Gi Grani na Den Wan Di Kisi Frantwortu na Unu Tapu
Gi Grani na Den Wan Di Kisi Frantwortu na Unu Tapu
„Gi grani na ala sortu sma, abi lobi gi a heri brada libimakandra, frede Gado, gi grani na a kownu.”—1 PETRUS 2:17.
1, 2. Fa sma e si den sma di abi frantwortu na ini a ten disi? Fu san ede?
„DEN pikin abi ala reti. Den no e lespeki papa nanga mama”, wan mama e kragi. „Sori taki yu no e agri nanga tirimakti” na so sma skrifi na tapu wan sticker di den ben fasi na tapu wan wagi. Leki fa yu sabi kaba, dan dati na tu eksempre nomo fu wan situwâsi di de fu si moro nanga moro na ini a ten disi. Taki moro furu sma no abi lespeki gi papa nanga mama, leriman, wrokobasi, nanga hei lantiman, na wan sani di wi e si na ala sei fu grontapu.
2 Kande son sma e opo den skowru nomo. Den e taki: „We, den sma di abi posisi fu frantwortu no e frudini a lespeki fu mi.” Sontron, a muilek kande fu taki dati a fruklari dati no bun. Wi e yere furu nyunsu di abi fu du nanga kruka hei lantiman, gridi wrokobasi, leriman di no sabi du den wroko bun, èn papa nanga mama di e meshandri den pikin fu den. Koloku taki, wan tu Kresten nomo e si den wan di abi frantwortu na ini a gemeente na a srefi fasi dati.—Mateus 24:45-47.
3, 4. Fu san ede Kresten musu sori lespeki gi den sma di abi posisi fu frantwortu?
3 Leki Kresten, wi abi „wan tranga reide” fu lespeki sma di abi frantwortu na grontapu. Na apostel Paulus ben frumane Kresten fu „saka [d]ensrefi na ondro den hei tirimakti, bika no wan tirimakti no de boiti nanga Gado; den tirimakti di de, na Gado poti den na ini den posisi fu den di skotu” (Romesma 13:1, 2, 5; 1 Petrus 2:13-15). Paulus ben sori tu fu san ede a fiti fu gi yesi na den wan di abi frantwortu na ini na osofamiri: „Un wefi, saka unsrefi na un masra ondro, soleki fa a fiti na Masra. Un pikin, un gi yesi na un papa nanga mama na ini ala sani, bika disi e plisi Masra srefisrefi” (Kolosesma 3:18, 20). Owruman na ini a gemeente de warti fu kisi a grani di wi e gi den, fu di ’santa yeye poti den leki opziener, fu wei a gemeente fu Gado’ (Tori fu den Apostel 20:28). Na fu di wi e lespeki Yehovah meki wi e gi grani na libisma di abi frantwortu. Ma a no de fu taki, dati na erken di wi musu erken Yehovah en makti e kon na a fosi presi na ini wi libi ala ten.—Tori fu den Apostel 5:29.
4 Meki wi go luku wan tu eksempre fu sma di no ben sori lespeki gi den wan di de na ini posisi fu frantwortu, so srefi eksempre fu wan tu sma di ben sori a lespeki dati, ala di wi e hori Yehovah en moro hei makti na prakseri .
No Sori Lespeki O Meki Taki Den No E Feni Yu Bun
5. Fa Mikal no ben sori lespeki na ini a kefal fu David? San ben de a bakapisi fu dati?
5 A historia fu Kownu David e meki wi si fa Yehovah e denki fu den sma di no e lespeki tirimakti di Gado e gi libisma. Di David ben musu tyari na ark fu a frubontu go na Yerusalem, dan en wefi Mikal „ben si Kownu David e dyompo èn e dansi na fesi Yehovah; èn a ben bigin wisiwasi en na ini en ati”. Mikal ben musu erken David no wawan leki a famiri edeman, ma so srefi leki a kownu fu a kondre. Ma na wan spotu fasi a ben taki fa a ben denki fu a tori: „Fa a kownu fu Israèl meki ensrefi bigi tide, di a ben puru en tapusei krosi tide na fesi na ai fu den umasrafu fu den futuboi fu en, neleki fa wan fu den don man e puru en tapusei krosi krinkrin!” Leki wan bakapisi fu disi Mikal no ben meki pikin noiti.—2 Samuèl 6:14-23.
