Den Evangelie​—A Haritaki E Go Doro

¿Den evangelie tori di e taki fu a geborte fu Yesus Krestes, de tru?

¿Na en ben hori a Bergitaki?

¿Yesus ben kisi wan opobaka trutru?

¿A ben taki trutru: „Mi na a pasi nanga a waarheid nanga a libi”?—YOHANES 14:6.

SO WAN 80 sabiman taki fu den sortu afersi disi na a Yesus Seminari, di hori tu leisi ibri yari fu sensi 1985. A grupu sabiman disi ben piki den aksi disi na wan aparti fasi. Den sma di ben teki prati na a Seminari fringi pikin bal fu stem gi ibri sani di sma e fruklari dati na Yesus ben taki en na ini den Evangelie. Wan redi bal e sori taki na Yesus ben taki a sani trutru. Wan roze bal wani taki dati a fruklari gersi wan sani di Yesus ben sa kan taki. Wan greisi  bal e sori taki den idea kan gersi di fu Yesus, ma taki a no en fosi ben kon nanga a fruklari dati. Wan blaka bal negatief srefisrefi, èn a wani taki dati a fruklari dati ben teki fu den gwenti di kon baka a ten dati.

Nanga a sistema disi, den sma di ben teki prati na a Yesus Seminari poti ala den fo penti na wan sei di wi ben kari na ini den aksi na a bigin. Te yu luku en bun, dan den fringi wan blaka bal gi 82 procent fu den wortu di Yesus ben taki na ini den Evangelie. Soleki fa den e denki, dan soso 16 procent fu den tori di ben fruteri sani fu Yesus na ini den Evangelie èn tra sani di skrifi, sori taki den tru.

A no a fosi leisi taki sma e krutu den Evangelie na a fasi disi. Na ini a yari 1774 sma ben kon na tapu den Evangelie di wan manuscript fu 1400 bladzijde, di Hermann Reimarus skrifi, wan professor fu Owstusei kondre tongo na ini Hamburg, Doisrikondre, ben tyari kon na doro na baka di a dede. Na ini a manuscript dati Reimarus ben abi trutru tweifri efu den sani di de na ini den Evangelie ben pasa trutru. Den bosroiti di a ben teki ben abi den gron tapu na ondrosuku di a ben ondrosuku den tongo èn den sokari sani di de kontrari makandra èn di a ben feni na ini den fo Evangelie tori di e taki fu a libi fu Yesus. Sensi a ten dati, den sma di e ondrosuku sani finifini ben sori nofotron taki den e tweifri efu den Evangelie de tru, èn na wan sortu fasi den ben broko a frutrow di a publiki ben abi na ini den sani disi di skrifi.

A moro prenspari denki di moro furu fu den sortu sabiman disi abi, na taki den e si den Evangelie tori leki relisi denki di difrenti sma e fruteri trawan. Den aksi di sabiman di e tweifri gwenti poti, na: ¿A ben sa kan taki den denki fu den ben meki den skrifiman fu den fo Evangelie ben e meki den trutru tori kon moro moi? ¿Den politiek afersi fu a fosi Kresten libimakandra ben meki den skrifi noso poti moro sani na a tori fu Yesus? Sortu pisi fu den Evangelie skrifi eerlijk kande, na presi taki den de anansitori?

Sma di ben kweki na ini wan libimakandra pe sma no e bribi na ini Gado noso na ini libimakandra pe sma no e prakseri relisi sani, e bribi taki Bijbel — so srefi den Evangelie — na wan buku di lai fositen tori nanga anansitori. Ma tra sma e tegu fu a trowe di Krestenhèit ben trowe brudu, a kwinsi di den ben kwinsi sma, a pratifasi di de na den, èn fu a godelowsu fasi fa den e tyari densrefi na ini a heri historia. Den sortu sma disi no e si no wan reide fu poti prakseri na den sani di skrifi èn di Krestenhèit e si leki santa sani. Den feni taki den muiti di du èn di abi leki bakapisi wan hoigri relisi, musu abi den gron na tapu anansitori di no warti noti.

San yu e denki? ¿Yu musu meki son sabiman di e tweifri efu den sani di skrifi na ini na Evangelie de trutru so, e meki yusrefi bigin abi den srefi tweifri disi na ini yu frustan? ¿Te yu e yere den e fruklari taki den skrifiman fu den Evangelie ben e meki anansitori, yu musu gi pasi dan meki disi broko a frutrow di yu abi na ini den sani disi di den skrifi? ¿A godelowsu nen di Krestenhèit abi musu meki yu tweifri efu den Evangelie de fu frutrow? Wi e aksi yu fu ondrosuku wan tu fu den tru tori.

[Prenki na tapu bladzijde 4]

¿Den Evangelie abi anansitori noso tru tori?

[Sma di abi a reti fu a prenki]

Yesus E Waka Na Tapu Se/​The Doré Bible Illustrations/​Dover Publications

[Sma di abi a reti fu a prenki na tapu bladzijde 3]

Background, bladzijde 3-5 nanga 8: Nanga a primisi fu a Freer Gallery of Art, Smithsonian Institution, Washington, D.C.