Yu E Bribi den Sani Di Yu No Man Si?

TE WAN sma e taki, „mi e bribi soso den sani di mi man si”, dan wi no musu si en leki wan sani di de trutru so. Fu taki en leti, wi alamala e bribi ini sani di wi no man si.

Fu eksempre, kande na skoro yu pruberi fu sori nanga yepi fu wan ondrosuku taki lontu wan magneiti ston wan krakti de, di kan hari sani kon na a magneiti ston. Disi na fa na ondrosuku ben sa kan waka: Trowe pikin pisi isri na tapu wan pisi papira. Dan hori a pisi papira tapusei fu a magneiti ston. Te yu e sekiseki a papira, dan den pikin  pisi isri e hari kon na wán presi, krosibei fu a magneiti ston. A krakti di de lontu a magneiti ston e hari den pikin pisi isri disi kon na wán.Wan sma ben sa denki taki na towfruwroko e meki dati pasa. Efu yu pruberi a sani disi, dan yu ben sa man si a krakti di de lontu a magneiti ston trutru? Nôno, ma a krakti di a abi tapu den pisi isri de krin fu si, èn dati e gi yu a tranga buweisi taki a krakti di a magneiti ston abi, de.

Tra sani de di wi no man si, ma wi e bribi taki den de, sondro taki wi e tweifri na den sani dati. Te wi e luku wan moi skedrei noso te wi e luku wan moi mekisani di wi lobi trutru, dan wi no e tweifri taki wan sma meki a skedrei noso taki wan sma meki a moi mekisani. So bun, te wi e prakseri dipi fu wan sula noso e luku fa a son e dongo, dan disi no musu meki wi prakseri srefi taki na wan Bigi Mekiman fu kefalek moi sani meki den?

Fu San Ede Son Sma No E Bribi

Son sma no e bribi ini Gado moro, yoisti fu den sani ede di sma ben leri den na kerki. Na so a ben de nanga wan man fu a kondre Noorwegen. Sma ben fruteri en taki Gado e bron den godelowsu sma na ini wan faya hel. A man no ben man frustan kwetikweti sortu Gado ben sa gi sma skin-ati na so wan fasi, èn dati meki a ben tron wan atheistsma (wan sma di no e bribi taki wan Gado de).

Ma baka ten, a man ben agri fu ondrosuku Bijbel èn wan Kotoigi fu Yehovah ben yepi en nanga dati. A ben fruwondru di a ben kon sabi taki Bijbel no e leri taki den godelowsuwan e kisi skin-ati na ini wan faya hel. Bijbel e teki dede gersi nanga sribi. Na ini a grebi wi no e firi pen; wi no sabi no wan sani kwetikweti (Preikiman 9:5, 10). A man ben kon sabi tu taki den libisma di Gado e krutu fu a godelowsu fasi fu den, di den no wani kenki srefisrefi, sa tan na ini a grebi fu têgo (Mateus 12:31, 32). Den tra dede sma sa kisi wan opobaka na Gado en reti ten èn den abi a howpu fu kisi têgo libi na ini wan presi di gersi wan Paradijs (Yohanes 5:28, 29; 17:3). A fruklari disi ben moro bun. A ben kruderi nanga san Bijbel e taki dati „Gado na lobi” (1 Yohanes 4:8). Na opregti man disi ben go doro fu studeri a Wortu fu Gado èn baka wan pisi ten a ben kon lobi a Gado fu Bijbel.

