Volmaakti Libi​—A No De wan Dren Nomo!

Wan volmaakti grontapu — san a wani taki gi yu? Prakseri fu wan libimakandra pe ogridu, a gebroiki di sma e gebroiki drug na wan fowtu fasi, angriten, pôtifasi, noso kruktudu, no de. Ala sma abi wan heri bun gosontu na emotioneel sei, ma so srefi na skin sei. No wan sma e firi sari. Ala sma de koloku, fu di srefi dede puru krinkrin. A winsi di wi abi fu libi na tapu so wan grontapu, na wan sani di kan kon trutru?

MORO furu sma e poti prakseri na a fasi fa sabidensi go na fesi. Ala di den e du dati, toku den no e bribi trutru taki wan volmaakti grontapu pe ala sma sa libi ini vrede nanga koloku, sa kon nanga yepi fu a koni fu libisma. Ma na a tra sei wi musu agri taki libisma abi a gwenti fu wani meki sani kon moro bun. A no de fu taki, dati a dren di sma e dren nomo fu sani di no kan kon trutru, no sa yepi den wan di de sondro tanpresi noso den pôtiwan. A no sa satisferi den malengri sma nanga den siki sma tu di wani kisi frulekti fu a pina fu den. Wi no sa kisi wan volmaakti grontapu soso nanga yepi fu sani di libisma meki. Ma ala di nowtu nanga kwinsi de na ini a ten disi, toku yu abi bun reide fu bribi taki, wan grontapu di yu ben sa taki dati a volmaakti, de krosibei trutru.

Te yu e denki fu volmaakti libi, dan kande a libi fu Yesus kan kon na ini yu prakseri. Yesus no ben de a wan-enkri volmaakti libisma di oiti ben libi na grontapu. Adam nanga Efa, di ben meki na a prenki fu Gado, ben abi volmaakti libi na ini wan paradijs. Ma den ben lasi a tumusi bun fasi disi fa sani ben de, fu di den ben opo densrefi teige a hemel Tata fu den (Genesis 3:1-6). Ma a Mekiman poti a firi fu wani libi fu têgo dipi na ini libisma. Preikiman 3:11 e sori taki dati tru: „Ala sani [Gado] meki moi na en ten. Srefi ten di no skotu a poti na ini den ati, so taki libisma noiti no sa kon sabi a wroko finifini di a tru Gado meki fu sensi a bigin te na a kaba.”

Na abi di sma abi fowtu nanga sondu ben meki taki libisma kon kisi wan libi di de wan „soso sani” èn den kon na ini „katibo fu porifasi”. Ma ala di dati de so, luku den wortu fu na apostel Paulus di e gi trowstu: „A tranga fruwakti fu den sani di Gado meki, e wakti a tyari di den manpikin fu Gado o tyari kon na krin. Bika den sani di Gado meki ben musu saka densrefi na ondro soso sani, no fu di  densrefi ben wani, ma fu a sma ede di saka en na dati ondro, tapu a fondamenti fu howpu taki den sani srefi di Gado meki sa kon fri tu fu a katibo fu porifasi èn den sa abi a glori fri fu den pikin fu Gado” (Romesma 8:19-21). Bijbel e sori krin taki sma kan kisi den sani di Gado seti fu meki volmaakti libisma libi, kon bun baka nanga yepi fu Yesus Krestes.—Yohanes 3:16; 17:3.

Boiti taki wi abi a moi howpu disi fu a ten di e kon, wi alamala man go na fesi na yeye fasi. Wi kan sori a go di wi go na fesi srefi nownow kaba.

