Bun Eksempre—Yu E Leri wan Sani fu Den?

„UNU ben kon tron wan eksempre gi ala den bribiman na ini Masedonia èn na ini Akaya.” Na apostel Paulus ben skrifi den wortu disi gi den getrow Kresten di ben e libi na ini Tesalonika. Na eksempre di den ben gi den kompe-bribiman fu den, trutru ben de wan eksempre di warti fu prèise. Ma den Tesalonikasma ben e waka baka na eksempre di Paulus nanga den kompe fu en ben gi. Paulus ben taki: „A bun nyunsu di wi e preiki, no ben kon na unu nanga wortu wawan, ma so srefi nanga krakti èn nanga santa yeye èn tranga overtoigi, fu di unu sabi sortu sma wi ben tron fu unu ede; èn unu tron sma di e waka na wi baka.”—1 Tesalonikasma 1:5-7.

Iya, Paulus no ben preiki nomo fa sma ben musu tyari densrefi. Na en heri fasi fu libi a ben de fu si kaba, fa wan sma ben musu tyari ensrefi — a ben de wan eksempre fu bribi, fu horidoro èn fu wan sma di nyan pina fu doro wan marki. Fu di Paulus ben de so wan bun eksempre, meki en nanga den kompe fu en ben kon abi wan bigi krakti tapu a libi fu den Tesalonikasma, èn dati ben meki taki den ben man teki a waarheid „na ondro furu banawtu”. Ma a no de so srefisrefi, taki soso Paulus nanga en kompe-wrokoman ben abi wan bun krakti tapu den bribiman dati. Na eksempre fu tra sma di ondrofeni furu banawtu ben gi deki-ati tu. Paulus ben skrifi den Tesalonikasma: „Brada, unu kon tron bakaman fu den gemeente fu Gado di de na ini Yudea èn di de na ini wánfasi nanga Krestes Yesus, bika un eigi kondreman ben meki unu kisi a srefi pina tu, di den ben kisi fu den Dyu.”—1 Tesalonikasma 2:14.

Krestes Yesus​—A Moro Prenspari Eksempre fu Waka na Baka

Ala di Paulus ben gi wan eksempre di de heri bun fu waka na baka, toku a no ben frigiti fu sori taki Yesus Krestes na a moro prenspari man di Kresten musu teki leki eksempre (1 Tesalonikasma 1:6). Krestes ben de a moro prenspari Eksempre gi wi fu waka na baka èn a de dati gi wi ete. Na apostel Paulus ben skrifi: „Fu a sani disi ede den ben kari unu, bika srefi Krestes ben pina fu unu ede, èn ben libi gi unu wan eksempre fu waka soifri na ini en futustap.”—1 Petrus 2:21.

Ma a de pikinmoro 2000 yari pasa kaba now, taki Yesus no e libi leki libisma moro. Now a e „libi na ini wan leti pe no wan sma no kan pasa go na ini”, leki wan yeye di no man dede. Na so fasi „no wan sma si noso kan si” en (1 Timoteus 6:16). Fa wi kan waka baka na eksempre di a ben gi dan? Wán fasi fa wi kan du dati, na fu studeri den fo Bijbel tori fu Yesus libi. Den Evangelie e meki wi kon frustan a fasi fa a ben de, a fasi fa a ben libi èn a ’fasi fa a ben denki’ (Filipisma 2:5-8). Wi kan kon sabi moro te wi e studeri a buku bun, di nen A moro bigi man di oiti ben libi. A buku dati e fruteri finifini fu den sani di pasa na ini a libi fu Yesus èn o ten den sani ben pasa trutru. *

Na eksempre di Yesus ben gi fu di a ben gi ensrefi, ben abi wan bigi krakti tapu na apostel Paulus. A ben taigi den Kresten fu Korente: „Mi fu mi sei sa breiti srefisrefi fu pai èn [fu gi misrefi] fu pai dorodoro gi un eigi sili ede” (2 Korentesma 12:15). Disi na trutru wan fasi di fiti Kresten! Te wi e prakseri dipi fu a tumusi moi eksempre fu Krestes, dan dati musu meki wi waka baka na eksempre fu en na ini wi eigi libi.