6. Fa Yehovah ben denki fu a sori di Korak no ben sori lespeki gi En salfuwan?
6 Wan tumusi takru eksempre fu wan sma di no ben lespeki theokrasia tiri di Gado poti, ben de di fu Korak. Leki wan Kehatsma, a ben abi wan grani srefisrefi fu dini Gado na a tabernakel! Toku, a ben suku fowtu na Moses nanga Aron, di Gado ben salfu leki fesiman fu den Israèlsma. Korak ben span anu makandra nanga tra edeman fu Israèl èn sondro fu syen den ben taigi Moses nanga Aron: „A heri konmakandra, den alamala santa èn Yehovah de na den mindri. We, fu san ede dan unu opo unsrefi na tapu a konmakandra fu Yehovah?” Fa Yehovah ben denki fu a fasi fa Korak nanga den bakaman fu en ben tyari densrefi? Gado ben feni taki den sani di den ben e du, ben sori taki den no ben abi lespeki gi Yehovah srefi. Baka di Korak nanga den 250 edeman ben si fa grontapu ben swari ala den sma di ben de na den sei, dan densrefi ben kisi pori nanga wan faya di ben komoto fu Yehovah.—Numeri 16:1-3, 28-35.
7. Den „tumusi bun apostel” ben abi wan reide fu krutu a posisi fu Paulus leki fesiman?
7 Na ini a Kresten gemeente na ini a fosi yarihondro, sma ben de di ben e wisiwasi theokrasia tiri. Den „tumusi bun apostel” na ini a gemeente fu Korente no ben e sori lespeki gi Paulus. Den ben krutu a fasi fa a ben taki. Den ben e taki: „A denoya fu en na ini skin swaki èn a fasi fa a e taki, na wan wisiwasi sani” (2 Korentesma 10:10; 11:5). Efu Paulus ben de wan kefalek bun takiman efu no, toku a ben fiti taki den ben gi en lespeki leki wan apostel. Ma Paulus en fasi fu taki ben wisiwasi trutru? Den publikitaki fu en di skrifi na ini Bijbel e buweisi taki a ben de wan takiman di e overtoigi sma. Fu dati ede, leki wan bakapisi fu wan syatu takimakandra di Paulus ben abi nanga Herodes Agripa II, di „’sabi ala . . . den kesekese di de na mindri den Dyu, heri bun’, Paulus ben tyari a kownu kon so fara meki a taki: „Na ini wan syatu pisi ten yu ben sa overtoigi mi fu kon tron wan Kresten”! (Tori fu den Apostel 13:15-43; 17:22-34; 26:1-28) Toku den tumusi bun apostel na ini Korente ben krutu en taki a fasi fu taki fu en ben wisiwasi! Fa Yehovah ben denki fu a fasi fa den ben e tyari densrefi? Na ini wan boskopu gi den opziener fu a gemeente fu Efeise, Yesus Krestes ben taki bun fu den wan di ben weigri fu meki den sma, ’di ben e taki dati den ben de apostel, ma den no ben de dati’, hari den gowe.—Openbaring 2:2.
Lespeki Den, Ala Di Den Abi Fowtu
8. Fa David ben sori taki a ben lespeki a posisi leki kownu di Yehovah ben gi Saul?
8 Wi abi furu eksempre na ini Bijbel fu den sma di ben lespeki sma di ben abi frantwortu, srefi te den sma disi no e gebroiki den posisi fu frantwortu di den abi na wan bun fasi. David ben de so wan moi eksempre. Kownu Saul ben kon dyarusu fu den sani di David, a futuboi fu en ben du èn dati meki a ben suku fu kiri en. (1 Samuèl 18:8-12; 19:9-11; 23:26). Ma ala di David ben abi okasi fu kiri Saul, toku a ben taki: „Fu mi sei, fu a fasi fa Yehovah e si sani, mi no man denki taki mi ben sa du a sani disi nanga mi masra, a salfuwan fu Yehovah, fu langa mi anu teige en, fu di en na a salfuwan fu Yehovah!” (1 Samuèl 24:3-6; 26:7-13) David ben sabi taki Saul ben fowtu, ma a ben libi a tori gi Yehovah meki a krutu Saul (1 Samuèl 24:12, 15; 26:22-24). A no ben taki na wan skempi fasi fu Saul noso taki na wan grofu fasi nanga en.
