„Unu Alamala Na Brada”
„Unu Alamala Na Brada”
„No meki sma kari unu Rabi, bika wán na un leriman, ala di unu alamala na brada.”—MATEUS 23:8.
1. Sortu afersi ben sa bun fu wi go luku?
„SUMA wi musu gi moro grani, wan zendeling noso wan Bethel wrokoman?” Disi na san wan Kresten uma na ini wan Owstusei kondre, ben aksi wan zendeling fu Australia sondro fu abi wan takru prakseri nanga na aksi. A ben wani sabi suma a ben musu lespeki moro, wan zendeling fu wan tra kondre noso wan bedinari fu a kondre pe a de, di e dini na a bijkantoro fu a Waktitoren Genootschap? Na aksi dati, di e sori taki a sma abi wan kulturu pe sma abi a gwenti fu si a wan grupu moro hei leki a trawan, ben de wan aksi di a zendeling no ben fruwakti. Ma na aksi suma moro bigi, e komoto fu wan angri fu sabi san na a presi fu wan sma te a abi fu du nanga a posisi di a abi na ini a libimakandra.
2. Fa wi musu si den kompe-anbegiman fu wi?
2 A broko-ede disi a no wan nyun sani kwetikweti. Srefi den disipel fu Yesus ben abi wan haritaki di ben go nanga langa ini a tori fu suma ben de a moro bigiwan (Mateus 20:20-24; Markus 9:33-37; Lukas 22:24-27). Den srefi tu ben komoto fu wan kulturu pe sma ben abi a gwenti fu si a wan grupu moro hei leki a trawan. Dati na a di fu a Dyu bribi na ini a fosi yarihondro. Nanga so wan libimakandra na prakseri, Yesus ben gi den disipel fu en a rai: „No meki sma kari unu Rabi, bika wán na un leriman, ala di unu alamala na brada” (Mateus 23:8). Wan kerki titel soleki „Rabi”, san wani taki „Leriman”, „e meki sma di abi so wan titel kisi heimemre nanga wan firi taki den moro hei moro trawan. A e meki den sma di no abi so wan titel e dyarusu èn kisi wan firi taki den moro mendri moro trawan. A heri fasi fu denki èn fu si sani disi di sma gwenti, de kontrari na ’sempel fasi di de na ini Krestes’”, na so a Bijbel sabiman Albert Barnes ben taki. Fu tru, Kresten no wani kari opziener di de na den mindri „Owruman So-èn-so”, ala di den e gebroiki a wortu „owruman” leki wan titel di e prèise den (Yob 32:21, 22). Na a tra sei, owruman di e handri akruderi a rai fu Yesus e gi grani na tra memre fu a gemeente, neleki fa Yehovah e gi grani na loyaal anbegiman èn fa Yesus Krestes e gi grani na loyaal bakaman.
Na Eksempre fu Yehovah Nanga fu Yesus
3. Fa Yehovah ben gi den yeye mekisani fu en grani?
3 Ala di Yehovah na a „Moro Heiwan”, toku a ben gi grani sensi a bigin na den wan di a ben meki fu di a ben e meki den abi wan prati na den wroko fu en (Psalm 83:18). Di Yehovah ben meki a fosi libisma, dan A ben meki en wan-enkri gebore Manpikin abi wan prati leki wan „basi wrokoman” na a wroko (Odo 8:27-30; Genesis 1:26). Yehovah ben aksi srefi den engel fu hemel fu en fu taki fa fu go doro nanga a pori di A ben o pori a godelowsu Kownu Akab di A ben teki a fasti bosroiti fu du dati.—1 Kownu 22:19-23.
4, 5. Fa Yehovah e gi grani na den libisma di a meki?
4 Yehovah e tiri leki a Moro Hei Soeverein fu na universum (Deuteronomium 3:24). A no de fanowdu gi en fu aksi libisma rai. Toku, a saka ensrefi, fu taki en so, fu poti prakseri na den. A psalm skrifiman ben singi: „Suma de leki Yehovah wi Gado, en di e meki en tanpresi na loktu? A e saka ensrefi fu luku go na hemel nanga grontapu, a e opo a mofinawan puru na doti srefi.”—Psalm 113:5-8.
5 Bifo Yehovah ben pori Sodom nanga Gomora, a ben arki den aksi fu Abraham èn ben satisferi Abraham en firi fu retidu (Genesis 18:23-33). Ala di Yehovah ben sabi kaba fa a sani ben o waka di Abraham ben aksi, toku a ben arki Abraham nanga pasensi. A ben agri nanga a taki-go-taki-kon fu en.
