Yere San A Yeye Abi Fu Taki
Yere San A Yeye Abi Fu Taki
„Un eigi yesi sa yere wan wortu na un baka di e taki: ’Disi na a pasi. Waka na tapu’, efu unu musu go na un reti-anusei noso efu unu musu go na un kruktu-anusei.”—YESAYA 30:21.
1, 2. Fa Yehovah ben taki nanga libisma na ini a heri historia?
NA ÈILANTI Porto Riko na a kondre pe a moro bigi èn a moro krakti schotel fu wan radio-telescoop de. Someni tenti yari langa den sabidensiman gebroiki a kefalek bigi wrokosani disi fu di den howpu fu ontfanga boskopu fu libisani di de dorosei fu wi grontapu. Ma noiti den ontfanga den sortu boskopu disi. Ma kontrari fu san sma e denki, toku krinkrin boskopu e komoto na dorosei a grontapu, boskopu di iniwan fu wi kan ontfanga awansi o ten — sondro fu gebroiki wan kefalek dangra wrokosani. Den boskopu disi e kon fu wan Sma di hei srefisrefi moro leki iniwan sani di sma e denki taki de na dorosei a grontapu. Suma na a Sma fu pe a sortu komunikâsi disi e komoto, èn suma e ontfanga den? San den boskopu e taki?
2 A Bijbel verslag abi difrenti tori fu den okasi pe libisma yesi ben man yere den boskopu di komoto na Gado. Sontron yeye kriaturu di ben dini leki boskopuman fu Gado ben tyari den boskopu disi (Genesis 22:11, 15; Sakaria 4:4, 5; Lukas 1:26-28). Na dri okasi sma ben yere a sten fu Yehovah (Mateus 3:17; 17:5; Yohanes 12:28, 29). Gado ben taki tu nanga yepi fu profeiti di ben de libisma, èn furu fu den ben skrifi san a ben meki den taki. Na ini a ten disi, wi abi Bijbel, di abi so srefi furu fu den sortu fasi fa Gado ben taki nanga libisma, èn so srefi den sani di Yesus nanga den disipel fu en ben leri sma (Hebrewsma 1:1, 2). Yehovah ben seni bodoi go trutru na den libisma di a kria.
3. Fu san ede Gado ben gi den boskopu fu en, èn san Gado e fruwakti fu wi?
3 Ala den boskopu disi di Gado ben gi nanga yepi fu en santa yeye, no e fruteri furu fu a trutru universum. Den e poti prakseri na moro prenspari sani, di abi krakti tapu a libi fu wi nownowde èn na ini a ten di e kon (Psalm 19:7-11; 1 Timoteus 4:8). Yehovah e gebroiki den boskopu disi fu taigi wi san na a wani fu en èn fu gi wi tiri. Den na wán fasi fa den wortu fu a profeiti Yesaya e kon tru: „Un eigi yesi sa yere wan wortu na un baka di e taki: ’Disi na a pasi. Waka na tapu’, efu unu musu go na un reti-anusei noso efu unu musu go na un kruktu-anusei” (Yesaya 30:21). Yehovah no e dwengi wi fu arki en „wortu”. A e didon na wi efu wi wani waka na baka a tiri fu Gado èn efu wi wani waka den pasi fu en. Na fu dati ede den Buku fu Bijbel e frumane wi fu arki den sani di Yehovah e taigi wi. Na ini a buku Openbaring, a deki-ati di wi e kisi fu „yere san a yeye e taigi” wi, de fu si seibi tron.—Openbaring 2:7, 11, 17, 29; 3:6, 13, 22.
4. ¿A de reidelek fu fruwakti na ini a ten fu wi taki Gado sa taki langalanga nanga wi komoto na hemel?
4 Na ini a ten disi Yehovah no e taki langalanga nanga wi komoto na a hemel kontren. Srefi na ini Bijbel ten, den sortu fasi disi fa Gado ben taki nanga libisma ben feni presi wanwan leisi nomo, èn son leisi baka wan tu hondro yari. Na ini a heri historia, moro furu Yehovah no ben taki langalanga nanga en pipel. Na so a de na ini a ten fu wi. Meki wi go luku dri fasi fa Yehovah e taki nanga wi na ini a ten disi.
