Abi na Angri fu Meki a Bun Nyunsu Bekènti
Abi na Angri fu Meki a Bun Nyunsu Bekènti
„De fayafaya na ini yeye. Dini Yehovah leki srafu.”—ROMESMA 12:11.
1, 2. Sortu fasi fu denki Kresten musu du muiti fu tan abi leki preikiman fu a bun nyunsu?
WAN yonkuman e prisiri fu di a kisi wan nyun wroko. A fosi dei fu en na wroko, a de nanga span fruwakti fu kisi tirilin fu en wrokobasi. A e winsi fu kisi en fosi wroko èn e teki en seryusu srefisrefi. A abi na angri fu du en wroko bun.
2 Na a srefi fasi, wi leki Kresten ben sa kan si wisrefi leki nyun wrokoman. Fu di wi e howpu fu libi fu têgo, meki wi ben kan taki dati na bigin wi bigin nomo fu wroko gi Yehovah. Fu tru, wi Mekiman abi wan lo wroko gi wi na prakseri di sa meki wi tan abi furu fu du fu têgo. Ma a fosi komando di wi ben kisi ben de fu prati a bun nyunsu fu en Kownukondre (1 Tesalonikasma 2:4). Fa wi e feni a wroko disi di Gado gi wi fu du? Neleki a yonkuman, wi wani du a wroko so bun leki wi man, nanga faya, nanga prisiri — iya, nanga na angri fu du en!
3. San de fanowdu fu kan abi bun bakapisi leki wan dinari fu a bun nyunsu?
3 A tru, taki a kan de wan tyalensi fu tan abi so wan bun fasi fu denki. Boiti a diniwroko fu wi, wi abi furu tra frantwortu. Son wan fu den frantwortu kan aksi furu fu wi na skin sei èn na emotioneel sei. Moro furu, wi man sorgu gi den sani disi ala di wi e gi nofo prakseri na a diniwroko. Toku, a kan de wan feti di e tan go doro (Markus 8:34). Yesus ben poti krakti na tapu taki efu wi wani abi bun bakapisi dan wi ben sa musu du tranga muiti.—Lukas 13:24.
4. Fa den aladei broko-ede kan abi krakti na tapu a fasi fa wi e si sani na yeye fasi?
4 Nanga so furu sani fu du, a de makriki fu abi a firi taki a tumusi gi wi, noso taki a hebi sontron. „Den broko-ede fu a libi” ben sa kan tapu a faya nanga warderi di wi abi gi theokrasia wroko (Lukas 21:34, 35; Markus 4:18, 19). Fu di wi leki libisma no de volmaakti, meki wi ben sa kan libi ’a lobi di wi ben abi fosi’ (Openbaring 2:1-4). Wan tu fasi fu a wroko di wi e du gi Yehovah ben kan tron wan gwenti pikinso. Fa Bijbel e gi a deki-ati di wi abi fanowdu fu tan hori a faya di wi abi gi a diniwroko libilibi?
Leki „wan Faya Di E Bron” na ini Wi Ati
5, 6. Fa na apostel Paulus ben si a grani di a ben abi fu du a preikiwroko?
5 A diniwroko di Yehovah gi wi fu du, warti tumusi srefisrefi fu a kon tron wan aladei sani. Na apostel Paulus ben si a preiki fu a bun nyunsu leki wan kefalek bigi grani. A ben si ensrefi leki wan sma di no ben warti fu kisi a frantwortu dati. A ben taki: „Na mi, a moro lagiwan fu ala den santasma, den ben gi a no-frudini bun-ati disi, so taki mi ben sa meki a bun nyunsu fu Krestes en gudu di e pasa wi frustan bekènti gi den nâsi, èn fu mi ben sa meki sma si fa a santa kibritori sa kon tru di ben kibri na ini Gado, di ben meki ala sani fu sensi ten di pasa di no abi marki.”—Efeisesma 3:8, 9.
6 A bun fasi fa Paulus ben e denki fu en diniwroko na wan kefalek bun eksempre gi wi. Na ini en brifi gi den Romesma, a ben fruklari: „Mi e angri fu meki a bun nyunsu bekènti.” A no ben syen gi a bun nyunsu (Romesma 1:15, 16). A ben abi a yoisti fasi fu denki èn ben angri fu du en diniwroko.