6. San ben de a bakapisi fu a sori di Yehovah ben sori taki a ben gi grani na Habakuk di a profeiti ben poti wan aksi gi en?
6 Yehovah ben arki Habakuk tu, di ben aksi: „O langa, o Yehovah, mi musu bari fu kisi yepi, sondro taki yu e yere?” Yehovah ben si na aksi leki na tyalensi a ben tyalensi a makti fu Gado? Nôno, a ben si den aksi di Habakuk ben poti leki aksi di a ben poti nanga reti. Baka dati, a ben tyari en prakseri kon na krin fu gebroiki den Kaldewsma fu tyari krutustrafu kon. A ben gi a profeiti a dyaranti taki ’a krutustrafu disi di a ben taki fu en na fesi, ben sa kon tru sondro fu misi’ (Habakuk 1:1, 2, 5, 6, 13, 14; 2:2, 3). Fu di Yehovah ben e teki den broko-ede fu Habakuk seryusu èn ben e piki en, meki Yehovah ben gi grani na a profeiti. Leki wan bakapisi fu dati, a profeiti di ben bruya ben kon de nanga prisiri. A ben kon breiti èn ben frutrow dorodoro na ini a Gado fu en frulusu. Disi de fu si na ini a buku fu Habakuk di Gado meki sma skrifi nanga yepi fu en santa yeye. A buku dati e tranga a frutrow di wi abi na ini Yehovah na ini a ten disi.—Habakuk 3:18, 19.
7. Fu san ede a prati di Petrus abi na sani na a Pinksterfesa fu 33 G.T. de so prenspari?
7 Yesus Krestes na wan tra moi eksempre fu a sori di wan sma e sori lespeki gi trawan. Yesus ben fruteri den disipel fu en taki „iniwan sma di e taki na fesi sma taki a no sabi mi, mi sa taki tu na fesi mi Tata . . . taki mi no sabi en” (Mateus 10:32, 33). Ma a neti di den ben tori en dan ala den disipel fu en ben lon gowe libi en. Na apostel Petrus ben taki dri tron dati a no sabi en (Mateus 26:34, 35, 69-75). Yesus ben luku moro fara leki san sma ai ben kan si. A ben poti prakseri na den moro dipi inisei firi fu Petrus, na opregti berow fu en (Lukas 22:61, 62). Soso 51 dei baka dati, Krestes ben gi na apostel di ben abi berow grani, fu di a ben meki en teki presi gi den 120 disipel fu Yesus na a dei fu a Pinksterfesa. A ben gi en a grani fu gebroiki a fosiwan fu „den sroto fu a kownukondre” (Mateus 16:19; Tori fu den Apostel 2:14-40). Petrus ben kisi wan okasi fu ’drai go baka èn tranga den brada fu en’.—Lukas 22:31-33.
Gi Grani na den Memre fu na Osofamiri
8, 9. Fa wan masra kan waka baka na eksempre fu Yehovah nanga Yesus, te a e gi grani na en wefi?
8 Trowmasra nanga papa nanga mama e du bun fu waka baka Yehovah nanga Yesus Krestes ini a fasi fa den e gebroiki a posisi fu frantwortu di Gado gi den. Petrus ben frumane: „Un masra, tan libi so srefi na den akruderi sabi, fu di unu e gi den grani leki na wan moro swaki prapi, na umasma fasi” (1 Petrus 3:7). Prakseri pikinso taki yu e gebroiki wan swaki posren prapi. A de krin taki a moro swaki moro wan udu wan. Yu no ben sa luku moro bun te yu e gebroiki en? Na so wan masra kan handri fu di a e waka baka Yehovah. A e arki fa a wefi fu en e denki te a musu teki bosroiti ini afersi fu na osofamiri. Memre taki Yehovah ben teki ten fu rideneri nanga Abraham. Fu di wan masra no de volmaakti, meki a kan taki a no man si a heri afersi bun. So bun, a no ben sa de wan koni sani fu en sei fu gi en wefi grani fu di a e hori a fasi fa na uma e denki seryusu na prakseri?
