Poti Prakseri na Gado En Profeiti Wortu gi a Ten fu Wi
Poti Prakseri na Gado En Profeiti Wortu gi a Ten fu Wi
„Frustan, o manpikin fu libisma, taki a fisyun de gi a ten fu a kaba.”—DANIÈL 8:17.
1. San Yehovah wani, taki a heri libisma famiri musu sabi fu a ten fu wi?
YEHOVAH no e hori a sabi di a sabi sani fu a tamara gi ensrefi. Ma a de a Sma di e tyari kibritori kon na krin. Fu taki en leti, a wani taki wi alamala musu sabi taki wi de bun fara kaba na ini „a ten fu a kaba”. Fa dati na prenspari nyunsu gi den siksi milyard sma di e libi na grontapu now!
2. Fu san ede sma e broko den ede nanga a tamara fu a libisma famiri?
2 ¿Wi musu fruwondru taki a grontapu disi e doro en kaba? Libisma kan waka na tapu mun, ma na furu presi den no kan koiri na den strati fu a planeiti disi sondro fu frede. Libisma kan poti nyunmodo wrokosani na ini wan oso, ma den no man du noti fu tapu a prati di someni osofamiri e prati. Èn den kan kon nanga a pisi ten di a moro prenspari sani na fu sma kon sabi wan lo nyun tori, ma den no man leri sma fu libi na ini vrede nanga makandra. Den sani disi di sma no man du, e horibaka gi den heri ipi buweisi di de na ini Bijbel taki wi e libi na ini a ten fu a kaba.
3. O ten sma ben gebroiki den wortu „a ten fu a kaba” a fosi leisi na grontapu?
3 So wan 2600 yari pasa, na engel Gabrièl ben de a fosiwan di ben gebroiki den tumusi aparti wortu disi — „a ten fu a kaba” — na grontapu. Wan profeiti fu Gado di ben frede kefalek, ben yere Gabrièl e taki: „Frustan, o manpikin fu libisma, taki a fisyun de fu a ten fu a kaba.”—Danièl 8:17.
¡Disi Na „a Ten fu a Kaba”!
4. Na sortu fasi moro Bijbel e taki fu a ten fu a kaba?
4 Yu kan feni den wortu „a ten fu a kaba” nanga „a fasti ten fu a kaba” siksi tron na ini a buku Danièl (Danièl 8:17, 19; 11:35, 40; 12:4, 9). Den abi fu du nanga „den lasti dei” di na apostel Paulus ben taki na fesi fu den (2 Timoteus 3:1-5). Yesus Krestes ben kari a pisi ten disi a „denoya” fu en pe a ben o kisi a wroko fu de Kownu na hemel.—Mateus 24:37-39.
5, 6. Suma ’waka lontu’ kaba na ini a ten fu a kaba, èn san ben de a bakapisi?
5 Danièl 12:4 e taki: „Fu yu sei, o Danièl, kibri den wortu èn sroto a buku, te leki a ten fu a kaba. Furu sma sa waka lontu, èn a tru sabi sa kon de pasa marki.” Furu sani di Danièl ben skrifi, ben skrifi leki wan kibritori èn den ben kibri so, taki furu yarihondro, libisma no ben man frustan san den sani disi ben wani taki. ¿Ma fa a de nanga a ten fu wi?
6 Na ini a ten disi fu a kaba, yu kan taki dati furu getrow Kresten ’waka lontu’ kaba fu luku den bladzijde fu Bijbel, a Wortu fu Gado. San ben de a bakapisi? Fu di Yehovah blesi a muiti di den du, meki tru sabi kon de fu kisi pasa marki. Fu eksempre, Gado blesi salfu Kotoigi fu Yehovah nanga inzicht di ben meki taki den ben man frustan taki Yesus Krestes ben tron Kownu na hemel na ini a yari 1914. Akruderi den wortu fu na apostel di skrifi na ini 2 Petrus 1:19-21, dan den salfuwan disi nanga den loyaal kompe fu den e ’poti prakseri na a profeiti wortu’ èn den sabi heri bun taki now na a ten fu a kaba.
