Yepi Sma na Robinson Crusoe-èilanti

ROBINSON CRUSOE na wan fu den dri èilanti di de na ini na èilanti grupu di den e kari Juan Fernández. Na èilanti disi e didon so wan 640 kilometer komoto na a syoro fu Chili na ini a Stille Zuidzee. * Robinson Crusoe-èilanti, di bigi so wan 93 fokanti kilometer, ben kisi a nen disi fu wan barinen buku fu a di fu 18 yarihondro èn di nen Robinson Crusoe. Na Ingrisi skrifiman Daniel Defoe ben skrifi a buku disi. Soleki fa a sori, dan a buku disi abi en gron tapu den ondrofenitori fu wan Skotman, Alexander Selkirk, di ben libi so wan fo yari, en wawan, na a èilanti.

Wan fu den sani di ben skrifi tapu wan udu bord na a èilanti e taki: „Na a presi disi wan botoman, Alexander Selkirk fu Skotland ben e go doronomo na syoro fu luku efu wan boto ben kon di ben sa puru en fu na èilanti disi pe a ben de en wawan. A ben du disi ibri dei, fo yari langa.” Te fu kaba wan boto ben kon teki Selkirk èn ben tyari en go baka na en mamakondre. Baka di a ben libi na ini en eigi pikin paradijs, dan a no ben prisiri moro fu tan na ini en mamakondre. Sma taki dati baka ten a ben taki: „O, mi èilanti di mi lobi sote! Mi ben winsi taki noiti mi ben gowe libi yu!”

Baka ten sma ben bigin gebroiki na èilanti leki wan presi gi strafuman. Drape son sma ben e libi di ben du san sma e kari den „ogridu fu a bribi” teige a Katolik Kerki. A situwâsi disi e difrenti kefalek furu fu a fasi fa Selkirk ben sabi a tumusi moi èilanti disi! Ma toku den sma di e libi na a èilanti now e nyan bun fu wan libi sondro furu broko-ede nanga wan korostu libi, wan sani di sma no sabi na furu tra pisi fu grontapu. A korostu fasi fu libi de a marki fu furu libimakandra na den èilanti. Fu di sma e libi na so wan fasi na a èilanti disi, meki a  de makriki fu bigin wan takimakandra nanga pikinmoro iniwan sma.

Na tapu papira Robinson Crusoe-èilanti abi so wan 500 sma. Ma na ini a moro bigi pisi fu a yari, so wan 400 sma nomo e tan na a èilanti. Wán reide fu san ede disi de so, na fu di son mama nanga den pikin fu den e libi na ini a kondre Chili na a pisi ten fu a yari te skoro de. Èn den e drai kon baka na a èilanti fu tan nanga den tra famiriman soso na ini den fakansi mun.

A no ala sma e prisiri nanga den moi kontren di gersi moi dyari na Robinson Crusoe-èilanti. Na presi fu dati, son sma di e tan na a èilanti e firi wan nowtu na yeye fasi èn den e suku piki tapu difrenti aksi. Trawan firi taki sma musu kon yepi den na yeye fasi.

Yepi Sma na Yeye fasi

So wan wroko fu yepi sma na yeye fasi ben bigin na wan sani fu 1979. Wan uma di ben e studeri Bijbel nanga Yehovah Kotoigi na ini Santiago, Chili, ben froisi go libi na a èilanti. Drape a ben bigin fu leri trawan san a ben leri. Wan pisi ten baka dati wan gemeente owruman di ben e go na a èilanti fu grontapu afersi ede, ben fruwondru fu feni wan pikin grupu bijbelstudenti di ben e go na fesi na yeye fasi nanga  yepi fu na uma dati. Dri mun baka dati di na owruman ben go na a èilanti baka, na uma di ben gi Bijbel leri èn di ben e libi farawe fu Kotoigi ben de klariklari fu teki dopu, makandra nanga tu fu den studenti fu en. Dati meki na owruman disi ben teki fesi na a dopu fu den. Baka ten, wan fu den Kresten uma disi di no ben dopu so langa ete ben trow èn makandra nanga en masra a ben go doro fu suku trawan di musu kisi yepi na yeye fasi. A masra fu en ben orga a bow fu wan pikin Kownukondre zaal, di a pikin grupu na a èilanti e tan gebroiki ete. Ma baka wan pisi ten, den ben gowe libi Robinson Crusoe-èilanti fu na ekonomia situwâsi ede. Èn den froisi go na wan gemeente di de na a mindri sei pisi fu Chili, pe den e go doro fu dini Yehovah fayafaya.