9. (a) Fa David ben firi di Saul no ben handri bun nanga en?(b) Fu san ede wi kan taki dati a lespeki di David ben abi gi Saul ben de opregti?
9 David ben firi sari di Saul no ben e handri bun nanga en? „Ogri-ati man e suku mi sili”, David ben bari kari Yehovah (Psalm 54:3). A ben taigi Yehovah san ben de tapu na ati fu en: „Frulusu mi fu mi feanti, o mi Gado . . . Trangawan opo kon na mi tapu, ma a no fu di mi meki wan opruru noso fu wan sondu fu mi sei, o Yehovah. Ala di mi no du sondu, toku den e lon èn e meki densrefi klari. Wiki te mi e kari èn luku” (Psalm 59:1-4). Oiti yu srefi ben firi na a fasi disi — taki yu ben handri bun nanga wan sma di abi frantwortu na yu tapu, ma toku a ben tan muilek yu? A no ben de so taki David no ben sori lespeki gi Saul. Di Saul dede, dan na presi taki David ben prisiri pasa marki, a ben skrifi wan kragisingi: „Saul nanga Yonatan, den lobiwan èn den bun wan di den ben de na libi . . . Den ben moro gaw leki den aka, den ben moro tranga leki den lew. Un umapikin fu Israèl, krei fu Saul ede” (2 Samuèl 1:23, 24). Disi na wan moi eksempre fu opregti lespeki gi a salfuwan fu Yehovah, ala di na Saul ben du David ogri!
10. Sortu bun eksempre Paulus ben gi ini a tori fu a lespeki di a ben lespeki a tiri skin di Gado gi posisi fu frantwortu? San dati ben abi leki bakapisi?
10 Na ini a pisi ten fu den Kresten, wi abi heri bun eksempre tu fu sma di ben e lespeki den wan di Gado gi posisi fu frantwortu. Teki fu eksempre Paulus. A ben sori lespeki gi den bosroiti fu a tiri skin fu a Kresten gemeente na ini a fosi yarihondro. A lasti leisi di Paulus ben de na Yerusalem, a tiri skin ben gi en a rai fu krin ensrefi akruderi a wet, fu sori trawan taki a no ben denki takru fu a Wet fu Moses. Paulus ben sa kan denki: ’Fosi den brada dati ben gi mi a rai fu libi Yerusalem di mi libi ben de na ini kefar. Now den wani taki mi musu sori na publiki taki mi e lespeki a Wet fu Moses. Mi skrifi wan brifi kaba gi den Galasiasma pe mi ben gi den a rai taki den no musu hori densrefi na a Wet moro. Efu mi e go na a tempel, dan kande trawan no ben sa frustan san mi e du. Den kan denki taki mi e meki skeki nanga den sma fu a grupu di besnij.’ Ma soleki fa a sori dan Paulus no ben rideneri so. Fu di a hori di a ben musu hori ensrefi na Kresten gronprakseri no ben kon na ini kefar, meki a ben lespeki a rai èn ben handri akruderi a rai fu a tiri skin na ini a fosi yarihondro. A bakapisi di ben kon wantewante ben de taki den ben abi fu frulusu Paulus fu wan ogri grupu Dyu sma. Baka dati a ben de tu yari na ini dungru-oso. Te fu kaba, Gado wani ben pasa. Paulus ben gi kotoigi na fesi hei lantiman na ini Cesarea. Baka dati den ben tyari en go na Rome tapu kostu fu lanti fu man gi kotoigi na fesi Caesar srefi.—Tori fu den Apostel 9:26-30; 21:20-26; 23:11; 24:27; Galasiasma 2:12; 4:9, 10.