7. Fu san Paulus ben warskow den Romesma na ini en brifi di a ben skrifi den?
7 Na apostel Paulus ben erken taki a de fanowdu fu tan hori wan fayafaya fasi fu si sani, fu dati ede a ben frumane den Kresten na ini Rome: „Unu no musu lesi fu du un wroko. De fayafaya na ini yeye. Dini Yehovah leki srafu” (Romesma 12:11). A wortu na ini Grikitongo gi a wortu „lesi”, wani taki „loboso, leki wan loiri”. Ala di wi no lesi trutru na ini wi diniwroko, toku wi alamala musu de na ai fu si efu wi e si na wisrefi kande taki wi e kon loboso pikinso na yeye fasi. Wi musu tyari kenki kon tu di fiti ini wi fasi fu denki efu wi e si dati na wisrefi.—Odo 22:3.
8. (a) San ben tron leki „wan faya di e bron” na ini na ati fu Yeremia, èn fu san ede? (b) San wi kan leri fu a sani di Yeremia ben ondrofeni?
8 A yeye fu Gado kan yepi wi tu te wi lasi-ati. Fu eksempre, wan leisi a profeiti Yeremia ben lasi-ati. A ben prakseri fu tapu nanga en profeiti wroko. A ben taki srefi fu Yehovah: „Mi no e go taki moro fu en, èn mi no sa taki na ini en nen moro.” Disi ben de wan buweisi taki Yeremia ben mankeri wan sani seryusu na yeye fasi? Nôno. Te yu luku en bun, dan a tranga di Yeremia ben tranga na yeye fasi, en lobi gi Yehovah nanga en faya gi a waarheid ben gi en a krakti fu go doro fu taki profeititori. A e tyari kon na krin: „Na ini mi ati [a wortu fu Yehovah] ben de leki wan faya di ben leti na ini den bonyo fu mi; èn mi ben kon weri fu dwengi misrefi, èn mi no ben man frudrage en” (Yeremia 20:9). A de so taki getrow futuboi fu Gado e lasi-ati ten na ten. Ma te den e begi Yehovah fu a gi den yepi, dan en sa si san de na ini den ati. A sa gi den en santa yeye fri efu den abi en wortu na ini den ati neleki Yeremia.—Lukas 11:9-13; Tori fu den Apostel 15:8.
„No Kiri a Faya fu a Yeye”
9. San ben kan tapu a wroko di a santa yeye e du gi wi?
9 Na apostel Paulus ben frumane den Tesalonikasma: „No kiri a faya fu a yeye” (1 Tesalonikasma 5:19). Iya, efu wi e du sani noso efu wi e denki na wan fasi di no e kruderi nanga den gronprakseri fu Gado, dan dati ben kan tapu a wroko di a santa yeye e du gi wi (Efeisesma 4:30). Na ini a ten disi Kresten kisi a wroko fu preiki a bun nyunsu. Wi e handri nanga a grani disi na wan fasi di e sori dipi lespeki. A no e fruwondru wi taki den sma di no sabi Gado e wisiwasi a preikiwroko fu wi. Ma te wan Kresten fu espresi no e du a diniwroko fu en, dan dati ben sa kan abi leki bakapisi taki a e kiri a faya fu Gado en yeye di e buweigi wi fu handri.
10. (a) Fa a fasi fa den sma na wi sei e si sani ben kan abi krakti na wi tapu? (b) Fu sortu moi fasi fu si a diniwroko fu wi 2 Korentesma 2:17 e taki?
10 Son sma di de na dorosei fu a Kresten gemeente kan si a diniwroko fu wi leki na prati wi e prati buku nomo. Trawan kan abi a fowtu denki taki wi e go oso fu oso soso fu kisi moni di sma e gi fu horibaka gi a wroko fu wi. Efu wi e gi pasi meki den fowtu fasi dati fu si sani abi krakti tapu a fasi fu denki fu wi, dan disi kan meki taki wi no e du a diniwroko so bun moro. Na presi fu meki so wan fasi fu denki abi krakti na wi tapu, meki wi tan si wi diniwroko na a fasi fa Yehovah nanga Yesus e si en. Na apostel Paulus ben taki fu a moi fasi dati fu si sani di a ben fruklari: „Wi a no seriman fu a wortu fu Gado soleki furu sma, ma nanga opregti fasi, iya, leki Gado ben seni wi, ondro na ai fu Gado, leki kompe fu Krestes, wi e taki.”—2 Korentesma 2:17.