7. San na wan tu tori di e meki taki a buku Danièl na so wan spesrutu buku?
7 A buku Danièl na wan spesrutu buku na difrenti fasi. Na ini a buku wan kownu e pramisi taki a o kiri den koniman fu en fu di den no man tyari a dren fu en di e dangra en, kon na krin èn den no man fruteri san a dren wani taki, ma a profeiti fu Gado e lusu a dangratori. Den e trowe dri yonkuman di e weigri fu anbegi wan bun hei popki, na ini wan onfu di faya kefalek, toku den e tan na libi sondro taki wán sani bron na den skin. Te wan fesa e hori, dan hondrohondro sma e si wan anu di e skrifi dangra wortu na tapu a skotu fu a paleisi. Takru sma, di poti mofo makandra fu du wan ogri sani, e meki sma trowe wan owru man go na ini wan olo pe lew de, ma a e komopo drape sondro taki wán sani pasa nanga en. Fo meti de fu si na ini wan fisyun, èn den abi fu du nanga wan profeititori di e doro te na ini a ten fu a kaba.
8, 9. Fa a buku Danièl kan de wan wini gi wi, spesrutu now na ini a ten fu a kaba?
8 A de krin, taki a buku Danièl abi tu difrenti thema. Wan thema na fu fruteri wi wan tu tori, a trawan abi fu du nanga profeititori. Den ala tu kan tranga a bribi fu wi. Den sani di e fruteri wi wan tu tori, e sori wi taki Yehovah Gado e blesi den sma di e tan hori den soifri retifasi na en. Èn den pisi di abi fu du nanga profeititori e tranga a bribi, fu di den e sori taki hondrohondro yari — iya, srefi dusundusun yari — na fesi, Yehovah sabi kaba fa historia sa waka.
9 Furu profeititori di Danièl ben skrifi e poti prakseri na a Kownukondre fu Gado. Te wi e si fa den profeititori disi e kon tru, dan dati e tranga a bribi fu wi, èn so a de tu nanga a sabi di wi sabi taki wi e libi na ini a ten fu a kaba. Ma son sma di e suku fowtu na sani, e krutu Danièl fu di den e taki dati den profeititori na ini a buku di abi en nen, trutru ben skrifi na baka di den sani ben pasa di gersi wan kontru fu den profeititori. Efu a tru san den sma e taki, dan sma ben sa kan poti wan tu seryusu aksi di abi fu du nanga san a buku Danièl ben taki na fesi fu a ten fu a kaba. Den sma di lobi fu tweifri na sani, e aksi densrefi tu efu den tori di fruteri na ini a buku, tru. So bun, meki wi go ondrosuku a tori.
¡A De na Fesi Krutu!
10. Na sortu fasi sma kragi a buku Danièl?
10 Kon wi taki dati yu go na krutu-oso fu arki wan krutu. Na afkati di kon nanga wan kragi, e hori nomo taki a sma di den tyari kon na fesi krutu na wan bedrigiman. We, a buku Danièl na wan buku di e buweisi fu ensrefi taki a tru èn a de wan buku di wan Hebrew profeiti di ben libi na ini a di fu seibi nanga a di fu siksi yarihondro b.G.T. ben skrifi. Ma den sma di e suku fowtu na trawan, e taki dati a buku na wan lei. So bun, kon meki wi go luku fosi efu a pisi fu a buku di e fruteri wi wan tu tori e kruderi nanga sani di pasa trutru na ini historia.
11, 12. Fa a ben go nanga a kragi di sma ben kragi taki Belsasar no ben de wan trutru sma ?
11 Kon wi taki dati wi e luku wan sani di wi kan kari a tori fu a kownu di ben lasi. Danièl kapitel 5 e sori taki Belsasar ben tiri leki kownu na Babilon di a foto dati ben teki abra na ini 539 b.G.T. Sma di e suku fowtu na trawan, tweifri na a sani disi fu di na no wan tra presi leki Bijbel den ben man feni a nen fu Belsasar. Na presi fu dati, historia skrifiman fu owruten ben taki dati Nabonidus ben de a lasti kownu fu Babilon.