Safrisafri a pikin grupu na a èilanti ben e gro moro fara, di den ben puru trawan komoto na falsi kerki. Ma fu di den studenti musu go tan na Chile fu kan go na hei skoro, meki a grupu disi ben kon moro pikin. A grupu ben kon abi tu sisa di teki dopu kaba èn so srefi wan yongu umapikin. Te son mama e drai kon baka na ini a fakansi ten na a èilanti dan a grupu e kon moro bigi. Disi e du fu gi den dri Kresten di e tan drape a heri yari, deki-ati. Den e libi den wawan farawe fu tra kotoigi. Leki wan bakapisi fu a tranga wroko fu den sisa disi, meki sma sabi den Kotoigi fu Yehovah heri bun na Robinson Crusoe-èilanti. A tru taki son sma di e libi na a èilanti dati, e gens a wroko fu den èn den e pruberi fu dwengi trawan fu no teki a Kownukondre boskopu. Ma toku, den siri fu Bijbel waarheid di prani na ini den ati fu den opregtiwan e sproiti moro fara.

Gi Deki-ati na Den Sma Di Ben Kisi Yepi Kaba

Wan leisi wan yari wan opziener di e reis, e go na a èilanti. Fa a de fu go luku wan pikin grupu Kotoigi na wan farawe èilanti? Wan kringopziener e taki fa a ben de a fosi leisi di a ben go na Robinson Crusoe-èilanti:

„A waka disi ben de neleki wan dren di kon tru. A ben bigin seibi yuru mamanten di wi ben gowe libi Valparaiso fu rèi go na a Cerrillos Airport fu Santiago. Wi ben go na ini wan pikin opolani di man teki seibi sma. Baka di wi ben frei 2 yuru nanga 45 miniti, wi ben si farawe wan bergi-ede di ben hei, pasa den wolku. Di wi ben kon moro krosibei, dan wi ben si na èilanti — wan bun bigi stonbergi di de na mindri se. A ben gersi taki a ben e drifi na tapu a watra, leki wan sipi di ben lasi na se.

 Baka di na opolani ben saka, dan wan boto ben teki wi tyari go na a dorpu. Na difrenti presi bigi ston de, di e sutu ede komoto na se. Den ston disi de wan pisi fu den tabiki pe den sedagu fu Juan Fernández e teki bro. Akruderi wet sma no mag kiri den sortu sedagu disi bika a nomru fu den di tan abra no bigi moro kwetikweti. Wantronso, wan sani ben frei pasa sei a boto bifo a ben gowe baka na ini a se. A ben de wan fisi di e frei. Den plata pari fu en e gersi frei. A ben gersi taki a fisi e prisiri fu di a e dyompo komoto na watra fu kisi insekt. Ma a no de fu taki dati son leisi den e kisi a wan di e suku fu kisi wan trawan; a dyompo di a e dyompo komoto na a watra kan hari a prakseri fu tra ontiman di de srekasreka fu swari en te a e dukrun tyubum go na ini a watra.

Te fu kaba, wi ben doro a dorpu fu San Juan Bautista (Santa Yohanes a Dopuman). Furu sma ben tanapu na a lanpresi, son wan fu di den ben e wakti den fisitiman fu den, ma trawan soso fu di den ben wani sabi nomo suma ben sa kan kon a leisi dati. Wi ben fruwondru fu si wan moi presi — a bun bigi bergi nanga furu srapu penti di den e kari El Yunque (Na Ambesi). A gersi neleki wan sortu safu dungru grun krosi de na tapu a bergi. Baka a bergi furu weti wolku de, di de lontu wan krin blaw hemel.

No langa baka dati, wi ben si wan grupu fu wi Kresten sisa nanga den pikin fu den, e wakti wi na a lanpresi. A ben de fakansi ten, èn dati meki a grupu ben bigi moro leki fa a ben gwenti de. Baka di wi ben taki makandra odi na wan switi fasi, den ben tyari wi go na a heri moi kampu. Wan wiki langa a heri moi kampu disi ben de wi oso.