11. San ben yepi den fosi Kresten fu tan fayafaya na ondro frufolgu srefi, èn fa na eksempre fu den musu abi krakti na wi tapu?
11 Syatu baka a dede fu Yesus, den disipel fu en na ini Yerusalem ben kisi fu du nanga wan pisi ten fu frufolgu. Den ben tapu skreki gi den èn den ben komanderi den fu tapu nanga a preikiwroko. Ma toku Bijbel e taki dati den ben „furu nanga a santa yeye èn den ben e taki a wortu fu Gado sondro frede” (Tori fu den Apostel 4:17, 21, 31). Den wortu di Paulus ben taigi Timoteus wan tu yari baka dati e sori a bun fasi fu si sani di Kresten musu tan abi. Paulus ben taki: „Gado no ben gi wi wan yeye fu wan fredeman, ma wan yeye fu krakti èn fu lobi èn fu wan gosontu frustan. Fu dati ede, no syen fu a kotoigi fu wi Masra, noso fu mi, wan strafuman fu en ede, ma teki a pisi di yu abi na ini a pina di wi e pina hebi fu a bun nyunsu ede akruderi a krakti fu Gado.”—2 Timoteus 1:7, 8.
San Wi Musu Gi a Sma na Wi Sei?
12. San na a moro prenspari reide fu san ede wi e preiki a bun nyunsu?
12 Fu kan abi wan yoisti fasi fu denki fu wi diniwroko, wi musu abi a yoisti reide fu san ede wi e du en. Fu san ede wi e preiki? A moro prenspari reide fu san ede wi e du dati de fu si na ini den wortu fu a psalm skrifiman: „Den loyaalwan fu yu sa blesi yu [Yehovah]. Fu a glori fu yu kownumakti den sa taki, èn fu yu makti den sa fruteri, fu meki den manpikin fu libisma kon sabi den makti sani di a du nanga a glori fu a moifasi fu en kownumakti” (Psalm 145:10-12). Iya, wi e preiki so taki wi kan prèise Yehovah na publiki èn so taki wi kan santa en nen na fesi a heri libisma famiri. Srefi efu wan tu sma nomo e arki wi, dan toku a meki di wi e meki a boskopu fu frulusu bekènti na wan getrow fasi e tyari prèise kon gi Yehovah.
13. San e pusu wi fu fruteri tra sma fu a howpu fu frulusu?
13 Wi e preiki tu fu di wi lobi sma èn so taki wi no kisi brudu-paiman (Esekièl 33:8; Markus 6:34). Den wortu fu Paulus abi fu du nanga disi te a e taki fu den sma di de dorosei fu a Kresten gemeente: „Na den Grikisma èn na den Barbaar, na den koniwan èn na den wan di no e gebroiki den frustan, mi de na paiman” (Romesma 1:14). Paulus ben firi taki a abi a plekti na sma fu fruteri den a bun nyunsu, fu di a de Gado wani taki „ala sortu sma musu kisi frulusu” (1 Timoteus 2:4). Na ini a ten disi wi e firi a srefi lobi gi a sma na wi sei. Wi abi a srefi plekti tu fu yepi den. A lobi di Yehovah abi gi a libisma famiri ben buweigi en fu seni en manpikin kon na grontapu fu dede gi den (Yohanes 3:16). Dati ben de wan bigi ofrandi. Wi e waka baka a lobi fu Yehovah te wi e teki ten èn e du muiti fu fruteri trawan a bun nyunsu fu frulusu, di wi kan kisi fu di Yesus ben gi en srakti-ofrandi.
14. Fa Bijbel e taki fu a grontapu di de dorosei fu a Kresten gemeente?
14 Kotoigi fu Yehovah e si tra libisma leki sma di kan tron memre fu a Kresten bradafasi. Wi musu preiki sondro frede, ma toku a de di wi de sondro frede no wani taki dati wi de klariklari fu feti nanga sma. A tru taki Bijbel e gebroiki krakti wortu te a e taki fu a grontapu disi. Paulus no e taki bun fu a wortu „grontapu”, te a e taki fu „a koni fu a grontapu disi” nanga „den lostu fu grontapu” (1 Korentesma 3:19; Titus 2:12). Paulus ben memre den Kresten fu Efeise taki te den ben e waka „akruderi a seti fu sani fu a grontapu disi”, dan den „dede” na yeye fasi (Efeisesma 2:1-3). Den fruklari disi nanga trawan leki den disi de akruderi den wortu fu na apostel Yohanes: „A heri grontapu e didon na ini a makti fu a godelowsuwan.”—1 Yohanes 5:19.