12 Ma na ini a yari 1854 den ben diki wan tu pikin ston di meki fu kleidoti puru komoto na ini doti, na den brokopresi di tan abra fu na owruten Babilon foto Ur di de na ini Irak fu a ten disi. Na ini den dokumenti disi di ben skrifi nanga spikri-skrifimarki yu ben abi wan begi pe Kownu Nabonidus ben taki fu „Bel-sar-usur, mi fosi manpikin”. Srefi den sma di e suku fowtu na trawan ben musu agri: Disi ben de Belsasar fu a buku Danièl. So bun, te yu luku en bun, dan a kownu di ben lasi no ben lasi kwetikweti, ma na ini grontapu buku sma no ben sabi en ete. Disi na soso wán fu den someni buweisi di e sori taki den sani di Danièl skrifi tru srefisrefi. A buweisi disi e sori taki a buku Danièl trutru na wan pisi fu Gado Wortu pe wi musu poti prakseri na en nownowde, na ini a ten fu a kaba.
13, 14. Suma ben de Nebukadnesar, èn sortu falsi gado a ben anbegi fayafaya?
13 Wan prenspari pisi fu a buku Danièl na den profeititori di e taki fa den grontapumakti ben opo kon èn den sani di son wan fu den tiriman fu den tiri dati du. Wan fu den tiriman wi ben sa kan kari wan fetiman di ben bow wan gran kownukondre. Leki a prins di ben o tron kownu, en nanga a legre fu en ben naki den legre fu Farao Neko fu Egipti trowe krinkrin na Karkemis. Ma wan boskopu ben dwengi a prins fu Babilon di ben e wini strei, fu gowe libi den legre-edeman fu en meki den wini a lasti pisi fu a feti nanga den Egipti legre. Di a yonkuman disi di nen Nebukadnesar yere taki en papa Nabopolasar dede, dan a ben teki a tiri abra na ini 624 b.G.T. Na ini a ten di a ben e tiri, san ben teki 43 yari, a ben bow wan gran kownukondre di ben e tiri kontren di fosi ben de fu Asiria èn a ben bradi en tiri di ben de na Siria nanga Palestina go te na a lanki fu Egipti.
14 Nebukadnesar ben de wan fayafaya anbegiman fu spesrutu Marduk, a gran gado fu Babilon. A kownu ben gi Marduk a grani fu a wini di a ben wini ala den feti fu en. Na Babilon, Nebukadnesar ben bow den tempel fu Marduk èn fu wan lo tra gado fu Babilon èn a ben meki den tempel disi kon moi. Kande a gowtu popki di a kownu disi fu Babilon ben poti na ini a lagipresi fu Dura, ben de fu Marduk ede (Danièl 3:1, 2). Èn a sori leki Nebukadnesar ben frutrow kefalek na tapu lukuman-wroko te a ben sreka a fasi fa a legre fu en ben o feti.
15, 16. San Nebukadnesar ben du gi Babilon, èn san ben pasa di a ben dyaf fu a bigi di a ben bigi?
15 Fu di Nebukadnesar ben kaba den bun deki dobru skotu di en papa ben bigin bow, dan a ben meki a mamafoto tron wan foto di a gersi leki no wan sma no ben man teki en abra. Sma e fruteri taki fu di Nebukadnesar ben wani prisiri en koningin fu Midian, di ben angri fu den pikin bergi nanga den busi fu a kondre pe a ben komopo, meki Nebukadnesar ben bow den dyari di ben e anga kon na gron — wan fu den seibi wondru fu grontapu fu owruten. A ben meki Babilon kon tron a moro bigi foto fu a ten dati, di ben abi wan ston skotu. ¡Èn fa a rutu dati fu falsi anbegi ben meki Nebukadnesar firi bun!