A ben de wan tumusi spesrutu wiki èn wi ben kon frustan taki a ben o pasa esi-esi. Wi ben musu gebroiki a ten fu wi heri bun. A srefi dei dati, wantewante baka a brekten nyanyan, wi ben go luku wan bijbelstudenti di syatu baka dati ben o tron wan fu den sisa fu wi na yeye fasi èn wan memre fu Gado en paradijs na yeye fasi. Na uma disi ben abi bun furu prisiri, ma a ben senwesenwe pikinso tu. A ben de fu doro a marki di a ben suku fu doro someni langa kaba. Wi ben taki makandra nanga en fu wan tu prenspari sani, so taki na uma disi ben kan doro den markitiki fu de wan preikiman fu a bun nyunsu. A dei baka dati, fositron a ben teki prati na a preikiwroko. Na a di fu dri dei, wi ben bigin taki nanga en fu den markitiki di wan sma musu doro fu kan teki dopu. Bifo a wiki ben tapu, a ben teki dopu.

A nomru fu sma di ben go na den konmakandra di ben hori na ini a wiki dati ben moi srefisrefi. Wan heimarki fu 14 sma ben go na den konmakandra. Ibri dei sani ben seti fu du a preikiwroko èn fu tyari gobaka. Sani ben seti tu gi a bijbelstudie wroko, nanga den herder fisiti. Fa disi ben de wan deki-ati gi den sisa di ben du a wroko fu den, den wawan a heri yari langa!”

A de moro muilek gi mansma na a èilanti fu teki a waarheid, kande bika a grontapu wroko fu den e aksi bun furu fu den. A moro prenspari wroko di den e du drape na taki den e suku fu kisi kreifti di e libi na se. Wan sma musu gi furu ten na so wan wroko. Wan fu den prenspari sani tu fu san ede furu sma no wani arki na fu di den e krutu trawan sondro taki den sabi den. Ma toku, den e howpu taki moro man nanga uma di e libi na a èilanti, sa teki a waarheid na ini a ten di e kon.

Te leki now, den yepi tin sma fu na èilanti kaba, fu di den kon leri sabi a waarheid nanga den prakseri fu Yehovah Gado. Baka dati, wan tu fu den gowe libi na èilanti fu difrenti reide ede. Ma efu den e tan noso den no e tan, toku a sori taki a yepi di den kisi na yeye fasi wani taki moro leki a yepi di Alexander Selkirk ben kisi. Now den e nyan bun fu wan paradijs na yeye fasi awansi pe den e libi. Den sisa makandra nanga den pikin fu den di e libi ete na a èilanti, e nyan bun fu den tumusi moi presi lontu den. Ma san moro prenspari na taki den e fruwakti fu libi te a heri grontapu sa de wan trutru paradijs, dorodoro.

A Wroko Fu Yepi Sma E Go Doro

Te yu e luku a presi pe den e tan, dan a pikin grupu disi fu Yehovah Kotoigi na Robinson Crusoe-èilanti e libi farawe fu den tra brada nanga sisa na yeye fasi. Ma toku den no e firi taki den de den wawan soleki fa a Skotman Selkirk ben firi. Fu di den e kisi theokrasia buku doronomo, èn a kringopziener e go luku den ala yari wan leisi, meki den e tan krosibei fu na organisâsi fu Yehovah. Boiti dati, dri leisi wan yari a bijkantoro fu a Waktitoren Genootschap na ini Chili e seni den video banti di e taki fu den konmakandra nanga den kongres. Na a fasi disi den e tan wan prenspari pisi fu ’a heri libimakandra fu brada na grontapu’.—1 Petrus 5:9.

[Futuwortu]

[Karta/​Prenki na tapu bladzijde 9]

(Efu yu wani si pe den sani disi skrifi, luku a tijdschrift)

CHILI

Santiago

ROBINSON CRUSOE-ÈILANTI

San Juan Bautista

El Yunque

STILLE ZUIDZEE

SANTA CLARA-ÈILANTI

[Prenki]

Te wan sma e si na èilanti, dan a e si wan bun bigi stonbergi na mindri se

[Sma di abi a reti fu a karta]

Karta fu Chili: Mountain High Maps® Copyright © 1997 Digital Wisdom, Inc.

[Prenki na tapu bladzijde 8, 9]

A bun bigi bergi nanga furu srapu penti di den e kari El Yunque (Na Ambesi)

[Prenki na tapu bladzijde 9]

A dorpu fu San Juan Bautista (Santa Yohanes a Dopuman)

[Prenki na tapu bladzijde 9]

Tabiki pe den sedagu nanga den zeeleeuw e teki bro

[Prenki na tapu bladzijde 10]

Wi ben frei nanga wan pikin opolani komoto na Santiago, Chili

[Prenki na tapu bladzijde 10]

Den syoro na Robinson Crusoe-èilanti di lai nanga ston

[Prenki na tapu bladzijde 10]

A pikin Kownukondre zaal na a èilanti