9 Na ini den kondre pe a posisi fu frantwortu di mansma abi, rutu steifi èn muilek fu kenki, wan masra musu hori na prakseri taki a wefi fu en abi fu wini wan kefalek bigi problema bifo a kan taki nanga en fu den dipi inisei firi fu en. Waka baka a fasi fa Yesus ben handri nanga den disipel fu en, wan pisi fu en trowmisi grupu na ini a ten di e kon, di a ben de na grontapu. A ben boboi den. A ben hori den swakifasi fu den na prakseri di den abi na skin sei èn na yeye sei. A ben hori dati na prakseri srefi bifo den ben taki san den ben abi fanowdu (Markus 6:31; Yohanes 16:12, 13; Efeisesma 5:28-30). Boiti dati, teki ten fu luku san a wefi fu yu e du gi yu nanga yu osofamiri. Sori a warderi fu yu nanga wortu èn nanga sani di yu e du. Yehovah nanga Yesus ben warderi, ben prèise èn ben blesi den wan di warti fu kisi dati (1 Kownu 3:10-14; Yob 42:12-15; Markus 12:41-44; Yohanes 12:3-8). Baka di a masra fu wan Kresten uma, di e libi na ini wan Owstusei kondre, ben tron wan Kotoigi fu Yehovah, na uma ben taki: „Mi masra gwenti fu waka dri noso fo stap na fesi fu mi. A ben e meki mi tyari ala sani. Now na en e tyari den tas èn a e sori warderi gi den sani di mi e du na oso!” Wan wortu fu opregti warderi e yepi srefisrefi fu meki yu wefi firi taki a warti.—Odo 31:28.
10, 11. San papa nanga mama kan leri fu a moi eksempre fa Yehovah ben e handri nanga a nâsi Israèl di ben meki opruru?
10 Te papa nanga mama e handri nanga den pikin fu den, spesrutu te den pikin abi piri-ai fanowdu, dan den musu waka baka na eksempre fu Gado. „Yehovah ben tan warskow Israèl nanga Yuda” fu libi den takru pasi fu den, ma den „ ben tan tranga den neki fu den” (2 Kownu 17:13-15). Den Israèlsma „ben pruberi [srefi] fu kori En nanga den mofo; èn den ben pruberi fu fruteri En lei nanga den tongo”. Furu papa nanga mama kan feni taki na so den pikin fu den e handri. Den Israèlsma „ben tesi Gado”. Den ben hati den firi fu en. Toku, Yehovah „ben abi sari-ati; a ben tapu a fowtu ibri tron baka èn a no ben tyari pori kon”.—Psalm 78:36-41.
11 Yehovah ben taki seryusu èn nanga firi srefi nanga den Israèlsma: „Un kon now, èn meki wi poti afersi kon reti na wi mindri. . . Awansi den sondu fu unu ben sa de leki redi kloru, toku den sa meki kon weti neleki snew” (Yesaya 1:18.). Ala di a no Yehovah ben fowtu, toku a ben gi a nâsi di ben meki opruru wan kari fu kon èn poti afersi kon reti. Dati na wan moi fasi fu denki di papa nanga mama kan waka na baka, te den e handri nanga den pikin fu den! Te a situwâsi e aksi dati, gi den grani fu di yu e arki den sei fu a tori. Rideneri tu nanga den fu san ede den musu kenki.
12. (a) Fu san ede wi no musu gi moro grani na den pikin fu wi moro leki na Yehovah? (b) San a e aksi fu wi efu wi musu lespeki a wartifasi fu den pikin fu wi te wi e piri-ai gi den?
12 A no de fu taki, dati sontron pikin abi krakti rai fanowdu. Papa nanga mama no ben sa wani de leki Eli, di ’ben tan gi grani na den manpikin fu en moro leki na Yehovah’ (1 Samuèl 2:29). Toku, yonguwan musu si taki na lobi e pusu papa nanga mama fu piri-ai gi den. Den musu man frustan taki den papa nanga mama lobi den trutru. Paulus e frumane den papa: „No tanteri den pikin fu unu, ma tan kweki den na ini a trangaleri èn a seryusu frumane fu Yehovah” (Efeisesma 6:4). Ala di papa nanga mama e teki a frantwortu na den tapu, toku a de so taki a de fanowdu dati a papa musu hori a wartifasi fu den pikin na prakseri. A papa e du dati fu di a no e meki den pikin kisi atibron fu a tranga-ati fasi di a e sori pasa marki. Iya, a hori di a papa nanga mama e hori a wartifasi fu den pikin na prakseri e aksi ten nanga muiti fu a sei fu papa nanga mama, ma den froktu di yu e kisi te yu e du so, warti ala den muiti dati.
