nengreten nanga mi yongu yari. * Noiti a ben taki wan wortu fu prèise mi, èn noiti mi firi taki mi de krosibei na en. Fu taki en leti, moro furu mi ben frede en.” A bakapisi de taki, Frits, di pasa 50 yari now, te now ete abi a firi leki a no man du no wan sani bun. Èn Margaret e fruklari: „Mi papa nanga mama no ben abi switi lobi firi srefisrefi èn den no ben abi lobi. Di mi ben bigin studeri Bijbel, mi ben abi problema fu prakseri fa wan lobi-ati tata ben musu de.”

Den firi dati, awansi sortu sani e meki den kon, ben sa kan meki taki sontron wi e du a diniwroko fu Gado, no fu di wi lobi en moro furu, ma furutron wi e dini Gado fu di wi konsensi e fon wi, noso fu di wi frede. Ala di wi e du ala san wi man, toku a gersi leki noiti a bun nofo. Na angri di wi e angri fu plisi Yehovah nanga den kompe-bribiman fu wi, kan meki wi firi taki wi no man du ala san wi wani du. A bakapisi de taki kande wi no e doro den marki di wi ben wani doro, wi e gi wisrefi fowtu èn e lasi-ati srefisrefi.

San wi kan du? Kande wi musu memre wisrefi taki Yehovah e firi gi sma. Wan sma di ben frustan a lobi eigifasi disi fu Yehovah heri bun, ben de na apostel Yohanes.

„Gado Bigi Moro Wi Ati”

Na a kaba fu a fosi yarihondro G.T., Yohanes ben skrifi gi en kompe-bribiman: „Nanga disi wi sa sabi taki wi komoto na a waarheid, èn na fesi fu en wi sa gi wi ati seikerfasi, fu ala sani di wi ati e krutu wi, bika Gado bigi moro wi ati èn a sabi ala sani.” Fu san ede Yohanes ben skrifi den wortu disi?—1 Yohanes 3:19, 20.

Yohanes ben sabi heri bun taki na ati fu wan futuboi fu Yehovah ben kan krutu en. Kande Yohanes srefi ben ondrofeni den sortu firi dati. Leki wan yonkuman di en ati ben e bron gaw, dan ten na ten Yesus Krestes ben piri-ai gi Yohanes fu di a ben e krutu tra sma tumusi hebi. Te yu luku en bun, dan Yesus ben kari Yohanes nanga en brada Yakobus „so srefi Boanerges, san wani taki den Manpikin fu Dondru”.—Markus 3:17; Lukas 9:49-56.

Den 60 yari di ben pasa, ben meki Yohanes kon tron wan Kresten di ben abi balansi fasi, lobi-ati nanga sari-ati fasi. Na a ten di Yohanes, leki a lastiwan fu den apostel di ben tan na libi ete, ben skrifi en fosi brifi nanga yepi fu Gado en santa yeye, a ben sabi taki Yehovah no e aksi iniwan fu den futuboi fu en frantwortu fu ibri pikinpikin fowtu. Na presi fu dati, a de wan lobi Tata di e firi gi sma, di lobi fu gi sani èn di abi sari-ati fasi, èn a abi dipi lobi gi ala den sma di lobi en èn e dini en na ini waarheid. Yohanes ben skrifi: „Gado na lobi.”—1 Yohanes 4:8.

Yehovah E Prisiri Nanga A Diniwroko fu Wi gi En

Gado sabi den swakifasi nanga fowtu nanga san wi gebore, èn a e hori den na prakseri. David ben  skrifi: „Ensrefi sabi heri bun fa wi meki, fu di a e hori na prakseri taki wi na doti.” Yehovah e hori na prakseri sortu krakti a background fu wi abi tapu a sma di wi de now. Te yu luku en bun, a sabi wi krinkrin moro bun leki wi sabi wisrefi.—Psalm 103:14.

A sabi taki furu fu wi ben sa wani fu de tra fasi, ma wi no man wini den onvolmaaktifasi fu wi. Wi ben sa kan teki a situwâsi fu wi gersi di fu na apostel Paulus, di ben skrifi: „A bun di mi wani du, mi no e du, ma na ogri di mi no wani du, na dati mi e du.”—Romesma 7:19. Wi alamala abi a srefi feti fu feti. Sontron a sani disi kan abi leki bakapisi taki wi ati e krutu wi.