16 „A no disi na a bigi Babilon, di misrefi bow?”, Nebukadnesar ben dyaf wan dei. Ma soleki fa Danièl 4:30-36 e taki, dan „a wortu ben de ete na ini a mofo fu kownu” di a ben kon law. Seibi yari langa a no ben man tiri moro èn a ben nyan sani soleki grasi nanga takru wiwiri, neleki san Danièl ben taki na fesi. Baka dati a ben kisi a kownukondre fu en baka. ¿Yu sabi san ala den sani disi fu a profeititori wani taki? ¿Yu kan fruklari fa a bigi kontru fu a profeititori disi e tyari wi kon te na ini a ten fu a kaba?
Tyari den Fini Pisi fu a Profeititori Kon na Wan
17. San yu ben sa fruteri fu a profeititori di Gado ben seni go gi Nebukadnesar na ini wan dren na ini a di fu tu yari di a ben tiri leki tiriman fu heri grontapu?
17 Kon meki wi tyari wan tu pisi fu a profeititori na ini a buku Danièl kon na wan now. Na ini a di fu tu yari fu a tiri di Nebukadnesar ben tiri leki a tiriman fu heri grontapu soleki fa Bijbel profeititori e taki en (606/605 b.G.T.), dan Gado ben seni wan dren go gi en di ben frede en. Soleki fa Danièl kapitel 2 e taki, dan a dren abi fu du nanga wan bun bigi popki di abi wan ede fu gowtu, wan borsu nanga anu fu solfru, wan bere nanga bowtu fu kopro, futu fu isri, nanga gronfutu fu isri di ben moksi nanga tokotoko. San den difrenti pisi fu a popki ben prenki?
18. San a gowtu ede, a borsu nanga den anu fu solfru, nanga a bere nanga den bowtu fu kopro fu a popki na ini a dren ben prenki?
18 A profeiti fu Gado ben taigi Nebukadnesar: „Yu, o kownu . . . yusrefi de na ede fu gowtu” (Danièl 2:37, 38). Nebukadnesar ben de na edeman fu wan lin fu kownu di ben tiri a Gran Kownukondre Babilon. Media nanga Persia, di a solfru borsu nanga den anu fu a popki ben prenki, ben teki en abra. Baka dati a Gran Kownukondre Grikikondre ben kon, di a bere nanga den bowtu fu kopro ben prenki. Fa a grontapumakti dati ben bigin?
19, 20. Suma ben de Aleksander a Bigiwan, èn san a ben abi fu du nanga a tron di Grikikondre ben tron wan grontapumakti?
19 Na ini a di fu fo yarihondro b.G.T. wan yonkuman ben abi furu fu du nanga a kontru fu a profeititori fu Danièl. A ben gebore na ini 356 b.G.T. èn grontapu kon kari en Aleksander a Bigiwan. Di sma kiri Aleksander papa Filip na ini 336 b.G.T., dan Aleksander ben kisi makti leki kownu na ini Masedonia.
20 Na ini a bigin fu mei 334 b.G.T., Aleksander ben bigin nanga wan feti fu wini a wan kondre baka a trawan. A ben abi wan legre fu 30.000 srudati di ben waka nanga futu nanga 5000 srudati di ben rèi asi. A ben de wan legre di ben pikin ma di ben man feti bun. Na Granikusliba na a noordwest sei fu Pikin Asia (now Torkukondre), Aleksander ben wini en fosi feti di a ben feti nanga den Persiasma na ini 334 b.G.T. Na ini 326 b.G.T. a fetiman disi di ben tan feti nomonomo, ben wini den èn a ben doro te na owstusei fu Indusliba, di de na ini disiten Pakistan. Ma Aleksander ben lasi en lasti strei di a ben de na Babilon. Na 13 yuni 323 b.G.T., a ben gi ensrefi abra na dede, a moro ogri feanti di de, baka di a ben libi soso 32 yari nanga 8 mun nomo (1 Korentesma 15:55). Ma na fu den feti fu en di a ben wini ede, meki Grikikondre ben tron wan grontapumakti, soleki fa a profeititori fu Danièl ben taki na fesi.