Yu E Sori Lespeki?
11. Fa wi kan sori lespeki gi tiriman fu a grontapu disi?
11 Yu e sori yoisti lespeki gi den sma di abi posisi fu frantwortu? Kresten kisi a komando fu „gi ala sma san den musu kisi, . . . na a sma di e aksi fu kisi grani, a grani dati”. Fu tru, a saka di wi musu saka wisrefi na ondro den „hei tirimakti” no abi na ini nomo taki wi e pai wi belasting, ma taki wi e gi den tirimakti grani tu nanga a fasi fa wi e tyari wisrefi èn nanga a fasi fa wi e taki nanga den (Romesma 13:1-7). Fa wi e du, te wi e kisi fu du nanga lanti tiriman di no e sori switifasi? Na ini a distrikt Chiapas, na Meksikow, den tiriman na ini wan libimakandra ben teki gron fu 57 osofamiri di de Kotoigi fu Yehovah fu di den Kresten disi no ben teki prati na spesrutu kerki fesa. Na den konmakandra di ben hori fu feni wan lusu gi a problema, den Kotoigi, di ben weri krin krosi di ben fiti na okasi, ben taki ala ten na wan warti fasi èn nanga lespeki. Moro leki wan yari baka dati, a bosroiti ben teki fu a bun fu den Kotoigi. A fasi fa den ben tyari densrefi ben meki sma di ben luku a tori kon lespeki den sote taki den sma disi tu ben wani tron Kotoigi fu Yehovah.
12. Fu san ede a prenspari gi wan uma fu abi „dipi lespeki” gi a masra fu en?
12 Fa yu kan sori lespeki gi den wan di Gado gi frantwortu na ini na osofamiri. Baka di na apostel Petrus ben taki fu Yesus en eksempre fu nyan pina, dan a ben taki: „Na a srefi fasi, un wefi, saka unsrefi na un eigi masra ondro, so taki efu son wan fu den no e gi yesi na a wortu, dan a fasi fa den wefi fu den e tyari densrefi kan wini den sondro wan wortu, fu di den si fa unu ben tyari unsrefi na wan krin fasi makandra nanga dipi lespeki” (1 Petrus 3:1, 2; Efeisesma 5:22-24). Dyaso Petrus ben poti krakti tapu a prenspari di a prenspari gi wan wefi fu saka ensrefi na ondro en masra nanga „dipi lespeki”, ala di wan tu masra no e du furu fu frudini a lespeki disi. A fasi fa wan wefi e tyari ensrefi nanga lespeki, kan wini na ati fu en masra di no de na bribi.
13. Fa wefi kan lespeki den masra fu den?
13 Na ini a kontekst fu den Bijbel tekst disi, Petrus e hari wi prakseri go na a eksempre fu Sara. Sara en trowmasra, Abraham, ben de wan kefalek moi eksempre fu wan sma di abi bribi (Romesma 4:16, 17; Galasiasma 3:6-9; 1 Petrus 3:6). Den wefi di abi masra di no de na bribi musu sori den masra fu den lespeki na a srefi fasi leki den wefi di abi masra di de na bribi, a no so? Ma fa a de efu yu no e agri nanga yu masra na ini son afersi? Yesus ben gi wan tu rai di sma kan gebroiki na ini furu afersi: „Efu wan sma di abi wan posisi fu frantwortu, e dwengi yu fu waka wán mijl nanga en, dan go tu mijl nanga en” (Mateus 5:41). Yu e gi grani na yu masra fu di yu e agri nanga den winsi fu en? Efu a gersi taki a muilek tumusi, dan taki nanga en fa yu e denki fu a tori. No prakseri taki a sabi fa yu e denki. Ma te yu e fruteri en fa yu e denki fu a tori, dan du dati nanga lespeki. Bijbel e frumane wi: „Meki a taki fu unu de switi ala ten, a musu abi sowtu leki spesrei, so taki unu sabi fa unu musu gi ibriwan sma wan piki.”—Kolosesma 4:6.
