A Di Fu 108 Klas fu Gilead Kisi a Deki-ati fu Du Santa Diniwroko

FURUTRON te Bijbel e taki fu na anbegi di wi e anbegi Gado, dan a e gebroiki den wortu „santa diniwroko”. Den wortu dati e kon fu wan Griki wortu di e sori go na a du di wi e du diniwroko gi Gado (Romesma 9:4). Den 5562 sma di ben arki a programa fu a di fu 108 klas fu a Waktitoren Bijbelskoro Gilead, ben yere fa den takiman ben gi bun rai. A rai disi ben sa yepi den wan di klari a skoro nanga bun bakapisi, fu du santa diniwroko di Yehovah Gado e feni bun. *

Theodore Jaracz, wan memre fu a Tiri Skin fu Yehovah Kotoigi, ben de a fesiman. Den ben bigin a programa nanga singi nomru 52, „De naam van onze Vader” (A Nen fu Wi Tata). A di fu tu pisi fu a singi dati e meki bekènti: „Altijd zoeken wij naar wegen om te heiligen uw naam” (Ala ten w’e suku fasi fu gi grani na yu nen). Dati trutru ben sori na angri di ben kon fu na ati fu den studenti fu a klas di ben klari a skoro nanga bun bakapisi (èn di ben de fu 10 kondre), fu gebroiki den sani di den ben leri na ini a zendeling toewijzing fu den. Den ben kisi toewijzing fu go na 17 difrenti kondre.

Na ini den biginwortu fu en, Brada Jaracz ben aksi sma fu poti prakseri na a fayafaya bijbelstudie di den studenti ben du feifi mun langa. A studie disi ben sreka den fu du diniwroko na ini tra kondre. Disi yepi den fu ’overtoigi densrefi fu ala sani’, san wani taki dati den ben ondrosuku finifini san den ben leri kaba fu a Wortu fu Gado èn fu „hori fasti na a sani di bun srefisrefi” (1 Tesalonikasma 5:21). A ben gi den deki-ati fu tan getrow na Yehovah, na a Wortu fu en, èn na den toewijzing di den ben kisi leri gi dati. San sa yepi den ala di den e du ala den sani disi?

Bun Rai fu Du Santa Diniwroko

Lon Schilling, wan memre fu a Bethel Wroko Komte, ben taki fu a tori: „Trawan Di Abi Demakandra Nanga Yu, E Si Yu Leki wan Reidelek Sma?” A ben tyari kon na krin o prenspari a de fu de reidelek. Te wi de reidelek, dan wi e sori taki wi abi a koni fu Gado (Yakobus 3:17). Fu de reidelek wani taki dati wan sma musu wani boigi ensrefi, a no musu teki sma partèi, a musu de bescheiden, a musu hori tra sma na prakseri, èn a musu frudrage sani. „Den sma di de reidelek sabi fa fu dwengi den firi fu den te den e handri nanga trawan. Den no e go du sani pasa marki”, na so Brada Schilling ben taki. San kan yepi wan zendeling fu de reidelek? A musu de bescheiden èn a musu meki bun gebroiki fu den okasi di a abi fu arki èn fu leri fu trawan. A musu wani fu poti prakseri tu na a fasi fa trawan e si sani, ala di a e tan hori  ensrefi na den gronprakseri fu Gado.—1 Korentesma 9:19-23.

„No Frigiti fu Nyan!” Disi ben de a nen fu a tra taki di ben hari a prakseri fu sma. Samuel Herd, wan tra memre fu a Tiri Skin, ben hori a taki disi. A ben tyari kon na krin o prenspari a de fu abi a gwenti fu nyan bun na yeye fasi, so taki wi kan tan gosontu fu du santa diniwroko. „A diniwroko fu yu na yeye fasi”, na so Brada Herd ben taki, „heri esi sa kon moro furu, te yu e bigin du a wroko di yu kisi fu du fu preiki èn fu gi leri. Fu dati ede, a sa de fanowdu taki yu e nyan moro na yeye fasi, so taki yu kan hori wan balansi na ini den difrenti sani di yu man du.” Te wan zendeling e nyan na yeye fasi doronomo, dan a sa yepi en fu no firi brokosaka na yeye fasi èn a sa yepi en fu no abi na angri fu go baka na en kondre. A sa yepi en fu prisiri nanga san a abi èn fu tan na ini a toewijzing di a kisi fu du santa diniwroko.—Filipisma 4:13.

Wan leriman fu Gilead, Lawrence Bowen, ben gi den studenti di ben klari a skoro nanga bun bakapisi, a deki-ati fu „Go Baka na a Bigin”. San a ben wani taki nanga dati? A ben meki ala sma di ben de drape, go na Odo 1:7 di e taki: „A frede gi Yehovah na a bigin fu sabi.” A takiman ben fruklari: „Iniwan leri di e sori taki Yehovah no de, noiti kan de trutru sabi, èn a no kan meki sma kisi  a yoisti sabi fu wan sani.” Brada Bowen ben teki den finifini tori fu a Wortu fu Gado, Bijbel, gersi den pisi fu wan puzzel. Te yu e poti den pisi makandra, dan yu e kisi wan prenki. O moro pisi yu e poti na makandra, o moro bigi èn o moro krin a prenki e tron, èn wan sma e kisi moro nanga moro warderi gi dati. Disi kan yepi ala sma fu du santa diniwroko gi Gado.