„Na Gado Ben Meki Sma Skrifi Ala den Buku fu Bijbel Nanga Yepi fu En Santa Yeye”
5. San na a moro prenspari wrokosani di Yehovah e gebroiki fu taki nanga wi na ini a ten disi, èn fa wi kan abi wini fu en?
5 A moro prenspari wrokosani di Gado e gebroiki fu taki nanga libisma, na Bijbel. Na Gado ben meki sma skrifi Bijbel nanga yepi fu en santa yeye, èn ala sani di skrifi na ini en kan abi wini gi wi (2 Timoteus 3:16). Bijbel lai nanga eksempre fu trutru sma ben bosroiti nanga den eigi fri wani efu den wani arki a sten fu Yehovah noso no wani arki en sten. Den eksempre disi e memre wi fu san ede a de tumusi prenspari fu arki san a yeye fu Gado e taki (1 Korentesma 10:11). Bijbel abi so srefi koni di wi kan gebroiki na ini wi libi. A e gi wi rai gi den ten te wi musu teki bosroiti na ini a libi. A de neleki Gado de na wi baka, èn e taki den wortu disi na ini wi yesi: „Disi na a pasi. Waka na tapu.”
6. Fu san ede Bijbel bun srefisrefi moro ala den tra buku di skrifi?
6 Fu man yere san a yeye e taki nanga yepi fu den sani di skrifi na ini Bijbel, dan wi musu leisi Bijbel doronomo. Bijbel a no soso wan pôpi buku di skrifi heri bun, wan fu den furu buku di de fu feni na ini a ten disi. Bijbel na wan buku di skrifi nanga yepi fu a santa yeye fu Gado, èn a abi den prakseri fu Gado na ini. Hebrewsma 4:12 e taki: „A wortu fu Gado de libilibi èn a abi krakti èn a srapu moro leki iniwan feti-owru di e koti na tu sei, èn a e boro go srefi so dipi taki a e prati sili nanga yeye, èn den skrufu fu a skin nanga a fatu na ini den bonyo fu den, èn a man fu si krin san na ati e denki èn abi na prakseri.” Te wi e leisi Bijbel, dan den sani di skrifi na ini en e boro leki wan feti-owru go na ini den inisei prakseri fu wi èn na ini den firi fu wi, èn a e sori o furu a libi fu wi de akruderi a wani fu Gado.
7. Fu san ede a de tumusi prenspari fu leisi Bijbel, èn omeni tron wi musu du dati, soleki fa wi e kisi deki-ati fu du?
7 Den sani di „na ati e denki èn abi na prakseri”, kan kenki baka wan pisi ten èn te den sani di wi e ondrofeni ini a libi abi krakti na wi tapu — bun sani èn so srefi muilek sani. Efu wi no e studeri a Wortu fu Gado doronomo, dan den prakseri fu wi, den maniri fu wi, nanga den firi fu wi no sa de akruderi den gronprakseri fu Gado moro. Fu dati ede Bijbel e frumane wi: „Tan tesi efu unu de na ini bribi, tan buweisi san unsrefi de” (2 Korentesma 13:5). Efu wi musu tan arki san a yeye e taki, dan wi musu gi yesi na a rai fu leisi Gado Wortu ibri dei.—Psalm 1:2.
8. Sortu wortu fu na apostel Paulus e yepi wi fu ondrosuku wisrefi te wi e leisi Bijbel?
8 Wan prenspari sani di sma di e leisi Bijbel musu hori na prakseri, na disi: ¡Teki nofo ten fu denki fu san yu e leisi! Te wi e du muiti fu handri akruderi a rai di wi kisi fu leisi Bijbel ibri dei, dan wi no wani leisi furu kapitel esi-esi sondro fu frustan san wi e leisi. Ala di a tumusi prenspari fu leisi Bijbel doronomo, toku a reide fu san ede wi e leisi Bijbel no musu de soso fu hori wisrefi na wan schema; wi musu abi wan opregti angri fu leri fu Yehovah èn fu den prakseri fu en. Ini a tori disi, wi kan gebroiki den wortu disi fu na apostel Paulus so taki wi kan ondrosuku wisrefi. Di Paulus ben skrifi den tra Kresten, a ben taki: „Mi e boigi mi kindi gi a Tata, so taki a kan gi unu . . . fu meki Krestes libi na ini un ati nanga lobi nanga yepi fu un bribi; so taki unu kan meki rutu èn kan kon stanfaste na tapu a fondamenti, so taki unu man frustan krinkrin nanga ala den santawan san na a bradi nanga a langa nanga a hei nanga a dipi, èn fu sabi a lobi fu Krestes di bigi moro sabi, so taki unu kan kon furu nanga ala bun sani di Gado e gi dorodoro.”—Efeisesma 3:14, 16-19.