15. San wi no e du te wi e handri nanga sma dorosei fu a Kresten gemeente, èn fu san ede wi no e du dati?
15 Ma memre taki den fruklari dati e sori go na a grontapu disi fu libisma di de farawe fu Gado, den no e sori go na ibri sma aparti. Kresten no musu taki na fesi kaba fa wan sma sa handri na tapu a preikiwroko. Den no man taki fu no wan sma taki en na bokoboko. A no de na wi fu taki fa sani sa waka te fu kaba te Yesus e kon fu prati „den skapu” fu „den bokoboko” (Mateus 25:31-46). Na Yesus poti na wroko leki krutuman; a no wi. Boiti dati, ondrofeni sori taki son sma di ben tyari densrefi na wan moro takru fasi, teki a Bijbel boskopu, kenki den libi, èn kon tron Kresten di e libi wan krin libi. Fu dati ede, ala di kande wi no e suku demakandra nanga son sma, toku wi no e draidrai fu taki nanga den fu a kownukondre howpu te na okasi opo fu du dati. Den Buku fu Bijbel e taki fu son sma di, ala di den no ben de na bribi ete, toku „ben abi a yoisti yeye gi a têgo libi”. Te fu kaba, den ben tron bribiman (Tori fu den Apostel 13:48). So bun, wi no kan sabi noiti suma abi a yoisti yeye te leki wi e gi a sma kotoigi — kande furu leisi. Nanga disi na prakseri, meki wi e handri nanga den wan di no teki a boskopu fu frulusu ete nanga „safri-atifasi” èn nanga „dipi lespeki”, ala di wi e howpu taki son wan na den mindri kan du wan sani ete na tapu a boskopu fu libi.—2 Timoteus 2:25; 1 Petrus 3:15.
16. San na wan reide fu san ede wi wani kweki a „koni fu gi sma leri”?
16 Te wi e kweki a koni fu man gi leri, dan dati sa meki wi kisi moro faya fu meki a bun nyunsu bekènti. Fu gi wan eksempre: Wan sma no sa lobi wan span prei noso sport efu a no sabi fa fu plèi en. Ma gi wan sma di e plèi en bun, a de wan prisiri sani. Na so a de tu, Kresten di e kweki a „koni fu gi sma leri” sa abi moro prisiri na ini a diniwroko (2 Timoteus 4:2; Titus 1:9). Paulus ben gi Timoteus a rai: „Du ala san yu man fu sori yusrefi na Gado leki wan sma di a feni bun, leki wan wrokoman di no abi fu syen fu noti, di e gebroiki a wortu fu waarheid na wan reti fasi.” (2 Timoteus 2:15). Fa wi kan kweki a koni fu wi fu man gi leri?
17. Fa wi kan „kweki wan angri” gi sabi fu Bijbel, èn fa so wan sabi sa yepi wi na ini a diniwroko fu wi?
17 Wan fasi fa wi kan kweki a koni fu gi sma leri, na te wi e teki moro furu soifri sabi na ini wi. Na apostel Petrus e gi wi deki-ati: „Leki nyunyun pikin, kweki wan angri gi a soifri merki di de fu a wortu, so taki nanga yepi fu dati unu kan gro kon kisi frulusu” (1 Petrus 2:2). Wan gosontu nyunyun pikin fu ensrefi e angri fu kisi merki. Ma wan Kresten musu „kweki wan angri” kande gi sabi fu Bijbel. Disi a kan du te a e kweki a bun gwenti fu studeri èn a bun gwenti fu leisi (Odo 2:1-6). A e teki muiti nanga a dwengi di wi musu dwengi wisrefi, fu tron leriman di abi a koni fu man gi bun leri fu a Wortu fu Gado, ma den sortu muiti dati e tyari wini kon. A prisiri di wi e kisi te wi e ondrosuku a Wortu fu Gado sa meki wi de fayafaya na ini a yeye fu Gado. Wi sa angri fu prati den sani di wi leri nanga trawan.