13. Fa Bijbel e si den owrusma na ini wan osofamiri?
13 A gi di wan sma e gi grani na den memre fu na osofamiri, e go moro fara leki a sori di wan sma e sori en wefi nanga pikin wartifasi. „Te yu kon owru, dan yu musu gi yesi na den pikin fu yu”, wan odo fu Yapan e taki. A sani di wi kan leri fu na odo dati na taki papa nanga mama di kon owru no musu gebroiki a posisi fu frantwortu fu den pasa marki èn musu arki san den bigi pikin fu den e taki. Ala di a de akruderi den Buku fu Bijbel taki papa nanga mama e gi grani na den pikin fu den fu di den e gi den yesi, toku den pikin no musu abi wan fasi fu no e sori lespeki gi moro owru memre fu na osofamiri. „No wisiwasi yu mama soso fu di a kon owru”, Odo 23:22 e taki. Kownu Salomo ben libi akruderi na odo disi. A ben gi grani na en mama di a mama fu en ben kon na en fu aksi wan sani. Salomo ben poti wan kownusturu na a reti-anusei fu a di fu en èn ben arki den sani di en owru mama, Batseiba, ben abi fu taigi en.—1 Kownu 2:19, 20.
14. Fa wi kan gi grani na den owru memre fu a gemeente?
14 Na ini wi famiri na yeye fasi di e kon bigi moro nanga moro, wi de na ini wan bun posisi fu „teki fesi” na ini a gi di wi e gi grani na den moro owru memre fu a gemeente (Romesma 12:10). A kan taki den no man du so furu moro leki san den ben du fosi, èn dati kan trobi den (Preikiman 12:1-7). Wan owru salfu Kotoigi di ben didon na bedi sondro fu man opo, na ini wan presi pe den e sorgu sikisma ben taki wan leisi fu a sani disi di ben trobi en: „Mi wani dede èn go baka na wroko na hemel.” Gi den owrusma dati, a gi di wi e gi den lespeki nanga grani di fiti kan de wan yepi. Den Israèlsma ben kisi a komando: „Yu musu opo tanapu gi weti wiwiri, èn yu musu sori taki yu e hori na owru man na prakseri” (Lefitikus 19:32). Sori taki yu e hori den owru sma na prakseri fu di yu e meki den firi taki den de fanowdu èn taki yu e warderi den. Fu ’opo tanapu’ kan wani taki tu fu ’sidon’ èn e arki den te den e fruteri san den ben du na ini den yari di pasa kaba. Dati sa gi den owrusma wartifasi èn a sa meki wi eigi libi na yeye fasi kon moro bun.
’Teki Fesi Te Unu E Gi Makandra Grani’
15. San owruman kan du fu sori den memre fu a gemeente wartifasi?
15 Sani e waka bun gi den memre fu a gemeente te den owruman e gi den wan bun eksempre (1 Petrus 5:2, 3). Ala di den abi furu sani fu du, toku owruman di e broko den ede nanga trawan e teki fesi fu go na den yonguwan, den famiri edeman, den mama di no abi masra, den osowefi, nanga den owrusma, awansi den sma dati abi fu kakafutu gi problema noso no abi fu du dati. Den owruman e arki san den memre fu a gemeente abi fu taki èn e prèise den fu san den man du. Wan owruman di de na ai fu si sani èn di e taki sani di e sori warderi gi san wan brada noso sisa e du, e waka baka Yehovah, di e warderi den mekisani fu en na grontapu.
16. Fu san ede wi musu si owruman leki sma di e frudini grani makandra nanga trawan na ini a gemeente?
16 Te den owruman e waka baka Yehovah, dan den e gi wan moi eksempre fu di den e du san Paulus e frumane: „Na ini brada lobi, abi safu lobi firi gi makandra. Teki fesi te unu e gi makandra grani” (Romesma 12:10). Disi kan de moro muilek gi owruman di e libi na ini kondre pe sma abi a gwenti fu si a wan grupu moro hei leki a trawan. Fu eksempre, na ini wan Owstusei kondre, yu abi tu wortu gi „brada”, wan wortu di e sori taki yu e gi a sma spesrutu grani èn a tra wortu di yu gwenti gebroiki gi tra sma. Te leki no so langa pasa, dan memre fu gemeente ben gebroiki a wortu, di e sori taki yu e gi a sma spesrutu grani, gi den owruman nanga den sma di moro owru. Ma den ben gebroiki a tra wortu gi tra sma na ini a gemeente. Ma den ben kisi a deki-ati fu gebroiki a tra wortu ala ten te den e taki nanga makandra, soleki fa Yesus ben taigi den bakaman fu en, „unu alamala na brada” (Mateus 23:8). Ala di a difrenti na ini a fasi fa wi e taki no de so krin fu si kande na ini tra kondre, toku wi alamala musu de na ai ini a tori fu a gwenti fu libisma fu si a wan sma hei moro leki a trawan.—Yakobus 2:4.
17. (a) Fu san ede owruman musu de sma di trawan kan go na den? (b) Na sortu fasi owruman kan waka baka Yehovah ini a fasi fa den e handri nanga memre fu a gemeente?