14. San a wani taki fu sori lespeki gi yu papa nanga mama?
14 Un pikin, fa a de nanga unu? Gado Wortu e gi a komando: „Un pikin, un gi yesi na un papa nanga mama ini wánfasi nanga Masra, bika disi regtfardiki: ’Gi grani na yu papa nanga yu mama’; san na a fosi komando nanga wan pramisi” (Efeisesma 6:1-3). Luku taki a gi di yu e gi yesi na yu papa nanga mama na a srefi leki ’a gi di yu e gi grani na yu papa nanga mama’. A Griki wortu di vertaal nanga „grani”, wani taki „feni en bun” noso „fu sori warderi gi wan sani”. So bun, fu gi yesi wani taki moro leki fu waka baka den tirilin fu papa nanga mama sondro taki yu wani dati fu di yu e feni taki den tirilin dati no de fanowdu. Gado e aksi yu fu lobi yu papa nanga mama srefisrefi èn fu warderi a tiri fu den.—Odo 15:5.
15. Fa pikin kan tan sori lespeki srefi efu den e denki taki a papa nanga mama fu den meki wan fowtu?
15 Ma efu yu papa nanga mama e du wan sani di e meki yu lasi lespeki gi den, dan san yu musu du? Pruberi fu si sani soleki fa den e si den. Na den „meki yu gebore”, a no so? Na den sorgu tu gi yu, a no so? (Odo 23:22) A no fu di den lobi yu meki den e du sani gi yu? (Hebrewsma 12:7-11) Taki na wan lespeki fasi nanga yu papa nanga mama. Fruklari ini wan yeye fu safri-atifasi fa yu e firi. Srefi efu den e piki yu na wan fasi di yu no lobi, dan toku no taki nanga den na wan fasi di no e sori lespeki (Odo 24:29). Memre fa David ben tan sori lespeki gi Saul srefi di a kownu no ben e waka baka a rai fu Gado. Aksi Yehovah fu yepi yu fu sabi fa fu du nanga den firi fu yu. „Taki san de tapu un ati na fesi fu en”, David ben taki. „Gado na wan kibripresi gi wi.”—Psalm 62:8; Kragisingi 3:25-27.
Gi Grani na den Sma Di E Teki Fesi
16. San wi kan leri fu den eksempre fu den falsi leriman nanga den engel?
16 Santa yeye e poti owruman fu a gemeente na wroko, ma toku den de onvolmaakti ete èn e meki fowtu (Psalm 130:3; Preikiman 7:20; Tori fu den Apostel 20:28; Yakobus 3:2). Leki wan bakapisi fu dati, wan tu sma na ini a gemeente kande no e firi switi nanga den owruman. Fa wi musu du te wi e denki taki den owruman no handri wan afersi reti na ini a gemeente? Noso kon meki wi taki na so a gersi. Luku a difrenti na mindri den fosi yarihondro falsi leriman nanga den engel: „Den de asranti, abi tranga-ede èn den [falsi leriman] no e beifi gi den gloriwan, ma den e taki na wan skempi fasi, ala di den engel, di bigi moro den na ini krakti èn na ini makti, toku no e taki no wan skempi wortu fu kragi teige den, èn den no e du disi fu di den abi lespeki gi Yehovah” (2 Petrus 2:10-13). Ala di den falsi leriman ben taki na wan skempi fasi fu „den gloriwan” — owruman di Gado poti na ini posisi fu frantwortu na ini a fosi yarihondro Kresten gemeente — den engel no ben taki na wan skempi fasi fu den falsi leriman di ben pori a wánfasi na mindri den brada. Den engel, di de na ini wan moro hei posisi èn di abi wan moro tranga firi fu retidu leki libisma, ben sabi san ben e pasa na ini a gemeente. Ma toku, „fu di den ben lespeki Yehovah”, meki den ben libi a krutu abra na Gado.—Hebrewsma 2:6, 7; Yudas 9.