9. Fa wi kan kweki èn tranga na angri di wi abi fu leri fu Yehovah?
9 A tru, wan tu fu wi no lobi leisi, ala di tra sma na fayafaya leisiman. Ma awansi fa ibriwan fu wi e denki, wi kan kweki na angri fu leri fu Yehovah èn kan tranga na angri dati. Na apostel Petrus ben fruklari taki wi musu angri fu kisi a sabi fu Bijbel, èn a ben erken taki wi sa musu kweki na angri dati kande. A ben skrifi: „Leki nyunyun pikin, kweki wan angri gi a soifri merki di de fu a wortu, so taki nanga yepi fu dati unu kan gro kon kisi frulusu” (1 Petrus 2:2). A de tumusi prenspari taki wi musu dwengi wisrefi efu wi wani „kweki wan angri” gi bijbelstudie. Neleki fa wi kan kon lobi wan nyun nyanyan na baka te wi tesi en furu leisi, na so a fasi fa wi e denki fu leisi èn fu studeri kan kenki kon bun efu wi e dwengi wisrefi fu tan hori wisrefi na a gwenti dati.
„Nyanyan na a Reti Ten”
10. Suma na „a getrow èn koni srafu”, èn fa Yehovah e gebroiki den na ini a ten disi?
10 Na ini Mateus 24:45-47 Yesus ben kari wan tra fasi di Yehovah e gebroiki fu taki nanga wi na ini a ten disi. Drape a ben taki fu a Kresten gemeente di salfu nanga santa yeye — „a getrow èn koni srafu”di poti fu gi „nyanyan [na yeye fasi] na a reti ten”. Ibriwan fu den memre fu a grupu disi na „oso-futuboi” fu Yesus. Den disi, makandra nanga „wan bigi ipi” fu „tra skapu” e kisi deki-ati nanga tiri (Openbaring 7:9; Yohanes 10:16). Furu fu a nyanyan disi di e gi na a reti ten e kon na ini publikâsi di druk, soleki A Waktitoren, na Ontwaakt!, nanga tra publikâsi. Moro nyanyan na yeye fasi e prati na ini lezing nanga demonstrâsi na den kongres, tra bigi konmakandra, nanga den gemeente konmakandra.
11. Fa wi e sori taki wi e arki san a yeye abi fu taki nanga yepi fu „a getrow èn koni srafu”?
11 Den leri di „a getrow èn koni srafu” e gi, ben meki nanga a marki fu tranga a bribi fu wi èn fu man gebroiki a koni di wi abi fu si sani krin (Hebrewsma 5:14). Den rai disi kan abi fu du nanga difrenti sortu tori, so taki ibriwan sma kan gebroiki en na en eigi fasi na ini a libi. Wanwan leisi wi e kisi so srefi rai di abi fu du nanga spesrutu afersi fu a fasi fa wi e tyari wisrefi. Fa wi musu handri te wi e arki trutru san a yeye e taki nanga yepi fu a srafu grupu? Na apostel Paulus e piki: „Gi yesi na den wan di e teki fesi na un mindri èn saka unsrefi na den ondro” (Hebrewsma 13:17). A tru, taki ala den sma di abi fu du nanga a seti disi na onvolmaakti sma. Ma toku Yehovah e feni en bun fu gebroiki libisma leki en futuboi, ala di den onvolmaakti, fu tiri wi na ini a ten disi fu a kaba.
Wi Konsensi Di E Tiri Wi
12, 13. (a) Sortu tra sani Yehovah gi wi di kan gi wi tiri? (b) Sortu bun krakti a konsensi kan abi srefi na tapu sma di no abi wan soifri sabi fu Gado Wortu?
12 Yehovah gi wi wan tra sani di e gi wi tiri — a konsensi fu wi. A kria libisma nanga wan inisei firi fu sabi san bun èn san ogri. A de wan pisi fu a fasi fa wi de. Na ini en brifi gi den Romesma, na apostel Paulus ben fruklari: „Ibri leisi te sma fu den nâsi di no abi wet, e du den sani fu a wet, fu densrefi, dan den sma disi, ala di den no abi wet, de wan wet gi densrefi. Den na yoisti den sma di e sori taki san de na ini a wet, skrifi na ini den ati, ala di a konsensi fu den e gi kotoigi nanga den èn den eigi prakseri na ini den, e gi den a fowtu noso e regtfardiki den.”—Romesma 2:14, 15.