21. Sortu tra grontapumakti, boiti a Gran Kownukondre Rome, den isri futu fu a popki na ini a dren ben prenki?
21 San den isri futu fu a bun bigi popki e prenki? We, a ben de Rome di ben gersi isri, di ben wini a Gran Kownukondre Grikikondre èn ben panya en krinkrin. Den Romesma, di no ben abi lespeki gi a Kownukondre fu Gado di Yesus Krestes ben meki bekènti, ben kiri Yesus na wan pina-udu na ini 33 G.T. Fu di Rome ben wani puru a tru Krestendom na pasi, meki a ben frufolgu den disipel fu Yesus. Ma den isri futu fu a popki na ini a dren fu Nebukadnesar no ben prenki a Gran Kownukondre Rome nomo, ma a ben prenki so srefi a politiek bakapisi fu dati — a Grontapumakti Anglo Amerika.
22. Fa a popki na ini a dren e yepi wi fu si taki wi doro moi fara kaba na ini a ten fu a kaba?
22 Te wi e ondrosuku sani finifini, dan dati e sori taki wi doro moi fara kaba na ini a ten fu a kaba, bika wi doro den gronfutu fu a popki na ini a dren, di meki fu isri moksi nanga tokotoko. Wan tu tiri fu now de leki isri noso den e tiri sma na wan ogri-ati fasi, ala di trawan gersi tokotoko. Awansi tokotoko di „den bakapikin fu a libisma famiri” meki fu en no tranga someni, toku den tiri di gersi isri ben de fruplekti fu gi a gewoon pipel a reti fu taki san den wani meki den tirimakti di ben e tiri den (Danièl 2:43; Yob 10:9). A no de fu taki, dati tirimakti di e tiri na wan ogri-ati fasi èn a gewoon pipel no man tan na makandra, neleki fa isri nanga tokotoko no man tan na makandra. Ma a no sa de langa moro bifo Gado Kownukondre o tyari wan kaba kon na a grontapu disi di prati fu politiek ede.—Danièl 2:44.
23. San yu ben sa fruteri fu a dren nanga den fisyun di Danièl ben kisi na ini a fosi yari fu a tiri fu Belsasar?
23 A di fu seibi kapitel fu a span profeititori fu Danièl e tyari wi kon na ini a ten fu a kaba tu. A e fruteri fu wan sani di pasa na ini a fosi yari fu Kownu Belsasar fu Babilon. Danièl, di na a ten dati pasa 70 yari kaba, e kisi „wan dren èn den fisyun fu en ede, na tapu en bedi”. Fa den fisyun disi e frede en! „¡Luku!” a e taki. „Den fo winti fu hemel ben meki a bigi se de leki wan krasi se. Èn fo bigi meti ben opo kon fu a se, ibriwan fu den ben difrenti fu den trawan” (Danièl 7:1-8, 15). Fa den meti dati na tumusi aparti meti! A fosiwan na wan lew di abi frei, èn a di fu tu wan de leki wan beer. ¡Baka dati yu e kisi wan penitigri di abi fo frei nanga fo ede! A di fu fo meti di tranga kefalek abi bigi isri tifi nanga tin tutu. Na mindri den tin tutu fu en „wan pikin” tutu e opo kon di abi „ai leki den ai fu wan libisma” èn ’wan mofo di e taki bigi sani’. Fa den disi na tumusi aparti kriaturu fu si!
24. San Danièl e si na ini hemel soleki fa Danièl 7:9-14 e taki en, èn na sortu sani a fisyun disi e sori go?
24 Baka dati a fisyun fu Danièl e taki fu sani di e pasa na hemel (Danièl 7:9-14). A e si fa „a Graniwan”, Yehovah Gado, e sidon na wan glori fasi na tapu wan kownusturu leki Krutuman. ’Dusun tron dusun de di e dini en, èn tindusun tron tindusun e tanapu leti na en fesi.’ Gado, di no e gi den meti wan bun krutu, e puru a tiri na den anu èn a e kiri a di fu fo meti. Têgo tiri abra „den pipel, nationaal grupu nanga tongo” e gi na „wan [sma] di ben gersi wan manpikin fu libisma”. Disi e sori go na a ten fu a kaba èn na a ten di Yesus Krestes, a Manpikin fu libisma ben o bigin tiri leki kownu na ini a yari 1914.