17. Fa a bribi fu yu de ini a tori te yu abi fu du nanga problema di yu e denki fu en taki na den owruman fowtu?
17 Srefi efu den no handri wan sani na a fasi fa a musu de, dan a no de so taki wi musu abi bribi na ini Yesus Krestes leki na Edeman, di de na libi, fu a Kresten gemeente? A no de so taki a sabi san e pasa na ini en eigi gemeente na heri grontapu? A no de so dan taki wi musu lespeki a fasi fa en e handri a situwâsi èn erken taki a man basi den afersi? Fu tru, ’suma na wi, taki wi e krutu a sma na wi sei?’ (Yakobus 4:12; 1 Korentesma 11:3; Kolosesma 1:18). Fu san ede yu no e tyari den broko-ede fu yu na fesi Yehovah na ini den begi fu yu?
18, 19. San yu kan du efu yu e denki taki wan owruman meki wan fowtu?
18 Fu di libisma no de volmaakti, meki muilek afersi noso problema kan opo kon. Son leisi srefi wan owruman kan meki fowtu, san e meki taki son sma e bruya. Te wi e handri tumusi esi na ini den sortu kefal dati, dan disi no sa kenki a situwâsi. A kan meki a problema kon moro ogri nomo. Den wan di abi a koni na yeye fasi fu man si sani krin, sa wakti tapu Yehovah fu poti sani reti èn fu gi awansi sortu trangaleri di ben kan de fanowdu na En eigi ten nanga fasi.—2 Timoteus 3:16; Hebrewsma 12:7-11.
19 Fa fu du efu wan afersi e meki yu e firi brokosaka? Na presi fu taki a tori nanga trawan na ini a gemeente, dan fu san ede yu no e go na wan lespeki fasi na den owruman fu kisi yepi? Fruteri den fa sani di pasa ben abi krakti na yu tapu, sondro fu suku fowtu na den. Abi „firi” gi den ala ten, èn meki a lespeki tan te yu e fruteri den fu den afersi fu yu (1 Petrus 3:8). No taki wortu di e hati sma, ma frutrow tapu a lepi di den lepi leki Kresten. Warderi ibri fasi fa den e gi yu deki-ati na wan switi fasi nanga yepi fu den Buku fu Bijbel. Efu a sori taki tra sani musu kenki, dan abi a frutrow taki Yehovah sa tiri den owruman fu du san bun èn san reti.—Galasiasma 6:10; 2 Tesalonikasma 3:13.
20. San wi e go luku na ini a tra artikel?
20 Ma wan tra sani de ete di wi musu go luku ini a tori fu a gi di wi musu gi grani nanga lespeki na den sma di abi frantwortu. A no de so tu taki den sma di den poti na ini wan posisi fu frantwortu musu lespeki den wan di den poti na den ondro fu sorgu gi den? Meki wi go ondrosuku dati na ini a tra artikel.
San Yu Ben Sa Piki?
• Fu san ede wi musu gi grani na den wan di abi wan posisi fu frantwortu?
• Fa Yehovah nanga Yesus e si den wan di no e lespeki den sma di Gado poti na ini posisi fu frantwortu?
• Sortu bun eksempre wi abi fu sma di ben lespeki den wan di poti ini posisi fu frantwortu?
• San wi kan du efu a gersi taki wan sma di abi frantwortu na wi tapu, meki wan fowtu?
[Aksi fu a tori disi]
[Prenki na tapu bladzijde 12]
Sara ben abi dipi lespeki gi a posisi fu frantwortu di Abraham ben abi èn a ben prisiri
[Prenki na tapu bladzijde 13]
Mikal no ben lespeki a posisi fu frantwortu di David ben abi leki famiri edeman nanga kownu
[Prenki na tapu bladzijde 15]
„Fu mi sei, mi no man denki taki . . . mi ben sa langa mi anu teige a salfuwan fu Yehovah!”
[Prenki na tapu bladzijde 16]
Fu san ede yu no e tyari den broko-ede fu yu na fesi Yehovah na ini den begi fu yu?