Wi na den Sma Di Abi Bribi

Bow Bribi Nanga Yepi fu Bijbelstudie na ini India

FU DEN kefalek bigi Himalayabergi di tapu nanga snew na a noordsei te go miti den syoro di lai watra dampu fu na Indis Se na a zuidsei, India na wan kondre pe difrenti de, te yu e luku pe a kondre de èn na kerki sei. Fu den moro leki wán milyard sma di e libi drape, so wan 83 procent na Hindusma, 11 procent na Moslimsma èn den wan di tan abra moro furu fu den na sma di e taki dati den na Kresten, so srefi Sikhsma, Budasma nanga Yainasma. Alamala de fri fu anbegi fa den wani. „Kerki e plèi wan prenspari rol ini a fasi fa sma e libi na India”, na so The World Book Encyclopedia e taki.

A libi di sma musu libi akruderi a Kresten bribi fu den, na wan sani di Yehovah Kotoigi e du. Den de moro leki 21.200 na ini India now. Den Kotoigi na ini India e si en leki wan grani fu yepi den sma na den sei fu bow wan tranga bribi na ini Gado Wortu, a Santa Bijbel, neleki fa den kompe fu den na yeye fasi e du na ini tra pisi fu grontapu (2 Timoteus 3:16, 17). Luku fa wan osofamiri na ini Chennai na a zuidsei fu India ben kon leri sabi a Bijbel waarheid.

Bifo den ben kon sabi den Kotoigi fu Yehovah, na osofamiri disi ben de fayafaya na ini Katolik charismatisch grupu. A grupu disi ben e taki dati den ben si fisyun, taki den ben abi a koni fu man taki na ini tongo èn taki den ben man dresi sma di siki. Den ben de prenspari sma ini a kerki nanga a libimakandra, dati meki sma ben kari wan tu memre fu na osofamiri „swami” srefi, dati wani taki „masra”. Ne wan dei wan Kotoigi ben kon na a osofamiri èn ben sori den na ini Bijbel taki Yesus na a Manpikin fu Gado, no na Almakti Gado, soleki fa moro furu sma e bribi. A Kotoigi ben sori den tu taki a nen fu Gado na Yehovah èn taki a prakseri di Gado abi nanga grontapu na fu meki a tron wan moi paradijs.—Psalm 83:18; Lukas 23:43; Yohanes 3:16.

Fu di memre fu na osofamiri disi ben e lespeki a Wortu fu Gado èn ben lobi den sani di den ben yere, meki den ben agri fu abi wan doronomo bijbelstudie nanga den Kotoigi fu Yehovah. Disi ben meki taki den kerki sma fu a kerki fu den ben bigin spotu den. Toku, na osofamiri ben tan abi a fasti bosroiti fu go doro nanga a bijbelstudie fu den. Di den ben kon kisi moro sabi èn a bribi fu den ben kon moro tranga, dan den ben tapu nanga den falsi kerki wroko fu den. Now, dri memre fu na osofamiri disi na fayafaya Kotoigi di dopu. A mama e dini leki wan yepi pionier someni leki a kan.

Bribi E Yepi sma fu Kakafutu gi Problema na Skin Sei

Sunder Lal, wan yonkuman di e libi na ini wan dorpu na ini a Punjab, ben abi furu bribi nanga deki-ati fanowdu fu kan prati a bun nyunsu fu a Kownukondre fu Gado nanga tra sma (Mateus 24:14). Wan reide fu san ede a ben abi deki-ati fanowdu, na fu di a ben libi a bribi na ini den furu gado fu en famiri nanga en dorpu fu anbegi a tru Gado, Yehovah. Wan tra reide, na fu di Sunder Lal no abi futu.

Te leki a yari 1992, Sunder Lal ben abi wan tu sani di a ben gwenti fu du ala dei. A ben wroko leki yepiman fu wan datra. Makandra nanga en eigi osofamiri a ben anbegi difrenti gado na ondro a tiri fu a guru fu den di den ben teki. Ne wan neti, a ben fadon di a ben e koti wan pasi abra pe loko e pasa. Wan loko ben rèi abra en èn na den bowtu a ben koti den tu futu fu en puru. Ala di a ben tan na libi, toku a heri libi fu en ben kon pori krinkrin. Yu kan  frustan, taki Sunder Lal ben kon broko saka èn bruya srefisrefi èn a ben prakseri tu fu kiri ensrefi. Na osofamiri fu en ben horibaka gi en, ma den sani di a ben man du na ini a ten di ben de na en fesi no ben e sori bun kwetikweti.

Baka dati wan Kotoigi fu Yehovah ben kon na a oso fu Sunder Lal èn ben sori en na ini Bijbel taki Gado pramisi taki a sa meki grontapu tron wan kefalek moi paradijs èn taki a sa gi ala sma di lobi en èn e frede en, wan volmaakti gosontu. Sunder Lal ben agri fu den studeri Bijbel nanga en èn wan yari langa a ben studeri fayafaya. A ben kisi wan kari fu kon na den Kresten konmakandra èn te fu kaba a ben go nanga wan mati, na tapu baka fu a baisigri fu wan mati. Ala di a fasi fa a ben musu sidon na tapu a baisigri ben meki taki en skin ben hati en, toku a pai ben bigi. Den sani di a ben leri di ensrefi ben studeri Bijbel ben sori taki den de tru, di a ben miti trawan di ben e bribi trutru na ini den pramisi fu a Wortu fu Gado èn di ben e libi akruderi Bijbel leri.

Sunder Lal ben bigin prati a bun nyunsu nanga den birtisma fu en, èn na ini a yari 1995 a ben dopu. Fosi, a ben e srepi ensrefi oso fu oso na ini en dorpu fu teki prati na a preikiwroko. Dati ben de a fasi fa a ben gwenti go na presi. Ma now a kisi wan presenti fu den yeye brada fu en–wan dri-wiel baisigri di meki spesrutu so taki sma kan „rèi” en nanga anu. Tangi fu a dri-wiel baisigri fu en, meki a de moro fri now fu go pe a wani. Ensrefi kan rèi a langa pasi fu 12 kilometer now fu go na den gemeente konmakandra. Son leisi a e rèi na ini hebi sibibusi alen; tra leisi a waran moro leki 43 graden Celcius

Boiti taki Sunder Lal e go na den konmakandra, a e studeri nanga furu sma tu di wani kisi yepi fu bow wan tranga bribi na ini a tru Gado, Yehovah. Fu taki en leti, dan seibi bijbelstudenti fu en dopu now, so srefi dri tra sma di a ben miti ma di studeri Bijbel nanga kompekotoigi.

Soleki fa Bijbel e taki, dan „a no ala sma abi bribi” (2 Tesalonikasma 3:2). Ma gi den wan „di abi a yoisti yeye gi a têgo libi”, a studeri di den e studeri Gado Wortu doronomo kan meki den kisi wan tranga bribi (Tori fu den Apostel 13:48). A studeri di sma e studeri Bijbel na a fasi disi e meki tu taki den ai fu den e brenki nanga howpu fu wan kefalek moi tamara — wan sani di moro nanga moro sma na ini India e poti bribi na ini.

[Karta na tapu bladzijde 30]

(Efu yu wani si pe den sani disi skrifi, luku a tijdschrift)

AFGANISTAN

PAKISTAN

NEPAL

BUTAN

CHINA

BANGLADESY

MIANMAR

LAOS

THAILAND

VIETNAM

KAMBODYA

SRI LANKA

INDIA

[Sma di abi a reti fu a karta]

Mountain High Maps® Copyright © 1997 Digital Wisdom, Inc.