Fu eksempre, Yesus ben leri wi taki wi musu  frutrow tapu a pramisi fu Gado taki a ben sa sorgu gi materia sani. Ma a no ben du dati nomo. A ben sori a bribi nanga a frutrow disi na ini Yehovah ibri dei. A ben taki: „Den krabudagu abi olo èn den fowru fu hemel abi sribipresi, ma a Manpikin fu libisma no abi no wan presi srefi fu poti en ede” (Mateus 6:25; 8:20). A fasi fa yu e denki èn den sani di yu e du e sori taki yu e broko yu ede moro furu nanga materia sani? Noso, yu e sori nanga a fasi fa yu e libi taki yu e suku a Kownukondre fosi? Èn fa a de nanga a fasi fa yu e si a diniwroko fu Yehovah? A de leki fa Yesus, na Eksempre fu wi, ben si dati? Bijbel e sori taki Yesus no ben preiki nomo taki sma musu de fayafaya, ma a ben sori na furu okasi taki a ben abi furu faya (Yohanes 2:14-17). Boiti dati, Yesus trutru ben gi wan moi eksempre di a ben sori lobi! We, a ben gi en eigi libi leki srakti-ofrandi gi en disipel! (Yohanes 15:13) Yu e waka baka na eksempre fu Yesus fu di yu e sori lobi gi den Kresten brada fu yu? Noso yu e gi pasi taki fowtu di son wan fu den abi, e meki taki yu no lobi den?

A de so taki te wi e pruberi fu du san Krestes ben du, dan furutron wi no sa man du dati heri bun. Ma den muiti di wi e meki fu „weri Masra Yesus Krestes”, e plisi Yehovah seiker.—Romesma 13:14.

„Eksempre gi na Ipi”

Sma de na ini a gemeente na ini a ten disi di wi kan teki leki eksempre? Seiker sma de! Den brada spesrutu di kisi frantwortu musu de wan eksempre. Titus ben dini na ini den gemeente na ini Kreita èn a ben poti owruman na wroko. Paulus ben fruteri en taki ibri owruman di poti na wroko musu de wan „sma di trawan no man sori finga na en tapu” (Titus 1:5, 6). Na wan srefi sortu fasi, na apostel Petrus ben frumane den „owruman” fu kon de „eksempre gi na ipi” (1 Petrus 5:1-3). Èn fa a de nanga den wan di e dini leki dinari ini a diniwroko? Den srefi tu musu de „man di e dini na wan bun fasi”.—1 Timoteus 3:13.

A krin taki wi no musu fruwakti dati ibri owruman noso dinari ini a diniwroko sa de sma di kan du ala sani fu a Kresten diniwroko heri bun. Paulus ben taigi den Kresten na ini Rome: „Wi abi presenti di no de a srefi, akruderi a no-frudini bun-ati di Gado gi wi” (Romesma 12:6). Difrenti brada abi a koni fu du difrenti sani heri bun. Wi no kan fruwakti taki owruman sa du noso sa taki ala sani sondro fu meki fowtu. „Wi alamala e naki futu fadon furutron”, na so Bijbel e taki na ini Yakobus 3:2. „Efu wan sma no e naki futu fadon na ini wortu, dan a sma dati na wan volmaakti sma, di man dwengi [en] heri skin tu.” Ma ala di owruman e meki fowtu, toku den kan de neleki Timoteus, fu di den e ’kon de eksempre gi den getrow sma na ini a fasi fa [den] e taki, na ini a fasi fa [den] e tyari densrefi, na ini lobi, na ini bribi, èn nanga a krin libi di [den] abi’ (1 Timoteus 4:12). Te owruman e du disi, dan den sma na ini na ipi sa de klariklari fu teki a frumane fu Hebrewsma 13:7: „Memre den wan di e teki fesi na un mindri, . . . èn waka baka a bribi [fu den], ala di unu e luku fa a waka nanga libi [fu den] e go.”