Tan hori disi na prakseri ala ten: A fasi fa Yehovah e si wi moro prenspari leki a fasi fa wi e si wisrefi. Ibri leisi te a si taki wi e meki muiti fu plisi en, dan a no e sori taki a breiti pikinso nomo ma a e sori taki a e prisiri srefisrefi nanga wi (Odo 27:11). Ala di san wi e du kan gersi leki a de wan pikin sani na ini wi eigi ai, toku a wani di wi wani handri na wan bun fasi nanga a reide fu san ede wi e du dati, e plisi en srefisrefi. A e luku go moro fara leki san wi e du; a abi a koni fu man si san wi wani du; a sabi san wi e winsi èn san wi e lostu. Yehovah kan leisi wi ati.—Yeremia 12:3; 17:10.

Fu eksempre, furu Kotoigi fu Yehovah na sma di fu densrefi no abi furu deki-ati, no lobi taki furu èn den no wani hari sma belangstelling na densrefi. Gi den sma dati, a preiki di den e preiki a bun nyunsu oso fu oso, kan de wan tyalensi di e meki den lasi-ati. Toku, wan angri fu dini Gado èn fu yepi a sma na den sei, e meki srefi den sma di no abi furu deki-ati fu go taki fu Bijbel nanga a birtisma fu den. Kande den e denki taki den e du pikinso nomo èn a firi disi kan meki taki den lasi a prisiri fu den. A kan taki na ati fu den e taigi den taki a publiki preikiwroko fu den no warti noti. Ma Yehovah e prisiri trutru nanga a bigi muiti di den sma dati e meki na ini a diniwroko fu den. Boiti dati, den no man sabi seiker o ten èn pe den siri di den ben sai sa sproiti, gro èn meki froktu.—Preikiman 11:6; Markus 12:41-44; 2 Korentesma 8:12.

Tra Kotoigi e nyan pina fu wan takru gosontu wan langa pisi ten noso den e kon moro owru. Gi den, a fisiti fu konmakandra doronomo na a Kownukondre zaal kan tron wan sani di furu nanga pen èn nanga broko-ede. Na arki di den e arki wan lezing di e taki fu a preikiwroko, kan memre den na san den ben gwenti fu du èn na san den wani du te now ete, ala di siki e meki taki den no man du dati moro. Den sma dati kande e kisi konsensi fonfon, fu di den no man waka na baka a rai di den e kisi someni leki den ben sa wani fu du. Toku, Yehovah e si a loyaalfasi nanga a horidoro fu den leki wan warti sani. So langa leki den e tan loyaal, noiti a e frigiti a getrow diniwroko fu den.—Psalm 18:25; 37:28.

„Gi Wi Ati Seikerfasi”

Di Yohanes ben kon grani, dan a ben musu frustan furu fu a firi di Gado e firi gi sma. Memre taki a ben skrifi: „Gado bigi moro wi ati èn a sabi ala sani.” Boiti dati, Yohanes ben gi wi deki-ati fu „gi wi ati seikerfasi”. San Yohanes ben wani taki nanga den wortu dati?

Soleki fa Vine’s Expository Dictionary of Old and New Testament Words e sori, dan a Griki werkwortu di vertaal nanga „gi seikerfasi” wani taki, „fu gebroiki koni fu kan overtoigi sma, wini wan sma, gi wan bun reide fu san ede wan sma musu du wan sani”. Fu taki en tra fasi, fu man gi wi ati seikerfasi dan a de fanowdu fu wini wi ati, fu overtoigi wi ati meki a kon bribi taki Yehovah lobi wi. Fa?