13 Furu sma di no sabi Yehovah, kan tyari den denki nanga den du fu den kon pikinso akruderi den gronprakseri fu Gado fu san bun èn san ogri. A de neleki den ben e yere wan swaki inisei sten e tyari den go na a yoisti sei. ¡Efu disi kan de so gi den wan di no abi soifri sabi fu Gado Wortu, dan dati musu de so moro furu srefi nanga na inisei sten fu den wan di de tru Kresten! Fu tru, a konsensi fu wan Kresten di a sabi fu Gado Wortu ben meki kon soifri èn di e wroko na ini wanfasi nanga a santa yeye fu Yehovah, kan gi tiri di wi kan frutrow.—Romesma 9:1.
14. Fa wan konsensi di kisi leri nanga yepi fu Bijbel, e yepi wi fu waka na baka a tiri fu a yeye fu Yehovah?
14 Wan bun konsensi, di kisi leri nanga yepi fu Bijbel, kan sori wi a pasi di a yeye wani meki wi waka. A kan son leisi taki Bijbel èn so srefi den publikâsi fu wi di gron na tapu Bijbel, no e taki finifini fu wan spesrutu situwâsi pe wi de na ini kande. Ma a konsensi fu wi kan gi wi wan warskow, fu di a e warskow wi gi wan pasi di kan du wi ogri. Na ini den situwâsi disi, te wi no e arki den sani di a konsensi fu wi e taigi wi, dan a de trutru so, taki wi e weigri fu arki san a yeye fu Yehovah e taki. Na a tra sei, te wi e leri fu frutrow tapu a Kresten konsensi fu wi di kisi leri, dan wi kan teki koni bosroiti srefi te wan spesrutu sani no skrifi fu dati. Ma a de tumusi prenspari fu hori na prakseri taki te Gado no ben gi wan gronprakseri, wan tirilin noso wan wet fu wan sani, dan a no ben sa de wan yoisti sani fu dwengi tra Kresten fu teki a fasi fa wi konsensi e si sani, na ini tori di de trutru persoonlijk afersi.—Romesma 14:1-4; Galasiasma 6:5.
15, 16. San kan meki taki a konsensi fu wi no e wroko bun, èn fa wi kan sorgu taki dati no e pasa?
15 Wan krin konsensi di kisi leri nanga yepi fu Bijbel, na wan bun presenti di wi kisi fu Gado (Yakobus 1:17). Ma wi musu kibri a presenti disi gi takru krakti di kan pori en, efu wi wani taki a presenti disi musu wroko bun leki wan yepisani di e kibri wi na moreel sei. Efu wi e du den gwenti di sma abi na ini a presi pe wi e libi èn di no e kruderi nanga den markitiki fu Gado, dan dati kan meki taki a konsensi fu wi no e wroko bun èn a no sa pusu wi fu du san bun. Wi e sori kande taki wi no man krutu afersi na wan yoisti fasi èn wi kan kori wisrefi fu bribi taki wan ogri sani di wi du, bun trutru.—Teki gersi Yohanes 16:2.
16 Efu wi e tan weigri fu arki den warskow di wi konsensi e gi wi, dan a sten fu en sa kon swaki moro nanga moro teleki wi no man firi moro san bun noso san ogri. A psalm skrifiman ben taki fu den sma disi di a ben taki: „Na ati fu den kon de sondro firi neleki fatu” (Psalm 119:70). Son sma di no e arki san den konsensi fu den e pusu den fu du, e lasi a man di den man denki bun. Den gronprakseri fu Gado no e tiri den moro èn den no man teki yoisti bosroiti. Fu no meki a situwâsi disi de, dan wi musu opo wisrefi gi den sani di a Kresten konsensi fu wi e sori wi, srefi te den afersi di abi fu du nanga dati gersi fu de pikin sani.—Lukas 16:10.
Den Sma Di E Arki èn E Gi Yesi, De Koloku
17. Sortu blesi wi sa kisi te wi e arki ’a wortu na wi baka’ èn e gi yesi na a konsensi fu wi di kisi leri nanga yepi fu Bijbel?