18. Fa Kresten konmakandra kan meki wi de srekasreka fu gebroiki a wortu fu waarheid na wan yoisti fasi?
18 Kresten konmakandra prenspari srefisrefi tu gi wi te wi wani gebroiki a wortu fu Gado na wan koni fasi. Te den e leisi tekst na ini Bijbel te publikitaki nanga tra Bijbel takimakandra e hori, dan a bun taki wi e luku tu na ini wi eigi Bijbel san a takiman e leisi. A de wan koni sani fu wi sei fu poti bun prakseri na den difrenti pisi fu a konmakandra, so srefi tu na den wan di abi spesrutu fu du nanga a preikiwroko fu wi. Noiti wi musu si den demonstrâsi leki sani di no wani taki so furu, fu di kande wi e gi pasi meki tra sani e puru wi prakseri. Agen, a dwengi di wi musu dwengi wisrefi nanga a poti di wi e poti prakseri heri bun na den konmakandra, de fanowdu (1 Timoteus 4:16). Kresten konmakandra e bow a bribi fu wi, den e yepi wi fu kweki wan angri gi Gado Wortu èn a e leri wi fu de fayafaya preikiman fu a bun nyunsu.
Wi Kan Frutrow Taki Yehovah Sa Yepi Wi
19. Fu san ede wan fasti gwenti fu teki prati na a preikiwroko de wan prenspari sani?
19 Kresten di de „fayafaya na ini yeye” èn di e angri fu meki a bun nyunsu bekènti, e du muiti fu teki prati na a diniwroko ala ten (Efeisesma 5:15, 16). A tru, den situwâsi di sma de na ini e difrenti, èn a no ala sma kan gebroiki a srefi ten fu du a wroko disi di e kibri libi (Galasiasma 6:4, 5). Ma toku den furu leisi di wi e taki nanga trawan fu a howpu di wi abi, moro prenspari srefi leki omeni ten wi e gebroiki fu du a preikiwroko (2 Timoteus 4:1, 2). O moro wi e preiki, o moro wi sa frustan taki a wroko disi prenspari (Romesma 10:14, 15). Wi sa kisi moro sari-ati nanga firi gi trawan te wi e miti opregti sma doronomo di e soktu èn e geme èn di de sondro howpu.—Esekièl 9:4; Romesma 8:22.
20, 21. (a) Sortu wroko de na wi fesi ete? (b) Fa Yehovah e horibaka gi den muiti di wi e du?
20 Yehovah gi wi a frantwortu fu preiki a bun nyunsu. Disi na a fosi komando di wi e kisi fu en leki „kompe-wrokoman” fu en (1 Korentesma 3:6-9). Wi e angri fu du a frantwortu disi di Gado gi wi nanga wi heri sili, so bun leki wi man (Markus 12:30; Romesma 12:1). Furu sma di abi a yoisti yeye gi a têgo libi de ete na grontapu. Den sma disi e angri fu a waarheid. Furu wroko de fu du, ma wi kan frutrow taki Yehovah sa yepi wi ala di wi e du wi diniwroko dorodoro.—2 Timoteus 4:5.
21 Yehovah e gi wi a yeye fu en èn a e meki wi de srekasreka nanga „a feti-owru fu a yeye”, Gado Wortu. Nanga a yepi fu en wi kan opo wi mofo „fu taki fri èn sondro frede, fu meki a santa kibritori fu a bun nyunsu bekènti” (Efeisesma 6:17-20). Meki sma taki fu wi san na apostel Paulus ben skrifi den Kresten na ini Tesalonika: „A bun nyunsu di wi e preiki no ben kon na unu nanga wortu wawan ma so srefi nanga krakti èn nanga santa yeye èn tranga overtoigi” (1 Tesalonikasma 1:5). Iya, meki wi meki a bun nyunsu bekènti, fayafaya!
Luku Syatu Baka San Wi Leri
• San den broko-ede fu a libi ben sa kan du nanga a faya di wi abi gi a diniwroko?
• Na sortu fasi a wani di wi wani meki a bun nyunsu bekènti musu de leki „wan faya di e bron” na ini wi ati?
• Fu sortu fowtu fasi fu denki fu a diniwroko wi musu tan farawe?
• Fa wi musu si den sma di no e bribi den srefi sani leki wi?
• Fa Yehovah e yepi wi fu tan hori a faya di wi abi gi a preikiwroko?
[Aksi fu a tori disi]
[Prenki na tapu bladzijde 9]
Kresten e sori a srefi faya leki Paulus nanga Yeremia
[Prenki na tapu bladzijde 10]
Lobi gi Yehovah nanga sma na wi sei e buweigi na ati fu wi fu de fayafaya na ini wi diniwroko