Frits, di wi ben taki fu en na fesi kaba na ini na artikel disi, dini leki wan owruman na ini wan fu den gemeente fu Yehovah Kotoigi moro leki 25 yari èn a kon si taki a studeri di a e studeri nanga ensrefi kan gi en ati a seikerfasi taki Yehovah lobi en. „Mi e studeri Bijbel nanga den publikâsi fu wi doronomo èn heri bun. A sani disi e yepi mi fu no prakseri den sani di pasa kaba, ma fu tan abi wan soifri fasi fu si sani fu a tumusi moi tamara fu wi. Ten na ten, den sani di pasa ini mi libi e moro mi èn mi e firi taki Gado noiti ben sa kan lobi mi. Ma moro furu mi feni taki a studeri di mi e studeri  doronomo e tranga mi ati, e meki mi bribi kon moro bigi èn e yepi mi fu de nanga prisiri èn fu abi balansifasi.”

A tru, taki a leisi fu Bijbel nanga a prakseri di wi e prakseri dipi fu en kande, no sa kenki a situwâsi fu wi. Toku a kan kenki a fasi fa wi e denki fu a situwâsi fu wi. Te wi e teki a fasi fu denki fu a Wortu fu Gado na ini wi ati, dan dati e yepi wi fu go denki soleki fa en e denki. Boiti dati, a studeri di wi e studeri e meki taki wi man gro ini a frustan di wi e frustan fa Gado e firi gi wi. Safrisafri wi kan kon frustan taki Yehovah no e krutu wi fu a situwâsi di wi ben de na ini leki pikin-nengre èn a no e krutu wi fu den swakifasi fu wi. A sabi taki den lai di furu fu wi e tyari — awansi den de na emotioneel sei noso na skin fasi — a no wi srefi suku den èn na wan lobi-ati fasi a e hori disi na prakseri.

Fa a de nanga Margaret, di wi ben taki fu en na fesi? Di a ben kon leri sabi Yehovah, dan a studeri di a studeri Bijbel ben de so srefi wan bigi wini gi en. En, neleki Frits, ben abi fu kenki a fasi fa a ben e denki fu wan papa. Begi ben yepi Margaret fu si fa den sani di a ben leri nanga yepi fu en bijbelstudie ben fiti na makandra. „Na a fosi presi, mi ben si Yehovah leki wan krosibei mati, fu di mi ben abi moro ondrofeni nanga lobi-ati mati leki nanga wan lobi-ati papa. Safrisafri mi ben leri fu taki nanga Yehovah fu san ben de tapu mi ati, den tweifri, den broko-ede nanga den problema fu mi. Ibritron baka mi ben e taki nanga en na ini begi, ala di na a srefi ten mi ben e meki ala den nyun sani di mi ben e leri fu en kon na wan, neleki fa sma kan poti ala den lusulusu pisi fu wan puzzel makandra. Baka wan pisi ten, den firi fu mi gi Yehovah ben gro kon so fara taki now na wanwan tron nomo mi abi problema fu si en leki wan lobi-ati Tata”, na so Margaret e taki.

Kon Fri fu Ala Broko-ede

So langa leki na owru seti fu sani disi de ete, no wan sma kan howpu fu de fri fu broko-ede. Gi son Kresten a wani taki dati den firi fu broko-ede noso a tweifri di den e tweifri na densrefi, ben kan kon baka èn a kan meki taki den e lasi-ati. Ma wi kan de seiker taki Yehovah sabi fu san ede wi e du sani èn a tranga wroko di wi e du na ini en diniwroko. Noiti a sa frigiti a lobi di wi e sori gi en nen.—Hebrewsma 6:10.

N a ini a nyun grontapu di e kon, di sa de na ondro a Mesias Kownukondre, ala getrow libisma kan fruwakti fu kon fri fu den hebi lai fu a seti fu sani fu Satan. ¡Fa dati sa de wan frulekti! Na a ten dati wi sa kisi fu si moro buweisi fu a firi di Yehovah e firi gi sma. Te a ten dati, meki ala sma de seiker taki „Gado bigi moro wi ati èn a sabi ala sani”.—1 Yohanes 3:20.

[Futuwortu]

[Prenspari pisi na tapu bladzijde 30]

Yehovah a no wan ogri-ati tiriman, ma wan lobi-ati, sari-ati Tata di e firi gi sma

[Prenki na tapu bladzijde 31]

A studeri di wi e studeri a Wortu fu Gado e yepi wi fu denki na a fasi fa en e denki