17 Te wi e kisi a gwenti fu arki ’a wortu na wi baka’ — soleki fa den Buku fu Bijbel nanga a getrow èn koni srafu e gi en — èn te wi e gi yesi na den frumane fu a konsensi fu wi di kisi leri nanga yepi fu Bijbel, dan Yehovah sa blesi wi fu di a sa gi wi en yeye. A santa yeye fu en sei sa meki wi man teki moro bun èn frustan moro bun san Yehovah e taigi wi.
18, 19. Fa a tiri di Yehovah e gi kan abi wini gi wi na ini wi diniwroko èn so srefi na ini wi eigi libi?
18 A yeye fu Yehovah sa tranga wi tu te wi kisi fu du nanga muilek situwâsi fu di a e gi wi koni nanga deki-ati. Soleki fa a ben de nanga den apostel, a yeye fu Gado kan wiki a krakti di wi abi fu denki èn a kan yepi wi ala ten fu handri èn fu taki akruderi Bijbel gronprakseri (Mateus 10:18-20; Yohanes 14:26; Tori fu den Apostel 4:5-8, 13, 31; 15:28). A yeye fu Yehovah makandra nanga den muiti di wi e du, sa meki sani waka bun gi wi te wi e teki prenspari bosroiti na ini wi libi, èn dati sa gi wi deki-ati fu go doro fu handri akruderi den bosroiti dati di wi teki. Fu eksempre, kande yu e prakseri fu kenki a fasi fa yu e libi so taki yu kan gebroiki moro ten gi yeye afersi. Noso kande yu musu teki prenspari bosroiti di sa kenki yu libi, soleki te yu e suku wan trowpatna, te yu e prakseri finifini efu yu o teki wan wroko, noso efu yu o bai wan oso. Wi musu arki san a yeye fu Gado abi fu taki èn handri akruderi a tiri di a e gi, na presi fu meki a fasi fa wi e firi de a wan-enkri sani di e yepi wi fu teki bosroiti.
19 Wi e warderi den switi frumane trutru èn a rai di wi e kisi fu tra Kresten, so srefi fu den owruman. Ma wi no musu wakti ala ten meki tra sma tyari afersi kon na ondro wi prakseri. Efu wi sabi san na a koni sani fu du èn sortu kenki wi musu tyari kon fu meki a denki fu wi èn a fasi fa wi e tyari wisrefi plisi Gado, dan meki wi handri tu akruderi dati. Yesus ben taki: „Efu unu sabi den sani disi, dan koloku fu unu te unu e du den.”—Yohanes 13:17.
20. Sortu blesi den sma di e arki a ’wortu na den baka’ sa kisi?
20 A de krin, fu man sabi fa den musu plisi Gado, dan Kresten no abi fu yere wan trutru sten e komoto na hemel, noso wan engel no abi fu fisiti den. Den abi a blesi taki den abi a Wortu fu Gado di skrifi èn so srefi a lobi-ati tiri di den e kisi fu a salfu grupu na grontapu. Efu den e arki ’a wortu na den baka’ heri bun èn e waka na baka a tiri di den konsensi fu den di kisi leri nanga yepi fu Bijbel e gi, dan sani sa waka bun gi den te den e du a wani fu Gado. Dan trutru den sa si a kontru fu a pramisi fu na apostel Yohanes: „A sma di e du a wani fu Gado, e tan fu têgo.”—1 Yohanes 2:17.
Fu Luku Sani Syatu Baka
• Fu san ede Yehovah abi komunikâsi nanga libisma di a kria?
• Fa wi kan abi wini te wi e leisi Bijbel doronomo?
• Fa wi musu handri na tapu a tiri di a srafu grupu e gi?
• Fu san ede wi no musu weigri fu arki den sani di wi konsensi di kisi leri nanga yepi fu Bijbel, e taigi wi?
[Aksi fu a tori disi]
[Prenki na tapu bladzijde 13]
Libisma no abi kefalek dangra wrokosani fanowdu fu kisi boskopu fu Gado
[Sma di abi a reti fu a prenki]
Nanga primisi fu Arecibo Observatory/David Parker/Science Photo Library
[Prenki na tapu bladzijde 15]
Yehovah e taki nanga wi nanga yepi fu Bijbel èn nanga yepi fu „a getrow èn koni srafu”