Wallace Liverance, di abi a frantwortu fu na administrâsi fu a Gileadskoro, ben hori a lasti taki. A tori di a ben taki fu en, ben de: „Meki a Gi Di Yu E Gi Tangi De wan Ofrandi gi Gado.”A ben poti prakseri na a tori fu Yesus pe a ben meki tin gwasiman kon gosontu baka (Lukas 17:11-19). Wán nomo ben go baka fu prèise Gado èn fu gi Yesus tangi. „A no de fu taki dati den trawan ben breiti srefisrefi taki den ben kon gosontu baka. Den ben firi bun taki now den ben krin. Ma a ben gersi leki a wan enkri sani di den ben wani, ben de taki den priester ben musu taki dati den ben krin”, Brada Liverance ben taki. Te wan sma e leri a waarheid, dan a e kon krin na yeye fasi. Disi, makandra nanga a tangi di a e firi na ati, musu buweigi en fu taki Gado tangi fu en bunfasi. Den studenti fu a di fu 108 klas fu Gilead ben kisi a deki-ati fu denki dipi fu ala den sani di Gado du èn fu a bunfasi fu en. Efu den e du dati, dan den sa man sori nanga den diniwroko èn nanga den ofrandi di den e tyari, taki den e taki Gado tangi.—Psalm 50:14, 23; 116:12, 17.

Ondrofenitori Nanga Takimakandra Di E Sori Fa fu Du En

Mark Noumair, wan tra leriman fu Gilead, ben hori a tra pisi fu a programa. A ben taki fu ondrofenitori di a klas ben abi na ini a preikiwroko na ini a pisi ten di den ben na a skoro. Moro furu fu den studenti ben de wan sani fu 12 yari na ini a furuten diniwroko kaba, bifo den ben kon na Gilead. Ala di den ben de na skoro, den ben bigin furu bijbelstudie nanga sma di kweki na difrenti fasi. Dati ben sori taki den studenti ben sabi fa fu „tron ala sani gi ala sortu sma”.—1 Korentesma 9:22.

Baka den ondrofenitori fu den studenti, dan Charles Molohan nanga William Samuelson ben taki nanga wan tu memre fu a Bethelfamiri nanga wan tu opziener di e reis. Den de sma di ben go na Gilead tu. Wan fu den brada di den ben taki nanga en ben de Robert Pevy, di ben dini na ini den Filipijnen, baka di a ben klari a di fu 51 klas fu a Gileadskoro nanga bun bakapisi. A ben taigi a klas ete wan tron: „Ala leisi te yu abi wan problema, dan ala sma e gi yu rai fa fu lusu a problema. Ala ten wan sma sa de di abi moro koni leki yu, wan sma di sa kon nanga wan moro bun idea. Ma efu yu e luku na ini Bijbel èn e pruberi fu feni a fasi fa Gado e si sani, dan no wan sma kan pasa en. Ala ten dati sa de a yoisti piki.”

Na a kaba fu a moi programa na yeye fasi, John Barr, wan memre fu a Tiri Skin, ben taki fu a tori: „Du Santa Diniwroko Di Yehovah Feni Bun.” A ben taigi den fa den kan sori taki den e du santa diniwroko te den de na ini a preikiwroko. Den ben kan yepi sma di abi wan opregti ati, fu anbegi Gado na wan fasi di en e feni bun. Baka di a ben go na den wortu fu Yesus na ini Mateus 4:10, Brada Barr ben taki: „Efu wi musu dini Yehovah wawan, dan wi musu wai pasi gi ala fasi fu afkodrei, soleki bigi-ai, na angri di wi e angri fu kon gudu, nanga a rikomanderi di wi e rikomanderi wisrefi fu kon na ini wan moro bun posisi. Dati e meki wi firi trutru prisiri te wi e prakseri den zendeling fu wi na ini ala den yari sensi 1940, di ben poti wan bun eksempre ini a tori disi! Èn wi sabi taki unu alamala fu a di fu 108 klas fu Gilead di kaba a skoro nanga bun bakapisi, sa waka baka na eksempre fu den. Yu o du santa diniwroko gi Yehovah, èn en wawan de warti fu kisi dati.”

Dati ben de wan moi heimarki fu wan programa di ben gi sma deki-ati. Baka dati, den ben arki odi di sma na heri grontapu ben seni den fu winsi taki sani ben o waka bun gi den. Den ben kisi den diploma tu, èn den ben leisi wan brifi di a klas ben skrifi. A brifi ben sori taki den ben warderi a leri di den ben kisi. Den studenti di ben kaba a skoro nanga bun bakapisi, ben kisi deki-ati fu sori taki den ben o tan getrow na ini den toewijzing fu den èn na ini den diniwroko gi Yehovah. Ala den sma di ben de drape, so srefi den sma di ben kon fu 25 kondre, ben singi èn begi makandra na a kaba fu a programa.

[Futuwortu]

[Faki na tapu bladzijde 23]

STATISTIEK FU A KLAS

Nomru fu kondre pe den komoto: 10

Nomru fu kondre pe den kisi toewijzing fu go: 17

Nomru fu studenti: 46

Gemiddeld yari di den abi: 34

Gemiddeld yari di den de na ini waarheid: 16

Gemiddeld yari di den de na ini a furuten diniwroko: 12

[Prenki na tapu bladzijde 24]

A Di fu 108 Klas fu a Waktitoren Bijbelskoro Gilead Di Klari a Skoro Nanga Bun Bakapisi

Na tapu a lijst na ondrosei, den rèi nomru fu fesi go na baka, èn den nen skrifi fu kruktu-anusei go na reti-anusei na ini ibri rèi.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James,, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.