25, 26. Sortu aksi kan kon te wi e leisi a buku Danièl, èn sortu buku kan yepi wi fu feni wan piki gi den aksi disi?
25 A de seiker taki sma di e leisi a buku Danièl abi aksi. Fu eksempre, san den fo meti fu Danièl kapitel 7 e prenki? Sortu fruklari de gi a profeititori fu den „seibitenti wiki” fu Danièl 9:24-27? Fa a de nanga Danièl kapitel 11 nanga a profeititori di e taki fu a feti na mindri „a kownu fu noordsei” nanga „a kownu fu zuidsei”? San wi kan fruwakti fu den kownu disi na ini a ten fu a kaba?
26 Yehovah gi den salfu futuboi fu en na grontapu „den santawan fu a Moro Heiwan”, soleki fa Danièl 7:18 e kari den, inzicht na ini den tori disi. Boiti dati, „a getrow èn koni srafu” gi wi sani di kan yepi wi fu kisi moro inzicht na ini den sani di Gado meki a profeiti Danièl skrifi den (Mateus 24:45). A de fu kisi now na ini a buku ¡Poti Prakseri na a Profeititori fu Danièl! di tyari kon na doro wan syatu pisi ten pasa. A buku disi fu 320 bladzijde di abi moi prenki, e taki fu ibri pisi fu a buku Danièl. A e taki fu ibri profeititori di e tranga a bribi èn e fruteri wan tu tori di a lobi profeiti Danièl skrifi.
A Trutru Wani Taki wan Sani gi a Ten fu Wi
27, 28. (a) San tru fu a kontru fu den profeititori na ini a buku Danièl? (b) Na ini sortu ten wi e libi, èn san wi musu du?
27 Luku a prenspari penti disi: Ala profeititori na ini a buku Danièl kon tru boiti wan tu pikin sani. Fu eksempre, now wi e si a situwâsi na grontapu di den gronfutu fu a popki na ini a dren na ini Danièl kapitel 2 e prenki. Di a Mesias Kownu Yesus Krestes ben tron kownu na ini 1914, dan a ben puru a banti di ben de lontu a tompu fu a bon fu Danièl kapitel 4. Iya, soleki fa Danièl kapitel 7 ben taki na fesi, dan na a ten dati a Graniwan ben gi a Manpikin fu libisma tirimakti.—Danièl 7:13, 14; Mateus 16:27–17:9.
28 Den 2300 dei fu Danièl kapitel 8, so srefi den 1290 nanga den 1335 dei fu kapitel 12 pasa kaba — den de na wi baka te yu e luku a fasi fa a ten e waka. Te wi e studeri Danièl kapitel 11, dan dati e sori taki a feti na mindri „a kownu fu noordsei” nanga „a kownu fu zuidsei” doro a lasti pisi fu en. Ala den sani disi na moro buweisi fu Bijbel di e sori taki wi doro moi fara kaba na ini a ten fu a kaba. San wi musu wani du trutru, te wi e luku sortu spesrutu presi wi abi na ini a fasi fa a ten e waka? A no abi misi taki wi musu poti prakseri na a profeiti wortu fu Yehovah Gado.
San Yu Ben Sa Piki?
• San Gado wani meki ala libisma sabi fu a ten fu wi?
• Fa a buku Danièl kan tranga a bribi fu wi?
• San ben de den pisi fu a popki na ini a dren fu Nebukadnesar, èn san den ben prenki?
• Sortu sani na ini a kontru fu den profeititori di de fu feni na ini a buku Danièl, e hari a prakseri fu sma?
[Aksi fu a tori disi]