Pruberi fu De Reidelek

Yesus Krestes ben si a tori fu volmaaktifasi leki so wan prenspari sani, taki a ben taigi wan bigi grupu arkiman: „Fu dati ede unu musu de volmaakti, soleki fa un hemel Tata de volmaakti” (Mateus 5:48). Yesus ben fruwakti trutru fu wi taki wi de sondro fowtu na ini a godelowsu sistema disi? Nôno. A tru taki wi musu pruberi fu kweki fasi soleki a lobi di wi lobi fu gi sani, switifasi nanga lobi gi a sma na wi sei. Ma toku furutron wi e misi fu du san yoisti. Wan fu den apostel fu Yesus ben skrifi srefi: „Efu wi e bekènti den sondu fu wi, dan a de getrow èn regtfardiki, so taki a gi wi pardon fu wi sondu èn e krin wi fu ala onregtfardikifasi. Efu wi e taki: ’Wi no ben du sondu’, dan wi e meki en tron wan leiman, èn en wortu no de na ini wi.”—1 Yohanes 1:9, 10.

Ma toku, wi kan meki a fasi fa wi e si wisrefi èn a fasi fa wi e handri nanga trawan, kon moro bun, sondro taki wi e du sani pasa marki. Gado en Wortu, Bijbel, e taki na wan bun fasi fa wi kan kisi eigifasi di de na ini balansi èn di de reidelek. Suma kan feni wan moro bun fasi? Efu wi e kweki fasi soleki prisiri nanga a dwengi di wi e dwengi wisrefi, dan dati sa yepi wi fu feni en nanga trawan na a wrokopresi. A sa yepi wi tu fu feni en nanga wi trowpatna, èn nanga wi papa nanga wi mama noso nanga wi pikin. Na apostel Paulus ben frumane Kresten: „Abi prisiri na ini Masra ala ten. Ete wan leisi mi sa taki: Abi prisiri! Meki ala sma kon sabi a reidelekfasi fu unu.”—Filipisma 4:4, 5.

Den Winimarki Di Wi Sa Kisi Te Wi De Reidelek

De reidelek na ini den sani di yu e fruwakti fu trawan. No suku sani fini pasa marki, na so wan fasi taki yu e pina yusrefi èn yu e broko yusrefi saka. Te yu e du disi, dan yusrefi èn tra sma sa kisi winimarki. Efu yu sabi sortu sani yu man du trutru, dan a wani taki dati yu musu si sani fa den de trutru èn yu musu de reidelek na ini den sani di yu wani fu du. Hori na prakseri taki Gado ben meki wi fu libi na grontapu èn fu feni satisfaksi na ini bun wroko di e gi wisrefi èn tra sma winimarki.—Genesis 2:7-9.

Efu yu ben aksi tumusi furu fu yusrefi, dan fu san ede yu no e go na Yehovah na ini begi? A kisi di yu e kisi a bun-ati fu Yehovah sa meki taki yu e firi frulekti. Yehovah sabi fa wi meki èn a sabi taki wi no de volmaakti. So bun, fu plisi en no de wan muilek sani, noso wan sani di no de reidelek. A psalm skrifiman e gi wi a dyaranti: „Neleki fa wan papa e sori den manpikin fu en sari-ati, na so Yehovah sori sari-ati na den wan di e frede en. Bika ensrefi sabi heri bun fa wi meki, fu di a e hori na prakseri taki wi na doti” (Psalm 103:13, 14). Wi kan de nanga tangi srefisrefi taki Gado e handri nanga libisma na so wan sari-ati fasi. A sabi san wi man du èn san wi no man du, ma toku na ini en ai wi kan de warti neleki lobi pikin.

 Na presi taki nomonomo wi e suku sani tumusi fini, a ben sa de wan moro koni sani fu kweki a koni fu man si sani krin na yeye fasi èn fu abi wan balansi fasi fu si sani. Boiti dati, wi kan de seiker taki no wan sma kan hori Yehovah fu a no meki a prakseri fu en, fu meki libisma tron volmaakti na ondro a Kownukondre fu Gado, kon tru. Ma san a wani taki fu de wan volmaakti libisma?