Tra Eksempre fu a Ten Disi

Na ini den someni tenti yari di pasa, someni tra sma ben sori taki den de bun eksempre. San wi kan taki fu den dusundusun zendeling di ben gi densrefi, di ben „libi oso noso brada noso sisa noso papa noso mama noso pikin noso gron na baka” fu go na tra kondre fu du a wroko di Kresten kisi fu du? (Mateus 19:29). Luku den opziener di e reis èn luku den wefi fu den tu, den man nanga uma di de friwani-wrokoman na den kantoro fu a Waktitoren Genootschap èn den pionier di e yepi den gemeente. Den sortu eksempre disi kan gi tra sma deki-ati? Wan Kresten preikiman na ini Asia e memre wan zendeling fu a di fu aiti klas fu a Waktitoren Bijbelskoro Gilead. A ben taki dati a getrow brada disi ben de „klariklari fu pasa tesi soleki den furu maskita nanga a faya son na ini alenten. . . . San ben fruwondru mi moro, ben de taki a ben man pristeri sani na ini Sneisi nanga Maleisiatongo ala di a ben de fu Ingrisikondre.” San ben de a bakapisi fu a moi eksempre disi? A brada ben taki:  „A de di a ben de sondro broko-ede èn a frutrow di a ben abi, ben gi mi deki-ati fu tron wan zendeling di mi ben gro kon bigi.” A no de wan wondru taki a brada disi ben tron wan zendeling trutru.

Na Index van Wachttoren-publikaties abi furu ondrofenitori fu sma di skrifi na ini den tijdschrift A Waktitoren nanga Ontwaakt! Den ondrofenitori disi e fruteri fu sma di no suku nen na ini grontapu. Den ondrofenitori e sori fa sma wini swakifasi, fa den ben kenki a heri fasi fa den ben de, fa den ben luku a bun sei fu sani na ini muilek ten. Den e sori tu fa den ben wroko tranga, ben horidoro, ben de loyaal, ben abi sakafasi èn ben abi a yeye fu gi densrefi. Wan uma ben skrifi fu den tori disi: „Te mi e leisi san trawan ondrofeni, dan den e meki mi tron wan Kresten di kon abi moro sakafasi èn di de nanga tangi moro. Den ondrofeni disi yepi mi fu no denki tumusi furu fu misrefi èn fu no denki misrefi wawan.”

Boiti dati, no frigiti den moi eksempre di de na ini yu eigi gemeente: edeman fu osofamiri di e sorgu bun gi na osofamiri fu den na materia sei èn na yeye fasi; sisa — so srefi mama di de sondro trowpatna fu sorgu den pikin — di abi fu du nanga den problema di e kon nanga a sorgu fu pikin, ala di den e tan abi wan prati na ini a diniwroko dorodoro; owru sma nanga siki sma di e go doro na wan getrow fasi ala di den e kon swaki moro nanga moro èn ala di a gosontu fu den e go na baka. Den eksempre disi no e gi yu deki-ati?

A tru, taki grontapu furu nanga takru eksempre (2 Timoteus 3:13). Toku, poti prakseri na a frumane di Paulus ben gi den Kresten di ben e libi na ini Yudea. Baka di a ben fruteri fa furu man nanga uma fu owruten ben de eksempre nanga a fasi fa den ben tyari densrefi, dan na apostel Paulus ben gi den a deki-ati disi: „Fu dati ede dan, fu di wi abi so wan bigi wolku kotoigi lontu wi, meki wi . . . horidoro [so srefi] fu lon a streilon di poti na wi fesi, ala di wi e luku bun na Yesus, a Moro Prenspari Fesiman èn a Sma di e meki a bribi fu wi kon bun dorodoro” (Hebrewsma 12:1, 2). Kresten fu a ten disi abi wan ’bigi wolku’ fu bun eksempre tu — fu owruten èn so srefi fu a ten disi. Yu e leri wan sani fu den trutru? Yu sa man du dati efu yu abi a fasti bosroiti fu de „wan sma di no e waka baka san takru, ma baka san bun”.—3 Yohanes 11.

[Futuwortu]

[Prenspari pisi na tapu bladzijde 20]

A krin taki wi no musu fruwakti dati ibri owruman noso dinari ini a diniwroko sa de sma di kan du ala sani na ini a Kresten diniwroko heri bun

[Prenki na tapu bladzijde 21]

Owruman musu de „eksempre gi na ipi”