Tra sma e taki dati wan lobi-ati Mekiman no de bika so furu broko-ede nanga kruktudu de. Den e denki a srefi fasi leki wan man fu Sweden di ben sori go na hemel wan leisi èn ben aksi: „Fa a kan, taki wan Gado de na hemel di de almakti èn di e gi sani bogobogo ala di wi abi so furu kruktudu nanga godelowsufasi dya na grontapu?” Fu di no wan sma no ben man piki na aksi disi, meki  a ben tron wan atheistsma tu. Baka ten a ben bigin studeri Bijbel nanga Yehovah Kotoigi. Sma e aksi densrefi langa ten kaba fu san ede Gado e gi pasi meki godelowsufasi de. A man ben kon sabi taki a Wortu fu Gado e gi wan yoisti piki tapu na aksi disi. *

Na opregti man disi ben kon sabi taki ala di godelowsufasi de, toku dati no wani taki dati Gado no de. Fu gi wan eksempre fu dati: Wan man kan meki wan nefi fu koti meti. Wan sma kande e bai a nefi, ma a no e gebroiki en fu koti meti ma fu kiri wan sma. Taki a nefi no gebroiki na wan bun fasi, no wani taki kwetikweti taki no wan sma no meki en. Na so a de tu nanga grontapu. Taki sma no gebroiki en na wan fasi di fiti a marki fu san a meki, no wani taki dati a no ben abi wan Mekiman.

Bijbel e leri taki no wan enkri fowtu de na ini a wroko fu Gado. Na en „no wan kruktudu de; a de regtfardiki èn opregti” (Deuteronomium 32:4). Gado e gi libisma bun presenti ma sma no gebroiki wan tu fu den presenti na wan bun fasi èn dati meki so furu pina de (Yakobus 1:17). Ma Gado sa tyari wan kaba kon na a pina. Baka dati, „den safri-atisma srefi sa abi grontapu leki a gudu fu den . . . èn den sa libi na tapu fu têgo”.—Psalm 37:11, 29.

A man fu Sweden di kari na a bigin, ben firi sari di a ben si fa tra libisma e pina so. Fu tru, a broko di a man ben broko en ede nanga tra sma e sori taki Gado de. Fa so?

Gi moro furu sma, a wan enkri sani di tan abra fu meki den bribi ini Gado na fu bribi ini evolutie. Den sma di e bribi ini evolutie e leri taki „den moro trangawan e tan na libi” — taki libisma e feti nanga libisma èn meti e feti nanga meti fu tan na libi. Den moro trangawan e tan na libi; den moro swakiwan e dede. Dati na a fasi fa sani seti, na so sma e taki. Ma efu a seti so, taki den swakiwan e dede so taki den kan meki presi gi den trangawan, dan fa wi kan fruklari taki, neleki a man fu Sweden, son tranga libisma e firi sari te den e si fa kompe libisma e pina so?

Den Kon Sabi Gado

Wi no man si Gado bika a no abi wan skin leki libisma. Toku Gado wani taki wi kon sabi en. Wán fasi fa wi kan kon sabi en bun, na te wi e luku den kefalek moi sani di A meki — den „skedrei” nanga den „moi mekisani” fu en. Na ini Romesma 1:20 Bijbel e taki: „Den eigifasi fu [Gado] di sma no man si nanga ai, de krin fu si sensi di grontapu meki, bika den de fu si na ini den sani di meki, iya, en têgo krakti nanga en makti leki Gado.” Iya, leki fa wan skedrei noso wan moi mekisani kan yepi yu fu kon sabi moro fu a fasi fa a sma de di meki a sani, na so yu kan kon sabi moro fu a fasi fa Gado de te yu e prakseri dipi fu den tumusi moi wroko fu en.

A no de fu taki dati wi no man gi wan piki tapu ala sani fu a libi di e gi broko-ede, soso fu luku den moi sani di Gado meki. Ma wi kan feni piki tapu den sortu aksi disi te wi e ondrosuku a Wortu fu Gado, Bijbel. Den tu man di kari na a bigin, ben kon sabi taki Gado de èn taki a e broko en ede nanga san e pasa nanga wi, bika den ben leisi Bijbel fu di den ben wani kon sabi moro fu Gado.

[Futuwortu]

[Sma di abi a reti fu a prenki na tapu bladzijde 28]

J. Hester nanga P. Scowen (AZ State Univ.), NASA