17 A tru, Paulus ben gi wi deki-ati fu handri nanga son owruman leki sma di warti fu kisi „dobru grani”, ma toku den na brada (1 Timoteus 5:17). Efu wi man „go nanga fri fu taki na a kownusturu fu no-frudini bun-ati” fu na Universeel Soeverein, dan a no musu de so taki wi man go na den owruman, di musu waka baka Yehovah? (Hebrewsma 4:16; Efeisesma 5:1) Owruman kan sabi efu den e opo pasi fu sma kon na den, te den e luku o furutron trawan e kon na den fu suku rai noso fu taigi den owruman san den e denki. Leri wan sani fu a fasi fa Yehovah e meki trawan wroko nanga en. A e si trawan leki warti sma fu di a e gi den frantwortu. Srefi efu a sori taki den owruman no man gebroiki wan tu fu den idea di wan tra Kotoigi ben gi den, toku den owruman musu warderi taki a sma wani gi yepi. Memre fa Yehovah ben handri nanga den dipi aksi di Abraham ben poti gi en, so srefi a krei di Habakuk ben krei fu banawtu.
18. Fa owruman kan waka baka Yehovah ini a meki kon bun baka fu den sma di abi yepi fanowdu?
18 Son kompekresten musu meki kon bun baka (Galasiasma 6:1). Toku den warti na ini Yehovah ai. A fiti taki sma e handri nanga den na wan warti fasi. „Te wan sma di e gi mi rai e handri nanga mi na wan lespeki fasi, dan mi kan go na en sondro frede”, wan Kotoigi ben taki. Moro furu sma e gebroiki a rai di den e kisi te sma e handri nanga den na wan warti fasi. A kan teki moro ten fu du disi. Ma te yu e arki den sma di e waka na wan fowtu fasi, dan dati e meki en moro makriki gi den fu teki ibri rai di de fanowdu. Hori na prakseri fa ibritron baka Yehovah ben rideneri nanga den Israèlsma fu di a ben abi sari-ati nanga den (2 Kroniki 36:15; Titus 3:2). Rai di gi nanga firi gi a sma èn na wan switi fasi, sa naki na ati fu den sma di abi yepi fanowdu.—Odo 17:17; Filipisma 2:2, 3; 1 Petrus 3:8.
19. Fa wi musu si sma di no abi a bribi di wi leki Kresten abi?
19 A gi di wi e musu gi trawan grani, abi fu du tu nanga den sma di kan tron wi brada na yeye fasi na ini a ten di e kon. Den sma dati no de esi kande fu teki a boskopu fu wi now, ma toku a de fanowdu taki wi abi pasensi nanga den. Wi musu erken a wartifasi di den abi leki libisma. Yehovah „no wani taki wan sma e kisi pori, ma a wani taki ala sma musu abi berow” (2 Petrus 3:9). Wi no musu abi Yehovah en fasi fu si sani? Te wi e hori libisma na prakseri, dan wi kan opo a pasi fu gi wan kotoigi fu di wi e pruberi fu yepi den sma na wi sei ala ten. A no de fu taki, dati wi musu tan farawe fu a sortu demakandra nanga sma di kan de wan kefar gi wi na yeye fasi (1 Korentesma 15:33). Toku, wie sori „bun-ati fasi”, èn no e wisiwasi sma di no e bribi leki wi.—Tori fu den Apostel 27:3.
20. San na eksempre fu Yehovah nanga Yesus Krestes musu buweigi wi fu du?
20 Iya, fu a sei fu Yehovah nanga Yesus Krestes ibriwan fu wi warti fu kisi lespeki. Meki wi memre ala ten fa den e handri nanga sma èn meki wi teki fesi na a srefi fasi na ini a gi di wi e gi grani na makandra. Èn meki a de so taki ala ten wi e hori den wortu fu wi Masra Yesus na prakseri: „Unu alamala na brada.”—Mateus 23:8.
San Yu Ben Sa Piki?
• Fa yu musu si kompe-anbegiman?
• Fa na eksempre fu Yehovah nanga Yesus e buweigi yu fu gi grani na tra sma?
• Fa trowmasra nanga papa nanga mama kan gi grani na tra sma?
• Te owruman e si kompekresten leki brada fu den, dan fa dati e yepi den owruman fu handri nanga den?
[Aksi fu a tori disi]
[Prenki na tapu bladzijde 18]
Gi grani na a wefi fu yu nanga wortu di e sori warderi
[Prenki na tapu bladzijde 18]
Sori den pikin fu yu wartifasi fu di yu e arki den
[Prenki na tapu bladzijde 18]
Handri na wan warti fasi nanga den memre fu a gemeente