Volmaakti Libi Moro Bun Leki a Suku Di Sma E Suku Sani Tumusi Fini

Fu de volmaakti, no wani taki dati wi musu de wan sma di e suku sani tumusi fini. Den wan di o kisi a grani fu libi na ini a Paradijs na grontapu na ondro a Kownukondre fu Gado, seiker no sa de sma di e aksi tumusi furu fu densrefi noso fu trawan. Den no sa de sma tu di e denki fu densrefi taki den de regtfardiki. Wan fu den sani di wan sma musu du efu a wani pasa a bigi banawtu libilibi, na taki a musu abi opregti warderi gi a frulusu-ofrandi, neleki a warderi di a bigi ipi di e kon fu difrenti tongo nanga nâsi ben sori. Yohanes ben taki fu den: „Tangi fu wi Gado, di e sidon na tapu a kownusturu, èn fu a Pikin Skapu, meki wi kisi frulusu” (Openbaring 7:9, 10, 14). Ala den sma di pasa a bigi banawtu di de fu kon, libilibi, sa de nanga tangi srefisrefi taki Krestes dede gi den èn gi ala den wan di e poti bribi na ini en, fu di a ben wani dati. Na srakti-ofrandi di a tyari na wan lobi fasi e poti a fondamenti fu tyari têgo frulekti kon fu den fowtu di den abi èn fu den swakifasi fu den.—Yohanes 3:16; Romesma 8:21, 22.

Fa a sa de fu abi volmaakti libi? Lobi nanga switifasi na mindri libisma sa meki taki a sa de wan prisiri sani fu de na libi. Den sani disi sa kon ini a presi fu a strei di sma e strei nanga makandra, na abi di sma abi a tranga lostu fu kisi posisi, broko-ede, èn a lespeki di sma no e lespeki densrefi. Toku, volmaakti libi no sa soi. A Wortu fu Gado no e gi wi ala den finifini tori fu a Paradijs. Ma a e fruteri wi sortu libi wi kan fruwakti: „Den sa bow oso trutru èn libi na ini, èn den sa prani droifidyari trutru èn nyan fu den froktu fu den. Den no sa bow èn wan tra sma go libi na ini; den no sa prani èn wan tra sma go nyan fu en. Bika den dei fu mi pipel sa de leki den dei fu wan bon; èn den sma di mi frukisi sa gebroiki a wroko fu den eigi anu krinkrin. Den no sa wroko tranga fu soso, èn den no sa meki pikin di e gi problema.”—Yesaya 65:21-23.

Na presi taki yu e prakseri fu sortu prisiri ten, wenkri, teknik, noso wagi fu tyari sma a Kownukondre sa seti, pruberi fu si fa yusrefi e nyan bun fu a kontru fu den wortu disi: „A wolfu nanga a pikin skapu sa nyan nanga makandra leki wán, èn a lew sa nyan drei grasi neleki a mankaw; èn fu a sei fu a sneki, na doti a sa nyan. Den no sa du ogri èn den no sa pori no wan sani na tapu heri mi santa bergi”, na so Yehovah taki” (Yesaya 65:25). Volmaakti libi sa de heri tra fasi leki a libi di wi sabi now! Efu yu sa tron wan fu den sma di kisi a grani fu libi na a ten dati, dan yu sa abi reide fu frutrow taki yu lobi-ati hemel Tata sa poti prakseri na yu nanga yu osofamiri. „Abi switi prisiri na ini Yehovah tu, èn a sa gi yu san na ati fu yu e aksi.”—Psalm 37:4.

Volmaakti libi a no soso wan dren. A prakseri di Yehovah abi gi a libisma famiri seiker sa kon tru. Yu nanga yu osofamiri kan de na mindri den sma di sa tron libisma di sa de volmaakti èn di sa libi fu têgo na ini a nyun grontapu fu Gado. Bijbel e taki na fesi: „Den regtfardiki sma sa abi grontapu leki a gudu fu den, èn den sa libi na tapu fu têgo.”—Psalm 37:29.

[Prenki na tapu bladzijde 6]

Wi kan meki a fasi fa wi e si wisrefi èn tra sma kon moro bun te wi e pruberi fu no suku sani tumusi fini, èn te wi no e luku ala sani finifini

[Prenki na tapu bladzijde 7]

Fu san ede yu no e pruberi fu si fa yusrefi e nyan bun kaba fu den situwâsi fu vrede nanga regtfardikifasi na ini a Paradijs?